Génesis 11
11
Óga yvate Babel pegua
1Ñepyrũme opaite yvyariguakuéra oiporu peteĩ ñe’ẽ (idióma) añónte.
2Ha ojehu ningo oho ramoguare hikuái kuarahyresẽ gotýo, ojohu hikuái Sinar retãme peteĩ ñuguasu ojepyso jojáva yvýpe, ha upépe opyta hikuái.
3Ha he’i hikuái ojupe: Jaha joaiténa jajapo hag̃ua ladríllo. Ha oiporu hikuái umi ladríllo ita ramo ha omboguapy ojo’ári asfálto reheve.
4Ha he’i hikuái: Jaha ñamopu’ã ñandejupekuéra g̃uarã peteĩ táva ha peteĩ óga yvate, hu’ã og̃uahẽva yvágape; ha jajapo ñandejupekuéra g̃uarã peteĩ téra, ani hag̃ua ñanesarambipa ramog̃uarã ko yvy tuichakuére.
5Upérõ Ñanderuete oguejy ohecha hag̃ua pe táva ha pe óga yvate yvyarigua ra’ykuéra omopu’ãvahína.
6Ha Ñanderuete he’i: Umi yvyariguakuéra ningo peteĩ tetãnte ha peteĩnte iñe’ẽ; ha oñepyrũma omba’apo hikuái, ha avave ndojokomo’ãvéima hembiapokuéra.
7Ko’ág̃a jaguejy ñambojuavy iñe’ẽ ojuehegui, ani hag̃ua avave oikuaa iñirũ he’íva guive ojupe.
8Péicha Ñanderuete omosarambipa ichupekuéra pe yvy tuichakuére, ha opoi hikuái pe táva ñemopu’ãgui.
9Upévare oñembohéra pe táva Babel, Ñanderuete ombujuavy haguére opaite tetãygua ñe’ẽ, ha upégui omosarambipa ichupekuéra yvy tuichakuépe.
Sem ñemoñarenguéra
10Ko’ãva hína Sem ñemoñarenguéra: Sem oguereko ramoguare 100 áño, onace ita’ýra Arfaksad, pe áño mokõiháme amaguasu rire.
11Ha Sem oikove, Arfaksad onace rire 500 áñove, ha hetave ita’ýra ha itajýra.
12Arfaksad oikóvo 35 áño, onace ita’ýra Sala.
13Ha Arfaksad oikove, ita’ýra Sala onace rire, 403 áñove, ha hetave ita’ýra ha itajýra.
14Sala oikóvo 30 áño, onace ita’ýra Héber.
15Ha Sala oikove, ita’ýra Héber onace rire, 403 áñove, ha hetave ita’ýra ha itajýra.
16Héber oikóvo 34 áño, onace ita’ýra Peleg.
17Ha Héber oikove, ita’ýra Peleg onace rire, 430 áñove, ha hetave ita’ýra ha itajýra.
18Peleg oikóvo 30 áño, onace ita’ýra Réu.
19Ha Peleg oikove, ita’ýra Réu onace rire, 209 áñove, ha hetave ita’ýra ha itajýra.
20Réu oikóvo 32 áño, onace ita’ýra Serug.
21Ha Réu oikove, ita’ýra Serug onace rire, 207 áñove, ha hetave ita’ýra ha itajýra.
22Serug oikóvo 30 áño, onace ita’ýra Nacor.
23Ha Serug oikove, ita’ýra Nacor onace rire, 200 áñove, ha hetave ita’ýra ha itajýra.
24Nacor oikóvo 29 áño, onace ita’ýra Tare.
25Ha Nacor oikove, ita’ýra Tare onace rire, 119 áñove, ha hetave ita’ýra ha itajýra.
26Tare oikóvo 70 áño, onace ita’yrakuéra: Abram, Nacor ha Haran.
Tare ñemoñarenguéra
27Ko’ãva hína Tare ra’ykuéra: Abram, Nacor ha Haran; ha Haran ra’y, Lot.
28Haran katu omano itúva Tare mboyve, itáva Ur, Caldéa peguápe.
29Abram ha Nacor oñemohembireko; Abram rembireko réra Sarái, ha Nacor rembireko réra Mílca. Haran rajykuéra, Mílca ha Isca.
30Sarái ndaikatúi imemby.
31Tare ogueraha hendive ita’ýra Abram, ha Haran ra’y, Lot ha Abram rembireko, ha osẽ Ur, Caldéa retãgui, oho hag̃uáicha Canaan retãme; ha ou hikuái Haran peve, ha opyta upépe.
32Tare oikove 205 áño pukukue, ha omano Haránpe.
المحددات الحالية:
Génesis 11: ÑÑP2015
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.