KEJADIAN 8
8
I mogo hetogerik lagasikhe mene a'nogo firok-firok pi wagaikhe wene
1Allah nen a'nogo inoati logolik, at Nuh ebe inom, wam, sue, paik, yi mene ti mene inom, kapal a'nogo elema kwisukwa mene inom, enek he, inoba inonggot agi'lek eberek mondok welagaikhesik, Allah nen sogoi funhoageluk hilingitikhemo, funhikhi logolik, i a'nogo pi wesigiluk isikhe. 2At Allah nen a'nogo hilingiti logolik, i elesi hokho kweangma nen wulifikhe omanogo inom, pogoroba nen pelabi wagaikhe omanogo inom, sa'lip watfesikhe. Sa'lip a'nogo watfesikhemo, meiso palagik, i a'nogo firok-firok pi wagik, isikhe. 3A'nogo pi waga logolik, inenggi 150 hari nen were'ma i a'nogo horok asi pi wagaikhe. 4A'nogo horok asi pi wagaikhesik, tugi it inenggi wenati lagaukwa hak nomor 7 ba tanggal 17 oba kapal a'nogo tom uan mene enu Ararat oba hu'lasi pi wagaikhe. 5I a'nogo mondok pi waga lagaikhesik, tugi it inenggi wenati lagaukwa hak nomor 10 ba, tanggal 1 oba tom uandek mene arat weinam arik wagaikhe.
6A'nogo weinam agaikhemo, inenggi 40 nen welagaukwasigen, at Nuh nen kapal a'nogo jendela anggwe fololek ekhe hut fesikhe. 7A'nogo hut fesikhesik, sue sibini hangge misigat ekhe wulakfesikhe. A'nogo wulakfesikhe mene re, ambotkwe kwigi'lek tarogo lagik-wagik hilingirik nugu kwelek, i a'nogo arat firitok isikhe. 8A'nogo firitok ugu kwelek, at Nuh nen, ”I a'nogo arat firok ikhe a? Lega,” iluk sue pel hangge ekhe wulakfesikheat. 9A'nogo wulakfesikhe meneat he, o kweangma mondogat i nen salek welagaikhe andi nen he, sue a'nogo hu'lasu obalik ekhe legen he, ambotkwe sugulogo wagaikhemo, at Nuh nen he, enggi wulakfesikhemo, sue a'nogo enggiba hu'lasi wagaikhemo re kwelakfesikhe. 10A'nogo kwelakfesikhesik, enggi 7 nen welagaikhesigen, sue pel hangge a'nogo hobuk wulakfesikheat. 11A'nogo wulakfesikhemo, sue a'nogo e zaitun engga ekhe palogo ambem salukhogo waluk hu'mokwe ambotkwe kwisikhemo, at Nuh nen he,
”I hi, yogondak i arat firitok ikhemo higi,” iluk endawimo anggasikhe. 12A'nogo anggasikhesik, enggi 7 nenat welagaikhesigen, sue pel hangge mene a'nogo hobuk wulakfesikhe mene re, ambotkwe oba wagi'lek kamo i lagaikhe.
13A'nogo wagi'lek werek kwelek, at Nuh ebe umur 601 tahun, nen tugi it inenggi wenati lagaukwa hak, nomor satu, tanggal 1 oba i a'nogo mondok firitok isikhe. A'nogo firitok isikhemo, at Nuh nen e kapal a'nogo wa'lengge salek welagaikhe mene a'nogo healogo eilenggen kweangma pelakhasikhe re, kweangma mondogat iring lagaikhemo eilenggen hasikhe. 14Nen, tugi it inenggi wenati lagaukwa hak, nomor 2, tanggal 27 ba kweang arat mondok iring lagaikhe.
15A'nogo iring lagaikhemo, at Allah nen Nuh mel yagatikhe: 16”Hat hagwe inom, hagainafuri inom, ari kapal elema nen wulibi we'ni o. 17Wulibi waga logolik he, sue, paik, wam, yi mene ti mene enggi lek werek mondogat ebe hokhondek mene inom, magendek mene inom, fano o kweangma mondogat sik-pikhogo wialasuageluk, waluk wulibi me o,” iluk yagatikhe. 18A'nogo yagatikhemo, at Nuh againafuri inom, kapal a'nogo elema nen wulibi wagaukwa. 19A'nogo wulibi wagu kwelek, it yirue-tirue mondogat inom, wam, paik yi mene ti mene enggi lek werek mene inom mondogat kapal elema nen inunggulenu lombok foli wulibi wagaukwaat.
Nuh nen wam Allah faget warogo noletikhe wene
20At Nuh nen wam yi mene ti mene warogo Tuhan faget noleti logogin mene obalik helep sengget watikhe. A'nogo watikhesik, sue, wam, paik, yi mene ti mene enggi lek mene inom, werek mene inom, nenggarek mene inom nenggarek lek mene inom omanogo inunggulenu tomok misiktek warogo fesikhesik eisena Allah faget noletikhe. 21A'nogo warogo noletikhemo amben fano mondok lagasikhemo re, Allah endawimo fano agaikhesik, yi'nogo anggasikhe: ”It afuni inobabut a'nogo hilingiti logogun andiba, An nen kweang andi hobuk homan fagain lego. It afuni andi inebe oan oba nen inobabut weak hilingisuogeluk ebeti logogun nelu meneat he, yogondak afuni inebe inom, yi mene ti mene eluk welagarek mene ekhe inom, legetfisigi andi hak hobuk legetfisagain mondok lego. 22Kweang yi re lek agi'lek werek kwelek he, afuni nen yi mene ti mene awi yatik, ebe itik, enggen palhik, ikhi logogun aro. Nen, o hup agik, wei igik, o sogoi agik, aganhan agik, o hibi agik, meiso agik, ikhi logogin aro,” iluk endawimo ebetikhe.
المحددات الحالية:
KEJADIAN 8: inohap
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول