SAN JUAN 2
2
Reꞌ pe̱t lokꞌ laj nawa̱l xiban i Jesus pan jenaj caxarahil
1Xib ok chic kꞌi̱j kꞌoꞌronak cho Jesus ru̱cꞌ i Natanahel, xbanaric jenaj ninkꞌi̱j reh caxarahil ar Canah pa riyukꞌul i Calile̱ya, reꞌ yukꞌumaj ponok wi̱ꞌ i Mari̱ya reꞌ ritu̱t i Jesus. 2Chipam aj i ninkꞌi̱j reꞌreꞌ, reꞌ xyukꞌunjic woꞌ wi̱ꞌ i Jesus chꞌi̱l take juꞌjun chic raj tahkanel, 3xcꞌuhlic peꞌ cho i chiho̱j wach haꞌ npuhcjic pan tak ninkꞌi̱j eh ruꞌum reꞌ, reꞌ Mari̱ya xikꞌor reh i Jesus chi xcꞌuhlic riha̱ꞌ aj ehcham ninkꞌi̱j reh chi naritoꞌbjic ru̱cꞌ ricꞌaxquilal. 4Chi jeꞌ aj reꞌ, reꞌ Jesus jeꞌ wili xikꞌor reh i ritu̱t:
«Mah, reꞌ hat awehtꞌalim chi maꞌ curman ta na̱kꞌorom wi̱n haj wilic i nanibanam. Charak chiri̱j chi reꞌ riꞌorahil reꞌ narirakmajic wi̱ꞌ chiri̱j hab wach i hin maꞌ jaꞌ nponic ta, nqui reh.
5Chiri̱j reꞌ, reꞌ ritu̱t i Jesus jeꞌ wili xikꞌor queh take raj tzꞌaꞌanel aj ehcham ninkꞌi̱j reꞌreꞌ:
«Wi paꞌ bih soꞌ erikꞌor aweh tak i Jesus chanimej tak ribanjic, nqui queh.
6Reꞌ aj ehcham reh ninkꞌi̱j reꞌreꞌ ruꞌum chi rinimej take takꞌanic bano̱j cho najtir kꞌi̱j ruꞌum i Moyses queh take ra̱ꞌ riꞌsil cho maꞌ Israhel chiri̱j ritzꞌajaric wach take xa paꞌ bih jaric ra̱j tzꞌajaric wach, reꞌreꞌ xa wilic woꞌ pa ripa̱t waki̱b chi nimak tak icom abaj yeꞌbal haꞌ. Chipam juꞌjun chi icom reꞌreꞌ ricꞌul jeꞌ na junikꞌob (400) culc chi haꞌ. 7Jeꞌ reꞌ ajic reꞌ Jesus naxilow take icom reꞌreꞌ jeꞌ wili xikꞌor queh take raj tzꞌaꞌanel chiꞌ kꞌa̱kꞌ i aj ehcham reh ninkꞌi̱j:
«Chacꞌam tak cho haꞌ eh chanuksaj tak take nimak tak icom wili, nqui queh.
Chiri̱j chic ruꞌ naxquinuksaj woꞌ chi coric take icom reꞌreꞌ, 8reꞌ Jesus jeꞌ woꞌ chic wili xikꞌor queh:
«Chawesaj tak cho nechꞌ ok i haꞌ wilic chipam take icom reꞌreꞌ eh chayew tak cho reh pahbamaj chi aj ilol reh ninkꞌi̱j reh chi naricꞌram, nqui queh.
Chi jeꞌ reꞌ, reꞌ haꞌ nucꞌjic xcꞌamaric woꞌ je reh aj ilol reh ninkꞌi̱j, reꞌ cok ruꞌ maꞌ xkꞌormojic ta reh cuꞌum take aj camanom haj xchalic i haꞌ reꞌreꞌ 9to̱b ta quehtꞌalim woꞌ nak haj xchalic. Jeꞌ reꞌ kꞌuruꞌ chi maꞌ rehtꞌalim ta haj xchalic i haꞌ reꞌreꞌ, reꞌ pahbamaj chi aj ilol reꞌreꞌ naxicꞌraj cok i haꞌ reꞌ mikcrinak chic chi haꞌ npuhcjic pan tak ninkꞌi̱j, xiyukꞌej je i acꞌun cꞌahchiꞌ ribanam caxa̱ra eh xikꞌor reh chi tare̱t xiban chi cu xam xiyew chi ucꞌjic i haꞌ reꞌ suk ritikꞌinjic bano̱j. 10Reꞌ aj wili xikꞌor reh:
«Reꞌ take kich katinami̱t ocronak take chi nancaꞌn jenoꞌ ninkꞌi̱j pe̱t nquiyew je queh cula̱ꞌ i haꞌ reꞌ suk ritikꞌinjic bano̱j eh nok quiyeb chic qui̱b chi suk ru̱cꞌ i haꞌ reꞌreꞌ, reꞌ chic i haꞌ maꞌ til ta ti suk ritikꞌinjic nquiyew je. Raj i hat maꞌ jeꞌ ta reꞌ xaꞌn. To̱b ta woꞌ pe̱t xayew i haꞌ reꞌ suk ritikꞌinjic bano̱j, xacana̱ꞌ peꞌ nchel riyeꞌeric chi xam i haꞌ reꞌ til kꞌe̱ꞌ woꞌ chic sukquil ritikꞌinjic bano̱j, nqui reh acꞌun reꞌreꞌ.
11Jeꞌ aj reꞌ riwi̱ꞌ ruꞌ naxipꞌut ribanaric take lokꞌ laj nawa̱l i Jesus. Reꞌ xiban wili chipam i tinamit Canah ar pa riyukꞌul i Calile̱ya, reꞌreꞌ xcꞌuhtunic keh hoj raj tahkanel chi reꞌ Jesus til wilic rajawric eh ru̱cꞌ reꞌreꞌ, reꞌ hoj raj tahkanel xkachop riman kacꞌux chiri̱j i Jesus.
Reꞌ Jesus ricꞌuhtaj rinimal rajawric
(Mt. 21.12-13; Mr. 11.15-18; Lc. 19.45-46)
12Chiri̱j chic riwihꞌic pan tinamit Canah, reꞌ Jesus richꞌi̱l i ritu̱t richꞌi̱l take richa̱kꞌ jeꞌ woꞌ i hoj raj tahkanel, xoj-o̱j ar chipam i tinamit Capernahum reꞌ xojwihꞌic wi̱ꞌ quib xib kꞌi̱j. 13Nok xa maꞌ naht ta chic wilic rikꞌijil i ninkꞌi̱j Pa̱scuwa ribihnal reꞌ nkaninkꞌijej wi̱ꞌ i kelbal cho hoj ra̱ꞌ riꞌsil cho maꞌ Israhel chipam i tiꞌcꞌaxic ar Eji̱pto, reꞌ Jesus xo̱j ar Jerusalen chi nariwihꞌic chipam i ninkꞌi̱j reꞌreꞌ. 14Naxponic ar xoquic cok chi chi̱ꞌ i Lokꞌ laj Pa̱t reꞌ nlokꞌonjic wi̱ꞌ wach i Dios eh xilow nicꞌ wach i noꞌjbal cꞌahchiꞌque̱b take tinamit cꞌa̱y ncaꞌn ar jeꞌ ricab cꞌayanic tak ma̱s wacax, cꞌayanic tak me̱ꞌ, cꞌayanic tak rexba̱. Jeꞌ woꞌ xilow i noꞌjbal cꞌahchiꞌque̱b take aj chꞌakol wach rehreh wach tumi̱n tzꞌukulque̱b ar chi cꞌahchiꞌ quijalam wach ru̱cꞌ i tumi̱n ncojoric chipam i Lokꞌ laj Pa̱t reꞌ nlokꞌonjic wi̱ꞌ wach i Dios. 15Naxilow aj chi jeꞌ reꞌ cꞌahchiꞌque̱b ar, reꞌ Jesus xitikꞌa̱ꞌ jenaj tzꞌuhumbal eh xesaj take lok chi tzꞌuhu̱m chiꞌnchel take aj cꞌa̱y wilque̱b ar. Jeꞌ woꞌ xesaj je take chicop cꞌahchiꞌ ricꞌayjic ar eh xihilej je quitzꞌa̱k take aj chꞌakol wach tumi̱n naxitahchꞌaj je quime̱xa quiwihꞌic wi̱ꞌ. 16Chiri̱j chic reꞌ jeꞌ wili xinak take wi̱ꞌ aj cꞌayem rexba̱:
«Chawesaj tak je ayuꞌ chiꞌnchel paꞌ bih nacꞌayej tak. Ma̱coj tak chi cꞌaybal ripa̱t i wAja̱w Dios, nqui queh.
17Naxikꞌor chi jeꞌ reꞌ i Jesus, reꞌ take raj tahkanel xcꞌulic cho pan quicꞌux jenaj kꞌoric tzꞌihmbimaj chipam riCꞌuhbal i Dios. Reꞌ kꞌoric reꞌreꞌ jeꞌ wili rikꞌor:
“Reꞌ Lokꞌ laj Pa̱t reꞌ nlokꞌonjic wi̱ꞌ wach i wAja̱w Dios til woꞌ chic kꞌe̱ꞌ rinimal rilokꞌil chi wi̱n
eh ruꞌum reh rinimal wach rilokꞌil chi wi̱n, naribanjic chi reꞌ hin narisacharic niwach, nqui rikꞌor.
18Jeꞌ reꞌ ajic ruꞌum xiban i Jesus ar chi chi̱ꞌ i lokꞌ laj pa̱t reꞌreꞌ, reꞌ take cꞌamol quibe̱h ra̱ꞌ riꞌsil cho maꞌ Israhel jeꞌ wili xquikꞌor cok reh:
«Chajaric jenoꞌ rehtalil enacꞌuhtaj keh cꞌuhtbal reh chi reꞌ hat wilic awajawric chi quesmejic lok take aj cꞌa̱y wili? nqui take reh.
19Chalic Jesus jeꞌ wili xicꞌuꞌlej take wi̱ꞌ:
«Reꞌ wili rehtalil nanicꞌuhtam cꞌuhtbal aweh tak chi reꞌ hin wilic wajawric: Nok xib ok chic kꞌi̱j sahchanak wach i Lokꞌ laj Pa̱t wili reꞌ nlokꞌonjic wi̱ꞌ wach i Dios, reꞌ hin nanijohsam woꞌ chic cho, nqui queh.
20Reꞌ take cꞌamol be̱h reꞌreꞌ naxquibiraj chi jeꞌ reꞌ, jeꞌ wili xquikꞌor reh Jesus:
«Reꞌ nakꞌor i hat chi enajohsaj i lokꞌ laj yeꞌa̱b wili maꞌ eta riban! Chacapaj, waki̱b laꞌ chic roxcꞌahl (46) cho ha̱b pꞌuhtunak cho ritikꞌinjic i lokꞌ laj pa̱t wili eh cu yuꞌna chi kꞌi̱j maꞌ jaꞌ cohlsomaj ta woꞌ wach! Chaj ti bih awajawric i hat kꞌuruꞌ chi enajohsaj chiwach xib kꞌi̱j? nqui take reh.
Jeꞌ reꞌ xquikꞌor chi maꞌ xquirak ta chiri̱j xikꞌor i Jesus 21maj reꞌreꞌ naxikꞌor ribiral i lokꞌ laj yeꞌa̱b lokꞌonbal reh Dios cꞌahchiꞌ rikꞌoric chiri̱j i ritiꞌjolal narucsjic woꞌ chic cho pa ro̱x kꞌi̱j. 22Ruꞌum aj reꞌ naxponic i kꞌi̱j chi nariquimic je i Jesus wach curu̱s eh naxuctic woꞌ cho pa ro̱x kꞌi̱j chi quixilac take camnak, reꞌ hoj raj tahkanel xcꞌulic cho pan kacꞌux i kꞌoric rikꞌorom cho reꞌreꞌ eh xkacoj wach chi manlic i kꞌoro̱j cahnok chipam riCꞌuhbal i Dios chiri̱j rucsjic i Jesus, jeꞌ woꞌ xkacoj wach i kꞌoric ribanam cho i Jesus chiri̱j i ructic. 23Maꞌ cu reꞌ ta naxuctic cho i Jesus chi quixilac take camnak xcojoric wach i kꞌoro̱j ruꞌum, wilic laꞌ take xquicoj wach rikꞌorbal chiwach i ninkꞌi̱j Pa̱scuwa ribihnal nok wilic i Jesus ar Jerusalen.
Jeꞌ reꞌ ajic nok wilic ar i Jesus, riqꞌuihal take tinamit xquicoj wach chi reꞌreꞌ wilic rajawric ruꞌum nok xquilow take lokꞌ laj nawa̱l xiban chi quiwach 24xa reꞌ laꞌ Jesus maꞌ ruꞌum ta reh reꞌ, xichꞌica̱ꞌ ta nak ricꞌux chiqui̱j take tinamit reꞌreꞌ maj rehtꞌalim i quicapew-bal wilic cho pan ca̱mna 25eh ruꞌum chi rehtꞌalim chaj bih wilic cho pan ca̱mna take cꞌacharel, maꞌ curman ta chi cu jenoꞌ chic cꞌacharel enkꞌoric reh Jesus wi holohic on maꞌ holohic quinoꞌjbal.
Currently Selected:
SAN JUAN 2: poh
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2012, Wycliffe Bible Translators, Inc. All rights reserved.