Text: © Wycliffe India Audio: ℗ Hosanna 2024 and WPT

Pangwali 2023 WBT (NT) Drama

फिर यीशु अपु बाराह चेले भेएड़ भिए त तेन्हि दुष्ट आत्मा नशाणे, हर बीमारी त कमजोरी ठीक करणे ताकत दिती। अन्हि बाराह खास चेली के नओं ईं असे।
शमौन जेस नओं तेन “पतरस” रखु
त तसे भाई अन्द्रियास;
जबदी कुआ याकूब
त तसे भाई यूहन्ना;
फिलिप्पुस,
बरतुलमेई,
थोमा
त मामला नेणे बाड़ा मत्ती,
होर हलफई कुआ याकूब
त तद्देइ,
शमौन कनानी
त यहूदा इस्कारियती, जेन यीशु टोवाई बि छड़ा।


तोउं यीशु तेन्हि बाराह जेईं जे ईं बोल कइ लंघाए “गैर यहूदी मेह्‍णु केईं न घिए, होर ना सामरी मेह्‍णु के केसे शेहर घिए। बल्कि तुस इस्राएली मेह्‍णु केईं घिए, जे जीं भटको ढडुड़ के ईं परमेश्वर केईआं बिडिड़ गो असे। होर हंटते हंटते ईं प्रचार करे: ‘स्वर्गे राज्य तुं भेएड़ एई गो असा।’ बीमार मेह्‍णु सुसुरेरिण दिए। मरो तेन्हि दुबारी जीआण दिए। कोढ़ी ठीक करे त दुष्ट आत्मा नशाण छड़े। ए सोब करणे शक्ति तुसी बजन मुले मेओ असी, त तुस बि ए सोब बजन मुले करे। तुसी अपफ जुए न सुन्ना चन्नी, न रुपेई, होर न कोई चीज रखीण। तुसी बथ जे न कोई झोड़ा, न झिणे, न प्युले त न लठि रखीण, किस कि मजूर तसे रौठि मेणे हक असा। तुस जेठि कोठि केसे ग्रां या शेहर घियेल त पता करे कि तठि कोउं तुं सेवा पाणि कता। तसे गी घिए त तेस जगाई केआं घेणे तकर तठि बिशे। जिखेईं तुस केसेरी गी घेन्ते त अन्तर घेन्त पेंत तेन्हि जे बोले, ‘तुसी सुख शान्ति मेओ लौती।’ अगर तेस गीहे मेह्‍णु तुसी बिशान्ते त तेन्हि पुठ तुं अशुश रेहन्ती। पर अगर से ना बिशाल त तुं अशुश तुसी केईं वापिस एन्ती। जे कोउं तुसी न धराल या तुं बोक न शुणियाल, तेस गी या तेस शेहर केआं बाहर नशणे टेम अपु खुरे धूड़ ठुटक छड़े। अउं तुसी जे बोता कि न्याय करणे रोज परमेश्वर तेस शेहरे मेह्‍णु जे सदोम त अमोरा शेहरे मेह्‍णु के सज्जा केआं बि ज्यादा सज्जा देन्ता।”


तोउं यीशु हउ बि बोलु, “हेरे, अउं तुसी तीं लंघान्ता जीं कोई शेंखु बुच ढडुड़ रखता। तोउं त, तुस कीड़े ईं खबरदार बिशे त अलणी ईं भोले बणे। मेह्‍णु केआं खबरदार बिशे, किस कि से तुसी टजोटी के हवाले कते त अराधनालय अन्तर चाबुके बइ मडते। तुस में बझई जुए अफसर त राजे सामणि नीइन्ते, ताकि तुस तेन्हि त गैर यहूदी मेह्‍णु जे बि में उगाह दी सकियेल। पर जपल से तुसी टोवाल त तुस ई चिन्ता न करे कि असी की बोलुण, किस कि जे किछ बि तुसी बोलुण भोल, तपले तेस घड़ी शुची आत्मा तुसी जे बोल छती। किस कि बोलुणे बाड़े तुस न भिन्थ, पर तुं बोउए आत्मा तुसी अन्तरा बोती। भाई भाई त बोउ कुआ मरण जे टोवाई छते, होर गभुरु ईये बोउए दुश्माण बण कइ तेन्हि मरवाई छते। होर में बझई जोई सम्हाई मेह्‍णु तुसी हेर नफरत कते; पर जे अखिर तकर लाह जोई सीढ़िन्‍ता, सेईंया बचता। जपल से तुसी यक शेहर भुंजाल त होरे शेहर जे नश घेण। अउं तुसी जे बोता कि तुसी इस्राएले सम्हाई शेहर अन्तर बि में खुश खबरी प्रचार कइ बि बटो ना भोल कि अउं, मनखे कुआ अपु शान जुए एन्ता। चेला अपु गुरु केआं बोडा न भुन्ता; त होर न नौखर अपु मालिक केआं बोडा भुन्ता। चेले गुरु जोई त नौखरे मालिक जोई बराबर भुणे ईं रज्जि असु। जपल तेन्हि गीहे मालिक जे ‘शैतान’ बोलु त तसे गीहे बाड़ी जे की न बोते?”


“तोउं त, तेन्हि हेर न डरुण; किस कि ईं कुछ ढकिये न रेहन्तु, होर न कुछ नियोकइ रखीन्तु जे बाहर न निस्तु। जे अउं तुसी जे अकेले अन्तर बोता, तेस तुस सोबी के सामणि बोले। होर जे अउं तुं कनपत बोता, तस लहाड़ि घेई कइ जोरी जोई बोले। जे सद जिसम मार बटते, पर आत्माई मार ना सकते, तेन्हि हेर न डरुण। पर तेस परमेश्वरे हेर डरे जे जिसम त आत्माई दुहि नर्क अन्तर बरबाद कइ बटता।”
“कि बारा! किछ रुपेई बइ दुई चड़ी न बेचीन्ति ना? तोउं बि, तुं बोउए इच्छाई बगैर तेन्हि अन्तरा यक बि मर कइ भीं न झड़ती। तुं मगरी छते बि सोब गणो असी। तोउं त डरे नउ; तुं कीमत त सुआ चड़ी केआं बि बध कइ असी।”


“जे कोउं मोउं मेह्‍णु के सम्हाणि मनाल, तेस अउं बि अपु स्वर्गे बोउए सम्हाणि मानता। पर जे मोउं मेह्‍णु के सामणि न मनियाल तेस अउं बि अपु स्वर्गे बोउए सामणि न मानता।”


ईं न समझे कि अउं धरती पुठ मेल मिलाप कराण जे अओ असा। अउं मेल मिलाप कराण जे नेईं, बल्कि तलवार चलाण जे अओ असा। अउं तोउं अओ असा कि में बझई जोई कुआ तसे बोउ जोई, कुई तसे ईया जोई त बेउठी तसे राणी जोई झगड़ीन्‍ती त बखी घेन्ते। मेह्‍णु सोबी केआं खतरनाक दुश्माण तसे गीहे बाड़े भोई घेन्ते। जे अपु ईया बोउ मोउं केआं ज्यादा ट्यारा कते, से में चेला बणणे लेएक नेईं। होर जे अपु कुआ या कुई मोउं केआं ज्यादा ट्यारा कते, से में चेला बणणे लेएक नेईं। होर जे कोउं अपु क्रूस ढीड़ कइ मरुण तकर में पता न एईयाल, से में चेला बणणे लेएक नेईं। जे अपु प्राण बचाण चहन्ता, से तेस गड़ाई छता। होर जे कोउं में लिए अपु प्राण दी छता, तेस से मेई घेन्ते।

तोउं यीशु बोलु, “जे तुसी अपणान्ता, से मोउं अपणान्ता। त जे मोउं अपणान्ता, से में लंघाणे बाड़े तस बि अपणान्ता। जे भविष्य वक्ते, भविष्य वक्ता मान कइ अपणान्ता, तेस तसे ईनाम मेता। होर जे धर्मी मेह्‍णु धर्मी मान कइ अपणान्ता, तेस बि तसे ईनाम मेता। त जे कोउं इन्हि मठड़ी अन्तरा यक जेईं बि में चेला मान कइ अगर यक गलास ठन्नु पाणि बि पियाल त तेस तसे ईनाम जरूर मेता।”

استمع إلى मत्ती 10