JOAN 4
4
Jisulang Samari Mimeko
1Joanme bojéyape Jisu bí luyilsuna kídíem baptis idung emnamdem Pharisi kídíe tatto, 2Aropaklok poyém baptis inade Jisu mangai, bíkkíng luyilsuna kídí emin itone. 3Ruutum bí dem tayyédem, bí Judia dem megeyéla Galil lope lekoda enlat toku. 4Depe iduem bí Samari gooralok gípe nampe ikai.
5Dekepe iname bí Samarilokke Sukar emnam taonkolo, Jakobke agí oo Josephme binam among anínlo aato. 6Jakobke deerung aside delo dungai, delokke Jisu bí bedang enngasula apééyé ila, deerung ampedelo duunosuto. De longe raadange.
7Samari mimeko asi tuppe emla aana konem Jisu bí sikepe poto, “No ngom asi tíípe namko biyédí?” 8(Bíkkelo luyilsuna kídíe taonlo donam rekape gíkai.)
9Samari mimede bím poto, “No Judai amiko delokke ngodan Samari mimeko. No kape kísa ngom asi tíípe namko kodune?” (Legade Judai ami kídíe Samari ami kídíem dorík tíírík sumangai.)#4:9: Demangkom “Samari kídí tíína donanem inamang.”
10Jisu bí bím poyansuto, “No Shédíke bisamnam amanem delokke nom tíípenam asi konasi sékodí dem kéntuamílo, no bím koyai delokke bí nom turgenam asiem biyai.”
11Mimede pokai, “Saare, nokke tupnana kamang delokke deerung asi si eerídung. Ingkolok no sim turge nana asi sim paalayéne? 12No ngolum deerung sim bina delokke bíkke ookídí kelang bíkke gooru sobén kídíete tíngko asi rusok tíína ngoluke abu Jakob mete botte yadunía?”
13Jisu bí poyansuto, “Sim asi sim tíína mipíde tíílíyéku. 14Idokom ngokke binam asi sim tíína de asi tíílíng yimayé. Aropakpe, ngokke asi binamde bíkkíng nyokyi mana turnamem bina sirung asipe duuyaryé.”
15Mimede bím poto, “Saare, ngo asi tíílíng kumadope delokke so asi bompe emla aatí kumadope dem asidem ngom bika.”
16Bí mimedem poto, “Gíka langku, nokke miluem tomla so aalat boto langku.”
17“Ngo milo kamang” emla bí poyansuto.
Jisu bí mimedem poyansuto, “No milo kamang emsu namde no emjidung. 18Agom arode no milo pilngoko katuai, delokke nokke supakke duubosunam amide nokke milomang. Nokke supakke ponamde arodung.”
19Mimede poto, “Saare, nom ngo kaaluna miriko emla kaadung. 20Ngoluke abu kídíe so dííte so kumsu dungai, idola nolu Judai ami kídíe ngoluke kumsu pekorude Jirusalemlo emsudung.”
21Jisu bí pobeng bito, “Mime, no ngom míngke sulangka, noluke Shédíem kumpekue so dííte sokom mang demangkom Jirusalem lotemang dekepe idí longe pííyé. 22Samari amikídí nolu noluke kénmanam atíem kumsudung, ngolu ngoluke kénnamem kumsudung, kapeila turkunamde Judai ami kídílo kadung. 23Depe idokom arolok kumsuna kídíe aidlok lang arolok Abuem kumsudíe píídak delokke píídakbong, kapeila dekepe kumsu penemmin Abu bí matadune. 24Shédí bí aide, delokke bím kumsuna kídíde aidloklang delokke arolok kumsurupe aido.”
25Mimede pokai, “Messiah (depe emnamde Kristo) bí píídakbong dem ngo kéndung. Edílo bí pííyédí, bí takam legangem ngolum pobeng biyé.”
26Delokrongem Jisu bí pobeng bito, “Nom pona ngomino bí.”
27Depe idopagem bíkkelo luyilsuna kídíe píídoku delokke Jisume mimekolo lupo sudope kaala bulu arí anyope mííto. Idakkom sékote, “No ingkoko lupo subomdune?” emla íngkína kamato.
28Delokrongem agíke asi pekingem mesu geyéla, mimede taonlo gílat sulangkula ami kídíem sikepe pokantoku, 29“Aala kaato langka, ngokke inam saanam takamem ngom apíípe pokuna amiko kadung. Si Kristope imanía?” 30Bulu taon delokke gílenla bíkkíng danpe ento.
31Depe idungem bíkkíng luyilsuna kídíe bím, “Saare, nokke dope namem dotola,” emto.
32Idakkom bí bulum poto, “Noluke kénmanam dopenam ngokke dotkéye kasudung.”
33Delo bíkkíng luyilsuna kídíe mipile pobosuto, ngoluke aralok bím dotké bombinako katonía emla bulu íímín sukai.
34Jisu bí pobito, “Ngokke dotkéde ngom melíkna lokke míínamem ibila delokke bíkke agérem iyin binamde. 35Nolu ‘Poolo appiko dungada delokrongem gaddíe pííyé’ emla pomanía? Ngo nolum podung, noluke amige migdarla arík kídíem kaasutola! Bulu gadbe dope mindung. 36Supakkom yidne agí agérem paadubong, pidnelang gatne ashéng bosudokupe supakkom turyarnam yéta legape aliem laasidung. 37Dekepe ila, ‘Akone nyiilíkdo delokke akone yiddoku’ emnamde arodung. 38Noluke nyiilík manamem yiddope ngo nolum melíkdung. Ayokone ankípe agérem gérto, delokke nolu buluke nyiinamem gérmín gedope yiddungku.”
39“Bí ngokke inam saanam takamem poyindo” emla mime delokke hakii binam agomlok taon delokke bosi borang amie bím arope mííto. 40Dekepe iname edílo Samari ami kídíde bíkkíng aatodí, bulu bím bulukíng duupo dope roguto, delo bí loonyiko duuto. 41Delokrongem bíkke agom kídarem tatla deddína amie arope míngke sunape ito. 42Bulu mimedem poto, “Ngolu nokke ponam petom lok arope míímang supak ngolu agí agísue tatsuto, delokke si ami si aropakpe tani amosim mopít kuna Ruutume emla ngolu kéndung.”
Migom Ookonem Jisuke Ipíkuname
43Loonyi méélamdelo bí Galil among danpe ento. 44Depe iduem Jisu bí agíe “Kaaluna miride agí doolulo amín kamang emla pokanto.” 45Bí Galil pííduem Galil ami kídíe bím yamríkto. Bulu Jirusalemlo Gíbong gíídí domanlo bíkke itonam takamem kaato, kapeila bulukom delo duuto.
46Lekoda bí bíkke asiem onggur alangpe ikuko Galil lokke Kanalo gítoku. Delo Kapernaumlo roja rumkílo agér ina migom ookone kila kedduai. 47Edílo Jisu bí Judia lokke Galillo píídung emnamdem tattodí, si ami si Jisukíng gíla bíkke sita simana oodem aala ipí bidokupe bím roguto. 48“Nolu ami kídí nolu irisinyo iyod sangodem kaasu madem edílokom aro míímayé.” emla Jisu bí poto.
49Migomde pokai, “Saare, ngokke kue simang adape aabi potoka.”
50Jisu bí poyansuto, “No gíladoku. Nokke ue turyéku.”
Amide Jisuke agomem míngge langaala gíkaku. 51Bíkke bedalo endung adape, bíkke kue turkaku emnam koborem bíkke béérang kídíe bím ríksula pokanto.
52Bí edípaklo koode aikakudí emla ííduem bulu bím pobito, “Ramnamde melo doonyi tuyod paklo aikaku.” 53Delo abude de moodí pakde Jisuke bím “Nokke kue turyéku” emdo page emla míípang sutoku. Dekepe iname bílang bíkke ekum erang takame arope míngkesuto.
54Judialokke Galillo aala Jisuke lennyinape irisinyo iyod ibiname si.
Tans Gekies:
JOAN 4: adiBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
