Ngiva, San Juan Atzingo - 2016 (NT) Non Drama

Ngiva, San Juan Atzingo - 2016 (NT) Drama

Ndá iso ña̱o chrꞌéxi̱n, ndá kꞌuáji chꞌin Jesús iso ti chjasin siín Galilea kixin chrókjuihya chꞌan Judea kixin ti sin judío la tjinkaon sin chrókꞌóñá sin chꞌan. *Kjánchó ó kuichjina ti ña̱o kia, ndá ti sin judío mé chꞌéna sin itsꞌuan chꞌénaxín sin chaon nta kixin tsjasixín sin kia, a̱ndá ti sin kícho chꞌin Jesús mé ndáche sin chꞌan:
―Chrokuito̱ahya ntihi. Sátjia Judea kixin kja̱xin ti sin chréhe̱ ti jaha la chrókꞌuikon sin ti kjuaxroan tjásian. Kixin ti ijnko nkexro tjinkaon kixin tsochóxin chojni, la jehya imó chrókjuíchꞌe ixra̱. A̱ndá ti chaxín tjetjásian kjuaxroan, la jehya imó chrókjuásian. Náhí. Chrokui̱to̱hé chrókꞌuikon kaín chojni.
Mé xi̱kaha ndáchro ti sin kícho chꞌan kixin kja̱xin sin titekakuenhña sin ti jehe chꞌan. A̱ndá kjuáte̱he chꞌin Jesús, ndáchro:
―Na̱xa̱ tihya ti hora tso̱nohe chojni nkexro ti janhan. Ndá jahara la kjónté jehya ti hora, la jína sáchrókjuira. Ti chojni chjasintajni la xitjahya tso̱nínkakohanra. A̱ndá janhan la imá nínkakona sin kixin ndátjan sin kixin jehya jína ti nkehe tjejóchꞌe sin. Jahara la sátjira ti kia a. A̱ndá janhan la tsjíhya kixin na̱xa̱ kjuixrakájña ti hora tso̱nohe sin nkexro ti janhan ―ichro chꞌan.
Mé xi̱kaha ichro chꞌan, ndá kuíto̱he chꞌan Galilea.

Ndá ti ó kjuixin sákjui̱ ti kícho chꞌan, ndá jehe chꞌan la kja̱xin sákjui̱ chꞌan ti kia a, kjánchó noxínhña kjuákꞌe chꞌan. Ndá ti sin judío mé xritjeyá sin chꞌan ti kia a, la ndáchro sin:
―¿Xá nketí chrókjuákꞌe ti nkexro a?
Ndá itsjé ti sin tjejó ntiha mé ikjo kícho sin kuènté chꞌin Jesús. Mé iso sin la ndáchro: “Jehe chꞌan mé ijnko chojni jína”; a̱ndá íso sin la ndáchro: “Jehya chojni jína ti jehe chꞌan kixin imá chꞌiyehe chꞌan chojni.”
Kjánchó noxínhña ikjo sin xi̱kaha kixin chráko̱nhe̱n sin ti sin tꞌe̱to̱an kuènté ti sin judío.
A̱ndá ó nko̱siñe ti kia, ndá kꞌuíxehen chꞌin Jesús ti ni̱nko, ndá kjuankíxin kjuako chꞌan. A̱ndá ti sin judío la chrákon sin, komá sin ti jehe chꞌan, ndáchro sin:
―¿Xá nkexrín kixin imá nohe ti nkexro i kixin tsíxrakoe̱hya chꞌan?
Ndá kjuáte̱he chꞌin Jesús, ndáchro:
―Ti nkehe tjàkua la jehya kuénta̱na, tíha la kuènté ti nkexro ichrꞌán ti janhan. Ti nkojinra tjinkáonra chrókjui̱nchexiteyára éxi tóxríhi̱n Díos, la tso̱nohara á chaxín kuènté Díos ti nkehe tjàkua, o̱ á jehó kuénta̱na. Ti nkexro tjako ti nkehe tꞌaxrjeníxin a̱sén ó, mé xi̱kaha tja̱ko̱xi̱n kixin tjinkaon chrókjuikosáyehe chojni. Kjánchó janhan tjínka̱oan kixin ti nkexro ichrꞌána kꞌuinka la tsꞌáyéhe̱ kaín ti kjuasàya, méxra̱ chaxín ndoá ndáxrja̱n kaín nkehe la tꞌa̱yahya ninkehó.
’¿Á jehya Moisés tjáhara ti ley ní? Kjánchó nijnkora nchexiteyéhyara. ¿Nkekuènté tjinkáonra chrókꞌoñára ti janhan?
Ndá kjuáte̱he sin, ndáchro sin:
―Jaha la chonta ncha̱kuén jínahña. ¿Xá nkexro tjinkaon chrókꞌóñá ti jaha?
Ndá kjuáte̱he chꞌin Jesús, ndáchro:
―Nkoko̱a kjuaxroan kjuásian ndá chrákonra. *A̱ndá Moisés tsíkꞌe̱to̱an kixin xja̱anra ndoa itsa xro̱ye (kjónté jehya Moisés kjuankíxixín kjuako tíha; tíha la kjuako ti sin tsíkꞌaxrjeníxinra ósé). Ndá xi̱kaha jahara la nchekara xjan xro̱ye, kjónté ti ña̱o to̱kꞌéheni. *A̱ndá ti xi̱kaha nchekara xjan xro̱ye, kjónté ti ña̱o to̱kꞌéheni, kixin tjinkákonhñara si̱nchekꞌitjáñankíra ti nkehe kꞌue̱to̱an Moisés, ¿ndá nkekuènté ninkáonra kixin kjui̱ntakito̱ha̱ jína ijnko chojni ti ña̱o to̱kꞌéheni? Chrókjuanchahyara ijie̱ kixin ti nkehe tꞌikonra nduáhya ó. Náhí. Chrókjuénka̱yáxinra ijnko nkehe chaxín ndoá kixin jína chrókuíto̱exín ―ichro chꞌin Jesús.

A̱ndá iso sin ti chjasin Jerusalén kjuanchankíhi kícho sin, ndáchro sin:
―¿Xá jehya ti nkexro i ti xritjeyá sin chrókꞌóñá sin ní? A̱ndá ijie ti siín nchónhña chojni la tjenixja chꞌan la ninkexró ndáchrohya ninkehó. ¿Á titekaon ti sin tꞌe̱to̱an kixin ti nkexro a mé chaxín ti Cristo ní? Kjánchó ó noheni nketí tsíkji̱xi̱n ti nkexro i. A̱ndá ti ó itsi ti Cristo la ninkexró tso̱noehña nketí tsi̱xi̱n chꞌan.
A̱ndá chꞌin Jesús kjuákꞌe chꞌan kjuako chꞌan ti ni̱nko, ndá kuíhin chꞌan kixin xi̱kaha ikjo kícho sin, ndá itsen nixja chꞌan, ndáchro chꞌan:
―Chaxín choxínra ti janhan la ko nohara nketí kjuixian. Kjánchó jehya kixin kꞌuinka si̱ntaxiteyá ti nkehe ndáchro a̱sená ó. Kꞌuinka kixin ti nkexro chaxín ndoá itjen la ichrꞌán ti janhan, a̱ndá jahara la na̱xa̱ chonhñara ti nkexro a. Janhan la choxián chꞌan kixin kꞌuinkaxian ti itjen chꞌan, la jehe chꞌan ichrꞌána kꞌuinka.
Ndá tjinkaon sin chrótsé sin chꞌin Jesús chrókjuakꞌechjina chꞌan, kjánchó ninkexró tséhya ti jehe chꞌan, kixin na̱xa̱ kjuixrakájña ti hora tsotsé sin chꞌan. A̱ndá itsjé chojni kuitekaon sin ti jehe chꞌan la ndáchro sin:
―¿Á ti ó itsi ti Cristo la a̱ntsí itsjé kjuaxroan tsja̱ko̱xi̱n chꞌan ke ti nkexro i ní?

A̱ndá ti sin fariseo kuíhin nkehe ichro chojni kuènté chꞌin Jesús, ndá jehe sin la ko ti sin ncha̱tꞌá kꞌue̱tue̱hen sin iso policía kuènté ti ni̱nko kixin tsotsé sin chꞌin Jesús tsjakꞌechjina. Ndá chꞌin Jesús ndáchro:
―Í séhya tsjakꞌé ntihi tsꞌejóni, ndá sáxikjiá ti itjen ti nkexro ichrꞌána. A̱ndá jahara tsjéyára ti janhan la í tsꞌitjáhyarani kixin xitjahya tsjasánra ti tsjakꞌé janhan.
A̱ndá ti sin judío kjuanchankíhi kícho sin:
―¿Xá nketí sátsji̱ ti nkexro i kixin tsjachahyani tsꞌitjani? ¿Xá sátsjichréhe̱ chꞌan ti sin judío tjejóyákjan ti sin griego, kixin tsja̱ko̱he̱ chꞌan sin ní? ¿Xá nkehe tꞌaxrjexín ti nkehe ndáchro chꞌan kixin tsjeyáni chꞌan la í tsꞌitjahyani, la tsjachahyani tsji̱chréhe̱ni chꞌan ti tsjakꞌe chꞌan?

*A̱ndá ti ña̱o tsjixixín ti kia a, mé ti ña̱o ijié, mé kꞌuínkatjen chꞌin Jesús, ndá itsen nixja chꞌan ndáchro chꞌan:
―Ti nkojinra ikꞌuénra ìnta̱ la xrákira ti itjén janhan, la itꞌira. *Éxi ndáchro xroon Itén Díos, ti nkexro titekaon ti janhan, la nkaya a̱sén sin tsꞌóna ijnko nda̱río tsꞌaxrje ìnta̱ tjechón.
Mé xi̱kaha chrónkaxín chꞌin Jesús kixin ti sin tsitekaon ti jehe chꞌan la tsꞌáyéhe̱ sin ti Ncha̱kuén Díos, kjánchó na̱xa̱ tihya ti Ncha̱kuén Díos kixin chꞌin Jesús la na̱xa̱ sátji̱hya chꞌan nka̱jní.

A̱ndá iso sin, ti ó kuíhin sin ti nkehe ndáchro chꞌin Jesús, la ndáchro sin:
―Kjá chaxín ti nkexro i mé ti profeta chrókui.
La íso sin ndáchro:
―Jehe chꞌan mé ti Cristo.
A̱ndá íso sin ndáchro:
―¿Xá nkekuènté chrókjui̱xi̱n Galilea ti Cristo? *Ti xroon tsíkjin sin ósé mé chrónka kixin ti Cristo mé tsꞌaxrjeníxin ti sin kꞌuaxrjeníxin ti Rey David la ko tsji̱xi̱n ti chjasin Belén, mé ti chjasin kꞌuékjakꞌe Rey David ―ichro sin.
Mé xi̱kaha nkoko̱ahya kjuénka̱yáxin sin kaín sin, kixin nkexro ti chꞌin Jesús. Iso sin tjinkaon sin tsotsé sin ti jehe chꞌan kixin tsjakꞌechjina chꞌan, kjánchó ninkexró xi̱kahña kjuíchꞌe.

A̱ndá ti sin policía kuènté ni̱nko mé ikjan sin ti tjejó ti sin fariseo la ko ti sin ncha̱tꞌá tꞌe̱to̱an. Ndá ti sin a mé kjuanchankíhi sin ti sin policía:
―¿Nkekuènté kjuíkoáhyara ti nkexro a?
Ndá kjuáte̱he ti sin policía ndáchro:
―Kohya ninkexró nixja éxi nixja ti nkexro a.
Ndá ti sin fariseo ndáche ti sin policía:
―¿Á kja̱xinra kui̱to̱héra kjuitꞌayahara chꞌan ní? ¿Á nkojín ti sin tꞌe̱to̱an kuènténi la ko ti sin fariseo kuitekaon ti jehe chꞌan ní? Ti chojni kuitekaon tíha la mé ti chojni chónhña ti ley, la jehe sin la tsjasóte sin ―ichro ti sin tꞌe̱to̱an.
*A̱ndá chꞌin Nicodemo, ti nkexro kjuitsjehe ti chꞌin Jesús ijnko tie, la jehe chꞌan ijnko chojni fariseo, la ndáche chꞌan sin:
―Ti ley kuènténi la tjajonhña kjuachaxin sinchekjasóteni ijnko chojni ti na̱xa̱ kienhñani nkehe nixja chꞌan, la ko ti ijie̱ kjuasin chꞌan.
Ndá kjuáte̱he sin, ndáchro sin:
―¿Á kja̱xinhña kjuixian Galilea ní? Nchekuáxian ti xroon itén Díos ndá tso̱noha kixin nijnko ti sin kꞌuéchronka itén Díos la tsíkji̱xi̱n sin Galilea. Ndá kaín sin sákjuí sin ndo̱e sin.

استمع إلى San Juan 7