JOAN 3
3
Jisulang Nikodim
1Depe iduem Pharisi ami Nikodim emnamko, Judai amilokke solaina kebang ruutumko kato. 2Yoh konem bí Jisukíng aala poto, “Saare, nom Shédí kelok aana luyilbonako emla ngolu kéndung. Legade Shédí bí duumín gemamílo nokke inam kísana irisinyo iyod kídarem sékote ilana kamang.”
3Jisu bí poyansula poto, “Ngo nom aruem pobidung, tanie lekoda olat suku mamílo,#3:3: Demangkom teyotelok olat suku mamílo, gomrek 7 lokom kadung. Shédíke amongem kaapa mayé.”
4“Tanie mijii rongem kape kísa olat suyékun?” emla Nikodim bí íngkíto. “Berokrupe bí olat sukupe emla ane kiiralo lennyinape aalang kumayé!”
5Jisu bí pobito, “Ngo nom aruem pobidung, tanie asiloklang Aidlok oku mamílo, Shédíke amolo aala mayé. 6Adínlok onamde adíne delokke Aidlok onamde aide. 7Ngokke nom ‘Nolu olat sukurupe aido’ emnam agom sim no arí anyope míímapeka. 8Asare agí míngkolok muddo, sokke muddudem no taddung, idakkom de ingkolok mudadudí demangkom ingkolo muddakdí no polamang. Dekepemin Aidlok okunam mipile idune.”
9“Kape kísa depe iyéne?” emla Nikodim bí íngkíto.
10Jisu bí poto, “No Israel ami kídíem luyilne idola no sim atí kídí sim tatkén manía? 11Ngo nom arope pobidung, ngo ingkuem kéndudí dem podung, delokke ngoluke kaato namem ngolu hakii bidung, idakkom no ami no ngoluke hakiiem torík sumang. 12Ngo tani amosokke atí legangem nom pobidung, idola no aro míímang; demílo kape kísa ngo teyong legangem pomílo no arope mííyéne? 13Teyong telok aana Tanike Oo#3:13: Ayokon agome “Teyong amolo duuna amie”. kékondelo sékote teyong amolo gíkína kamang.”
14Mosi bí mooruk amolo arem peking adínlok pínam tabíem aséklok tungonnam kísape Tanike Uem bomon rupe aiyé; 15delo bím arope míngkesuna mipile turyar namem paayéku. 16Kapeila Shédí bí tani amongem yagorupe ayangkane, séko Jisume arope míngke suyédí bí nyokmadope, idakla turyarnamem paadope emla bí agíke Oo atelem bingumsuto. 17Legade Shédí bí tani amongem bisar dope emla bíkke Oo atelem melíkmang idola Bíkkelok mosingkupe emlamin melíktone.
18Séko arope míngke suyédí bím bisarmang, idakkom séko arope míngke sumadí bím bisar tubong kapeila bí Shédíke Oo atel amínem arope míímato. 19Bisar igade sikepe idung; Angune tani amoso pííto, idokom tani kídíe angun empemílo kaamuem mííyato kapeila buluke inam saanamde atímang. 20Atímape ina amide angunem kanggot dung, delokke bíkke inam saanamem kénpelo emla pesuem angunlo anggemang. 21Idola séko arolok yédudí, de bíkke inam saanamde Shédí kelok lenne dem apíípe kaabedope emla angunlo aadung.
Jisulang Joan
22Sok méélampe, Jisulang bíkkíng luyilsuna kídíe Judia doolung danpe gígooto, delo bulum bí oolko yébosula irongem baptis isuto. 23Delo Joanteng Ainon doolulo Salim anínlo amiem baptis ila yéduai, kapeila delo asi mílí kato, delokke ami kídíe baptis isupe emla aatíto. 24(Dekepe idodelo Joanme pateklo líkmangada).
25Joankelo luyilsuna kídí elang Judai amiko dormolo pídéésunam legalo akmínsuto. 26Bulu Joankíng aala poto, “Saare, Jordan rotkonlo nokkíng yémín gena nokke ainako emla yidnam amide baptis idung delokke takame bíkke danpe gídung!”
27Sim Joan bí poyansuto, “Tanie teyong telok binam petom emmin paadune. 28‘Ngo Kristomang,#3:28: Messiah. idola bíkke kerape mege name’ emla ngokke ponamem nolu hakiipe yége sudung. 29Nyamede makboke. Makbuem igulna ajonde makbuem igulla delokke bím tatbidung, delokke makbo agom adudem tayyém bí ashérunge idung. De ashéde ngokkíng dung, delokke supak de apíngkai. 30Bí botte yaperung aido ngo amé yaperung aido.”
Teyong Telok Tokna Amie
31Séko teyong telok tokdudí bí takamem botte yalumne, séko among sokkepe idudí bí tani amongke delokke tani among legangem podung. Séko teyong telok tokdudí bí takamlokke kedon yane. 32Bí bíkke kaanam tatnamem hakii bidung, idakkom sékote bíkke hakii binamem torík sumang. 33Sim toríksuna tanide Shédí bí aronako emla kéndung. 34Kapeila sékom Shédí bí melík dudí bí Shédíke agomem tatdung; bím Shédí bí Aidem birí kayimape bidung. 35Abue Uem ayadung delokke atí takamem bíkke teyolo melíkdung. 36Séko Uem arope míngke sududí bí turyar namem paadung, idola séko Uem tomadudí bí turnamem paamayé, kapeila Shédíke aklínge bíkkíng duuyé.
Tans Gekies:
JOAN 3: adiBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
