JƆN Yeemagonɛi
Yeemagonɛi
Ngowili yekpei Kenɛi Jɔn Nyɛini i Yesu lɔ luawo ma kɛ tamia Ngewɔ Yiei le kunafɔ, na “Woteni a nuuvui i heini mu lia.” Kia bukui i ndema la yɛ, ti Ngowili ji nyɛilɔ aako yeekaableisia ti gu ti lala kɛ Yesu lɔ Mbawomɔi le, na yɛni a Ngewɔ Hindoloi, tawao ti langaa a ngi ta kunafɔ lɛɛvui majɔlɔ (20.31)
Kona wiengɔi woma na i Yesu luawo ma kɛ tamia Ngewɔ nda Yiei a ngie kunafɔ, Ngowili ji yeembekei yeehaalayei ji goohu kanako gbotoa magɛngɔi na kɛma kɛ Yesu lɔ Mbawomɔi le Ngewɔ Hindoloi a ngie. Na wooma, kaaisia lɔ na ta hugɛ gbɔɔ yeekanako hindei jisia gɔlongɔ ma. Bukui yeembekei ji goohu lɔ hugɛma kia nungeisia lɛɛnga ti lani a Yesu ti woteni a ngi woomablaa, kɛ pekangaa ti loonga kpayangɔ ngi baahu ti ganga a lala a ngie. I gbuama ngui yeepuu mahu sawei ma a too yeepuu mahu wɔflei ma, pungɔi kɔlɔ ma hujɛmbɛngɔ kia mbaaya gomɛi yɛyii yɛ na Yesu tia ngi gaalopoisia ti houni kpɔkɔi ma ti wilani a ngi houla, i gbɛlɛ magbatɛi tia ndii nɛpɔ yɛpɛngaa ma i ndeni ti ma a kpɔkɔi na yeengele wongɔi ma ti ngi gbakpani krɔsii ma. Kɔlɛi ji yeekɛlɛma wuisia goohu ti yɛpɛilɔ kɔlooni Yesu houla ma kɛɛ ngi gbɛmbola, ngi gbakpalei ma kɛɛ ngi hiyelei ma hee hu, kɛɛ na ngi gbualei ma ngi gaalopoisia yaama ji i hiyeni i vulu hee hu.
Ndɔmii na kɔlooni nyahɛi ma puegbua labai i gulani ngi ma (8.1-11), ti puilɔ kalɛ blangɔisia goohu jifa kɔlɛisia ti gbotoma goohu kpɛingɔ nasia ma haala ti ngawoteni tii lali yeedɔmii ji hinda ma kulo bɛɛ, kɛɛ kɔlɔ wekeisia lɔ na ti lalima hinda wekeisia ti gɔlɛi hu.
Jɔn i laa liigbai lɔ kpekpeya hani na ma na yɛni a kunafɔ lɛɛvui ngi majɔɔlalɔ gbama va dangɔ Kristi sabui hu; yeekpekpeya hani ji yee nafɛi tɔtongɔ kiahuna lɔ ma, tawao a wa nasia lɔ gama ta luma Yesu wɛ kɛ pelei a taa, tɔnyɛi kɛɛ ndɛvui.
Na mahoungɔ gboŋ kenɛi Jɔn gɔlɔ nyɛingɔi hu tamia a haka gbamɛi nasia lɔ ma yenge la mu lɛɛvui hu, sia nyɔkɔ njɛi, bledii, fofoi, mbala mahugbemɔi taa ngi mbalangɛisia, kɛɛ na glepii wulii kɛɛ ngi wuɛi, i guilɔ i ti wumbu a tɔmaseli Ngewɔyɛi yeetɔnyɛisia hugɛ va.
NGUISIA KƆLƐI JI GOOHU
Yeemagonɛi 1.1-18
Jɔn Nguamɔi kɛɛ Yesu gaalopoi yeehaalayeisia 1.19-51
Yesu yenge lokoisia kpawama leeŋ 2.1—12.50
Kɛlɛma voleisia ma Jelusalɛm goohu kɛ yeekpalateisia hu 13.1—19.42
Ndemɔi hiyelei hee hu kɛɛ ngi gbualei nungaa yaama 20.1-31
Yeekɛlɛmɛi: gbua gaama wekei i pieni Galili lɔlei hu 21.1-25
Currently Selected:
JƆN Yeemagonɛi: MENNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mende New Testament © The Bible Society of Sierra Leone, 2002.