मर्कुस 11
11
येसुके राजा मानिकुन मानमन्ता कर्ल
(मति २१:१-११; लुका १९:२८-४०; युहन्ना १२:१२-१९)
1जब ओनेन्सब यरुसलेम नजिकइ जइतुन डाँडाक बेथफागे र बेथानिया गाउयँ पुगिकेभइल, तब ओनेनेइ आफ्न चेलासबमद्धे दुइ जेनाके यस्न कइकुन पाठाइकेभइल, 2“नजिकइक गाउयँ जाओ, उसे गाउयँ पुग्ल बिथिकइ तोहेसब बाधिराख्ल एक्टा गधाक बछेडा भेट्ताहाउ, जोक्र उप्र यख्निसमन कोलोउ पुनु नइजेचढ्ल बाटइ, उख्राके फुच्काइकुन इछि आनउ। 3उछिका कोलोउयेइ ‘इसे किति कार्ते?’ कइकुन पुछ्नेपार, ‘इसे बछेडा प्रभुके चाहाल बाटइ, ओनेनेइ चाडइ नइ फर्काइ देताहात्’ कहउ।”
4उसब जइल, हसे एक्टा घर बाहारक केवारि आघु खुल्ला पइडायँ बाधिराख्ल बछेडा भेट्ल। र उख्राके फुच्काल, 5उछिका नजिकइ ठोडेलाहार मद्धे कोलोउ-कोलोउयेइ पुछ्ल, “तोहेसब बछेडाके फुच्काइकुन किति कार्ते बाटउ?”
6येसुइ कहिकेभइल जस्नइ उसबेइ कहलपाछु, मानुससबेइ उसब्के जाइके देल। 7हसे उसबेइ बछेडाके येसुकलघि आनिकुन, आफ्न लुगासब बछेडाउप्र डासाइदेल, र ओनेन् उक्रउप्र चढिकेभइल। 8धेरइ मानुससबेइ आ-आफ्न लुगासब र कत्काइ चाहिँ सेउलासब काटिकुन पइडायँ डास्ल। 9हसे ओनेन्क आघु र पाछु हिठ्लाहार मानुससबेइ यस्न कहतिन् जयजयकार करिके थाल्ल,
“होसन्ना!
परमप्रभुक नाउयँ आइकेभइलाहार, धन्यक बाटत।
10हाम्र बुबा दाउदक अइलाहार राज्जे धन्य भउस्,
सोर्गयँ बोसिकेभइल परमेसोरके होसन्ना!”
11जब येसु यरुसलेम पुगिकेभइल, तब मन्दिरभितर पोसिकेभइल। हसे ओनेनेइ चारिओर चाहिसक्लपाछु, अबेर भइलगुनेइ बाह्र जेनाके लेइकुन बेथानिया जाइकेभइल।
नेभाराक रुख
(मति २१:१८-१९)
12कालुपल्ट ओनेन्सब बेथानियाकमाटे फर्किकुन अइतेखना येसुके भुखाल रहइ। 13हसे येसुइ टाढोहिँसे झेम्मइ पोर्ल नेभाराक रुख देखिकेभइल। उसे बेला नेभारा पाक्लाहार बेला नइजेभइते पुनु ओनेन् उसे रुखयँ बतिलासतिला बाटइ कि कइकुन चाहिके जाइकेभइल, तर उछिका पात मत्रइ रहइ। 14येसुइ उसे रुखके कहिकेभइल, “आबेसे कोलोउयेइ पुनु तेरमाटे फोर झुनखाउस्।” हसे इसे कुरा ओनेन्क चेलासबेइ पुनु सुन्ल।
येसु मन्दिरयँ
(मति २१:१२-१७; लुका १९:४५-४८; युहन्ना २:१३-२२)
15यरुसलेम पुगिके भइलपाछु ओनेन् मन्दिरभितर पोसिकेभइल। उछिका किनबेच कर्लाहार सभइके बाहार निस्काइकेभइल, हसे पइसा साट्लाहार टेबुलसब र परेवा बेचिके बोस्लाहार पिह्रासब पुनु पल्टाइ देइकेभइल। 16ओनेनेइ मन्दिरभितर कोख्राहुके पुनु किनबेच करिके नइजेदेइकेभइल। 17हसे ओनेनेइ सिछ्या देतिन् कहिकेभइल, “किति धर्मक कितापयँ यस्न लेख्ल नइजे से, ‘मेर घर सभइ जातसब्क लागि पार्थानाक घर कताहात्?’ तर तोहेसबेइ त इख्राके डाकुसब्क ओडार बानाल बाटउ।”
18जब इसे कुरा मुक्खे पुजेहेरिसब र धर्मगुरुसबेइ सुन्ल, तब उसबेइ येसुके कस्के मारिके कइकुन उपाय खोजिके थाल्ल। तर उसब ओनेन्साङ डाराते रहत किकेकने सभइ भिडसब ओनेन्क सिछ्यायँ छक्क पोर्ल रहत।
19जब ब्यार भइल, तब येसु र ओनेन्क चेलासब सहरकमाटे बाहार जाइकेभइल।
नेभाराक रुखकमाटे सिछ्या
(मति २१:२०-२२)
20कालुपल्ट बेहेनिहिँ उहइ पइडा भइकुन जइतेखना, ओनेन्सबेइ उहइ नेभाराक रुखके जह्रिसे सुखाल देखिकेभइल। 21हसे येसुइ कहिकेभइल कुराके सम्झिकुन पत्रुसेइ कहल, “रब्बि, चाहिके हबखाइ न, तोहे सराप देइकेभइल नेभाराक रुख त सुखाल बाटइ।”
22येसुइ चेलासब्के कहिकेभइल, “परमेसोरके बिस्वास करुक्। 23साच्चिकइ मोइ तेउह्रासब्के कहतम्, यदि कोलोउयेइ आफ्न मनयँ सङ्खा नकरिकुन आफुइ सोच्ल कुरासब पुरा भइत कइकुन, बिस्वासक साथ इसे डाँडाके ‘तोइ उख्निकुन समुन्रयँ खसुक्’ कहने पुनु, उक्र लागि ओस्नइ भइत। 24उहइगुनेइ मोइ तेउह्रासब्के कहतम्, तोहेसब पार्थानायँ जिति माङ्ताहाउ उसे पाइसक्ल बाटम कइकुन बिस्वास करउ, हसे उसे तेउह्रसब्क भइत। 25जब तोहेसब पार्थाना करिके ठोडेताहाउ, तब कोख्राहुसे नइजेराम्र भइल बाटइ कने उख्राके छेमा देओ, ताकि सोर्गयँ बोसिकेभइल परमेसोर बुबाइ पुनु तेउह्रसब्क पाप छेमा करिदेउस्। 26[तर तोहेसबेइ छेमा नाकरउ कने, परमेसोर बुबाइ पुनु तेउह्रसब्क पाप छेमा नाकरत्।”]
येसुक अधिकारक बारेयँ प्रस्न
(मति २१:२३-२७; लुका २०:१-८)
27येसु र ओनेन्क चेलासब फेरि यरुसलेमयँ आइकेभइल। र ओनेन् मन्दिरक ओरिपोरि हिठिराख्ते बेलाके मुक्खे पुजेहेरिसब, धर्मगुरुसब र अगुवासब ओनेन्कलघि अइल। 28हसे उसबेइ ओनेन्के पुछिकेभइल, “तोहे कोनो अधिकारकमाटे इसे कामसब कर्तिन बाटउ? तेउह्राके कोनेइ अधिकार देल?”
29येसुइ उसब्के कहिकेभइल, “मोइ तेउह्रासब्के एक्टा प्रस्न पुछ्तम्, यदि मेह्राके उत्तर देताहाउ कने, मोइ कोनो अधिकारकमाटे इसे कामसब कर्तिन बाटम उसे तेउह्रासब्के बातातम्। 30लु कहउ त, युहन्नाइ देल बप्तिस्मा परमेसोरकमाटे कि मानुसकमाटे?”
31हसे उसब एक-अर्कसाङ कुरा करिके थाल्ल, “आबे हामे किति कहिके? यदि ‘परमेसोरकमाटे’ कहउ कने, ‘तोहेसबेइ किके उख्राके बिस्वास नइजेकर्ल’ कइकुन पुछ्ताहात्। 32‘मानुसकमाटे’ कहउ कने कस्के कहिके?” यस्न कहिके उसब जनतासे डाराल, किकेकने सभुनि युहन्नाके साच्चिकइ अगमबक्ता कइकुन बिस्वास कर्तेरहत। 33उहइगुनेइ उसबेइ ओनेन्के जबाफ देतिन् कहल, “खइ, हाम्राके थाहाइ नइजे।”
हसे येसुइ उसब्के कहिकेभइल, “ओसेकने मोइ पुनु कोनो अधिकारसे इसे कामसब कर्तिन बाटम तेउह्रासब्के नाकहम्।”
Currently Selected:
मर्कुस 11: DRY
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2024 (Active), Mother Tongue Translators Society and Wycliffe Bible Translators, Inc. All rights reserved.