युहन्ना 1
1
सुरवातीमेहे वचन ओतो
1सुरवातीमेहे वचन ओतो, अने वचन परमेश्वरोओ आरी ओतो, अने वचन परमेश्वर ओतु. 2तोज सुरवाती मेहे परमेश्वरा आरी ओतु. 3आखो काही त्यापोरत उत्पन्न ओवयो, अने जे किबी उत्पन्न उवे होय तियाआ मायरोत कोडली पण वस्तू तियाआ शिवाय उत्पन्न उवी नाहा. 4तीयाम जीवोन ओते अने जीवोन माअहा प्रकाश ओतु. 5प्रकाश आंदाराम सोमकीतलु, अने आंदारो तीयाहा ग्रहण नाहा कोअयो. 6एक मांहु परमेश्वरा त्यापोरोत ओवयू ज्याआ नाव योहान ओते. 7तो साक्ष आपुहू आवयू का तो उजवोडाआ साक्ष आप्यी, काहाके आखे तियाआ त्यापोरत विश्वासामेहे आवे. 8युहन्ना स्वताहा प्रकाश ने ओतू, परंतु तियाअ उजवोडाआ साक्ष आपुहू आवयू होय. 9खोरो प्रकाश जो हर एक मांहाहा प्रकाशाम कोअत्लू, जगात आविलो ओतु. 10तो जगात ओतु, अने जग तियाआ त्यापोरत उत्पन्न उवे, अने जगोवाही तियाहा ओलखे नाहा. 11तो आपाआ कोअ आवयू अने तियाहा तियाआ कोऱ्यावाही ग्रहण कोअयु नाहा. 12परंतु जेते तियाहा ग्रहण कोल्यु, तिये तियाहा परमेश्वरोओ पोऱ्ये उविला अधिकार आप्यू होय, अर्थात तियाहा जे तियाआ नावापो विश्वास कोअत्ले. 13ते नाहा रक्ताआ, नाहा डीलोओ इच्छावाहि नाहा मांहाहा इच्छावाहि परंतु परमेश्वरा त्यापोरोत उत्पन्न उवे होय. 14अने वचन देहधारी उवे; अने अनुग्रह अने खोरावाही पुरो ओतगोयु आमा माय रोला, अने आमाहा तियाआ एहलो गौरव पालील्यो, जेहलो का बाह्हाआ एखली होमला ची महिमा. 15योहानाई तियाआ विषया माय साक्ष आप्यी अने आयडीत कोयु, “ओ तोज होय, ज्याआ आय वर्णन कोल्यु का जो माआ नंतर आविलो होय तो मापो रोत वोडीत होय काहकी तो माआ पेक्षा पेल्लु ओतु.” 16काहाके तियाआ परिपूर्ती आमाहा आखाज जोडयो कोअयी होय अनुग्रहापो अनुग्रह. 17याआ याकोअता का नियमशास्त्र मोशेए त्यापोरत आप्लु गोये होय, परंतु अनुग्रह अने खोरो पणा येशु ख्रिस्ता त्यापोरत पुगी. 18परमेश्वरोओ कोडु केधीज नाहा पालील्यो, एखलूच एक पुत्र जो बाह्हाआ जागे होय यांहि तियाहा प्रगट कोल्यु.
युहन्ना बाप्तिस्मा आपनाराआ गवाही
(मत्ती 3.1-12; मरकुस 1.1-8; लूका 3.1-9,15-17)
19योहानाहा साक्ष ए होय का तेहलाम यहुदीयाआ यरूशलेम मायरोत याजकांवाही अने लेवी तियाहा ओ फुसिला याकोअता मोकल्ये, “तू कोडू होय?” 20ताहा तिये ओ होमजीत लेधलो अने नाकार कोअयु नाहा, परंतु होमजीत लेधलो, “आय ख्रिस्त नाहा.” 21तेहलाम तिये तियाहा फ़ुस्ल्याआ, “ताहा फासाडी कोडू होय? कि तू एलिया होय?” तोओ कोयु “आय नाहा होय” “ताहा कि तू भविष्यवक्ता होय” “तोओ उत्तर आप्लु,” “नाहा” 22तेहलाम तिये तियाहा फ़ुस्ल्याआ, “ताहरु तू कोडू होय काहाके आमाहा आपाआ मोकलीनाराहा उत्तर आप्लु, तू आपाआ विषया माय कि कोत्लू.” 23तिये कोयु, जेहलो यशायाह भविष्यवक्त्यावांही कोयु होय आय जंगलूम आअडीनाराआ शब्द होय का तुमु प्रभू चा मार्ग हीदू को; 24ते परुश्या त्यापोरोत मोकल्ये गोये ओते. 25तिये तियाहा ओ प्रश्न फुसल्या, “केधी तू ख्रिस्त नाहा, अने नाहा एलिया अने नाहा तो भविष्यवक्ता होय, ताहा फासाडी बाप्तिस्मे काहा आपोहो?” 26योहानाई तियाहा उत्तर आप्लु, “आयताहा पायोंवाही बाप्तिस्मे आपोहो, परंतु आमा माय एक माहहू उबु होय ज्याहा तुमु उलखित्लू नाहा. 27अर्थात माआ फासाडी आविलो होय, तियाआ बुटाची दोरी आय सोडवीलाआ योग्य नाहा.” 28याआ गोठी यार्देन नदीच्या पार बेथानी माय ओवल्यु, जीही योहान बाप्तिस्मे आपित ओतु.
परमेश्वरोओ मेंड़ो
29दिहरा तेदीही तिये येशुहू आपाआ जागे आवातल्या पालीत कोयु, “पाला ओ परमेश्वरोओ कोकरू होय जे जगोआ पाप विसित लेहो.” 30ओ तोज होय का ज्याआ विषयामे आय कोयु ओते, एक मांहु माआ फासाडी आवीत होय तो माआ पेक्षा श्रेष्ठ होय, काहाके तो माआ आगाडी चा ओतु. 31आयताहा तियाहा उलखित्लू ने ओतू, परंतु आय याकोअता पअयोंवाही बाप्तिस्मे आपित आवयू का तो इस्राएल उपो प्रगट ओतगोयु जाय. 32अने यूहन्ना ए साक्ष आप्यी आय आत्माहा कबूतरो होस जुगोमोरत उतरीलावेले पालील्यो, अने तो तियाआ उपो थोबिलो गोल्यो. 33आयताहा तियाहा ओलखे नाहा, परंतु जीआ माहु पाअयोवांही बाप्तिस्मे आपलो कोअता मोकल्ये, तिये माहु कोयु, ज्यापो तू आत्माहा उतरीलावेले अने थोबेताहू पालील्यो,, तो पवित्र आत्माआ बाप्तिस्मा आपी होय 34अने आय पालील्यो अने साक्ष आप्यी का ओ परमेश्वरोओ पोऱ्या होय.
येशुउ पेल्लाआ चेला
35दिहरा तेदीही फासाडी योहान अने तियाआ शिष्या मायरोत बेन जोओ उभे रोल्या ओते, 36अने तिये येशु जागे जात ओतु पालीत, कोयु, “पाला ओ परमेश्वरोओ कोकरू होय.” 37तेहलाम ते बेनु शिष्य तियाआ ओ होमलित येशुउ फासाडी आव्ये. 38येशु लेतजा वोलीत तियाहा फासाडी आवातल्या पालील्यो अने तियाहा कोयु तुमु कोडाआ होदिअलो होय “तिये तियाहा कोयु, ओ रब्बी (अर्थात गुरु) तू कोठे रोतलू?” 39तिये तियाहा कोयु, “साला ताहा पालीत लेहु.” तेहलाम ते जात तियाआ रोलो ठिकाण पालील्यो, अने तियाअ दिहोम तियाआ आरी रोल्या अने दहा तासा आसेपासे ओते. 40तियाअ दिहे माय जे योहानाहा गोठी होम्लाडित येशु च्या फासाडी आव्ये ओते, एक शिमोन पेत्राचा पाही आंद्रिया ओतु. 41तिये पालील्यो आपाआ आरी पाही शिमोनाहा मिलित तियाहा कोयु, “आमाहा ख्रिस्त अर्थात येशु ख्रिस्त, मिल्यू.” 42तो तियाहा येशु जागे लेत आवयू येशु तियाहा नजर लागाडी कोयु, “तू यूहन्नाआ पुत्र शिमोन होय.” तू कैफा अर्थात पेत्र कोअहो जाय.
फिलिप्पुस अने नतनेलोहो हादयु
43दिहरा तेदीही येशु लेतजा गालीला मेहे जाअला ठेरवीही तो फिलीप्प ला मिल्यू अने कोयु, “माआ फासाडी आव.” 44फिलीप्प, आंद्रिया अने पेत्रा च्या नगरामे बेथसैदा चा रोनारू ओतु. 45फिलीप्प नथवेल ला मिल्यू अने तियाहा कोयु, “ज्याआ वर्णन मोशे नि नियम शास्त्रात अने भविष्य वक्तांवाही कोल्यु होय, तो आमाहा मिल्यू होय; तो योसेफाआ पोऱ्या, येशु नासरी होय.” 46नथवेल नि तियाहा कोयू, “नाहाकोत किबी हाजी वस्तू पण नासरेथ उसेरोत निहुं शकली?” फिलीप्प तियाहा कोयु, “जात पालीत ले.” 47येशु लेतजा नतनएल ला तियाआ जागे आवातल्या पालीत तियाआ विषया माय बोलतुल्यो, “पाला, ओ खरोज इस्राएली होय तीयाम कपट नाहा.” 48नथवेलाने तियाहा कोयु, “तू माहु केहलो नाहाकोत ओलखीत्लू?” येशु तियाहा उत्तर आप्लु, “तिया आगाडी का फिलीप्प माहु हादाडीही, जांहा तू अंजिराआ बाहा निसे थोब ला ओतु, तेहलाम आय ताहु पाल्यो उवनारा.” 49नथवेल नि तियाहा उत्तर आप्लु, “हे रब्बी, तू परमेश्वरोओ पोऱ्या होय; तू इस्राएल चा राजा होय.” 50येशु तियाहा उत्तर आप्लु, “आय जे किबी ताहु कोयु का आयतांहु अंजिराआ साडो निसे पालील्यो, नाहाकोत तू याआ याकोअता विश्वास कोअत्लू? तू याआ पेक्षा वोडो-वोडो काम पालही.” 51ताहरु येशु माहु कोयु, “आय तुमाआ खोरो-खोरो कोत्लू का तुमु स्वर्गाआ उघड लेला, अने परमेश्वरोओ पुत्राच्या स्वर्गदूतो माअहा पोऱ्याच्या उसे उतरीलावेले अने उसे जाआत्लू पालील्यो.”
Currently Selected:
युहन्ना 1: NOINT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.