PSALMS 116:12-15
PSALMS 116:12-15 Afrikaans 1983 (AFR83)
Hoe sal ek die Here vergoed vir al sy weldade aan my? Met 'n drankoffer sal ek van sy redding getuig en die Naam van die Here aanroep. My geloftes aan die Here sal ek betaal in die teenwoordigheid van sy hele volk. Vir die Here is die dood van sy troue dienaars geen geringe saak nie.
PSALMS 116:12-15 Bybel vir almal (ABA)
Die Here het baie goeie dinge vir my gedoen. Wat kan ek vir Hom doen? Ek sal 'n drank-offer bring en ek sal roep en sê: “Here!” Ek sal my geloftes aan die Here betaal waar die hele volk dit sien. Die lewens van die mense wat in die Here glo, is vir Hom kosbaar.
PSALMS 116:12-15 Afrikaans 1933/1953 (AFR53)
Wat sal ek die HERE vergeld vir al sy weldade aan my? Ek sal die beker van verlossinge opneem en die Naam van die HERE aanroep. My geloftes sal ek aan die HERE betaal in die teenwoordigheid van sy ganse volk. Kosbaar is in die oë van die HERE die dood van sy gunsgenote.
PSALMS 116:12-15 Die Bybel 2020-vertaling (AFR20)
Hoe kan ek die HERE vergoed vir al sy goeie dade aan my? Die beker van verlossing sal ek oplig en die Naam van die HERE aanroep. My geloftes aan die HERE sal ek betaal, daar voor sy hele volk. In die oë van die HERE is die dood van sy troue volgelinge 'n duur verlies.
PSALMS 116:12-15 Contemporary Afrikaans Bible 2023 (CAB23)
Wat moet ek die HERE vergeld vir al sy weldade aan my? Ek sal die beker van verlossing neem en die Naam van die HERE aanroep. Ek sal nou my geloftes aan die HERE betaal in die teenwoordigheid van sy hele volk. Kosbaar in die oë van die HERE is die dood van sy heiliges.
PSALMS 116:12-15 Die Boodskap (DB)
Hoe kan ek die Here ooit vergoed vir al die goeie dinge wat Hy vir my gedoen het? Maar ek sal vir Hom iets terugdoen: ek sal vir Hom dankie sê. Ek sal na Hom toe gaan. Ek het beloftes aan die Here gemaak. Ek sal dit hou sodat al sy kinders dit kan sien. Sy kinders is vir Hom baie werd. Daarom laat Hy nie maklik toe dat een van hulle doodgaan nie.
PSALMS 116:12-15 Nuwe Lewende Vertaling (NLV)
Hoe kan ek die HERE vergeld vir al sy goeie dade aan my? Ek sal die beker van redding optel en die Naam van die HERE aanroep. My geloftes aan die HERE sal ek betaal in die teenwoordigheid van sy hele volk. Die dood van sy getroue dienaars is kosbaar vir die HERE.