The Ebira Audio Bible

Ebira - 1981 Edition (NT)

Ebira First Bible © Bible Society of Nigeria, 2014.

Hụrẹ ụmọrụmọ, dị a va yẹ ka aa mẹ ẹhẹ, Ịrẹyị Ohomorihi hụrẹ yà ịzọọ nị. Ịrẹyị ọnọọ vị ana yà ịdị Ohomorihi, Ịrẹyị ọnọọ gẹdẹ-gẹdẹ vị Ohomorihi. Hụrẹ ụmọrụmọ ọnọọ, Ị́rẹyị ọnọọ hụrẹ yà ịdị Ohomorihi nị. Ini oze Ịrẹyị ọnọọ Óhomorihi zị mẹ avaba ịsa nị. Ịnị avaba ịsa oni Ohomorihi tụ́ saka-saka ẹ yị nyị ikonya ẹnẹ ẹ̀ yị vị ini oze Ịrẹyị ọnọọ ọ yà tụ́ ọọ. Ịrẹyị ọnọọ ọ mẹ ka ịsavị-ịsavị ẹ̀ yàra nị. Ọyịyàra ọnọọ aa sị ẹtohweyi zụ̀ aza nị. Etohweyi ọnọọ aa zẹtẹ ịnị ịrahụ, ama ịrahụ o yi huna a.
Â nyị ọnọrụ ọnya aanị, oni Ohomorihi tụ́ vẹ. Ịrẹha anị ọ rị Ịjọọnụ nị. Ịjọọnụ ộ vẹ ka ọnị ọ̀ dọ ivenu yị aza ini oze Etohweyi ọnọọ. Ọ va kà a, agụvị dị avaba aza ẹ̀ zụ zị oze ịnị ụvọ anị dọ ọ wụ́. Ẹ yị vị Ịjọọnụ ọ vị Etohweyi ọnọọ, ama vị a tụ́ ọ ka ọ̀ dọ ivenu ịrẹyị Etohweyi ọnọọ yị aza nị. Etohweyi obooro ana aa sị ẹtohweyi zụ̀ aza, aa vẹ ịnị ẹhẹ, Ọza ana vị Etohweyi obooro ọnọọ ọ vavẹ ịnị ẹhẹ; ini oze anị Óhomorihi hyakụ yà mẹ ẹhẹ nị, ama anẹhẹ ẹ yị va yẹ ẹ. Ộ vẹ ịnị ẹkụra anị, ama aza anị ẹ yị va dọ ọ. Ama ọza tụra ọza ana àa dọ ọ, dị ẹ sị ayị tụra a nị, ẹnị ọọ̄ sị ọdaa yị ka ẹ̀ vara ezi Ohomorihi nị. Ka aza ẹnẹẹ ẹ sị vị ezi Ohomorihi o yi véné, aza mẹ̀ẹ̄ ma ezi ana ahịka ọnọrụ ọnịrị ọnẹẹ ẹ tụra ụsụ anị nị. Ama Ohomorihi ọnị ụvọta ọ ma wa nị.
Ịrẹyị ọnọọ ộ vara ọzarẹyịrẹsụ, dị ọ ra ịnị akakana ayị yị ụmẹ chee nị. Yê re igirima anị ana vị igirima ana vọrọ tụra ọza ana vị ozi ikonya Ada anị kẹnẹ. Ộ nyị ayamva ẹnẹmẹhị, dị ọ rẹ vị ọnịzẹyịza nị. Ịjọọnụ ộ vịdị kà ịrẹyị anị yị aza. Aa nọọ ka, “Ọza ọnị mị vịdị aa kà ịrẹyị anị yị, ka aa vẹ ị́rẹma amị, ama ọnị o huna mị nị, agụvị ka o si kù ọnị ọnị hụrẹ yà ịzọọ, dị a va yẹ ka aa ma mị.” Agụvị ka ô sì ịrẹyị ẹnẹmẹhị, ộ mẹ̀ ọyịza yị avaba ayị; dị aa mẹ ẹyị ẹyịza irenyi-irenyi nị. Ohomorihi ộ sị ọda zị oze ịnị ụvọ Imosiisi yị aza; ama ayamva ọnịrị ịzẹyịza vị oni Ohomorihi zị oze ịnị ụvọ Ijeesu Ikirisiti sị yị aza. Ẹẹ̀ yị nyị ọza ene re Ohomorihi tụ́ eyi da. Ozi ikonya gene-gene ọnị ọnịrị Ohomorihi vị ọnya, dị ọ gụrị Ada anị ẹtẹẹtẹrẹ ọ kà a zụ̀ yị, Áda anị mẹmẹ yà nị.


Aniju nịnị ene hi Ijerusarẹmị ệ tụ́ ohirẹsụ irehi Ohomorihi ẹnyị ọnịrị Anireevi nịnị ne tù Ịjọọnụ. Ẹ ka ẹ̀ họ̀ Ịjọọnụ ka ẹnẹ ọ vị ana vị da. Ịjọọnụ ọ yị kà a ka ọnị ọ yị tụ́ ohi ịrẹyị, ộ dọ irenu gedebee, dị ọ ka ẹ yị vị ọnị ọ vị Ikirisiti! Dị ẹ yaa yịị họ̀ ọ ka, “Ẹnị ụ va vị? Ẹ wáá vị Erija nị?” Dị Ịjọọnụ re tụ́ ohi ka, “Mẹ yị vị Erija!” Dị aza ẹnẹẹ rẹ họ̀ ọ ka, “Ẹ wáá vị Ọnịsẹ ọnọọ nị?” Dị Ịjọọnụ kà: “Eyiye” nị. Dị ẹ rẹ yaa yịị họ̀ ọ nị ka, “Ẹnị ụ va vị? Kà ẹ yị, dị ya yẹ ohi ana a vọrọ ka ya sị na yị aza ana tụ́ yị vẹ. Sị ụ zụ kà ini oze ẹngụ awụ?” Dị Ịjọọnụ tụ́ wa ohi ka ọnị ọ vị ọza ana Ayịsaya ọnịsẹ vịdị kà ịrẹyị anị ka, “Â nyị ọza ịnya aanị ana vaa yà ịnị ụnọmị ana aa nọọ ka: ‘Tenyi oze Ananyị yị tịtẹ yọ nịnị, tenyi oze anị, dị ọ̀ vọrọ ẹtẹẹtẹrẹ!’ ”
Anihwarisi nịnị ẹ maanị tụ́ aza ne tù Ịjọọnụ nị. Dị ẹnịnị va họ̀ Ịjọọnụ kà: “Wàa ka ẹ yị vị ẹwa vị Ikirisiti, dị ụ wẹ̀ yị rẹ vị Erija, dị ẹ̀ yị rẹ vị ẹwa vị Ọnịsẹ ọnọọ nị, sị ẹ vavẹ dị ụ wa hụ́ aza enyi ẹdọwụ?” Dị Ịjọọnụ tụ́ wa ohi, dị ọ ka, “Ẹmị aa sị enyi mẹ ọyịhwenyii yị wụ nịnị; ama â nyị ọza ana yà ịnị akakana awụ nịnị, ọnị ụ wẹ̀ yị yẹ nịnị. Ọza ọnọọ mị ka aa vẹ ị́rẹma amị nị; mẹ yị hyakụ yà ọza ana a vọrọ ka ọ̀ ngwa adava hụụnị ahụ anị.” Avaba ịsa ẹnẹnị vị ana mẹ ẹkụra Ịbẹtanị, ana yà akẹnẹ Okuha Ịjọdanị ịzị Ịjọọnụ yà aa mẹ ọyịhwenyii yị aza.


Eyinẹhẹ anị, Ịjọọnụ ô re Ijeesu, ọ màa vẹ ịdị anị. Dị ịjọọnụ ka, “Wee re Ozi Atẹmẹ Ohomorihi ana a vaa sị mẹ̀ ịsọvọ dị ọ̀ kụ̀ ịvị anẹhẹ kwooze! Ọza ọnị mị vịdị aa kà ịrẹyị anị yị ka: ‘Â nyị ọza ana aa vẹ ị́rẹma amị; ama oni o huna mị nị, agụvị ka o si kù ọnị ọ hụrẹ yà ịzọọ dị a va yẹ ka aa ma mị.’ Ẹmị nyẹmba ẹ yị vịdị yẹ ẹ; ama ma va sị enyi mẹ̀ ọyịhwọzenyi yị aza, agụvị dị à zụ sị ọọ zụ̀ ẹwụ nịnị Anisirẹrị.”
Ịjọọnụ ộ dọ ivenu tụ́ ọọ ka, “Mê re ka Ụhwẹ Ọnịnị ee chíi hụrẹ ẹbẹẹba vẹ anka arivadi avọọ, dị ọ va yà a ịrẹsụ nị. Mẹ yị vịdị yẹ ẹ, ama Ohomorihi ana tụ́ mị ka maa sị enyi mẹ ọyịhwenyii yị aza, ộ vịdị kà a mị ka, ‘Ọza oni u wèe re ka Ụhwẹ Ọnịnị ô chí vẹ, dị ọ va yà ịrẹsụ anị nị, ọza ọnọọ gẹdẹ-gẹdẹ ọ vaa sị Ụhwẹ Ọnịnị hụ̀ aza mẹ enyi nị.’ Ma si oo re, mâ dọ ivenu tụ́ ọọ ka ọnị ọ vị Ozi Ohomorihi nị.”

Eyinẹhẹ anị, dị Ịjọọnụ ọnịrị ezirẹma anị ẹẹva rẹ jẹẹ ịzọọ nị. Ị́jọọnụ mè re ka Ijeesu aa parahu, dị ọ rẹ ka, “Wee re Ozi Atẹmẹ Ohomorihi!” Ezirẹma ẹyịva Ịjọọnụ ana jẹẹ ịzọọ ệ wụ́, Ị́jọọnụ mẹ̀ vavọọ kà, dị ẹ saasa Ijeesu aa na nị. Dị Ijeesu kana eyi, di o re ka ẹyaa dụ ọnịị vẹ nị. Ộ họ̀ wa ka, “Si u wee sì nịnị?” Dị ẹnịnị ka, “Iraabi, ịzị ụ ra?” (Iruvo “Iraabi” ọ vị “Iticha”.) Dị Ijeesu kà a yị wa ka, “Ve re e nịnị!” Dị ẹ na, di e ne re ịzị Ijeesu ra nị, dị ẹnị rị ọ dudu yà ịzọọ ịhị ọnọọ nị. Ụmẹ ọnọọ vị ẹhụụ ụmẹ agogo ẹẹna oruva.
Ọnyara ịnị aza ẹyịva ẹnẹẹ ana wụ́ ịrẹyị Ịjọọnụ dị ẹ saasa Ijeesu, vị Andụrụ, ọyịnyara Ịsayịmọnị Ipita. Andụrụ ộ vịdị ne sì Ịsayịmọnị ọyịnyara anị. Dị ọ kà a yọ ka, “Ya sị Imesaya ọnọọ re, ọ!” Iruvo Imesaya ọ vị Ikirisiti nị. Dị Andụrụ sị Ipita vẹ ịdị Ijeesu nị. Ịjị Ijeesu re e, dị ọ kà a yọ ka, “Ẹ wa vị Ịsayịmọnị ozi Ịjọọnụ nị. Ẹwa kụkụ rẹ vaa rị Ikehwasi nị.” (Iruvo “Ikehwasi” ọ vị “ịrẹta” nị.)

Eyinẹhẹ anị, dị Ijeesu ka ọnị aa nọ Igariri nị. Ô re ọza ịnya aanị ana aā hị́ Ihwiripi. Dị Ijeesu kà a yọ ka, “Waa dụ mị ịrẹma!” Ihwiripi vị Anịbẹtịsayịda, ẹkụra Andụrụ ọnịrị Ipita. Ihwiripi oni o re re ọza ịnya aanị ana aā hị́ Inatanẹrị. Dị Ihwiripi kà a yọ ka, “Ọza oni Imosiisi chẹrẹ ịrẹyị anị tụ́ ini iwe ọda, dị ọnịsẹ nịnị ẹnị rẹ chẹrẹ ịrẹyị anị, ye si o re. Ọnị ọ vị Ijeesu Anịnazarẹtị, ana vị ozi Ijosẹẹhụ nị.” Dị Inatanẹrị ka, “Aanịka â nyị ịsa ozoza ana zụ hụrẹ ẹkụra Ịnazarẹtị vẹ?” Di Ihwiripi kà a yọ ka, “Vẹ, di u we ve re e!”
Ịjị Ijeesu re ka Inatanẹrị aa vẹ ịda anị, di Ijeesu kà ịrẹyị ini oze anị ka, “Anisirẹrị obooro yọ! Ọnịzẹyịza obooro ọ vị̀ nị.” Dị Inatanẹrị họ̀ ọ ka, “Ho! Ịzị ụ yà yẹ mị?” Dị Ijeesu tụ́ ohi, dị ọ ka, “Mê re wu, ụ mẹ̀ yaayịtẹ íruvo ọchị ihwigi, di Ihwiripi va hị́ wụ.” Dị Inatanẹrị tụ́ ohi, dị ọ ka, “Ọga, ẹwa vị Ozi Ohomorihi nị. Ẹ wa rẹ vị Ohinọyị Anisirẹrị nịnị nị.” Dị Ijeesu tụ́ ọọ ohi, dị ọ ka, “A vị agụvị ka mâ kà a ka mê re wu íruvo ọchị ihwigi, ọ va mẹ ka wa dọ wụ́? U vee re ịsa ana banyị huna ẹsẹnị.” Dị Ijeesu rẹ kà a yọ ka, “Ịzẹyịza m maa kà a wụ nị: U vee re ka ẹbẹẹba ộ na hi ẹtẹ, dị anggẹẹrị Ohomorihi aa vaa hịrẹẹ vaachi ịrẹsụ ẹmị Ozi ọza onigirima.”

استمع إلى Ịjọọnụ 1