Mattaayo 12
12
Yeesso a Kamuri Seeri Lanaso
(Marko 2:23-28, Luuka 6:1-5)
1Maantoo Seeri Lanaso ka, Yeesso abattitiis khabaayi, gosase goya raaha. Abattitiis la a ankaaate, ilmohoo ꞌdargaayye guratte, tuhum. 2Farissaayo uus iche waha agarte ka, wihi iche Yeesso itidah, “Yey! Wihi abattitaah Seeri Lanaso ka yeesso ichoow amurre ma israahaan!”
3Yeesso wihi us ilaabe, “Atin wihi Dawuud yeele maanti usu ichoow ꞌdooꞌdi us khabe ba raarahteen Yeedi Waakh ka ma soomin a? 4Dawuud uranti minki Waakhe gele, usu ichoow ꞌdooꞌdi leejire makaateti Waakh liibahche yumheen. Amurreti laraaho ka kuhaaniyyo kaldaye makaatetaas yahame, icho ma kakhabaan. 5Atin injire Amurre ka saggi kuhaaniyyo chiꞌicho minki Waakhe buure ka Seeri Lanaso hil haaggichaan, seera ibiꞌdirroochaane, iꞌdaasenyi icho uskeel iyeelin ma soomin a? 6Wihi an atin icheeko, etoo inta kajiro, minki Waakhe buure laka a kussanyahe. 7Chiirnaanneti Yeedi Waakh wahane kachiiran, ‘An soorriyoti at ibihisso menye, atihi ꞌdooꞌdi addan uur inugleysatti iche ꞌdoona.’#12:7 ꞌHoseeya 6:6. Chirri atin rumanka wihi yeeda essi garatteen, ꞌdooꞌdi uskeel iyeelin, uskeel ma igoossaan. 8A mehe Ínam Aadam, a Kamuri Seeri Lanaso.”
Yeesso Seeri Lanaso ka etoo samaacha
(Marko 3:1-6, Luuka 6:6-11)
9Yeesso intaas katabe, minkichoki weysiite Yaꞌhuud gele. 10Etoo dahane hanjaawte la intaas a kijire. Farissaayotoo la intaas goya kijirta, wohoo icho Yeesso kacheektaane yowtaane, ꞌdeerka wihi icho Yeesso worsateen, “Amurre ichoow eti Seeri Lanaso ka lasamaacho a israahaan?”
11Ulla wihi us icho iyidah, “Chirri etiinkoo naffoo iiyyaat khabo, naf la Seeri Lanaso ka ankhar kadihe ma sookhabatti ma soobihisso? 12Weeli enenyet geeddoo meheenye naffi iiyyaat kussanyahe? Maantaka wihi haaggane Seeri Lanaso ka layeelo ichoow amurreteen a israahaan.” 13ꞌDeerka wihi us et iyidah, “Dahantaah fiti.” Et dahan ficche, dahane toro tuum haagsatte, iꞌdi ti addan titah. 14Iꞌdaasenyi Farissaayo bahte, tossatte, jiti icho Yeesso kayagiisiin kamasseen.
Yeesso a falfati Waakh soobahsate
15Yeesso saggi Farissaayo ogoos iyowatti garta, intaas katabe. Ururoo buure la raahe, Yeesso la ꞌdooꞌdichoki khakkhannan tuumman samaache. 16Ulla ꞌdooꞌd tootooche, uus icho eti us yahe cheekin. 17Ulla wahaas a yeele ꞌdee wihi eti Waákh íyeyyeedo Isaaya layadeeh ka lacheeke labuuhicha.
18“Falfateeyti an soobahsade talla.
A eti an weyti ꞌdoono, toro la an kahamaado.
Anihi Waakhe la Rubeyti Munyee rubeytiis goya a buuhicha,
ulla saggi us yaafo jiti fissan ka ihukkumo icheeka.
19Us ma jaakho ommos ma rirriiro,
et jitat ka hooyiis daago mele.
20Us koloo kalday laka balakki khollokhte ma jebcho,
toro la ꞌdabi taahi uum bahcho ma jiccho.
Iꞌdaas ka eti ꞌdabakhenye ꞌdaran jiti samacchaarenye kawoya,
ma ꞌdiicho ichoowka ebba saggi jiti fissan ka liihukkumo iyeela.
21Magahiis ka yaafo tuumman khajjeel a khabaan.”#12:21 Isaaya 42:1-4.
Farissaayo Yeesso miigti karnati ginnayyoote hil kahaaggicha elatta
(Marko 3:20-30, Luuka 11:14-23, 12:10)
22Saahka ꞌdooꞌdoo etoo ginna dakhatti indo laaye af laa Yeesso ikeene. Yeesso la et samaache, ꞌdee et a yeyyeedo toro il a argo. 23Enenyet tuumman girmeeste wihi us yidah, “Eta sarka a weel Dawuud a?”
24Iꞌdaasenyi Farissaayo chirri iche wahaas daagte ka, wihi iche tidah, “Miigti Beelsebuulhi karnati ginnayyoote kaldach on eta enenyet ginna kabahcha.”
25Yeesso wihi icho kamassaan garte, wihi us icho iyidah, “Yaafti tuummane seley goote isdihto a baabaata. Toro la ilkerengeet ommos minki seley gowe isdiho geed us fiddiyo mele. 26Chirri Seytaan on Seytaan bahcho, us seley a goggowe. Dakhiis saggoh orey ikasohta? 27Chirri an miig Beelsebuul ka ginnayyo enenyet kabahcho la, ꞌdooꞌdiin miig eyya ginnayyo kabahcha? Icho ꞌdeerka atin hukkuma. 28Iꞌdaasenyi chirri an Rubeyti Waakh ka ginnayyo bahcho, waha saggi dakhi goobi Waakh goytiin iyimiyye tusaan.”
29“Ommos etoo saggoh minki etoo miige igela, meehiis ihata sammata us koloo etaas miige ihidhidin? ꞌDeerka minkiis gela hata.
30“Eti tuummane ani ileejirin, a itirrima. Eti igargaarine walah ileesooholin a ileefida. 31Toollaka wihi an atin icheeko, uskeel tuumman ichoow gaf tuumman a geeddi enenyet liikakuto. Iꞌdaasenyi eti Rubeyti Munyee igafe, uskeeliis ma liikakuto. 32Eti Ínam Aadam igafe a geeddi uskeeliis liikakuto. Iꞌdaasenyi eti Rubeyti Munyee igafe, uskeeliis harrata ka ichoow harrati soosohatti ka ma liikakuto.
33“Geey haaggiche ulla gurnaanki haaggane delaa, ommos geey suujaache ꞌdee gurnaanki suuje a delo. A mehe geey ba gurnaanki us delo lakaabta. 34Dessi toof! Saggoh wihi haaggan itadeehiin chirri atin uskeel kajirtaan? Iꞌdi tahe wihi uuraah goya buuho iche afaah leeyamiit. 35Eti haaggan uuriis laka a haagganyahe gone, haaggaas on dela. Eti suuje la uuriis a suuj gone suujoonkaas on dela.”
36“Iꞌdaasenyi wihi an atin icheeko, ibeenki Waakh ꞌdooꞌd hukkumo, enenyet yeedi indigir laaye aficho kasoobahe iche cheekta. 37A mehe yeedi afaah ka a lakifura, toro yeedi afaahha uskeel liikaagoocha.”
ꞌDooꞌdi Yeesso ꞌdiiꞌdo sina latusa
(Marko 8:11-12, Luuka 11:29-32)
38Farissaayotoo ichoow tagaammeti amurre wihi iche Yeesso itidah, “Eti ween, atihi wohoo miigti Waakh tuso nah tusso ꞌdoonna.”
39Yeesso wihi us ilaabe, “ꞌDooꞌdi iꞌdeenye uskeel lehe waakkhassi addan wahti on wohoo miigti Waakh tuso daaha. Iꞌdaasenyi wihi goorat Waakh eti Waákh íyeyyeedo Yoona layadeeh ka enenyet tuse on menye, walah addane lasiicho mele. 40A mehe Yoona maan seyyah ibeenkiche khabto uuri bahaggoo buurenye goya kajire. Ínam Aadam laka saggaase maan seyyah hawwaal ikabarya. 41Ibeenki Waakh ꞌdooꞌd hukkumo, ꞌdooꞌdi ili Ninaawi a tolossata ꞌdooꞌdi iꞌdee cheekta. Iꞌdi tahe icho maanti Yoona Yeedi Waakh icheeke, uskeelicho a kasoonokhteene, toro la etoo Yoona kaween kalla atin leejira. 42Ibeenki Waakh ꞌdooꞌd hukkumo la makhaabassi karnatenye ili Cheeba a kahta ꞌdooꞌdi iꞌdee uskeel igoossa. A mehe iche goorat harra ginꞌdohicheeda katimiyye kharati karnati Soolomon layadeeh khabe dagansatte, toolla la etoo Soolomon laka kaween kallaay.
Saggi ginna toro isoonokhatti
(Luuka 11:24-26)
43“Maanti ginna etoo goya kabahte, ginnata a iratta, ili daarenye bicche laa dah kagoossa. Fur yowatta, iꞌdaasenyi fur ma ꞌhesso. 44ꞌDeerka wihi iche tadeeh, ‘Fureeyki an kasootabe inokhda.’ Maanti iche tamiit, furi marahe, harane lamujjummooche ꞌhessa. 45Ginnataas ꞌdeerka iratta, ginna teeba addane iche laka kasuuje sookhaatatta etaas goya gelaane, fur yeessaan. Etaas la jirotiis, ti goorat oraat a kaꞌdarsatta. ꞌDooꞌda iꞌdeenye uskeel leh iꞌda on itateeh.”
Hiiy Yeesso ki rummaat
(Marko 3:31-35, Luuka 8:19-21)
46Yeesso urur leeyyeedaayi, abartiis ichoow walaalinyetiis ba usu leeyeedin ꞌdoonaane, khar tolossateen. 47Etoo wihi us Yeesso iyidah, “Abartaah ichoow walaalinyetaah khare toollaane, ati kileeyeedin ꞌdoonaan.”
48Wihi us ilaabe, “Kamalda bal, abarteey ichoow walaalinyeteey a ayyo illeh?” 49Yeesso abattitiis dahan iooge, wihi us yidah “Abarteey ichoow walaalinyeteey kallaayo. 50A mehe eti tuummane wihi Aabbaheeyki serey jiro ꞌdoono yeelo, a walaalaaya, a walaassaaya, a abartaaya.”
Currently Selected:
Mattaayo 12: rel
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2018, Wycliffe Bible Translators, Inc. All rights reserved.