Juan 3
3
Jesús judyeyaꞌ Nicodemo
1Muꞌyaꞌ jiquej judíoty ayoꞌ muꞌin, Nicodemo tịj muꞌ, fariseosĉantyiꞌ ñuruꞌtyity muꞌ. 2Uts ĉọcte tsedyedyeꞌ muꞌ Jesús jéte:
—Jịꞌchiyacsity, tsun cạvepyac ferdyeꞌ mi, mọꞌdyes chị́yeyac mi Jenꞌtyiꞌ jutactyiꞌ muꞌ paj qui jịꞌchiyacsi muntyiꞌ mi. Jam meꞌchupte Jenꞌsiꞌ ferdyeꞌ jụijyaꞌ mi, a vuty jam tupuj meꞌ jịꞌcaveyacsi um ferdyeꞌ mi —yi muꞌ Nicodemo jéte Jesús.
3Jesús jéte:
—Yụ jéye, tyi chuc jam naꞌebantyiꞌ quivij, muꞌ raꞌ jam junꞌ nạijbite Jenꞌsiꞌĉan ayoꞌbuꞌyedyeꞌ muꞌ —yi jéte.
4Yi Nicodemo jéte:
—¿Junꞌ bu raꞌ meꞌ naꞌeban quivij tupuj yirity ishoꞌ? ¿Tupuj buty sisan tseꞌsiꞌĉan aꞌ muꞌ paj qui quivij naꞌeban muꞌ?
5Vorjete Jesús:
—Yụ jéye, aꞌĉan mọmoꞌ naꞌi jụijyaꞌ muꞌ muntyiꞌ mọꞌ jam yaꞌiꞌ paj qui Jenꞌyaꞌ bäꞌyi, jemoñeꞌ Jenꞌsiꞌĉan Ạꞌedyeꞌ muꞌ naꞌi, meꞌ raꞌ chat Jenꞌyadyety ayoꞌbuꞌyedyeꞌĉan muꞌ. 6Muꞌ na tseꞌĉan naꞌity, meꞌchuqui aꞌ muꞌ, Jenꞌsiꞌĉan qui na Ạꞌedyeꞌ naꞌi jụijyaꞌ muꞌ, meꞌchupte Jenꞌsiꞌ Ạꞌedyeꞌ muꞌ, muꞌ chat Jenꞌyadyety. 7Jam raꞌ äjjibutim ọij p̂eyacdyeꞌ jéyes yụ q̂uinꞌ: "Jemoñeꞌ naꞌeban quivij mi." 8Jeshaꞌ, tyiꞌmu junꞌvevej ĉụiꞌ mọmoꞌ fujyi. Meꞌ tsanꞌ seꞌvete mi, jam qui namꞌ junꞌ chịj mi junꞌve chuc jijtuij muꞌ tyiꞌmu mijam chịj chimeꞌ mi junaꞌ chuc raꞌ jịjcaij. Meꞌ buꞌyiꞌdye chimeꞌ Jenꞌsiꞌ Ạꞌedyeꞌ muꞌ mijam jorojĉan junꞌ buꞌyiꞌ chuc muꞌin naꞌebantyiꞌ in.
9Nicodemo jéte:
—¿Jedyeꞌ buty cạiꞌ mọꞌ p̂eyacdyeꞌ?
10Vorjete Jesús:
—Yoj na jịꞌchiyacsi mi Israeltyiꞌ vóshiꞌ in, ¿junꞌ qui dash jam chiqueꞌ mi ọij jiꞌchäyitidyeꞌ? 11Yụ anic jéye, ọij jiꞌchäyitidyeꞌ p̂eyacdyeꞌ jéyacsiꞌ tsun miꞌin, ọij anic rụijsis, mọꞌ cạves tsun, mọꞌdyes tsun jéyac, miꞌin qui namꞌ jam anicyi. 12Meꞌ tsanꞌ ọ́ches jacches p̂eyeꞌ yụ jiꞌchäyitidyeꞌĉan yụ, miꞌin qui namꞌ jam anicyi, chị́dyemꞌ mạyedyeꞌches p̂eyeꞌ jụijyaꞌ u yụ, dadamꞌ raꞌ mujuꞌchaꞌ jam anicyi miꞌin.
