Mateu 19
19
Usu Jurdão ruaxara kiti
1Asui umbue rire kua inyenga Jesus uyuiri Galileya sui usu arama Jurdão ruaxara kiti Judeya kiti.
2Asui siya miraita usu sakakuera asui ape umburi aintasui mãsi.
Maitaa yamuyuiri yanesui yanerimiriku
3Asui aintauri ipiri yepeyepe farizewita aintauputari aintaukuawa maye umanduariwaa ape aintaumbeu ixupe:
—Maitaa apigawa upuderi umuyuiri isui ximiriku maa resewarantu?
4Asui Jesus umbeu ainta supe:
—Maitaa tipeleri maye uyupiru umunya apigawa kunya yuiri kua umunyawaa kua mundu?
5Asui umbeu ainta supe:
—Kuiri kuri uxari ipaya imaya yuiri uiku arama ximiriku irumu kua apigawa yepenyu arama kuri kuaita mukuĩwaita.
6Ape timaa mukuĩwaita ainta maa yepenyuana ainta. Asui kuaita Deus uxariwaita aintauiku aintapawa tiawa upuderi umutirika ainta.
7Asui aintaumbeu ixupe:
—Ape marantaa Muize umundu aintaumpinima papera aintaumuyuiriwaa rupiara aintarimiriku?
8Jesus umbeu ainta supe:
—Muize uxari pemuyuiri pesui perimiriku santa resewara pepia, maa timaa Deus uxari yawe uyupirungawa upe.
9Kuiri hambeu penye:
—Warixiwaa kua umuyuiriwaa isui ximiriku uiku arama amu kunya irumu tirame umunya isui puxi.
10Asui aintaumbeu Jesus supe kuaita umbuewaita:
—Aintauiku rame aintarimiriku irumu kuaye rembeuwaa yawe kuaita apigawaita asui purangate tiaintaumendari.
11Asui umbeu ainta supe:
—Tiaintaupuderi aintauruyari kua nyenga kuaita apigawaita panye, maa aintauruyari kuri kuaita haxariwaita aintauruyari ae.
12Nyãse yepeyepe unaseri eunuku ainta, asui yepeyepe apigawaita uxari eunuku ainta, asui yepeyepe aintauyuxari eunuku ainta sesewara kua iwaka ruixawa. Awa upuderi uruyari nyenga pexari uruyari ae.
Uabensuari tainaita
13Asui aintaururi Jesus ipiri tainaita uxari arama ipu aintarese upurandu arama ipaya irumu aintarese maa umbuewaita aintausaisu aintauri.
14Asui Jesus unyee ainta supe arama:
—Pexari aintauri sepiri kuaita tainaita, tepesaisu aintauri sepiri, nyãse iwaka ruixawa imiraita yawewaita ainta.
15Asui uxari rire ipu aintarese usuana.
Kurumiwasu rikuwaa
16Asui yepe uri umbeu ixupe:
—Inde umbuewaa maataa kuri hamunya purangawaa hariku arama mundu tiwa upawa?
17Jesus umbeu ixupe:
—Marantaa repurandu ixe sese kua purangawaa? Yepenyute purangawaa kua Deus, reputari rame rewike mundu tiwa upawa kiti remunya kuri kua Deus umuduwaa yamunya.
18Asui upurandu Jesus:
—Maataa? Jesus umbeu ixupe:
—Tereyuká mira, teresikari amu kunya nerimiriku sui, teremunda, tereganani amuita rese,
19Rerespetari nepaya nemaya yuiri, asui regustari neanamaita kuaye reyugustariwaa yawe indepawa.
20Asui kua kurumiwasu umbeu ixupe:
—Hamunyanate panye kua rembeuwaa; maa xingataa watari serunde?
21Asui Jesus umbeu ixupe:
—Reputari rame purangawaa inde resu revenderi panye nemaa remee arama kuri sikuyara pirasuawaita supe asui reriku kuri nemaa iwaka kiti, asui reyuiri serakakuera.
22Asui kua kurumiwasu usendu rire kua nyenga sasiyara uyuiri asui, nyãse rikuwaa ae.
Yawaite yanemaa uganani yande
23Asui Jesus umbeu ainta supe kuaita umbuewaita:
—Supiwa hambeu penye arama, iwasu yepe rikuwaa usikari arama suixawa arama kua iwaka ruixawa.
24Asui hambeu yuiri penye:
—Iwasuima xinga kamelu uwike awi resa kuara rupi kua rikuwaa usikari arama suixawa arama kua iwaka ruixawa.
25Umbuewaita aintausendu rame inyenga turusu aintaakayemu aintausendu ixupe. Asui aintaumbeu:
—Yawe rame maa, awataa upuderi uyumukaturu?
26Asui Jesus umaa ainta supe unyee:
—Apigawaita tiaintaupuderi, maa Deus upuderi.
27Asui Pedru unyee ixupe:
—Remaa yande yaxariana panye maa yasu arama nerakakuera; asui maitaa kuri yande?
28Asui Jesus umbeu ainta supe:
—Supiwa hambeu penye, nyã mundu pisasuwaa upe mairame kuri uwapika itrunu upe purangawaa kua unaseriwaa umaa kua ara penye usuwaita serakakuera pewapika kuri yuiri duziwaita trunu upe purangawaita pembeu arama aintaresewara kuaita duzi tribu Israelitaita.
29Asui muiri kuaita uxariwaita aintaruka seresewara, aintaimuita yuiri, aintarendiraita yuiri, aintapayaita yuiri, aintamayaita yuiri, aintarairaita yuiri, aintakupixawa yuiri, aintauriku kuri siyapiri isui kua aintauxariwaa serera resewara, asui aintauriku kuri mundu nunkawaa upawa.
30Asui siya kuaita uputariwaita aintarunde kitiwara ainta maa aintate aintarakakuerawara ainta, asui kuaita aintarakakuerawaraita aintate aintarunde kitiwaraita ainta.
Currently Selected:
Mateu 19: BBp
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO