Mateo 9
9
Jesupa sorek'ea bada jɨpada
Marco 2:1-12; Luca 5:17-26
1Jesú p'ãp'orrode batook'ari mãicha senia choma k'ĩaria wãk'ari ichi bapari p'uurudea chesima. 2Mãma ẽpẽra sorek'ea bɨt'a ẽpẽra uapataɨde Jesumá enemeesidama. Jesupa unusima ãchia piarã ĩjãa p'anɨ ichia chi sorek'ea bɨ p'ue jɨpa beepiit'a. Mãɨ k'orea Jesupa chi sorek'ea bɨa jarasima:
—Sõpia base, k'ũtã́. Pɨa nemietá ooda k'ɨ̃risia atuasima.
3Mãma Moisepa bɨda jarateapataɨrã waapẽarã p'anasidama. Mãɨrãpa k'ɨ̃risiasidama: «Ichia Tachi Ak'õre k'ĩrari piawẽa pedea bɨma». 4Maamina ãchia k'ɨ̃risia p'anɨ Jesupa k'awasima. Mãɨpuru jarasima:
—Mãrapa ¿k'ãre k'orea mãra sõne jãɨya piawẽa k'ɨ̃risia p'anɨma?#9:4 Griego pedeade chi eda waapẽarã k'art'ade ichiaba bɨ bɨma: Mãra sõne. 5Mãramá ¿chi sãɨ jarait'a chaarea bɨma? ¿Pɨa nemietá ooda k'ɨ̃risia atuayade ait'a wa p'irabarik'ari nipapade ait'a? 6Tachi Ak'õrepa mɨ, chi Ẽpẽra Warra bɨsima nãɨ ĩjũane p'anɨpa nemietá oopataɨ k'ɨ̃risia atuamẽrá. Mãɨ mãrá unupiipɨ.
Ara mãɨne chi sorek'ea bɨa nãɨya jarasima:
—P'irabarise. Pɨchi ne ẽpẽra uapataɨ atak'ari tiidá wãse.
7Ara mãɨne chi sorek'ea bada p'irabarik'ari tiidá wãsima. 8Mãɨ unusidaɨde chi mãma p'anana ne wap'easidama.#9:8 Ne wap'easidama. Griego pedeade chi eda waapẽarã k'art'ade bɨ bɨma: K'awa k'ɨ̃risiadaé pasima. Maamina Tachi Ak'õrea pia pedeasidama ichi jua chaareadepema ẽpẽrá teada, k'ak'ua piawẽa bee jɨpa beepimẽrá.
Jesupa Mateo t'ɨ̃na
Marco 2:13-17; Luca 5:27-32
9Jesú mãmãɨpa wãrune ẽpẽra Mateo apataɨ unusima. Mãɨ ẽpẽra chi Romanepema pae erreara jɨrɨp'eparí tede suak'abari basima. Jesupa Mateoa jarasima: «Mɨ ome chese».
Ara mãɨne Mateo p'irabarik'ari Jesú ome wãsima.
10Mãɨya bak'ari Jesú Mateo tede nek'o basima. Jesú ome p'ɨrrɨapataɨrã, Romanepema pae erreara jɨrɨp'epataɨrã mãɨnepa nemietá oopataɨrã Jesú ome nek'o p'anasidama. 11Waapẽarã p'ariseorãpa mãɨ unusidama. Mãɨ k'orea Jesú ome p'ɨrrɨapataɨrã́ idisidama:
—Mãra jarateaparí ¿k'ãre k'orea Romanepema pae erreara jɨrɨp'epataɨrã ome mãɨnepa waapẽarã nemietá oopataɨrã ome ará nek'oparima?
12Ãchia mãɨya idiuta Jesupa ũrik'ari jarasima:
—K'ak'ua pia berãpa nẽará teaparí jɨrɨdak'ama. Mãɨt'u chi k'ak'ua piawẽa berãpa jɨrɨpatama. 13Nãɨ pedea k'ãre jara bɨ k'awayá wãt'ɨ: “Ãnimara peadak'ari, mɨ pae paateadai k'aepẽra mɨa k'ɨ̃ria bɨma mãrapa waapẽarã k'ĩra chupuria p'ananait'a”.#Osea 6:6. Mɨ chi jĩp'a berã t'ɨ̃i k'orea chewẽa bɨma, mãɨpari nemietá oopataɨrãt'u t'ɨ̃ bɨma Tachi Ak'õremá chedamẽrá.#9:13 Tachi Ak'õremá chedamẽrá. Griego pedeade chi eda waapẽarã k'art'ade mãɨ newẽma.
Nek'odak'apɨ́ ewari k'orea jarateada
Marco 2:18-22; Luca 5:33-39
14Mãɨya bak'ari Juan chi Porochoaparí ome p'ɨrrɨapataɨrã Jesumá chedak'ari idisidama:
—Taipa mãɨnepa chi p'ariseorãpa Tachi Ak'õrene k'ɨ̃risiadayá nek'odak'apɨ́ ewari oopatama, maamina chi pɨ ome p'ɨrrɨapataɨrãpa ¿k'ãre k'orea mãɨya oodak'ama?
15Jesupa ãchiá jarasima:
—Ɨmɨk'ĩrapa wẽra atarude ¿k'ai sõp'ua baima? Mãɨ ɨmɨk'ĩra chi ichia t'ɨ̃narã ome bɨmisa arapá p'ananaipɨ. Maamina chi ewari ará parude waapẽarã ẽpẽerãpa ichi ãyá ateewãnaipɨ. Maapaepuru ichia t'ɨ̃narãpa Tachi Ak'õrene k'ɨ̃risiadayá nek'odak'apɨ́ ewari oodai.
16»Tachia neet'á sore k'õa bɨmá p'aru chiwidi ará k'osadak'ama. Mãɨya k'osadaipɨra, chi abaɨ jidibarirupa chi p'aru sore minachia atepe k'õawãipɨ. 17Ichiaba abaɨ pida uvaba chiwidi ãnimara e ooda chi sorede t'ɨɨdak'ama. Mãɨya oodaipɨra baak'ak'ari mãɨ ãnimara e ooda chota jĩawãipɨ. Maapae uvaba weawãipɨ mãɨnepa chi ãnimara e ooda ãriipɨ. Mãɨpuru uvaba chiwidi ãnimara e ooda chiwidide t'ɨɨdai p'anɨma. Mãɨya umea tãaraa choadaipɨ.#9:17 Mãɨne Jesupa k'awapisima ichi pedea ãchi chõarãenapema k'ɨ̃risia ome abarik'a ará jarateak'ama.
Jesupa wẽrak'au jɨpada
Marco 5:21-43; Luca 8:40-56
18Jesupa mãɨya jaratea bɨde judiorã chi mãɨrã chaareadepema chesima. Mãɨ ẽpẽra Jesú k'ĩrari bedabari k'obeek'ari jarasima:
—Mɨ k'au arat'ea k'ĩrawẽasima. Maamina pɨ wãk'ari pɨ jua ichi ɨ̃rɨ bɨsira ɨ̃rɨmaipɨ.
19Jesú p'irabarik'ari mãɨ ẽpẽra ome wãsima. Chi ichi ome p'ɨrrɨapataɨrã sida wãsidama. 20Mãɨ wãrune wẽra aba ãyo k'ak'o doce oamia jita bɨpa Jesú ãpɨtepa ara k'ait'a wãk'ari, ichi neet'á ɨ̃rɨpema chi i t'õmarisima. 21Mãɨya oosima ichia chi Jesú neet'á ɨ̃rɨpema t'õmarirupa jɨpa beei k'ɨ̃risia bada pẽra. 22Maamina mãɨya t'õmariside, Jesupa ãpɨtea ak'ɨk'ari, mãɨya jarasima mãɨ wẽrá:
—K'au, arapaase. Piarã jɨpa beeit'a ĩjãana pẽra pɨ jɨpa beesima.
Ara mãɨne mãɨ wẽra pia beesima.
23Jesú judiorã chi chaarea bɨ tede cheside siru chaapataɨrã mãɨnepa jẽapataɨrã unusima.#9:23 Israel ĩjũanepemarãpa siru chaapataɨrã́ mãɨnepa jẽapataɨrã́ erreara teapachidama k'aripa jẽane chedamẽrá. 24Jesupa ãchiá jarasima:
—Ãyá wãt'ɨ. Wẽrak'au piuwẽa bɨma, mãɨpari k'ãi bɨma.
Mãɨ k'orea ẽpẽrarãpa ichimá ak'ɨdak'ari eesidama. 25Maamina ẽpẽrarã ãyá jeret'aak'oak'ari Jesú tiida eda wãsima. Maapae wẽrak'au juade jitak'ari k'ĩrapapisima. 26Jesupa ooda k'orea ãarea mãɨ tuade ũrisidama.
Jesupa tau p'ãrio p'anana jɨpak'oa bada
27Jesú mãmãɨpa wãside tau p'ãrio p'anana ume ichi k'aade bia chesidama. Mãɨ ẽpẽrarãpa jĩk'ua jarasidama:
—¡Jesú, Davidepa cheda, tai k'ĩra chupuriase!
28Jesú tiida eda wãside mãɨ tau p'ãrio p'anɨ ichimá chesidama. Maapae Jesupa ãchiá idisima:
—¿Mãrapa piarã ĩjãa p'anɨk'ãra mɨa mãra p'ue jɨpa beepiit'a?
Ãchia p'anoosidama:
—Ãjã, tai Chipari.
29Maapae Jesupa ãchi taude t'õmarik'ari jarasima:
—Mãrapa ĩjãa p'anɨ jĩra mɨa ooipɨ.
30Ara mãɨne unu p'aneesidama. Maapae Jesupa ũraasima mãɨ abaɨ pida nepɨrɨpidaemaapa. 31Maamina mãmapema wãnak'ari Jesupa ãchi ome ooda jõma mãɨ tuade jarade wãsidama.
32Mãɨ tau p'ãrio p'anana wãutade waapẽarãpa ẽpẽra k'ĩrame t'urrá bɨ jaore mietá pará bɨ enemeesidama. 33Jesupa mãɨ jaore mietá jeret'aak'ari ẽpẽra k'ĩrame t'urrá badapa pedeasima. Ẽpẽrarã mãma p'anɨpa k'awa k'ɨ̃risiadaé pasima. Nãɨya jarasidama:
—Israel tuade waidi nãɨ jĩra ununak'a pasima.
34Maamina p'ariseorãpa jarasidama:
—Jãɨ Jesupa jaore mietá ãyá jeret'aaparima, jaore mietaarã chi atepe bɨpa ichiá mãɨ jua chaarea teada pẽra.
Ne uu chauk'ari ¿k'aipa baadaima?
35Mãɨya bak'ari Jesú p'uuru waibɨa becha mãɨnepa p'uuru chak'e bemá p'ɨrrɨa wãsima. Judiorã ará pedeapataɨ techa jarapachima Tachi Ak'õrepa ichidirã ichi juade ua bɨ k'orea. Ichiaba mãɨ pedea pia jaratea nipasima jõma k'ak'ua piawẽa berã mãɨnepa k'ak'ua p'ua be jɨpa beepik'oasima. 36Ẽpẽrarã ará minachia nɨbɨ unuk'ari, sõchupuriasima, ãchi chupuria, k'ĩra piaawẽa para bada pẽra, oveja chi ak'ɨparí newẽa p'anɨ jĩra p'anana pẽra.#Número 27:15-17. 37Mãɨne ichi ome p'ɨrrɨapataɨrã́ nãɨya jarasima:
—Piarã nãɨ ẽpẽrarã ne uu minachia chau nɨbapari jĩra p'anɨma. Maamina chi mimiapataɨrã waibɨawẽa p'anɨma. 38Mãɨpuru chi ne uu ĩjũa Chiparia ɨt'aa chiidit'ɨ mimiapataɨrã ichi ne uu ĩjũamá peemẽrá.
Currently Selected:
Mateo 9: tdc
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© (Active), Wycliffe Bible Translators, Inc. All rights reserved.