Mt 11
11
1Amana Yesus angamana vë bëyègè awom ai bëbè boe bëtëbëga ba, ndò angakodo a etere, na akë ayëgëlë, ayedëgan mbëmbë foe a bëtisòn baban.
E bod ya Yohannes Ndu-bodo angalom
Lk 7,18-35
2Hala Yohannes atoa a mimbog, ndò angawog mimboan mi Kristus. Alomo#11,2-6Yohannes atoan ki yëm ngë Yesus ṅnyè anë Messias. a hm fò bëyègè boe na 3bësili nyè na: Yë wa onë e nyò azu, yë biyanga mfë? 4Ndò Yesus angayalan bò na: Kaṅan kad Yohannes e mam miawog, miyënë fë: 5Mindindim hm mi miayen, mimbombog miwulugu, minzëzam mibò mvoè, mindondòg miwogo, mimbim miwomëṅe a mësòṅ, mimbubua miwogo mbëmbë foe. 6E mod ayi ki ku mbëg asu dama anë mvòm. 7Eyòṅ bëngadugan, ndò Yesus angatari na akad minkunda etòm Yohannes na: Dze mingakë yen a nkod-nnam? Yë e ndën yandëṅa evundu? 8Dze a hm fò mikëlë yen? Yë e mod abëgë mimkpamaṅ biyie? Anë hm na: E bod bësë bëbëgë abëṅ biyie banyiṅ a mënda minkukuma! 9Dze mikëlë yen? Yë profet? Owe, makad mina, alodo profet. 10Ṅnyè bëngatil asu die na: Yënë sik, malom wa englès wama osu, nyè ayi wa komëzan zen osu. 11Bëbëla, makad mina na: mod ziṅ a bòn bë bininga alod ki Yohannes ndu-bodo. Dzam da, man mod ntòg ya edzoe ya yob alod nyè. 12Atarigi abog Yohannes azaa kui ana, edzoe ya yob ebëlë ndzug. Miṅyoyòg miasa dzò. 13Amu bëprofet bësë ai mvende bibendëge dzò akui abë Yohannes. 14Ndò hm, ngë miayi na miayëbë dò, ṅnyè anë Elias ambë yean sò. 15E mod abëlë mëlò, awogo! 16Mayi hëg e mvòṅ bod nyi ai dze? Mvòṅ te enë anë bongò#11,16-19Nkana ban bòngò walëdë na e bod ya ayom Yesus bënë anë bòngò ya bayëm ki ngë bayean tòbò mintag ngë mëlunga. Yë Edzoe Zamba yabëbë fò bò nga? ya bëtoa a nsëṅ angara, bëloege e ba behòg na: 17Bilòṅ mina mindiṅ, mina tègè dzëm, akë mina yia bia mëlunga, mod tègè bëgë mëyëb. 18Yohannes angasò, tègè di, tègè nyu, bò na abëlë mbë nsisim. 19Mòn mod akë sò, adzaa, anyaa, bò na: Yënë ndondòg ai nsòò mëyòg, mvoe bënòṅò bëtoya ai bësëm minsëm. Tò a hm nala, fëg yayenëban a mimboan.
Amala ai e bëtisòn batsende ki enyiṅ
Lk 10,12-15
20Ndò hm angatari na akòṅan ai bëtisòn ya abui biyëṅ bi mam bie bingayenan ete, amu bandzëki tsende. 21Amala ai wa, a Korazin#11,21e bëtisòn ya Yesus alaṅ ba: Korazin, Betsaida, bëngabë babi ai Kafarnao. Dzam bò na Yesus angayedan mbëmbë foe we, tègè ai e bod bayëbë nyè. Tir, Sidon, ai Sodoma bëngabë bëtisòn minsëm. Bod bëkarëga bòd minkut a nyòl, bësoege asub a nlo eyòṅ babò endëgëlë., amala ai wa a Betsaida: Amu yë na, ngë e mësimba mëngabòban a zaṅ dzaan mëyënan a Tir ngë a Sidon, ngë bëngamana ya vëṅan koba, bëbòdò minkut, bësoegan asub a nyòl. 22Ndò hm makad mina na: layi yenan ai Tir ai Sidon abòd abui alodo mina, a amos nkat. 23Mfa woe, a Kafarnao, tò ongayab akëlë kui a ebas yob, ongâdzòdiban akëlë kui a mbibiṅ a si#11,23Is 14,13.15. Amu, ngë mësimba ya mëngabòban a zaṅ dzoe mëyenëban a Sodoma, ngë angënë atëlë azaa kui amos vi. 24Ndò hm makad mina na: Sodoma ayi yenan ai mbëṅ alodo wa a amos nkat.
Zaan abë ma, miwaè
Lk 10,21
25Abog te, Yesus nyè na: Makaṅ wa a Tara, Nti yob ai si, amu ongasòli mimfëfëg ai minkëkëṅ e mam ma, okulan mò ban bòngò. 26Owe, a Tara, amu nala ngò lënganyëb wa a mis. 27«Tara angavë ma dzom esë; mod ziṅ ayëyëm mòn#11,27Zamba asëki hë esya ntòṅ Yesus. Anë fò nyè esya bëbëla; Asu te ayëm mòn mbëṅ mbëṅ., ngë së Tara, mod ziṅ ayëyëm Tara ngë së mòn, ai e nyò mòn ayi na akulan dò. 28Zaan abë ma, e mina bësë miawu mindzug, mibëgë fë adid: mayi mina vë awaè. 29Bëëgan efanga dzama#11,29Abëgë efanga mod ziṅ atyan na abaala mëmvende moe., miyègè fë abë ma na mënë evovoe ai edzòdi nyòl, eyòṅ te miayi bi awaè asu enyiṅ dzaan#11,29Ye 6,16. 30Efanga dzama enë ebubud, mbëgë wama otoa ovëves».
Currently Selected:
Mt 11: NTE12
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
MKPAMAṄ AMVOE Nouveau Testament en langue Ewondo © Bible Society of Cameroon, 2012.