KEJADIAN 33
33
Yakub Esau inom ambi agaukwa wene
1At Esau agoromi inebe 400 nen inom wagunem at Yakub en eilenggen isasikhesik at agoromi omanogo sumburogo it ekhe he Lea oba figik, it ekhe he Rahel oba figik, nen it ekhe agagwi heihe mene inebe pire aremnogo inoba figik, isikhe. 2A'nogo fisasikhesik at agagwi heihe aremnogo ineagwi inom he elokhoma fisasikhe, it inambotma re he Lea eagwi inom fisasikhe. Nen mondogat it inambotma kobokhogo re he Rahel inom Yusuf inom fisasikhe. 3A'nogo laga logolik at Yakub enek he it inelokhoma attak waga logolik at oe era'lu asi wagaikhesik, eindep awi yagaisogo enggi 7 oba oe elokhoma sagaum etikhe. 4A'nogo hilingitikhe oba nen he at Esau humusek Yakub ambit lagaikhesik obakhe felikhogo fakfesikhesik olokhe kwe hai inambe saluk wat-wat aga logolik, emberek le agaukwa. 5At Esau nen hemi inom, yenggerugwi inom omanogo isasikhesik heinok wokhikhi logolik, ”Hat hinom welagep oma sani?” iluk heinok wokhasikhe. Heinok wokhasikhemo at Yakub en yagati logolik, ”Allah endawinggen fano nen an nagainafuri oma wo'netikhemo re it oma re, an nagainafuri o,” iluk yagatikhe. 6A'nogo yagatikhemo it agagwi heihe aremnogo ineagwi inom wagaukwasik inelokhe pelabek sagaum esi wagaukwa. 7Andi nen ombo'ne at he Lea eagwi inom wagaukwama wurep kobokhogo re he Rahel inom, Yusuf inom wagaukwasik it inebe mondogen ineindep awi yagaisogo inelokhe pelabek sagaum etukwasik hai wasi wagaukwa. 8Hai watukwama at Esau nen heinok wokhikhi logolik, ”It fena inebe fageat ninom ambi ago mene andoma re nenahalok?” iluk heinok wokhasikhe. Heinok wokhasikhemo at Yakub en ikhi logolik he, ”We, hat noe nen hendawit nabinogen ilu lakfisa wagi mene o,” yagatikhe. 9A'nogo yagatikhemo at Esau nen ikhi logolik, ”An he nangge mondok higithogo werek mare, haren an onggo wo'netu aplere herakfisan o,” iluk yagatikhe. 10A'nogo yagatikhemo at Yakub en ikhi logolik, ”A'nogo fuk noe! Hobabut sakhorek oba hilingitenma, an he noe helokhe hiigi andi re Allah elokhe hak hiigimo re, noe an nen hat hendawimo hagaiyek mene hilingiti halok he an nen wokheti mene ya re helan o. 11Allah an noba endawimo fano agasik an namu mene yi mene ti mene mondogat wo'netikhemo an nen waluk wokhesi wagi mene ya re helan o, noe,” iluk Yakub en ane omamerogo ugu aple nen at Esau wogetikhe mene omanogo helasikhe.
12Helasikhesik at Esau nen ikhi logolik, ”An he hat nemberek logoin enggere fik-fouk esuogo o,” iluk yagatikhe. 13Yagatikhemo at Yakub en ikhi logolik, ”Noe an nagainafuri yoma inomame lek andi hat helu o, andi nen wam domba, sapi inom, ineagwi eilak oan nili'lagwi mene omanogo re an nen nendawinggen wenggelogo elok hilingisigin en iluk, werego. Nen linggene misik sambul iluk ogo weak-weak wo'inarek lamo nen he wam oma mondogat wa'lasu hago. 14A'nogo hilingi'mo hat tak laga logoin. An ogore it nagainafuri inom wam oma inom weak-weakhogo o Edom were'ma hea wesugun nen he, an hombo'ne orok-orok wesigin,” iluk yagatikhe. 15A'nogo yagatikhemo at Esau nen ikhi logolik, ”Andi halok he, an nagoromi fena re hat hinom wesuabagaigen fisagain o,” iluk yagatikhe. A'nogo yagatikhemo at Yakub en ikhi logolik, ”An he hat hoe hendawimo agaiyek hoageluk hilingiti laginggere haren enggin aple andoma hilingitu lego,” iluk isikhe. 16Andi isikhemo linggene andi sambul at Esau a'nogo aiba Edom wagaikhe. Oba nen he, 17at Yakub he o Sukot lagaikhesik andoma at onggwarek faget o wutik, anggo omanogo nogo uguba awi wutik, isikhe. A'nogo hilingitikhe andiba o andoma enu Sukot iluk salhikhe.
18At Yakub a'nogo o Mesopotamia nen fanorogo o Kanaan kweang oba o enu Sikhem asi wagaukwasik aren awi tenda ba o kota andi horokhogo wurasikhe. 19O tenda salogo wurasikheba andoma re ap Hemor mene nen tagongge ambisangma mene hun enu Sikhem eisena oba onggo uang perak 100 meneba palhikhe.#Yos. 24:32; Yoh. 4:5 20Andi nen aren Allah fogerati logolik, wam warogo nolhuba iluk obalik Mezbah andoma wutikhesik enu re, ”Israel mene ineisena Allah re, Allah,” iluk salhikhe.
المحددات الحالية:
KEJADIAN 33: inohap
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول