Mateu 9
9
Umukaturu yepe imembekawaa ipira
1Asui uwiye igara upe usu arama lagu ruaxara kiti setama kiti.
2Asui aintaurasu Jesus ipiri yepe apigawa imembekawaa ipira uyenu uiku kama upe, asui Jesus umaa irumu mayetaa aintauxari aintapia sese umbeu ixupe kua imembekawaa ipira:
—Seraira suuri reiku hamburi nesui nepekadu.
3Asui yepeyepe umpinimawaita aintauyupurungita aintapawa aintaumbeu:
—Tenyuntu umbeuwaa kua apigawa.
4Asui Jesus ukuawa aintaumanduariwaa, ape umbeu ainta supe:
—Marantaa puxuwera pemanduari pepia upe?
5Maitaa iwasuima xinga hambeu hamburi nesui nepekadu u iwasuima xinga hambeu repuamu rewata?
6Kuiri haxari pekuawa arama upuderi umburi aintapekadu kuaita mundu puraita kua unaseriwaa umaa kua ara, asui umbeu ixupe kua imembekawaa:
—Repuamu repisika nekama resuana neruka kiti.
7Asui upuamu usuana suka kiti.
8Aintaumaa irumu Jesus umunya kua milagri aintausikie isui kua miraita siyawaita, asui aintaumee purangawaa Deus supe uxari resewara ukuawasawa kirimbawawaa apigawaita supe.
Usenui Mateu
9Asui Jesus usu irumu aintasui umaa yepe apigawa sera Mateu uwapika uiku kuleturia upe. Asui Jesus umbeu ixupe:
—Reyuiriana serakakuera, asui upuamu sakakuera.
Umbau publikanuita irumu
10Asui Jesus uwapikare uiku umbau uka upe aintauri ipiri siya publikanuita pekaduruita yuiri aintauwapika Jesus irumu umbuewaita yuiri.
11Kuaita farizewita umaa irumu aintaumbau Jesus irumu aintaumbeu umbuewaita supe:
—Marantaa umbau aintairumu kuaita publikanuita pekaduruita yuiri kua umbuewaa penye?
12Maa Jesus usendu irumu aintaupurungita, umbeu ainta supe:
—Timaa ikatuwaita usikari umpusangasara maa mãsiweraita aintausikari ae.
13Ape pemanduari sese mayesawataa kua inyenga:
—Haputari pirasua peyumaa, timaa haputari peirumu uvelya pesapi aramawaita, maa timaa hayuiri hasenui purangawaita maa hayuiri hasenui pekaduruita.
Marantaa aintauyukuaku
14Asui aintauri ipiri kuaita Juão umbuewaita aintaumbeu ixupe:
—Marantaa yayukuaku yande siya viaji kuaita yuiri farizewita maa timaa aintauyukuaku kuaita rembuewaita?
15Asui Jesus umbeu ainta supe:
—Maitaa aintaupuderi aintauiku sasiyara kuaita umaawaita kazamentu uiku ramere aintairumu kua nuivu? Maa yepe ara kuri aintaurasu aintasui kua nuivu, nyã ara upe kuri aintauyukuaku.
16Tiawa uremendari panu pisasuwaa irumu irupa kuximawara rese yawaite pisasua umusuruka kuximawara yawaite uxari turusu piri ikuara upita puxuwera.
17Tiyuiri yaxari vinyu pisasuwaa siru kuximawara upe uvelya pirera suiwarawaa yawaite usuruka siru yawaite vinyu uyuyusena yawaite siru uyumuaiwa, maa yaxari vinyu pisasua siru pisasuwaa upe puranga arama vinyu siru yuiri.
Serakuenawaa upurandu irumu
18Jesus upurungitare uiku ainta supe uri yepe serakuenawaa ipiri umunya benditu umbeu ixupe:
—Kuirintu umanu serayera reyuiriana rexari neipu sese upaka arama kuri ae.
Umukaturu yepe kunya
19Asui Jesus upuamu usu arama sakakuera kuaita yuiri umbuewaita.
20Asui yepe Kunya uri Jesus rakakuera duzi akayu upurara umaa tuwi, asui upisika Jesus irupa rakapira rese.
21Nyãse umbeuwana ipia upe hapisika rame irupa rese ape kuri purangana ixe.
22Asui Jesus uyereu umaa ixupe umbeu:
—Inde serayera, timaarese inde, rexariana nepia serese ape purangana inde. Aramete ikatuana kua kunya.
Usupiri umbaka Jairu rayera
23Asui Jesus uwike irumu serakuenawaa ruka upe umaa kuaita upeyuwaita membi kuaita yuiri uyaxiuwaita kirimbawa panye miraita irumu.
24Jesus umbeu ainta supe:
—Petirika timaa umanu kua taina anyunte ukiri uiku, asui aintaupuká sese.
25Asui umusemu rire kua miraita ukara kiti uwike uka upe upisika ipu rese, asui usupiri kua kunyatai.
26Asui aintausendu sesewara kua umunyawaa panye aintaretama kiti.
Umukaturu mukuĩ sesaimawaita
27Asui Jesus usuwaa upe aintasui, asui mukuĩ apigawaita sesaimawaita aintauri sakakuera aintausenui ae aintaumbeu ixupe:
—Inde Davi rimiariru pirasua remaa yande.
28Asui Jesus uwike rire uka upe aintauri ipiri kuaita apigawaita sesaimawaita, asui Jesus umbeu ainta supe:
—Maitaa pemanduari hapuderi hamunya penye arama kua peputariwaa seirumu? Asui aintausuaxara ae:
—Ẽẽ yaneruixawa, yaruyari.
29Ape uxari ipu aintaresa rese umbeu:
—Hamunya penye arama kuaye peruyariwaa yawe pepia upe.
30Asui aintaumaawana, asui Jesus umbeu ainta supe satambika:
—Kuiri pemaa pesui tiarama pexari amuita ukuawa kuayewaa perese.
31Maa aintauyuiri isui aintaumbeu sesewara panye tetama kiti.
Umukaturu yepe inyengaimawa urikuwaa demuniu
32Miraita usu irumu isui aintaururi ipiri yepe apigawa muduwaa uriku demuniu.
33Asui Jesus umburi rire isui kua demuniu upurungitana puranga kua muduwaa kuera, asui aintaakayemu aintaumaa Jesus kuaita miraita siyawaita, aintauyupurungita aintapawa:
—Tire awa umaa kuayewaa Israel upe.
34Maa kuaita farizewita aintaumbeu:
—Umburite demuniwita ukuawasawa irumu kua demuniu ruixawa.
Jesus umunya puranga
35Jesus uwata umaa panye aintaretama turusuwaita kuairawaita yuiri umbue ainta sinaguga upe umbue ainta kua inyenga purangawaa maye aintaruixawa arama kuri kua Deus. Asui Jesus umburi aintasui panye mãsi.
36Umaa irumu kuaita miraita siyawaita sasiyara ipia aintarese nyãse tiaintaupuderi aintauiku timaarese ainta aintauyusupariwaita ainta kuaye uvelya iyaraimawaa yawe.
37Asui umbeu ainta supe kuaita umbuewaita:
—Turusuwaa kua Deus upuuwaa rendawa maa muiriira kuaita upurakiwaita ixupe.
38Ape kuri pepurandu irumu kua upuuwaa ruixawa umundu arama upurakiwaita aintaupuu arama ixupe iyaraita.
Currently Selected:
Mateu 9: BBp
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO