ᐅᐸᓓᑭᔅ ᒫᑎᐤ 10
10
ᑳ ᓂᔓᔖᐱᓕᒋ ᐊᐸᔅᑕᓚ
(ᒫᕐᒃ 3:13–19; ᓘᒃ 6:12–16)
1ᐃᔅᐱ ᒫᑲ ᑳ ᑮ ᓇᑐᒫᑦ ᐅ ᑭᔅᑭᓄᐊᒪᐙᑲᓇ ᑳ ᓂᔓᔖᐱᓕᒋ, ᑮ ᒥᓓᐤ ᑲᔥᑭᐅᐎᓂᓕᐤ ᑭᒋ ᔖᑯᒋᐋᓕᒋ ᒪᒋ ᐊᒑᑾ, ᑭᒋ ᐗᓚᐎᐌᐱᓈᓕᒋ, ᓀᔥᑕ ᑭᒋ ᒥᓇᐙᒋᑖᓕᒋ ᒥᓯᐌ ᓇᓈᑲᐤ ᐋᑯᓯᐎᓇ, ᓀᔥᑕ ᒥᓯᐌ ᓇᓈᑲᐤ ᐃᑖᔅᐱᓀᐎᓇ᙮ 2ᐅᐅ ᐁᐗᒀᓂᐃ ᐅᑦ ᐃᔑᓂᑳᓱᐎᓂᐙᐗ ᐊᓂᑭ ᓂᔓᔖᑉ ᐊᐸᔅᑕᓚᒃ; ᐊᓇ ᓃᔥᑕᒻ ᓵᐃᒪᓐ, ᑳ ᐃᔑᓂᑳᓱᑦ ᐱᑕᕐ, ᓀᔥᑕ ᐎᒋᔖᓇ ᐋᓐᑦᕉ; ᒉᒻᔅ ᓭᐸᑎ ᐅᑯᓯᓴ, ᓀᔥᑕ ᐎᒋᔖᓇ ᒑᓐ; 3ᐱᓕᑉ, ᓀᔥᑕ ᐸᕐᑕᓕᒥᐤ; ᑕᒪᔅ, ᓀᔥᑕ ᒫᑎᐤ ᑳ ᐸᑉᓕᑳᓂᐎᑦ; ᒉᒻᔅ ᐋᓪᐱᔭᔅ ᐅᑯᓯᓴ, ᓀᔥᑕ ᓓᐱᔭᔅ, ᑳ ᐊᔅᐱᓂᑳᓱᑦ ᑖᑎᔭᔅ; 4ᓵᐃᒪᓐ ᑳ ᑫᓇᐃᓕᓕᐎᑦ, ᓀᔥᑕ ᒎᑕᔅ ᐃᔅᑳᕆᔭᑦ, ᐊᓇ ᑳ ᐙᔦᔑᐸᑭᑎᓈᑦ᙮
ᐅᑕᐹᑎᓯᐎᓂᐙᐗ ᑳ ᓂᔓᔖᐸᓕᒋ ᐊᐸᔅᑕᓚ
(ᒫᕐᒃ 6:7–13; ᓘᒃ 9:1–6)
5ᐅᐅ ᓂᔓᔖᑉ ᒋᓴᔅ ᑮ ᑭᒋᑎᔕᐌᐤ, ᑮ ᐃᑕᔓᐙᑌᐤ ᒫᑲ, ᐁ ᐃᑗᑦ, ᐁᑳᐎᓚ ᐃᑐᑌᒃ ᐃᑕ ᐁ ᐃᑖᒋᒃ ᒉᓐᑕᐃᓚᒃ, ᓀᔥᑕ ᐅᑦ ᐃᑖᐎᓂᐙᒃ ᓴᒫᕆᑖᓇᒃ ᐁᑳᐎᓚ ᐱᑐᑫᐙᒃ᙮ 6ᔮᓕᑌᓐ ᒫᑲ ᓈᑎᑯᒃ ᐌᓂᔑᑭᒃ ᒫᓂᔥᒑᓂᔕᒃ ᐃᔅᕃᐃᓪ ᐅ ᐙᔅᑳᔨᑲᓂᒥᒃ᙮ 7ᐁ ᐊᑎ ᐃᑐᑌᔦᒃ ᒫᑲ, ᑲᑫᔅᑭᒥᐌᒃ, ᐁ ᐃᑗᔦᒃ, ᑭᒋᑭᔑᑳᐎ ᐅᑭᒫᐎᐎᓐ ᐯᔓᓈᑾᓐ᙮ 8ᒥᓇᐙᒋᐃᑯᒃ ᐅᑖᑯᓯᐗᒃ, ᐹᔦᑭᐃᑯᒃ ᐅᓓᑉᕈᓯᐃᑖᔅᐱᓀᐗᒃ, ᐊᓂᔥᑳᓂᑯᒃ ᐅᓂᐱᐗᒃ, ᐗᓚᐎᐌᐱᓂᑯᒃ ᒪᒋ ᐊᒑᑾᒃ: ᒧᔐ ᑭ ᑮ ᒥᓕᑳᐎᓇᐗᐤ, ᒧᔐ ᒥᓕᐌᒃ᙮ 9ᐁᑳᐎᓚ ᐅᑎᓂᒃ ᐅᓵᐎᔔᓕᐋᓐ, ᐁᑳ ᓀᔥᑕ ᔔᓕᐋᓐ, ᐁᑳ ᓀᔥᑕ ᐅᓵᐙᐱᔉ ᑭ ᐱᑖᓱᐎᓂᐙᒃ, 10ᐁᑳ ᓀᔥᑕ ᒥᒋᒥᐗᑦ, ᐁᑳ ᓀᔥᑕ ᓂᔓ ᐊᑯᐅᓇ, ᐁᑳ ᓀᔥᑕ ᒪᔅᑭᓯᓇ, ᐁᑳ ᓀᔥᑕ ᓴᔅᑲᐅᓈᑎᑾᒃ: ᐌᓴ ᐅᑕᑐᔅᑫᐤ ᑌᐸᑫᓕᑖᑯᓯᐤ ᑭᒋ ᐋᔮᑦ ᐅ ᒥᒋᒥᒻ᙮
11ᐊᑕ ᐱᑯ ᑭᒋ ᐃᑖᐎᓐ ᓀᔥᑕᐱᑯ ᐃᑖᐎᓐ ᑫ ᐃᔑ ᐱᑐᑫᐌᑴ, ᑲᑴᒋᑫᒧᒃ ᐊᐌᓇ ᐁᑯᑕ ᑎᐁᐸᑫᓕᑖᑯᓯᑴ; ᐁᑯᑕ ᒫᑲ ᑕᔑᑫᒃ ᐹᑎᒫ ᒥᓇ ᑭᑐᑌᔦᑴ᙮ 12ᐃᔅᐱ ᒫᑲ ᐱᑐᑫᔦᑴ ᐙᔅᑳᔨᑲᓂᒃ, ᐊᑕᒥᔅᑲᒧᒃ᙮ 13ᑮᔥᐱᓐ ᒫᑲ ᑫ ᑌᐸᑫᓕᑖᑾᓄᑴ ᐊᓂᒪ ᐙᔅᑳᔨᑲᓐ, ᐁᑯᑕ ᑫ ᐅᑎᑕᒧᒪᑲᒃ ᑭ ᑳᔮᒣᓕᑕᒧᐎᓂᐗᐤ: ᑮᔥᐱᓐ ᒫᑲ ᐁᑳ ᑫ ᑌᐸᑫᓕᑖᑾᓄᑴ, ᐁᑯᔑ ᑭ ᑳᔮᒣᓕᑕᒧᐙᓂᐗᐤ ᑭ ᑳ ᑭᐌᑐᑖᑯᓇᐗᐤ᙮ 14ᐊᐌᓇ ᒫᑲ ᐁᑳ ᑫ ᐱᑐᑳᐃᑖᑴ, ᐁᑳ ᓀᔥᑕ ᑫ ᓇᑐᑕᒧᑴ ᑭᑦ ᐋᔭᒥᐎᓂᐙᐗ ᐃᔅᐱ ᐗᓚᐎᔦᑴ ᐊᓂᒪ ᐙᔅᑳᔨᑲᓂᒃ ᓀᔥᑕᐱᑯ ᐃᑖᐎᓂᒃ ᐅᒋ, ᑭᓯᑎᐙᒃ ᐅᒋ ᐸᐹᐎᐸᓕᑖᒃ ᒪᒋᑾᓛᔕ᙮ 15ᑖᐺ ᑭᑦ ᐃᑎᓇᐗᐤ, ᐊᐙᓯᑌ ᑲᑕ ᒥᓗ ᐃᑌᓕᑖᑾᓋ ᓴᑕᒻ ᐊᔅᑭ ᓀᔥᑕ ᑯᒪᕋ ᑎᐹᔅᑯᓂᑫᐎ ᑭᔑᑳᑫ, ᐃᔥᐱᔥ ᐊᓂᒪ ᐃᑖᐎᓐ᙮
ᑲᒀᑕᑭᐃᑯᐎᓇ ᑫ ᑕᑯᔑᓄᒪᑲᒃ
(ᒫᕐᒃ 13:9–13; ᓘᒃ 21:12–17)
16ᒫᑎᑲ, ᑭᑦ ᐃᑎᔕᐅᑎᓇᐗᐤ ᑖᐱᔅᑯᒡ ᒫᓂᔥᒑᓂᔕᒃ ᐃᑕ ᐁ ᐃᑖᓕᒋ ᒪᐃᑲᓇ: ᐁᐗᑯ ᐅᒋ ᓕᑆᑳᒃ ᑖᐱᔅᑯᒡ ᑭᓀᐱᑾᒃ, ᓀᔥᑕ ᓗᔅᐹᑎᓯᒃ ᑖᐱᔅᑯᒡ ᐅᒥᒥᐗᒃ᙮ 17ᒫᑲ ᔮᒀᒥᔅᑖᑯᒃ ᐃᓕᓕᐗᒃ; ᐌᓴ ᑭ ᑳ ᐸᑭᑎᓂᑯᐙᐗᒃ ᑭᒋ ᑎᐹᔅᑯᓂᑲᐎᔦᒃ, ᑭ ᑳ ᐸᐸᓴᔅᑌᐅᑯᐙᐗᒃ ᒫᑲ ᐅᑦ ᐋᔭᒥᐁᐎᑲᒥᑯᐙᒃ; 18ᑭ ᑳ ᐃᑐᑕᐃᑲᐎᓇᐗᐤ ᒫᑲ ᐅᑎᔥᑲᐤ ᐅᑎᐯᓕᒋᑫᐗᒃ ᓀᔥᑕ ᑭᒋᐅᑭᒫᐗᒃ ᓂᓚ ᐅᒋ, ᐎᓚᐗᐤ ᓀᔥᑕ ᒉᓐᑖᐃᓚᒃ ᑭᒋ ᑭᔅᑫᓕᑕᒥᐋᑲᓂᐎᒋᒃ᙮ 19ᒫᑲ ᐃᔅᐱ ᐸᑭᑎᓂᑖᑾᐌ, ᐁᑳᐎᓚ ᒫᒥᑐᓀᓕᑕᒧᒃ ᑖᓀ ᓀᔥᑕᐱᑯ ᑖᓀ ᐃᔑ ᑫ ᐃᑗᔦᒃ: ᐌᓴ ᐁᐗᑯ ᑎᐹᔨᑲᓂᒃ ᐱᓯᒧᑳᓂᒃ ᑭ ᑳ ᒥᓕᑲᐎᓇᐗᐤ ᑫᒀᓐ ᑫ ᐃᑗᔦᒃ᙮ 20ᐌᓴ ᓇᒪᔦᐤ ᑭᓚᐗᐤ ᑳ ᐋᔭᒥᐁᒃ, ᒫᑲ ᐅᑦ ᐊᒑᑾ ᑯᑖᐎᐗᐤ ᐁᐗᒀᓇ ᑳ ᐋᔭᒥᔅᑳᑖᒃ᙮
21ᐎᒋᔖᓂᒪᐤ ᒫᑲ ᑲᑕ ᐸᑭᑎᓀᐤ ᐎᒋᔖᓇ ᑭᒋ ᓂᐹᔨᒥᒋ, ᓀᔥᑕ ᐅᑖᐎᒪᐤ ᐅᑦ ᐊᐙᔑᒥᔕ: ᐊᐙᔑᔕᒃ ᒫᑲ ᑲᑕ ᐸᓯᑯᔅᑕᐌᐗᒃ ᐅ ᓂᑭᐃᑯᐙᐗ, ᑲᑕ ᐃᑐᑕᐌᐗᒃ ᒫᑲ ᑭᒋ ᓂᐹᔨᒥᒋ᙮ 22ᑭ ᑳ ᐸᒀᑎᑯᐙᐗᒃ ᒫᑲ ᒥᓯᐌ ᐃᓕᓕᐗᒃ ᓂᑦ ᐃᔑᓂᑳᓱᐎᓐ ᐅᒋ; ᒫᑲ ᐊᓇ ᐁᑳ ᑫ ᔖᑯᒋᐋᑲᓂᐎᑦ ᐁᐗᒀᓇ ᑫ ᐱᒫᒋᐋᑲᓂᐎᑦ᙮ 23ᒫᑲ ᐃᔅᐱ ᑲᒀᑕᑭᐃᑕᑾᐌ ᐯᔭᒃ ᐃᑖᐎᓂᒃ, ᑯᑕᒃ ᓈᒋᑎᔑᒧᔅᑕᒧᒃ; ᐌᓴ ᑖᐺ ᑭᑦ ᐃᑎᓇᐗᐤ, ᓇᒪᐎᓚ ᑭ ᑳ ᐅᒋ ᐊᑭᓀᔥᑫᓇᐗᐤ ᒥᓯᐌ ᐃᑖᐎᓇ ᐃᔅᕃᐃᓕᒃ, ᐃᓕᑯᒃ ᑫ ᐯᒋ ᑕᑯᔑᒃ ᐃᓕᓕᐎᑯᓯᓵᓐ᙮
24ᑭᔅᑭᓄᐊᒪᐙᑲᓐ ᓇᒪᐎᓚ ᐊᐙᓯᑌ ᐃᑌᓕᑖᑯᓯᐤ ᐁᑌᓕᑖᑯᓯᓕᒋ ᑳ ᑭᔅᑭᓄᐊᒫᑯᑦ, ᓇᒪ ᓀᔥᑕ ᐊᑑᔅᑫᓛᑲᓐ ᐃᔥᐱᔥ ᐅᑦ ᐅᑭᒫᒪ᙮ 25ᐁᑯᓕᑯᒃ ᑭᔅᑭᓄᐊᒪᐙᑲᓐ ᑭᒋ ᐃᑌᓕᑖᑯᓯᑦ ᐁᑌᓕᑖᑯᓯᓕᒋ ᑳ ᑭᔅᑭᓄᐊᒫᑯᑦ, ᓀᔥᑕ ᐊᑑᔅᑫᓛᑲᓐ ᐃᔥᐱᔥ ᐅᑦ ᐅᑭᒫᒪ᙮ ᑮᔥᐱᓐ ᐲᓪᓯᐸᓪ ᑳ ᐃᔑᓂᑳᑕᐙᑴ ᑳ ᑎᐯᓕᑕᒥᓕᒋ ᐙᔅᑳᔨᑲᓂᓕᐤ, ᑖᐺ ᐊᐙᓯᑌ ᑲᑕ ᐃᔑᓂᑳᑌᐗᒃ ᐊᓂᐃ ᐅ ᐙᔅᑳᔨᑲᓂᒥᓕᒃ ᑳ ᐃᑖᓕᒋ᙮
ᐊᐌᓇ ᑫ ᑯᔅᑌᒃ
(ᓘᒃ 12:2–7)
26ᐁᐗᑯ ᐅᒋ ᐁᑳᐎᓚ ᑯᔅᑎᑯᒃ: ᐌᓴ ᓇᒪᐎᓚ ᑫᒀᓐ ᐊᑾᓇᐃᑳᑌᐤ, ᐁᑳ ᑫ ᓄᑯᑖᓂᐗᒃ; ᓀᔥᑕ ᐁ ᑳᑖᓂᐗᒃ, ᐁᑳ ᑫ ᑭᔅᑫᓕᒋᑳᑌᒃ᙮ 27ᑫᒀᓐ ᑳ ᐎᑕᒫᑕᑾᒃ ᐁ ᐗᓂᑎᐱᔅᑳᒃ, ᐁᐗᑯ ᐋᓕᒧᑕᒧᒃ ᐁ ᐙᔅᑌᒃ; ᑫᒀᓐ ᓀᔥᑕ ᑳ ᐯᑕᒣᒃ ᑭᑕᐗᑳᐙᒃ, ᐁᐗᑯ ᐙᐎᑕᒧᒃ ᑕᑯᒡ ᐙᔅᑳᔨᑲᓂᒃ᙮ 28ᐁᑳᐎᓚ ᓀᔥᑕ ᑯᔅᑎᑯᒃ ᐊᓂᑭ ᑳ ᓂᐸᑖᒋᒃ ᒥᔭᐎᓕᐤ, ᒫᑲ ᐁᑳ ᑳ ᑲᔥᑭᑖᒋᒃ ᑭᒋ ᓂᐸᐋᒋᒃ ᐊᒑᑾ: ᒫᑲ ᐊᐙᓯᑌ ᑯᔅᑎᒃ ᐊᓇ ᑳ ᑲᔥᑭᑖᑦ ᑭᒋ ᓂᔑᐗᓈᒋᐋᑦ ᐊᒑᑾ ᓀᔥᑕ ᒥᔭᐎᓕᐤ ᒪᒋ ᐃᔥᑯᑌᒃ᙮ 29ᓇᒪ ᓈ ᓂᔓ ᒥᒋᔥᑯᔑᔕᒃ ᐯᔭᒃ ᔔᓕᐋᓈᐱᔅᑯᔑᔥ ᐃᑕᑭᒪᐗᒃ? ᓇᒪᐎᓚ ᐅᒋ ᐯᔭᒃ ᒫᑲ ᑲᑕ ᐸᑭᔑᓐ ᒧᔅᑕᔅᑲᒥᒃ ᐁᑳ ᐁ ᑭᔅᑫᓕᑕᒃ ᑯᑖᐎᐗᐤ᙮ 30ᒫᑲ ᒥᓯᐌ ᑭᔅᑎᒀᓂᐱᐙᔨᐙᐗ ᐊᑭᒋᑳᑌᐗ᙮ 31ᐁᐗᑯ ᐅᒋ ᐁᑳᐎᓚ ᓱᑫᓰᒃ, ᐊᐙᓯᑌ ᑭ ᑭᔅᑕᑭᒥᑲᐎᓇᐗᐤ ᐃᔥᐱᔥ ᒥᒉᑦ ᒥᒋᔥᑯᔑᔕᒃ᙮
ᑕ ᔕᐌᓕᑖᑯᓯᐤ ᐊᐌᓇ ᑫ ᑎᐹᒋᒫᑦ ᐁ ᑎᐯᓕᒥᑯᑦ ᙭ᑕ
(ᓘᒃ 12:8–9)
32ᐊᐌᓇ ᒫᑲ ᑫ ᑎᐹᒋᒥᑴ ᐃᑕ ᐁ ᐃᑖᓕᒋ ᐃᓕᓕᐗ, ᐁᐗᒀᓇ ᓀᔥᑕ ᑫ ᑎᐹᒋᒪᒃ ᐅᑎᔥᑲᐤ ᓄᑖᐎ ᑭᒋᑭᔑᑯᒃ ᑳ ᐃᑖᑦ᙮ 33ᐊᐌᓇ ᒫᑲ ᑫ ᐋᓉᑕᐎᑴ ᐃᑕ ᐁ ᐃᑖᓕᒋ ᐃᓕᓕᐗ, ᐁᐗᒀᓇ ᓀᔥᑕ ᑫ ᐋᓉᑕᐗᒃ ᐅᑎᔥᑲᐤ ᓄᑖᐎ ᑭᒋᑭᔑᑯᒃ ᑳ ᐃᑖᑦ᙮
ᐁᑳᐎᓚ ᑳᔮᒣᓕᑕᒧᐎᓐ ᒫᑲ ᔑᒫᑲᓐ
(ᓘᒃ 12:51–53; 14:26–27)
34ᐁᑳᐎᓚ ᐃᑌᓕᑕᒧᒃ ᐁ ᐯᒋ ᑕᑯᔑᓂᔮᓐ ᑭᒋ ᐃᑎᔕᐊᒫᓐ ᑳᔮᒣᓕᑕᒧᐎᓐ ᐅᑕ ᐊᔅᑮᒃ: ᓇᒪᐎᓚ ᓂ ᑮ ᑕᑯᔑᓂᓐ ᑭᒋ ᐃᑎᔕᐊᒫᓐ ᑳᔮᒣᓕᑕᒧᐎᓐ ᒫᑲ ᔑᒫᑲᓐ᙮ 35ᐌᓴ ᓂ ᐯᒋ ᐃᑐᑖᓐ ᑭᒋ ᐃᑐᑕᐗᒃ ᐃᓕᓕᐤ ᑭᒋ ᐸᒀᑖᑦ ᐅᑖᐎᔭ, ᓀᔥᑕ ᐅᑖᓂᓯᒪᐤ ᑭᒋ ᐸᒀᑖᑦ ᐅᑳᐎᔭ ᓀᔥᑕ ᐅᓇᐊᑲᓂᔅᑴᒥᒪᐤ ᑭᒋ ᐸᒀᑖᑦ ᐅᓯᑯᓴ᙮ 36ᐃᓕᓕᐤ ᒫᑲ ᑲᑕ ᐸᒀᑎᑯ ᐊᓂᐃ ᑳ ᐃᑖᓕᒋ ᑎᐱᓚᐌ ᐎᑭᒃ᙮
37ᐊᓇ ᐊᐙᓯᑌ ᑳ ᓵᑭᐋᑦ ᐅᑖᐎᔭ ᓀᔥᑕᐱᑯ ᐅᑳᐎᔭ ᐃᔥᐱᔥ ᓂᓚ ᓇᒪᐎᓚ ᑌᐸᑫᓕᑖᑯᓯᐤ ᑭᒋ ᐎᒉᐎᑦ: ᐊᓇ ᓀᔥᑕ ᐊᐙᓯᑌ ᑳ ᓵᑭᐋᑦ ᐅᑯᓯᓴ ᓀᔥᑕᐱᑯ ᐅᑖᓂᓴ ᐃᔥᐱᔥ ᓂᓚ, ᓇᒪᐎᓚ ᑌᐸᑫᓕᑖᑯᓯᐤ ᑭᒋ ᐎᒉᐎᑦ᙮ 38ᐊᓇ ᓀᔥᑕ ᐁᑳ ᑳ ᐅᑎᓇᒃ ᐅᑦ ᐋᔑᑌᐋᑎᑯᒻ, ᓀᔥᑕ ᓄᔅᐱᓇᔑᑦ, ᓇᒪᐎᓚ ᑌᐸᑫᓕᑖᑯᓯᐤ ᑭᒋ ᐎᒉᐎᑦ᙮ 39ᐊᓇ ᑳ ᒥᔅᑲᒃ ᐅ ᐱᒫᑎᓯᐎᓐ ᑲᑕ ᐗᓂᑕᐤ: ᐊᓇ ᒫᑲ ᑳ ᐗᓂᑖᑦ ᐅ ᐱᒫᑎᓯᐎᓐ ᓂᓚ ᐅᒋ ᑲᑕ ᒥᔅᑲᒻ᙮
ᑎᐸᐊᒫᑯᓯᐎᓇ
(ᒫᕐᒃ 9:41)
40ᐊᓇ ᑳ ᐅᑎᓂᑖᒃ, ᓂᓚ ᓀᔥᑕ ᓂᑦ ᐅᑎᓂᒃ, ᐊᓇ ᓀᔥᑕ ᑳ ᐅᑎᓂᑦ, ᐅᑎᓀᐤ ᓀᔥᑕ ᐊᓂᐃ ᑳ ᐯᒋᑎᔕᐅᓕᒋ᙮ 41ᐊᓇ ᑳ ᐅᑎᓈᑦ ᐅᑭᔅᑭᐙᐃᑫᐗ ᐅᑦ ᐃᔑᓂᑳᓱᐎᓂᓕᒃ ᐅᑭᔅᑭᐙᐃᑫᐗ, ᑲᑕ ᐋᔭᐤ ᐅᑭᔅᑭᐙᐃᑫᐗ ᐅ ᑎᐸᐊᒫᑯᓯᐎᓂᓕᐤ; ᐊᓇ ᓀᔥᑕ ᑳ ᐅᑎᓈᑦ ᐁ ᒀᔭᔅᑭᑖᑎᓯᓕᒋ ᐃᓕᓕᐗ ᐅᑦ ᐃᔑᓂᑳᓱᐎᓂᓕᒃ ᐁ ᒀᔭᔅᑭᑖᑎᓯᓕᒋ ᐃᓕᓕᐗ, ᑲᑕ ᐋᔭᐤ ᐁ ᒀᔭᔅᑭᑖᑎᓯᓕᒋ ᐃᓕᓕᐗ ᐅ ᑎᐸᐊᒫᑯᓯᐎᓂᓕᐤ᙮ 42ᐊᐌᓇ ᒫᑲ ᑫ ᒥᓈᐋᑴ ᐯᔭᒃ ᐅᐅ ᑳ ᐋᐱᔅᑌᓕᑖᑯᓯᓕᒋ ᒥᓂᒀᑲᓂᒃ ᐱᑯ ᑕᑭᐱᓕᐤ ᐅᑦ ᐃᔑᓂᑳᓱᐎᓂᒃ ᑭᔅᑭᓄᐊᒪᐙᑲᓐ, ᑖᐺ ᑭᑦ ᐃᑎᓇᐗᐤ, ᓇᒪᐎᓚ ᑲᑕ ᐗᓂᑕᐤ ᐅ ᑎᐸᐊᒫᑯᓯᐎᓐ᙮
Currently Selected:
ᐅᐸᓓᑭᔅ ᒫᑎᐤ 10: MCNT91
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
The text of the Bible in Moose Cree is in the public domain.
Moose Cree New Testament © Canadian Bible Society, 1991.