Wekvt Yesuí kàshvbóng kèní rá àngmaq sv̀ng shǿn pà:ngòe. “Vsv̀ng tiqgǿ nø bìm tiq kùlwàng ka:tnò nø̀, gùrhøm ha:mò dá:ngí bìmshí cutrà dv̀ngkø̀r gø chuqdv̀ng, zunzvng gø wàòe. Wekvt bìm kùlwàng sv̀ng kùlwàng wáshúrì kaq ngáò dá:ngí, àng nø dvgá tiqmóng sv̀ng dìá:mì. Àngshí dvkøm rvtø̀í, kùlwàng wáshúrì kèní àngò mvtu wál rvkullv́m dvpvt, à:ngí àngmaq yv́ngsv̀ng àng vshuq tiqpè dvzv́r bǿà. Íwe àngmaqí wepè sv̀ng ta:pmò nø̀, hwíhwí reò dá:ngí, àng sv̀ng vhúng shvloòe. Vrá, À:ngí vshuq dvgá tiqpè àngmaq yv́ngsv̀ng dvzá:ròe. Àngmaqí wepè vgo sv̀ng vdipmò nø̀ shvraq chaqòe. Vrá, À:ngí vshuq dvgá tiqpè dvzv́r bǿà nìnø, wepè sv̀ng gø àngmaqí shvt bǿà. Mèpvng dvgádø mvme gǿ dvzv́r bǿà nìgø, tiqmaq sv̀ng hwíhwí reò nø̀, tiqmaq sv̀ng sha:tnòe.
Wemèpvng àng shóngshì we àngcè tiqpè wa v́laò we, ‘Ngàcèpè sv̀ng nø àngmaqí vpǿ dáòe,’ wa dvda:mò nø̀, shvngbe lv̀ngdø̀m nø wepè gø àngmaq yv́ngsv̀ng dvzá:ròe.
Wedø ínìgø kùlwàng wáshú werì vrashì nø̀, ‘Zaqshøp vpvtlv́m pè nø yapè lè íe. Ló, àng sv̀ng shatnì. Wekvt zaqshøp nø nøngmaq dvpvt í longe,’ wae. Wervt àngmaqí àng sv̀ng ta:pmò nø̀, sha:tnò dá:ngí bìm kùlwàng vdàm lap sv̀ng gu:ròe.
Wedø í nìnø, bìm kùlwàng àngkàngpèí kadø wà lú:ngò má? Àng di daq weí, kùlwàng wáshúrì sv̀ng sha:tnò nø̀, bìm kùlwàng nø dvgárì sv̀ng tvle bǿòe. Shànshér kàru taq,

‘Chø̀m vrvngshú rìí gur bǿà we lóng chv̀ng nø
górtong dvdøng lóng chv̀ng íá:mì.
Yalòng nø Kàngpèí wa daqà nø̀,
nøngmaq nemv̀rø dvdvm vtiqlv́m íe,’

wa kà sv̀ng nàmaqí mèrø dv́rnø̀ng má?” a:lòe.
Kàshvbóng yalòng nø àngmaq kaq vchaqlv́m À:ngí shø̀:nò we sv̀ng àngmaq dǿmshi bǿì. Wervt Àng sv̀ng tvp mvyǿ we í nìgø vsv̀ng loksokrì sv̀ng àngmaq svre rvt Yesu sv̀ng ca là:ngò nø̀ loá:mì.


