KEJADIAN 2
2
1At Allah nen pogot ebe inom, yi mene ti mene oba welagarek mene inom, kweang ebe inom, yi mene ti mene oba welagarek mene inom, mondogat elugun warogo elalhikhe. 2A'nogo mondogat elalik waga lagaikhesik elugun warogo enggi sabit oba fei wagaikhesik set walogo weat welagaikhe.#Ibr. 4:4, 10 #Kel. 20:11 3A'nogo weat welagaikhe andi re yi yabu ti yabu omanogo mondogat elugun warogo elalik waga lagaikhesik he enggi sabirenggeba re At onggwarek faget enegeisogo fakhasikhesik he, mel isikhe: ”Nenggi sabirengge yi re, nonggwarek faget fakhigimo re, fanot figi o,” iluk isikhe. 4Allah nen pogot kweang elalik wagaikhe aplere, andi.
At Allah nen afuni o Eden yabumo fisasikhe wene Nineisena Tuhan Allah nen pogot inom, kweang inom, yi mene ti mene oba welagarek mene inom, mondogat elalhikhesik, 5Aren meiso pelabi wagi'lek, afuni yabu hilingiti logogun mene fisigi'lek were'ma, kweangma yi mene ti mene mondok legat, e enggen awi fulelhi'legat welagaikhe. 6A'nogo welagaikhe meneat he, i kweangma nen wulibi wagaikhesik he, kweang a'nogo sakhoratikhe.
7 Tuhan Allah nen kweang endebat mene ekhe enggim wanhikhesik, ap misigat ekhe pugunhogo hilingitikhesik he, set inebe inelugerinaferek mene eleage ambisang elekwe furogo kwelakfesikhe. A'nogo kwelakfesikhemo, ap a'nogo arat eluk agaikhe.#1Kor. 15:45
8 Tuhan Allah nen a'nogo hilingitikhesik he, o Eden yabumo enggen awi fanorogo hilingisogo mo wulibi wagarek fikhit fesikhe. A'nogo fesikhesik, ap elalhikhe mene a'nogo andomaat fesikhe. 9A'nogo fesikhesik he, e yi agayo ti agayo mondok fano mene enggen iti logogin mene mondogat fulelfesikhe. A'nogo fulelfesikhemo, e andoma enggen tulem he, e enggen nunggunem inebe inelugerinaferek mene fulelhik, e ekhe enggen nunggunem yi wene ti wene fano wene inelu agik, weak wene inelu agik, ikherek mene fulelhik, isikhe.#Why. 2:7, 22:2, 14
10E enggen yabu andi fano sakhot fikhi logouwageluk, i yabumo nen elesi wulakfesikhemo, pialiluk lagaikhe. A'nogo wulifikhemo re, e enggen yabumo abel endakwe nen he, i ebe 4 en togarogo lakfesikhe. 11I togarogo lakfesikhe andi nomor 1, enu Pison. I andi wulibisogo re, o Hawila kwe yiling-waling lakfesikhe. 12O andoma re, emas fano mene inom, amusu amben fano mene inom, helebenggen hombonu onggo hokho mene inom, ero o andoma mene wanharek oba. 13Nen, i aksek nomor 2 re, enu Gihon. I andi wulibisogo re, o Kus kweang oba andoma yiling-waling lakfesikhe. 14Nen, i aksek nomor 3 re, enu Tigris. I andi wulibisogo re, ambutmo o Asyur esanggoma mo lagai wagarek higithogo lakfesikhemo lagarek. Nen, i aksek nomor 4 he, enu Efrat.
15Hobuk Tuhan Allah nen he, ap a'nogo nen, e enggen yabu enu Eden ebe hilingitik, kwalogo welagik, ikhi logouwageluk andoma fesikhe. 16A'nogo fesikhesik, Allah nen ap a'nogo mel yagatikhe, ”Hat he, e enggen yabumo awi yago yoma mondogat enggen palogo ninggi logoino. 17A'nogo meneat he, e enggen nunggunem yi wene ti wene fano mene weak mene inelu agarek mene yi nek he, enggen ekhe palogo nagun. Mene re, nenggen halok, nunggu kwelek andemat eberogoat hebe wa'lasigin o,” iluk yagatikhe.
18A'nogo yagatikhesik, ekhe mel isikhe: ”Ap andi alegenek eilmo weakhogo logogin andi re weak, athe at lebethikhi logogin mene, agailak at emberek higit mene ekhe elaligin,” iluk isikhe. 19A'nogo isikhesik he, kweang ekhe endebat wanhikhesik, wam, sue, paik, yi mene ti mene enggi lek werek mondogat kweangma logogin mene inom, sue tarogo nikhi logogin mene inom, pugunhogo hilingitikhe. A'nogo hilingitikhesik, mondogat it inenu lombok ap a'nogo nen, ”Andi mene enu ki salugun,” iluk penesuagaluk oba waluk wagaikhe. Eroba wam, sue, paik, enggi lek werek kweangma mene inom, pogot a'ma kweang ambolkwe tulem tarogo nikhi logogin mene inom, enu lombok saluageluk oba wogosi wagaikhemo enu salhikhemo, salagaikhe mene re andi. 20A'nogo oba waluk wagaikhemo, at ap a'nogo nen yi mene ti mene kweangma enggi lek mene inom, werek mene inom, sue tarogo pogotkwe nikherek mene inom, mondogat inenu salhikhe. Meneat he, at agailak hangge lebethikhi logogin mene ekhe welagaikhe lek. 21A'nogo welagaikhe le'ma, Tuhan Allah nen ap a'nogo nogo obabe lekhogo hilingfesikhemo, nogo ugunem, ap a'nogo abeloak mene lisogo wanhikhesik he, obali'mo eino mene to'mot fesikhe. 22To'mot fesikhesik abeloak a'nogo Allah nen he, he elalogo fesikhesik, ap a'nogo wogosi wagaikhe. 23A'nogo wogosi wagaikhemo, at ap a'nogo nen he,
”Yogo, hat yi re, hoak an noak mene,
nen heino an neino mene andi
nen he, an nebe hangge aro.
Allah nen an nebe mene wanhesik
pugunhogo hilinghafe
andi nen he, hat henu re,
he mene, salhafi o,” iluk isikhe.
24A'nogo hilingitikhe andi nen he, aben ineisena inagaisa herakfisaluk, inagagwi inom fano logolik, inebe pire meneat he, misik a'luk logouwago.#Mat. 19:5; Mrk. 10:7-8; 1Kor. 6:16; Ef. 5:31 25It ap inom, he inom, aremnogo inalfulukwa welagaukwa meneat he, inenggali legat welagaukwa andi.
المحددات الحالية:
KEJADIAN 2: inohap
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول