मर्कुस 13
13
अन्तिम दिनक चिना
(मति २४:१-१४; लुका २१:५-१९)
1जब येसु मन्दिरकमाटे बाहार निस्कतिन रहत, तब ओनेन्क एक जेना चेलाइ ओनेन्के कहल, “गुरुजिउ, इसे मन्दिरके चाहिके हबखाइ न बड्क-बड्क पाथरेइ बन्ल अचम्मक भबनसब!”
2हसे येसुइ उख्राके कहिकेभइल, “तोइ इसे भबनक यस्न प्रसम्सा कर्ते बाटस्? इसे सभइ भबन एक्टा पाथरउप्र अर्क पाथर नइजेरहलार करिकुन भत्काइत्।”
3उपाछु ओनेन् मन्दिर ओपारे जइतुन डाँडायँ बोसिके भइल बेलायँ पत्रुस, याकुब, युहन्ना र अन्द्रियास आइकुन ओनेन्के सुटुक्कइ पुछ्ल, 4“हाम्राके कहिके हबखाइ, इसे घटनासब कइह्या घटित्? हसे घटनासब पुरा भइके कस्न चिनासब देखार पोरित?”
5हसे येसुइ उसब्के कहिकेभइल, “होसियार रहउ, कोलोउयेइ पुनु तेउह्रासब्के झुन् झुक्केउस। 6धेरइ जेना मेर नाउयँ ‘मोइ ख्रिस्ट हखम’ कहतिन् अइताहात्, र धेरइके झुक्केताहात्। 7जब लडाइ र लडाइक हल्ला सुन्ताहाउ, तब तोहेसब झुनडाराओ। किकेकने यस्न घटनासब भइके नइ पोरित, तर सन्सारक अन्ते चाहिँ नाभओइ। 8जातक बिरोधयँ जात र राज्जेक बिरोधयँ राज्य उठित। धेरइ ठाउयँ भुइचाल जाइत, र अनिकाल पोरित। इसे चाहिँ बेटिसब्के सुत्केरि बेथा सुरु भइल जस्नइ दुखक सुरुवात हखइ।
9 “तोहेसब चाहिँ होसियार रहउ। मेह्राके बिस्वास कर्लगुनेइ उसबेइ तेउह्रासब्के अदालतयँ लेज्ताहात्, र सभाघरयँ लेजिकुन ठोक्ताहात्। हसे तोहेसबेइ हाकिमसब र राजासब्क आघु मेर बारेयँ गवाहि देइके खडा भइकेपोरित। 10तर अन्तिम दिन आइकेकते आघु सभइ जातसब्के सुसमचार प्रचार करिके पोरित। 11जब उसबेइ तेउह्रासब्के धरिकुन मुद्दा चालाताहात्, तब आघुहिँसे नइ किति बोराइके हखइ कइकुन चिन्ता झुनकरउ। उसे बेला जिति तेउह्रासब्के देइत, उहइ मत्रइ बोराओ किकेकने तोहेसब नइजे, तर पबित्र आत्मा बोराताहात्। 12उसे बेला एक्टा भाइ अर्क भाइके र बुबाइ छाहोके मारिके सोपिदेइत्। ओसिनकरिकुन छावासबेइ पुनु उइया र बुबासब्क बिरोधयँ खडा भइकुन मारिके लागाइत्। 13हसे मेह्राके बिस्वास कर्लगुनेइ तेउह्रासब्के सभुनि हेला कर्ताहात्, तर जिबनक अन्तिम दिनसमन स्थिर रहलारसब्के बाचाताहात्।
डाराउनो दुखक समय
(मति २४:१५-२८; लुका २१:२०-२४)
14 “जब तोहेसब नास कर्लाहार घिनाउनो थोक जुछि नइजेभइके पोर्लाहार उहइ ठाउयँ ठोडेल देख्ताहाउ,” इक्र अर्थ पढ्लाहारइ बुझुस्, “तब यहुदियायँ भइलाहारसब डाँडापटि भागुस।” 15हसे घरक कउसियँ भइलाहारसब हेठ झरिकुन घरभितर सामानसब लेइके पुनु झुन् पोसुस्। 16खेतबारियँ भइलाहारसब कोम्रि लेइके पाछु झुनफर्कुस। 17उसे दिनयँ पाउलाहारि र दुद खावालाहारि उइयासब्के झन कस्न गाह्र भइत हबाहाइ! 18यस्न कुरासब जाडाउनो मइनायँ झुनपोरुस कइकुन पार्थाना करउ। 19किकेकने उसे बेलायँ ओस्न डाराउनो दुख आइपोरित कि जोनो परमेसोरेइ करिकेभइल सिरिस्टिक सुरुसे आजुसमन न त भइल बाटइ, न त पाछु नइ भइत। 20यदि परमेसोरेइ उसे कस्टक दिनसब नइजे घाटाल भइने त कोलोउ मानुस पुनु बाचिके नइजे सक्लारत्, तर ओनेनेइ छान्लसब्क लागि उसे दिनसब घाटाइकेभइल बाटत।
21 “उसेबेला कोलोउयेइ तेउह्रासब्के ‘चाहुक् त, ख्रिस्ट एते बाटत’ अथबा ‘ओते बाटत’ कहने पुनु बिस्वास झुनकरउ। 22किकेकने ओस्न झुठा ख्रिस्ट र झुठा अगमबक्तासब देखार पोरिकुन सकेसमन परमेसोरक मानुससब्के समेत झुक्काइके लागि बड्क-बड्क चिना र अचम्मक कामसब कर्ताहात्। 23उहइगुनेइ होसियार भइकुन बोसउ। सभइ कुरा मोइ आघुहिँसे कहतिन् अइल बाटम।
मानुसक छावा अइलाहार बेला
(मति २३:२९-३१; लुका २१:२५-२८)
24 “उसे बड्क कस्टक बेलायँ घाम र धवरेइ उजुङ नादेओइ। 25हसे आकासक तिरियासब खसित् र आकासक सक्तिसब डग्मगाइत। 26उपाछु मानुसक छावाके बड्क सक्ति र महिमासाङ बाद्रियँ आइरहल मानुससबेइ देख्ताहात। 27हसे ओनेनेइ सोर्गदुतसब्के पाठाइकुन पिर्थिबि र आकासक चारिओर कोन्धोरसे आफ्न छान्लसब्के जम्मा कर्ताहात्।
नेभाराक रुखकमाटे सिछ्या
(मति २४:३२-३५; लुका २१:२९-३३)
28 “आबे नेभाराक रुखक काथासे केहाउ कुरा सिखउ। जब उक्र हाङ्गासब टुसा पालाइकुन पालुवा घालित, तब तोहेसब बर्खा नजिकइ अइल बाटइ कलाहार थाहा पाउताहाउ। 29ओसिनकरिकुन जब इसे घटनासब भइरहल देख्ताहाउ, तब मानुसक छावा अइलाहार बेला भइसक्ल कइकुन जानउ। 30साच्चिकइ मोइ तेउह्रासब्के कहतम्, इसे सभइ कुरा पुरा नइजेभइलसमन इसे पुस्ता नाबितइ। 31सोर्ग र पिर्थिबि बितिकुन जाइत, तर मेर बचन कइह्याउ नाबितइ।
जग्लइ बोसउ
(मति २४:३६-४४; लुका १२:३८,४०)
32 “तर उसे दिन र बेलाक बारेयँ परमेसोर बुबाके बाहेक कोख्राहुके थाहाइ नइजे, न त सोर्गयँ भइल सोर्गदुतसब्के न त छावाके। 33उहइगुनेइ होसियार भइकुन जग्लइ बोसउ, किकेकने उसे बेला कइह्या आइत कइकुन तेउह्रासब्के थाहा नइजे बाटइ। 34इसे त मालिकेइ आफ्न नोकरसब्के बिदेस जाइकेकते आघु, घरक सभइ काम र जिम्मेवारि देइकुन, पालेके चाहिँ जग्लइ बोसिसाइ कइकुन देल आग्या जस्नइ हखइ। 35उहइगुनेइ तोहेसब पुनु जग्लइ बोसउ, किकेकने घरक मालिक ब्यार, आधा रातयँ, भाले बास्ते, अथबा बेहेन कोनो बेला अइताहात्, तोहेसब नाजानउ। 36नत्र उसे अन्चक्लइ अइतेखना तेउह्रासब्के निन्दाइराख्ल भेट्बक। 37मोइ तेउह्रासब्के जिति कहल बाटम, उसे सभइके कहतम् ‘जग्लइ बोसउ।’”
Currently Selected:
मर्कुस 13: DRY
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2024 (Active), Mother Tongue Translators Society and Wycliffe Bible Translators, Inc. All rights reserved.