13Mijam jụꞌñity mạyedyeꞌcheꞌ jịjcaij, meꞌdye yụmꞌ yirity Anictyity Muntyiꞌ yụmꞌ yirity mạyedyeꞌchety jijtuijtyiꞌ yụ, yócheꞌdyemꞌ bäꞌyi uij. 14Moisés jiquej cäjyasĉan jac muꞌĉan cheꞌve yụꞌtyeꞌ soncheꞌ mọꞌ nas buꞌyis yiris jämꞌtacdyeꞌ, paj qui cạveꞌ muntyiꞌ in, paj qui c̣hoñi in. Meꞌdye raꞌ yụ chimeꞌ Anictyity Muntyiꞌ yụ cheꞌve raꞌ yụꞌtac yụ soncheꞌ, 15paj qui räj tyi chuc anicjintyiꞌ yụ in muꞌin raꞌ räjĉan tsạꞌ buꞌyi Jenꞌyaꞌ in —yi muꞌ Jesús jéte muꞌ Nicodemo.
Mạꞌjitidyeꞌ Jenꞌsiꞌ muꞌ
16Muꞌ Jenꞌ fer mạꞌjeyacsi jacchety muntyiꞌ in, meꞌdyes qui muꞌ yụꞌtaqui muꞌ yiritytyity Ạvaꞌ muꞌ. Tyi chuc anicjete in muꞌin raꞌ jam cạveꞌ sänꞌdyeꞌ in, räjĉan raꞌ Jenꞌyaꞌ bäꞌyi in. 17Jenꞌ jutaqui Ạvaꞌ muꞌ, jam paj qui vaꞌtacdyeꞌ soꞌmacsi jacchety muntyiꞌ in. Damꞌdye muꞌ jutaqui Ạvaꞌ paj qui muꞌ jiꞌc̣honacsive muntyiꞌ in.
18Tyi chuc anicjeptety Jenꞌtyiꞌ Ạvaꞌ in, muꞌin aty jam vaꞌtacdyety in, muꞌin na jam anicjeptety in, muꞌin aty yụꞌtac in vaꞌtacdyety in, ĉaĉaij na jam anicjepte in Jenꞌtyiꞌ Ạvaꞌ muꞌ, yiritytyity muꞌ. 19Meꞌ tsanꞌ úcheꞌ jijtuij muꞌ mạijchucsity muntyiꞌ, uts na jam jụjjete in, tojmadyemꞌ maꞌjotyeꞌ in, mọꞌ qui namꞌ mạijquedyeꞌ muꞌ jam maꞌjotyepte in ĉaĉaij na mọꞌ jorojĉanjeyacsebiꞌ aꞌc̣his dyijyedyeꞌ muꞌin. Mọꞌ jiꞌmeꞌtacsiꞌ vaꞌtacdyeꞌĉandyety in ĉaĉaij na jam jụjjete in. 20Tyi chuc aꞌc̣his dyijyedyeꞌ cạiꞌtyiꞌ jụijyaꞌ in, muꞌin fạ́quepte in Jenꞌsiꞌ mạijquedyeꞌ muꞌ, mijam mạꞌjeꞌ ĉọcte in ĉaĉaij na muꞌin jam mạꞌjeꞌ in paj qui jam jorojĉanjeyacsebiꞌ aꞌc̣his dyijyedyeꞌ muꞌin. 21Muꞌin na rụijsis dyijyedyeꞌ cạiꞌtyiꞌ in ĉọcbite muꞌin Jenꞌsiꞌ mạijquedyeꞌ in, mọꞌ jorojĉanjeyacsebiꞌ dyijyedyeꞌ muꞌin ĉaĉaij na muꞌin cạpte Jenꞌsiꞌ dyijyedyeꞌ in.
Juan chojtacsity quivij p̂eijte muꞌ Jesús
22Aty meꞌsiꞌ Judeave qui jịjcaij muꞌ Jesús jịꞌchiyactyiꞌtum muꞌ. Juñucsiꞌ muꞌĉan mạyedyeꞌ in, chojtacsi muntyiꞌ in. 23Chimeꞌdye muꞌ Juan Enónĉan chojtacsi muntyiꞌ in ĉaĉaij na mọꞌĉan jam jayejyiꞌ ojñiꞌ. Ĉọcte muꞌin muntyiꞌ in jiꞌchojti Juanyaꞌ in. Enón c̣hẹiꞌyaꞌ yocsiꞌ bäꞌyedyeꞌ Salim. 24Jambiꞌdyemꞌ ĉärꞌtac muꞌ Juan jiquej.
25Pạrej Juantyiꞌ jịꞌchiyactyiꞌ muꞌ yiritytum judío jítidyeij in, jiꞌchojtidyeꞌ p̂eyeꞌ in. 26Chat qui ĉọcte Juan jéte in:
—Jịꞌchiyacsity, muꞌ penꞌdyetutety mi nopej Jordán jiquej, muꞌ p̂eijtety mi, muꞌ nash Jiꞌc̣honacsity, yi mi jiquej, muꞌ chimeꞌ chojtacsi muntyiꞌ q̂uinꞌ, anic muꞌ mujuꞌchaꞌ cäc̣häꞌchute muntyiꞌ in, jam jeñej mi, uyaꞌyaꞌ cäc̣häꞌchun in —jéte in.
27Jéyacsi Juan:
—Jenꞌdye soꞌmacsi cäts yirityityij mọꞌ carijtacdyes muꞌin. 28Miꞌin jiquej seꞌvibutiĉamꞌ p̂eyacdyeꞌ yụs miꞌin, yi yụ jiquej jéyac: "Jam nash yụ Jiꞌc̣honacsity Muntyiꞌ, yụ nash jutactyiꞌ buꞌyi mọmoꞌ paj qui yụ jäꞌmij jämꞌ yụꞌbite majmi muꞌsiꞌ", yi yụ. 29Yojdyemꞌ muꞌ vämity muntyiꞌ u muꞌ meꞌchuiꞌ mọꞌ p̂en, muꞌ na penꞌdyeꞌ muꞌ maꞌjoij seꞌvepteyaꞌ p̂eyacdyeꞌ vämitysiꞌ. Meꞌdye yụ chimeꞌ maꞌjotyeꞌ yụ ĉaĉaij na daiꞌ cäc̣häꞌchute Jesús in. 30Muꞌ raꞌ yejĉoij mujuꞌchaꞌquejĉoij, yụ na raꞌ meij uyaꞌyaꞌquejĉoij —jéyacsi muꞌ Juan.
Muntyiꞌ Mạyedyeꞌchety
31Muꞌ mạyedyeꞌchety muntyiꞌ anic mujuꞌchaꞌ buꞌyi, muꞌ na úchety jacchety, jacches mọmoꞌ chị́dyeꞌ meꞌchuiꞌ. Muꞌ na mạyedyeꞌchety muntyiꞌ, räj muꞌ mujuꞌchaꞌtacsi. 32Muꞌ jịꞌchiqueyacsi muntyiꞌ in seꞌves judyeyaꞌ cạves muꞌ, muꞌin qui namꞌ muntyiꞌ in, meꞌ tsanꞌ seꞌvete in, jam qui namꞌ anicjepte p̂eyacdyeꞌ in. 33Muꞌin na anicjetety in, muꞌin chịj in anic rụijtyity muꞌ Jenꞌ, judyeyaꞌ rụijsis p̂eyacdyeꞌ muꞌ. 34Muꞌ anictyity Jutactyiꞌ Jenꞌtyiꞌ muꞌ, mọmꞌ p̂eyepte Jenꞌsiꞌ p̂eyacdyeꞌ muꞌ, ĉaĉaij na Jenꞌ jasoꞌmiti ĉụiꞌsiꞌ Ạꞌedyeꞌ muꞌ, anic mọjoꞌchaꞌ mọꞌcheꞌ soꞌmete. 35Jenꞌ mạꞌjeyaqui Ạvaꞌ muꞌ judyeyaꞌ yụꞌte paj qui muꞌ räjdyes ayoꞌbuꞌyi. 36Tyi chuc anicjepte Jenꞌtyiꞌ Ạvaꞌ muꞌ, muꞌin raꞌ Jenꞌyaꞌ bäꞌyi in. Muꞌin na jam seꞌveptety Ạvaꞌ in, muꞌin raꞌ jam junꞌ Jenꞌyaꞌ bäꞌyi in, vaꞌtacdyeꞌĉan raꞌ in, Jenꞌ raꞌ meꞌ soꞌmacsi ñịbedyes.
Tans Gekies:
Juan 3: CAS
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Copyright 2017 Nuevo Testamento en Chimane
Jen'si' P̂eyacdye'
