Matiu 8
8
E Iesus vimaroka la vovo la tahalo isasa ale sereka gegeru
(Mark 1:40-45; Luk 5:12-16)
1E Iesus purusu loata te la gove ale eia valolo la valalua me hatavivile ovola, eia gotalo, la valalua me hatavivile mapaiti sesele egite tilimulia soio. 2Tio la tahalo isasa, la vovola sereka gegeru, eia loio tegiteu la valalua me hatavivilele, eia tuga loio goio magiri te la lagule Iesus ele, eia goio toto tulu otalo, eia lagu tugu, togoa. Eia veiale Iesus mago “Tahalo Uru, mai eme masagea, eme koramulia ge vimaroka la vovogu.”
3Goio, e Iesus sau te la vovo la tahalo ale serekale, eia veiala mago “Eau masagea, la vovomu ge maroka lou.” Tio oio moli ovola la serekale kokovu, la vovo la tahalole marokatio. 4Goio e Iesus tutu toleala mago “Eme ge baumulime, eme umala ge veveiale isasa ale eau vimarokati lou la vovomu, umala. Eme ge goio moli te pris, eme ge vahilo leia la vovomu ele. Eme ge vahari la vaabila mai te la tahalo ale la vovola marokati lou, mai la merera te Moses veia, eme ge vaharia soio te la luma la lotu, eme ge igo la vaabila taume soio te La Tahalo Uru, la valalua me hatavivile tomi ge rovia veia la sereka taume kaluvuti, la vovomu marokati.”
E Iesus vimahuli la bilalaha te la mulugaluga te ami isasa
(Luk 7:1-10)
5Tio, e Iesus goio la mautu e Kapernaum, la mulugaluga te la tala la tahalo la vaubi salatu sasa eia goio sibitala oio te Iesus veia ge kaka la visuli oio tetala, eia veiala mago 6“Tahalo Uru, la bilalaha taku isasa eia lea, eia tabuli oio te la luma, la tatuhala mauba tomiti, la iligiligi tai uru pepeho.”
7Goio, e Iesus goio veiala mago “Eau ge goio ge vimahulia.”
8Eala moli la mulugalugale goio veiale Iesus mago “Tahalo Uru, eau kama la tahalo ale taritigi veia eme ge goilo te la luma taku, taritigi eme ge toi moli la merera soio te la bilalaha taku, eia ge mahuli. 9Ale eau veia mai ele la vuhula eau rovi la vulovulo la iroromulila, eau la bilalaha tegiteu la uru taku, me eau tai babaha egiteu la tahalo la vaubi ale otalo taku. Mai eau ge baha isasa, eia ge tuga moli, eia kama ge tou, mai tai eau ge tola isasa veia eia ge gomai taku, eia ge roromuli moli, eia ge gomai taku, tio me mai eau ge vei taiale isasa mago ‘Eme ge igo la igogolu aleie’, eia ge igo molia.”
10Tio, e Iesus goio lolo la merera tetala maie, eia karutu sesele, eia goio veia giteu la valalua me hatavivile egite tilimuliale, mago “Eau vei seselea mutou, eau souka sivuti la tau Israel isasa la tautaulailo tetala ge uru mai la tautaulailo te la tahalo aleie. 11Ale eau veia mutou, mulimuli la valalua usu ge lomuli, usu tai ge loale malau, egite ge vikapopo me Aisak, me Iakob te la pou vikapopola oata te la pulolou la matagagala te La Tahalo Uru. 12Eala moli la valalua me hatavivile e Israel ale te La Tahalo Uru sesele, egite lolo palati la merera tetala, egite rovi tomitia, usu tegiteu ele kama tilimuli tigi la masasagala te La Uru, eala eia ge pitaro egiteu sogala, egite ge pou te la maligoma ale uru, me oio vola egite ge tali pepeho, egite ge koro magegege, ge melimeli la togo giteu.”
13Goio, e Iesus vikara kaluvu soio tegiteu mai ele, eia goio veia la mulugalugale mago “Eme ge tuga, La Tahalo Uru ge igoa mai sesele ale eme tautaulailoti ovola.” Tio oio moli ovola te la mata la haro moli alele, la bilalaha tetala eia mahuli.
E Iesus vimahuli e loale Pita ale hatavile
(Mark 1:29-31; Luk 4:38-39)
14Tio, e Iesus goilo te la luma te Pita, eia hilo e loale Pita oilo mamavuta moli oio te la mulila, la vovola tivura pepeho. 15E Iesus hiloa mai ele, eia goio sau moli te la limala, tio la ilea tetala goio kaluvu, la vovola maigi lou, eia goio hiliti, eia raragiale Iesus la ilali.
La valalua me hatavivile usu e Iesus vimahuli egiteu
(Mark 1:32-34; Luk 4:40-41)
16Goio, la paga maulaviti, egite la valalua isahari goio guvi, egite vahari egiteu e tabarabara giteu isahari ale la hituhitu ale kama kokora pou oio tegiteu, egite vahari egiteu usu ale lea mai ele. e Iesus goio kumuli taro molia egiteu la hituhitu ale egite igo barati la mahulila tegiteu ele, eia ge vikara vakasa moli maie soio tegiteu, oio moli ovola egiteu la hituhitu ge hele. Eia goio vimahuli tai egiteu tomi ale lea. 17Me la igogolu ale e Iesus igoa mai ele, eia vipuru sesele la merera te la bilalaha e Aisaia ale eia veipalea pala maie:
La Uru vimahuliti etatou,
eia bole taroti la ilea tegatou tomi.
La vikararala soio tegiteu ale masagea veia ge tilimuli e Iesus
(Luk 9:57-62)
18E Iesus hilo la lolo la valalua me hatavivile uru egite magiri galilia, tio eia goio veia giteu la valalua la vimari tetala veia egite ge goio te la gale la magolilo loio. 19Tio la tahalo la mari isasa eia goio te Iesus, eia veiala mago “Tahalo La Vimari, eau ge mulimulime soio te la maututula tomi ale eme ge goio vola.”
20Eala moli e Iesus baoliala soio mago “Egiteu la paia hou, la hova giteu isasasa otalo te la magasa, egite momou oio vola, me egiteu la malumalu tai oata te la baa, la loa giteu tai isasasa oata te la obobu egite mamavuta oio vola, eala moli eau e Latu La Tahalo, eau la muligu ouka ale eau ge mavuta oio vola, ouka sesele.”
21Goio, la tahalo isa tegiteu la valalua la vimari te Iesus ele, eia goio te Iesus, eia kaka e Iesus mago “Tahalo Uru, eau ge tilimulime, eala moli eau kakame veia eau ge pou tali muga e tete ge peho, tio eau ge mulimulime.”
22Eala moli e Iesus goio veiala mago “Korale, egiteu ale so popou te la maligoma, egite mai ale pehoti, egiteu moli ele ge ulai la pileleho giteu ele. Taritigi eme ge gomai, eme ge tilimuli eau.”
E Iesus mera taro la lolovi me la mago
(Mark 4:35-41; Luk 8:22-25)
23Tio, goma, e Iesus vikapopo me egiteu la valalua la vimari tetala, egite hiliti, egite goio sae te la uaga veia ge polo soio te la gale la magolilo loio. 24Egite goio soko la tuluga mai ele, egite so kabili posa moli, egite karutu la ave uru sesele eia sibitala, la mago tai gasi pepeho, eia hagagaviti ge pigi robo la uagale, eala moli e Iesus kama gabua, eia oio mavuta moli. 25Eala moli egiteu la valalua tetala goio paloa, egite veiala mago “Tahalo Uru, eme ge suli etatou, etato ge sululu gageie!”
26Goio, e Iesus kolia soio tegiteu mago “Amuto tataga la rova e? La tautaulailo tamuto bakisi ouka e?” Tio eia vikara soio tegiteu mai ele, eia goio hiliti, eia mera taro la lolovi me la mago, me oio moli ovola la lolovi goio tabou, la mago goio malilo.
27Tio, egite la valalua tetala hiloa, la gabutatalala tegiteu marapa, egite goio vitahi baololi lou egiteu mago “La tahalo aleie, eia mave? Ere tahalo maito, la lolovi me la mago egira roromulito la vikararala tetala e?”
E Iesus kumuli taro la hituhitu ale kama kokora
(Mark 5:1-20; Luk 8:26-39)
28Tio, e Iesus mite goio guvi oio te gale la magolilo e Galilea loio, oio te la gale sesele tegiteu e Gadarea. Egite so guguvi moli ele, egira la tahalo ilua ale la hituhitu ale kama kokora pou tegirua, egira loio te la liba, egira gomai poga tavu e Iesus. Eala moli egira taho luale, egira hate vuraga sesele, la valalua me hatavivile kamati tilimuli la gauru aleiele, egite souka ge poga egirua. 29Eala moli egira goio tola agagi oata maie mago “Eme e Latu La Tahalo Uru, eme masagea ge igo amilua mave? Eia soukama la imamala la viputumulila, eala moli eme guviti veia ge viligi hari amilua, ia?”
30Eala moli la karakara la bolo isa uru soio malau bakisi, egite la bolobolo magirigiri, egite alali. 31Goio egite la hituhitu goio kaka gogogo e Iesus mago “Mai eme ge kumuli taro amiteu gageie, taritigi eme ge baha taro moli amiteu soio, amite ge goilo tegiteu la karakara la bolobolo aleie.”
32Goma, e Iesus lolo la kilaka tegiteu mai ele, eia goio kumuli taro egiteu mago “Tuga!” Tio egiteu la hituhitu ale kama kokorale, egite goio hele taro egira taho luale, egite goio goilo tegiteu la bolobolole. Tio egiteu la bolobolole goio hele mata veveiti, egite goio hele bura sotalo te la vai, egite goio tilomu tomi olau la mago, egite peho tomitio. 33Goma, egite la valalua ale vibaumuli la bolobolole, egite goio hele, egite goluma te la mautu. Egite goio valolo egiteu la valalua me hatavivile, egite gilemuli taia giteu te la igogolu ale e Iesus igotia soio tegirua taho lua ale la hituhitu pou tegira, ale eia vimahuli egirua. 34Tio egiteu tomi la valalua me hatavivile te la mautu ale uru ele, egite hiliti, egite goio paa muli e Iesus veia ge hiloa. Egite goio poga e Iesus soio, egite kaka gogogo vagaria veia eia ge hiliti taro la gale tegiteu, eia ge goio te la gale isapolo.
المحددات الحالية:
Matiu 8: nakNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 1983, Wycliffe Bible Translators, Inc. All rights reserved.