Zãa 9
9
Gbɛ̃́ pɔ wa ì vĩ̀a gbãgbãa
1Kɛ́ Yesu lɛ́ bɛbɛ, à gbɛ̃́ pɔ wa ì vĩ̀a è. 2Ɔ̃ aà iwaɔ aà là aa mɛ̀: Mɛtulu, dé duuna yãi ɔ̃ wà gbɛ̃́pi ìi vĩ̀ai? Aazĩa pɔ yãi yã̀, ge aà de ń aà dao pɔɛ? 3Yesu wèmá à mɛ̀: I kɛ aà duuna ge aà de ń aà dao pɔ yãi no. Kɛ́ wà Lua yãkɛa ewà yãiɛ. 4Sema wà gbɛ̃́ pɔ ma zĩ bɔɔlɛɔ kɛ za gupua wɛ́i. Gu lɛ́ mɔ́ sii kɛ́ gbɛ̃e a e yãe kɛ lɔo. 5Gɔɔ pɔ má ku dũniau, má dɛ gupua ũ dũniaɛ.
6Kɛ́ a ò màa, à lɛ'i tɔ̃̀ busuwa, ɔ̃ a yà a màma aà wɛ́ɔwa. 7A òɛ̀: Gɛ ǹ oopi Siloe í guu. (Bee mɛ̀ í pɔ wa gà wà sùò.) Ɔ̃ à gɛ̀ oopì, ɔ̃ à sù wɛ́ wɛ̃a. 8Aà fãanideɔ ń gbɛ̃́ pɔ aa aà dɔ̃ baakɛna ũɔ mɛ̀: Gbɛ̃́ pɔ ìɔ baakɛ zɔ̃lɛapin weo lò? 9Gbɛ̃eɔ mɛ̀: Aapiɛ. Gbɛ̃eɔ mɛ̀: Aawo, ade bɔ̀aawaɛ. Gɔ̃ɛpi mɛ̀: Mamɛ! 10Ɔ̃ aa aà là aa mɛ̀: Kpelewa ń kɛ̀ n wɛ́ wɛ̃̀i? 11A wèmá à mɛ̀: Gbɛ̃́ pɔ wì mɛ Yesu mɛ́ busu yà a màma ma wɛ́wa, à mɛ̀ mà gɛ mà oopi Siloe í guu. Kɛ́ ma gɛ ma oopì, ɔ̃ ma gu'è. 12Ɔ̃ aa aà là aa mɛ̀: Aapi ku má ni? À mɛ̀: Má dɔ̃o.
13Ɔ̃ aa gɛ̀ Falisiɔ kĩi ń gbɛ̃́ pɔ dɛ vĩ̀a ũ yãapio. 14Kãmabogɔɔzĩ ɔ̃ Yesu busu yà, à aà wɛ́ wɛ̃̀òɛ̀. 15Ɔ̃ Falisiɔ aà là lɔ: Kpelewa ń kɛ̀ n gu'èi? A wèmá à mɛ̀: À bɛlɛ nà ma wɛ́waɛ. Kɛ́ má pìpi, ɔ̃ ma gu'è. 16Ɔ̃ Falisieɔ mɛ̀: Gbɛ̃́pi i bɔ Lua kĩio, asa ìli kãmabogɔɔ yãdao. An gbɛ̃eɔ mɛ̀: Duunkɛna a fɔ̃ dabudabu bee taaɔ kɛe? Ɔ̃ aa kɔ̃kpaalɛ̀. 17Ɔ̃ aa aà là lɔ: Mpi sɔ̃, n gbɛ̃́ pɔ à n wɛ́ wɛ̃̀nɛ, nlɛ e aà yãmusu kpelewa ni? À mɛ̀: Ãnabiɛ.
18Ń beeo gbãadeɔ i si kɛ́ a dɛ vĩ̀a ũ ɔ̃ aà wɛ́ wɛ̃̀o, ɔ̃ aa gɛ̀ aa aà de ń aà dao sìsi. 19Aa ń lá aa mɛ̀: Á nɛn laa? A aà ì vĩ̀a yãma yã? Kpelewa a kɛ̀ àlɛ gu'e sai? 20Ɔ̃ aà de ń aà dao wèmá aa mɛ̀: Wá dɔ̃ kɛ́ wá nɛɛ. Wa aà ì vĩ̀aɛ. 21Ãma lá a kɛ̀ sa àlɛ gu'e, wá dɔ̃o. À aà la we, gbɛ̃́ gbãaɛ, a azĩa yã'o. 22Aà de ń aà dao ò màa, kɛ́ aalɛ vĩakɛ gbãadeɔnɛ yãiɛ. Asa aa zɛ̀ò kɛ́ gbɛ̃́ pɔ ò Yesuá Mɛsiɛ, wà luasisikpɛ zɔ̃ɛ̀ɛ. 23Bee yãi aà de ń aà dao mɛ̀, gbɛ̃́ gbãaɛ, aa aà la.
24Gbɛ̃́ pɔ dɛ vĩ̀a ũ yãapi sisia gɛ̃n plaadeu ɔ̃ aa òɛ̀: O ń sì ń Luao. Wá dɔ̃ kɛ́ gɔ̃ɛpiá duunkɛnaɛ. 25Ɔ̃ à mɛ̀: Tó duunkɛnaɛ, má dɔ̃o. Yã mɛndo má dɔ̃. Vĩ̀an ma ũ yãa, ɔ̃ malɛ gu'e sa. 26Ɔ̃ aa aà là aa mɛ̀: Bɔ́ a kɛ̀nɛi? À n wɛ́ wɛ̃̀nɛ kpelewa ni? 27A wèmá à mɛ̀: Má òɛ́ kɔ̀, i swãsɛio. Bɔyãi á ye mai lɔi? Á ye gɔ̃ aà iwaɔ ũ sɔ̃ yã? 28Ɔ̃ aa zɔadɔ̀wà aa mɛ̀: Mmɛ ń aà iwa ũ we! Wapiɔ, Mɔizi iwaɔn wá ũ. 29Wá dɔ̃ kɛ́ Lua yã'ò Mɔiziɛ. Aapi sɔ̃, wá dɔ̃ gu pɔ à bɔ̀uo.
30Ɔ̃ gɔ̃ɛpi ònɛ́: Yãbɔnsaɛ ma we! À ma wɛ́ wɛ̃̀mɛɛ, ɔ̃ á dɔ̃ gu pɔ à bɔ̀uoa? 31Wá dɔ̃ kɛ́ Lua lí swãsɛ duunkɛnaɔ yãio, a yãmana pɔ ì a pɔeã kɛ yã ɔ̃ ì swãsɛi. 32Zaa Lua dũnia kàlɛ, wi ma gbɛ̃e gbɛ̃́ pɔ wa ì vĩ̀a wɛ́ wɛ̃̀o. 33Tó gbɛ̃́pi i bɔ Lua kĩio, a fɔ̃ pɔe kɛo. 34Ɔ̃ aa òɛ̀: Wà n i duuna guu miɔmiɔɛ, ɔ̃ nlɛ yãdadawɛ̃ɛa? Ɔ̃ aa aà yà.
Luadɔ̃saiá vĩ̀akũaɛ
35Yesu mà wà aà yà. Kɛ́ à aà è, à aà là à mɛ̀: Nlɛ Gbɛ̃nazĩn Nɛ naaikɛa? 36Gɔ̃ɛpi wèwà à mɛ̀: Mae, dé ni, kɛ́ mà e mà aà naaikɛi? 37Yesu òɛ̀: N aà è, aapi mɛ́ lɛ́ yã'onnɔ. 38Ɔ̃ gɔ̃ɛpi òɛ̀: Dii, malɛ n naaikɛ. Ɔ̃ à kùlɛɛ̀. 39Ɔ̃ Yesu mɛ̀: Kɔ̃kpaalɛa yãi ma mɔi dũniau la, kɛ́ wɛsiadeɔ gu'e, wɛkɛ̃naɔ i gɔ̃ vĩ̀aɔ ũ.
40Falisieɔ ku we. Kɛ́ aa yãpi mà, aa òɛ̀: Wapiɔ, vĩ̀aɔn wá ũ sɔ̃a? 41Ɔ̃ Yesu ònɛ́: Tó vĩ̀aɔn á ũ, dɔ̃ á duuna vĩo. Lá álɛ o á wɛ́ kɛ̃a, á duuna kuwáɛ.
المحددات الحالية:
Zãa 9: Boo2024
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Boko Bible © SIM International, 2024.