Wemèpvng, Yesu sv̀ng Àng kà kèní shvwá lúnlv́m dvpvt, àngmaqí Parisirì nv̀ng Herod mvdò kèní vsv̀ng tiqmaq Yesu yv́ngsv̀ng dvzá:ròe. Àngmaq tuq ráì kvt Àng sv̀ng, “Svrapèá, Nà nø dìng we kà wa èshø̀n we nøngmaqí shá bǿshà. Nàí kagǿ sv̀ng gø mènàna:tnò. Vsv̀ng mv̀rshv̀m mèrèwì:ngò, Gvray tvrà døngdøng wa shèngø:tnòe. Íni, Kesar sv̀ng kùyà gún lòng nø dvráe má, màdvrá má? Nøngmaqí kùyà gúnaì ni má, mvgúnaì ni má?” a:lòe.
Íwe, àngmaqí vní nøt nø:tnò we sv̀ng À:ngí sháò rvtnø̀, “Ngà sv̀ng pàwá nàløtshàe má? Dinari tiqgø̀m èlv́ngvtnø̀ng nø̀ dètanvtshà,” a:lòe. Àngmaqí gv̀msùng tiqgø̀m tvlea:tnà kvt À:ngí, “Vsv̀ng hang nv̀ng vrushaq kà yarì nø, kagǿò íaò má?” a:lòe.
Àngmaqí Àng sv̀ng, “Kesarò íe,” a:lòe.
Yesuí àngmaq sv̀ng, “Kesaròrì nø Kesar sv̀ng, Gvrayòrì nø Gvray sv̀ng nàtv́nganø̀ng,” a:lòe.
Wekà rvt àngmaq nø Àng sv̀ng dàá:mì.


Wemèpvng, shì yv́ngkèní zun long we màvl, wa kv́m we Saduki mvdò Àng yv́ngsv̀ng dì ráì nø̀, “Svrapèá, lvngàré tiqpè nø svma vdávm mèpvng cv̀mré màdá ke la shìvm nìnø, àngnvmpè nø memàmè nv̀ng shvzøngshì nø̀, àngnvmpè dvtut lvvl dø wá ràe wa, Moshií nøngmaq dvpvt nàrua yv̀ngshà. Vzv̀ng dvgvp àngnøngnvm shvngøtpè vl we, vlatpè nø zvmì lushì dá:ngí, àngcè màdá shìá:mì. Vdǿ gø memàmè nv̀ng shvzøngshì dá:ngí, àngcè màdá shìá:mì. Vkwin gø wedø tiqdvchá shìá:mì. Àngnøngnvm shvngøt pèpè nø, àngcè màdáshaq shì yà:ngì. Lv̀ngdø̀m nø svmarémè gø shì yà:ngì. Àngnøngnvm shvngøtpè nø wemè nv̀ng shvzøngshì yà:ngì we í rvtnø̀, zun long kvt wemè nø kapè chø̀mmè í longe má?” wa rø:tnòe.
Yesuí àngmaq sv̀ng, “Nàmaqí nàlénø̀ng we nø, Shànshér Kàrurì sv̀ng gø, Gvray jórnònggùn sv̀ng gø, mècíngnø̀ng rvtnø̀ íe. Kadø íe wani shì yv́ngkèní zun long dvgvp àngmaq nø svma gø mvlushì long, zvmì gø màshvrúngvm long. Àngmaq nø muqlàng dvzv́rrì dø í longe. Shì yv́ngkèní zun long dang èshø̀:nò nìnø, Moshi kàru bok taq svmi gwa we shǿngcè tø̀ng dang vruò yv́ng, Gvrayí Moshi sv̀ng, ‘Ngà nø Abraham Gvray gø, Isak Gvray gø, Yaku Gvray gø ǿngàe,’ wa nø̀ vru yà:ngà we nàmaqí mèrø dv́rnø̀ng má? Nàmaqí nø gvzà dvdvm nàlé dv́rshà. Kadø íe wani Gvray nø shì rìò Gvray mø̀í. Cúnshi rìò Gvray mv̀ng íe,” a:lòe.


Dvrá svrarì kèní tiqpè dì ráì nø̀ àngmaq wedø tasv̀ng vzø̀ng we sv̀ng tá bǿà. Yesuí werì sv̀ng vdu vbóng dø tv̀ng bǿà we sv̀ng à:ngí yv̀ng bǿà kvt Yesu sv̀ng, “Gvray dvkv́mkà shvngbe kèní, ring vtvng ciq nø kaciq íe má?” wa rø:tnòe.
Yesuí, “Dvkv́mkàrì shvngbe taqkèní ring vtvng nø yaciq íe. ‘Israel dvcì cèrìé, ètá dánø̀ng! Kàngpè nøngmaq Gvray nø, Àng tiqgǿ wa í pè Gvray íe. Nà nøt mvsø̀n shvngbeí gø, nà dòngnøt shvngbeí gø, nà shánøt shvngbeí gø, nà nònggùn shvngbeí gø, Kàngpè nà Gvray kaq shóngshì ràe,’ wa ciq íe. Dvkv́mkà vníciq wa ciq nø, ‘Nà vdè sv̀ng èshóngshì dø, nà tiqdv́ng vsv̀ng kaq shóngshì ràe,’ wa ciq íe. Ya vníciq mvdv̀m ring we dvkv́mkà nø màvl,” wa vtá:nòe.
Wekvt dvrá svrapèí Yesu sv̀ng, “Svrapèá, gvzà vdu dø èshø̀n bǿà. Gvray nø tiqpè wa í we nv̀ng, Àng wa mø̀í nìnø dvgá gvray màvl wa kà nø dìng we kà íe. Nøt mvsø̀n shvngbeí gø, cíngrál nøt shvngbeí gø, nònggùn shvngbeí gø, Gvray kaq shóngshì ràe. Vdè sv̀ng èshóngshi dø, vdè tiqdv́ng vsv̀ng kaq shóngshì ràe. Ya ciqní nø, wv́r núngpà nv̀ng shvrúng núngpà í dv́ngte mvdv̀mø té vpǿe,” a:lòe.
Àng nø cíngrálnøt vl dø kà vtv́nshì we Yesuí yv̀ng bǿà kvt, àng sv̀ng, “Nà nø Gvray móngdàn nv̀ng mènàsar,” a:lòe. Wemèpvng nø, kagǿí gø Yesu sv̀ng tiqkà gø røt mvkvm bǿà.


Yesuí Noqngø̀m Tø̀ngnø wáng vdòngø shvngø:tnò dvgvp àngmaq sv̀ng yadø rø:tnòe. “Kristu nø Dawi àng pvlí pvlaqpè íe, wa nø̀ kadø í rvt dvrá svrarìí shø̀:nò má? Pàwá wani Dawií Shànshér Pvlàcè taqkèní,

‘Gvrayí ngà Kàngpè sv̀ng,
“Nà ngv̀nshàrì sv̀ng, Nà hí lv̀ngpvngø Ngàí màyàlò dv́ngte,
Ngà vbàngpa yv́ng èrung,” vl yà:ngà,’ wae.

Dawií dv́ng Kristu sv̀ng ‘Kàngpè’ wa tǿ yà:ngà. Íni, Àng nø kadøwa rá àng pvlí pvlaq í ni má?” a:lòe. Wervtø̀ taq bashàrì nø shaqshaqwa Àng kà sv̀ng tashìe.
Yesuí àngmaq sv̀ng, “Dvrá svrarì sv̀ng nàyáshìnø̀ng. Àngmaq nø bèlaq yvnggúng gwashì sórí vwúshì nø̀, gvt tø̀m yv́ng vsà:ngí vpǿ nø̀ pàmvrà wa ra we sv̀ng shóngshìe. Vrá, júrøt chø̀mrì nv̀ng bóyrì taq gø té vpǿ nø̀ ring we rúngràrì taq wa rúnglv́m shóngshìe. Àngmaqí memàrérì sv̀ng vmupmá:mò nø̀, yvnggúnggúng júrøt dvpéshìe. Vsv̀ng yamvdòí nø té vlishì we kàngélv́m lòng vhǿm lú:ngòe,” wa shvngø:tnòe.


Yesu nø vlu svdik vzv̀ng kaq rung nø vsv̀ngrìí vlu gv̀msùng zá:ngò we sv̀ng yà:ngòe. Mvgàmrì mvme gǿí nø gv̀msùng mvmeme zá:ngòe. Íwe dvshà we memà tiqmè dì ráì nø̀, cvmaqcè wa vpø we kàmø gv̀msùngshicè vnígø̀m wa zá:ngòe.
Yesuí Àng coqcv́nrì goò nø̀, “Ngàí jø̀ngjǿng vla:tnìni, vlu svdik taq zá:ngò rì àngmaq shvngbe mvdv̀m, dvshà we memà yamèí té zv́ng bǿà. Kadø íe wani dvgárìí nø, àngmaqí lv́ng vchéò rì taqkèní zíò we wa íe. Yamèí nø dvshà nìgø àng dvkúmshìlv́m shvngbe, àngò v́laò dv́ngte zv́ng bǿà,” a:lòe.

استمع إلى Marko 12