JOAN 1
1
Turnam Bina Agome
1Lendak delokai agome dungai, delokke de Agomde Shédíkíng dungai, delokke de Agomde Shédí bí. 2Bí kerayalum pekai Shédíkíng duuto. 3Bíkkelok atí takamem píto, pínam takam si bíkke kékonlok pínam kamang. 4Bíkkíng turname kato delokke de turnamde tani kídíke angunpe ito. 5Angune kaamolo ngunkanto, idakkom kaamue dem kénmato.#1:5: Demangkom ikummato.
6Delo Shédíke melíknam amiko kato; bíkke amíne Joan. 7Ami takame bíkkelok arope míngke suyépe emla bí angun delokke hakiipe aato. 8Bí agísue angunmang, bí angun delokke hakii kootír pemino aatone. 9Mipil taniem angun bina aro angunde tani amoso aatuai.
10Agomde tani amoso yéto, delokke bíkkelok tani amongem pílate tani amonge bím kangkénmato. 11Bí agí amosulo aatuai, idokom agí amie bím torík sumato. 12Depe idokom bím toríksula, bíkke amínlok míngkesuna takamem, bí Shédíke ome-oope ilanana ralnamem bito 13de ome-oode tani odong lokmang, demangkom mime milo míísu lokmang idola Shédí kelok lenna kídíe.
14Agomde tanikope ila ngoluke gooralo duumín gekai. Ngolu bíkke angun ralnamem kaato, Abukelok ayang emlang aruem bomla aana angunlok ralna, Oo atelem kaato.
15Joan bí bím hakii bito. Bí gokla sikepe poto, “ ‘Ngokke méélamlo aamín gena bí ngom pemílo botte yane, kapeila ngokke kerang pekai bí turla yéto’ emla ngokke pokannam amiemin si.”
16Bíkke yanggonge bíísét kolok ngolu takame akon paarongem akone ayang igulem paato. 17Kapeila ayonem Mosikíng bilíkto; yanggong elang arue Jisu Kristo kelok aato. 18Sékote Shédíme kaana kamang, idola Abukelo duuna Oo atel demin bím lengkantone.
Joan Baptiske Ngiitome
(Mt 3:1-12; Mk 1:1-8; Lk 3:1-18)
19Depe iduem Joanke hakiiye sikepe ito: bí sékodí dem íngkídope emla Jirusalem lokke Judai ami kídíe mirie kelang Lebi kídíem melíkto.
20Bí pobeng sugotmang, idakkom peebepe pobisula poto, “Ngo Kristomang.”#1:20: Messiah.
21Bulu bím tatkíto, “Demílo no séko? No Elijah bía?”
Bí “Ngo bímang” emto.
“No kaaluna miridía?”
Bí “Ma” emyansuto.
22Bulu ííyin nape poto, “No sékoda? Ngolum melíkna kídílo pobi dokupe aruem pobisutola. Nokke agí legasuem pobi sutola?”
23Joan bí Kaaluna miri Isaiahke agomlok poyansuto, “Ngomin mootumlo ‘Ruutumke bedangem jonmolangka’ emla agom ponade.”#Isa 40:3
24Depe iduem melíknam Pharisi kídíeke 25bím íngkíto, “No Kristo petemang, Elijah petemang, kaaluna miri petemang, demílo no kapeila baptis idune?”
26Joan bí poyansuto, “Ngo asilok#1:26: Demangkom asilo. baptis idung, idokom noluke pénsamlo noluke kénmanam amiko dung. 27Bí ngokke méélampe aapena amie, bíkke leyuk aan emte ngo taaba mane.”
28Si tabusi Bethani doolung Joanke baptis iboko Jordan korong Sanggo danlo ito.
Shédíke Mérbenue
29Longekon dem Joan bí Jisume bíkkíng aanín dakpe kaala poto, “Tani amosokke paabem laabín bipena Shédíke mérbenuem kaasutola! 30‘Ngokke méélamlo aapena amide ngokke kerapekai duubong’ ngokke embomnam de simino. 31Ngo agíe bím kénmangai, depe idola ngokke Israel opínlo bím lengkan dope emla ngo asilok baptis ila aato.”
32Delokrongem Joan bí sim hakii bidola poto, “Teyong telok Aide pekí kísape oila bíkkíng duudope ngo kaato. 33Ngo bím kénmayai, idola ngom asilok baptis idope melíkne ngom sikepe poto, ‘Aide tokla duulík dope nokke kaanam amide Deena Aidlok Baptis ipene.’ 34Simin Shédíke Ue emla ngokke kaanamde delokke ngo hakii bidung.”
Jisukíng Kerayalumpe Luyilsuna Amikídíe
35Longe kondem Joan bí bíkkíng luyilsuna midum annyi konem yébosula yéto kukéng. 36Bí Jisume gídakpe kaayédem, bí poto, “Shédíke mérbenuem kaatola!”
37Luyilsuna annyikone bím depe podope tayyédelo bulu Jisukíng gímín geto. 38Ngéélat sukuname, Jisu bí bulum mamín gedope kaala, íngkíto, “Nolu ingkoko míídun?”
Bulu pokai, “Saare (depe emnamde luyilbone), ingkolo no duudune?”
39Bí poyansuto, “Aatola nolu kaasudope.” Depe iname bulu gíla delokke ingkolo bí dudí dem kaato, delokke delo longedelo bíkkíng duubosuto. Delo íying baji dobong.
40Simon Pitorke bíro Andria bí Joanke agomem tatla Jisukíng gímín gena akone. 41Andriake kerayalumpe inam atí akonde bíkke bíro Simonme paala, “Ngolu Messiah me paato” (depe emnamde Kristome) emla pobinamde. 42Delokrongem bí Simonme Jisukíng aaboto. Jisu bí bím kaasudola poto, “No Joanke oo Simon. Nom Kepha #1:42: Kepha emnamde, (Aramaik agome) delokke Pitor emnamde (Grik agome) annyilokke ortue lííreng. emyé” (dem angukonpe atkuname Pitor.)
Philip Melang Nathanaelme Jisuke Tomname
43Longe kondem Jisu bí Galildanpe enpe emla mííto. Philipme paala bí, “Ngokkíng gímín getola” emto. 44Philip bí Andria delokke Pitorke akampe Bethsaida taonlo duune. 45Philip bí Nathanaelme paala poto, “Mosike ayon Kitablo atbomnam delokke kaaluna miri kídíe atnam Josephke oo Najareth lokke Jisume ngolu paato.”
46“Najareth lok aina atíko lendunía?” emla Nathanael bí íngkíto.
“Aala kaato langka” emla Philip bí poto.
47Nathanael bí aaníndope kaayédem, Jisu bí poto, “Sina aropak Israel amide, bíkkelo menam yadnam kamang.”
48“No ngom kape kísa kéntone?” emla Nathanael bí tatkíto.
Jisu bí pokai, “Nokke tapang ane rumkílo duudungem Philipke nom tommang adape ngo nom kaato.”
49Delokrongem Nathanael bí poto, “Saare, no Shédíke Ue; nomino Israel lokke Roje.”
50Jisu bí poto, “Ngo nom tapang ane rumkílo duuduem kaato emkolok no arope míídung. #1:50: Demangkom “no arope míídunía?” No simpenem botteyana atí siriem kaayé.” 51Delo bí potemto, “Ngo nom aruem pobidung, no teyong among eyabem siyyadope, delokke Shédíke teyong kotokie Tanike Oolo tokdu saatokla idope kaayé.”
Tans Gekies:
JOAN 1: adiBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
