JOAN 5
5
Asi Paatalo Ipíkuname
1Méélamdem longekonem Jisu bí Jirusalemlo Judai kídílokke domanem dobosupe emla gíto. 2Depe iduem Jirusalemlo Mér yapgo anín delo Aramaik agompe Bethesda#5:2: Ayokon agome, Bethjatha; ayokone Bethsaida. emnam ekum baranda pilngoko dunggo bomnam asi paatangko kadungai. 3So deddína kina ramna mingmane, lebaane, pittempe kina kídíe keddungai#5:3: Ayokon agome “Delokrongem bulu asi sipyarem toyato; ayokon dorkar manam agome poyondung, 4 leko leko Ruutumke teyong kotokie tokla asiem pyakmo dungai. Kerape paatadelo dekepe iduem aanade kinamem ipíkosu dungkuai.” 5Delo takying angum kolang dítag píínyi kokai kina amiko kato. 6Edílo Jisu bí bím delo keddope kaatodí delokke deddí kokai sikepe kidope kéntodí delo bí amidem íngkíto, “No eker lídung kunía?”
7Kinade poyansuto, “Saare, asi si beleyém sékote ngom paatalo joolíkdope igul penayang kamang. Ngokke aape iduem, ngokke kerape akone angkam kadan dan idung.”
8Delo Jisu bí bím poto, “Gereptola! Nokke ketpuem bomla gíto langku.” 9Menang asak de amide aikaku; bí agí ketpuem bomla gíkaku.
Dekepe ido longede Sabbath longeko, 10dekepe iname Judai ami kídíe ipínam amidem poto, “Silo Sabbath longe; ayone nom nokke ketpuem bomnamem luyadung.”
11Idakkom bí bulum poyansuto, “Ngom ipíkuna amide ngom ‘Nokke ketpuem bomla gítola’ ” emto.
12Dekepe iname bulu bím tatkíto, “Séko nom ketpuem bomla gítola emla pona amide?”
13Ipínam amide bím ipínade sékuadí dem kénmato, kapeila Jisu bí delo yéna mibamdelo gínyok líkkai.
14Méélamdem bí kumkeng ekumlo paala bím poto, “Kaatola, no aidungkune; paab iyimapeka, demamílo mangkam yana atíko nokkíng kapelo.” 15Amide gílangkula Judai ami kídíem ngom ipí kunade Jisumin emla pokan bitoku. 16Dekepe iname, Jisu bí Sabbath longelo sikesim igalok Judai ami kídíe bím gééto. 17Jisu bí bulum poto, “Ngok Yayi bí so longepak sote agér géryardung, depe ila ngokom agér gérdung.”
18Sok legalok Judai ami kídíe pakyape bím petpe emla míítí bomkai; bí Sabbath longem ipéésunam petommang, idakla bí Shédí meteng agíke Abue emsudung, agíe Shédíme kídísupe posudung.
Ooke Ralname
19Jisu bí bulum sikepe poyan suto, “Ngo nolum aruem pobidung. Oode agíe atí ilasumang; bí agí Abuke inam petomem kaalamin iladune; kapeila Abue ingkuem idudí Uekom idung. 20Legade Abude Uem ayadung delokke bím bíkke inam takamem lengkandung. Arue, bí sike simpemílo botteyana atí siriem bím lengkanyé dem nolu irisinyope mííyé. 21Kapeila Abue sina kídíem kiirep langkula bulum turnamem bila inam kísa pakpe Uekom bíkke bipe míínamem turnamem bidung. 22Delok teyolote, Abude séko mete bisarmang, idola bisar penam takamem Oolo melíkto, 23depe inamde bulu Abuem mínggenam kísape takame Uem míngge dope emla iname. Sékodí Uem míngge madune, bím melíkna Abuemkom mínggemang.
24“Ngo nolum arope podung, séko ngokke agomem tatla ngom melíkna bím arope míngke sududí bíkkelo turname dung delokke bím bisarmang; bí sinamlokke turnamlo aadungku. 25Nolum ngo aruem pobidung, sina kídíe Shédíke Oo agomem taddíe píídak delokke píídubong delokke séko bulu taddudí bulu turyé. 26Legade Abukelo turname duula, Oo kelote turname duusudope bitung. 27Bí Uem bisar nana ralnamem bitung kapeila bí Tanike Ue. 28Sim kapei emla míímapeka, kapeila agolo duune bíkke agomem taddíe píídak 29delokke bulu darepyéku, séko bulu aina agérem itodí dekede turyéku, delokke séko bulu atímana agér itodí dekede bisar kosuyé.
Jisuke Hakii Agére
30“Ngokke sulok ngo atí ilamang; ngo ngokke Abuke ponam petomem bisardung, delokke ngokke bisarde jondung, kape ila ngo agí ainam legape matamang idakla ngom melíkna kepemin matadune
31“Ngo agíem hakii bisu dumílo ngok hakiide aromang. 32Ngokke legape hakii bina konko kadung, delokke ngokkepe hakii binamde arodung emla ngo kéndung. 33Nolu Joankíng ami melíkto delo bí aruem hakii bito. 34Ngo tani hakiiem tomang emmang; idakla ngokke potonam kísape nolu turdo kupe emlamin podune 35Joan bí dorna delokke angun bina merukuai, delokke nolu longeko bíkke angunlo yémandope emla mííto. 36Joan kempemílo tebeg yana hakiiye ngokkelo kadung. Kapeila ingoo bomdunam delokke iyindope Abuke ngom melík bomnam agér susi Abue ngom melíktung emnam hakiiyem bisudung. 37Delokke ngom melíkna Abude agíe ngok legangem hakii bidung. Nolu edílokom bíkke agomem tatkímang delokke bí kapenakodí demte kangkímang. 38Bíkke agomete nolukelo duumang, kapeila nolu bíkke melíknam amiem arope míímato. 39Nolu kénnamrupe Dooying kitab agomem poridung kapeila dekelok turyar namem paadung emla nolu míídung. Sikesina ngok legangem hakii bina Dooying kitab agome, 40depe ilate nolu turnamem paape emla ngokkíng aalímang.
41“Ngo tani kídílok yidnamem míímang 42idakkom ngo nolum kéndung. Ngo kéndung noluke aanglo Shédíke ayang kamang. 43Ngo ngokke Abuke amínlok aadung, idola nolu ngom torík sumang; idakla agí amínlok aanako kamílomin, nolu torík sudune. 44Nolu Shédí kelok lenna koyidem matamape akone akonlok koyit matana kídí nolu kape kísa míngkén suyéne? 45Idokom nolum ngo Abuke keralo ajéng luketyé emla míímem mapeka. Nolum ajéng luket penade noluke míínam subomnam Mosi bímin. 46Nolu Mosime arope míngke sudumílo, nolu ngom míngke sukan duai, kapeila bí ngokke legangem attung. 47Idakkom nolu bíkke atnamem míngke sumanade, ngokke ponamem kape kísa arope mííyéne?”
Tans Gekies:
JOAN 5: adiBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
