Lucas 22
22
Hjemahchinikankakyehitluna Jesus Ruylaxyawakapluna Piranapni
1Waneya hi hix-hohne mahatatka Páscoa hohne tshinkaluru rexyawakapa. Waleni pão myapjetu nijikolu hohne.
2Hiyáhoni tsru hixikatshinwa sacerdote-ne hiyrunu kasruklewaklerune hinanchitkaluru pirana hasruklewatatshine hijhahchinikanuta hanu rixa himukata hiylaletanruna Jesus.
Judas Tshinkaluru Kamnixyawaklu Jesus Piranapni
3Waneyakni tsru kamtshi Satanás jihloklu Judas tshinkaluru. Hyokle hiwakni Iscariotes. Judas tshinkalur-honra satu doze Jesus hasrukleru.
4Judas yatka, riynumsaxyawakapna tsru hixikatshinwa sacerdote-ne hiyrun-koxa Hoyakalupji hinotatshine hanu potu rixa hiphujetletanru Jesus wanna yehiya.
5Wale hjeminixkana poyikpotukna. Waneya tiyiro renekpiratluna Judas.
6Waneya Judas hinkakletlu Jesus renejyawakapna. Hiyáhoni rujhalu hiklukta hpoyaho hekhiretanna, hixolune yine himnanhinri papko Jesus rekhixyawakapna.
Jesus Páscoa Hohne Hichinijyawaka Pirana
7Rapokatka pão myapjetu hnikjexinrina hohne, carneiro-ne ruylajexinrina judeu-ne Páscoa hohne ruchinikjexinrina hohne.
8Waneya Jesus yokanatna Pedro, João tshinkalune, wla htshinatkana:
— Hajewa. Halpokotanru hixa tshinanupa Páscoa hohne nikle wnijyawakapa tshinanu.
9Waneya repomhaluna:
— Hanhe paluka wutajyawaklu?
10Waneya Jesus wan-tshina:
— Tsru poktshi hjihlojinipa wane hyoptoxinri satu jeji honha hachhaji hanijikatshri. Homkahitanru. Hanupjiktako hjihlokamxini jeji wane koxa hjihlokanu.
11Waneya wla htshinanru kapjiru: “Kasruklewakleru hepomhakjixyi: Hanhe rawa hihruko hita, nasrukleneyma himukata niklexyawakapa Páscoa hohne tshinanupa?”
12Hiyáhoni wale hekhitanhi tsru hihruko pantshi hohwaka hwatshri, ralpokotka ptowruka hwiywaka. Wane halpokoxini.
13Waneya wane hyana. Waneya rukchikluna Jesus tshinyawaka pixka potuko. Waneya ralpokotluna hniklerupna Páscoa hohne kayno hnijyawakapna.
Jesus Hipninri Yapkakle Piranapni
14Waneya rapokpapkoluxinixka, Jesus mesa htuplata hnurreneyma.
15Waneya wla htshina:
— Naluk-himinkalepotuthi xye Páscoa hohne, nsalewninri wkatanuko.
16Klu tshinanu halikaka wane ntshinhi hikeklu hohne nnikanru xye Páscoa hohne tshinanupa haté rakanhanu Páscoa hohne potu Hoyakalu pohirewaxyawakaya.
17Waneya copa stono hkochtsheka. Hpoyahnutlu Hoyakalu. Waneya wla htshina:
— Xye copa hyoptotanu. Himurkakanu.
18Klu tshinanu wane ntshinhi: Hi nuranutnaklu xye vinho-ha haté rapojinipa Hoyakalu pohirewaxyawaka.
19Waneya pão hkochtsheka. Waneya hpoyahnutlu Hoyakalu. Hjiknajrotlu pão waneya rasruklene reneklu. Waneya wla htshina:
— Xyeni hatatjewa nomane. Hixa tshinanu renekka. Xye pixkalutu hkamhajetanu hita hichinijikolupa.
20Waneyatnaka rali niklexinixkana waneko pixka rixa, copa stono hkochtsheka, waneya wla htshina:
— Twu copa stonha nunkakletleru, waleni herotu nohraha piranni. Xye nohraha hixa tshinanu hiyokkalurupa.
21Seyni hetanu! Hewitkalu nkamnitjerupa! Hitayma hewi nikjexikowaka rawa.
22Klu tshinanu Jeji Whene tshinkaluru halikaka hipnanu Hoyakalu hixahchinikanuxyawaka pixka. Seyni hektu potlu wale jeji, Jeji Whene tshinkaluru kamnitatshri!
23Waneya hyinuwaka hepomhakakletna wannakakluko, kathe xawaka kamnitanru?
Katpothe Hijhakaluru
24Seyni Jesus hasruklene hihjekaka wannakakluko katpotnihe hijhakaluru.
25Hiyáhoni Jesus wan-tshina:
— Phurune xye tshijne hajene towutjetna yine. Hiyrun-koxa towutatshine ralukluna kihlewaka htshinanwakaxikowakna.
26Seyni hixa hi wan-hixanu. Seyni hijhakalur-potni mujhakot-potu hikahwajikatshriwa. Hiyrun-koxa tsru towutatshri hijhalu towrertshi pixka rixyawaka.
27Klu tshinanu katpothe hijhakaluru? Ho nikjexikowaka tuplatatshri ho nijittshi hitakatshri? Hi he nikjexikowaka tuplatatshri potu hijhakaluru? Seyni hix-yehiya towrertshino Hita.
28— Hixa himwatkano ptowruka nsalewnale tshinanu.
29Hiyáhoni towuwlu, Nuru henejyano pixkalutu, wale towuwlu pixkalutu nenekanhi hixa.
30Halikaka himinkanno, himuranno nikjexikowakaya npohirewaxyawaka hwatshri. Hiyrun-koxa phuru tuplawakle htuplatanu hikolukanuwnakakanna israel-nerune doze ptohkakapni.
Jesus Hinkaklu Pedro Wkatakluyakawa Pirana
31Waneya Jesus wan-tshina:
— Simão, Simão. Hetanu, Tsru kamtshi Satanás-mka halukyi pixa. Raluk-hixirikletmakyi hahosu hixirijikowaka pixka.
32Seyni nanjihohneyehityi palixle hma mahaxyawakanupa. Pehchinikanuxinpatka pmixkowkakahchinikanutanna xako Hita tshinanu pmoletanune.
33Waneya Simão Pedro wan-tshinru:
— Tsru Hixikatshriwa, halpokotatshrino preso nutajikowakapa pixayma. Haté pixayma nupniywakapa halpokotatshrino.
34Waneya Jesus wan-tshinru:
— Halikaka wane ntshinyi, Pedro. Xye yetshno hma yanumatkanuklunuwa patlapa hepi kata, pixa map-kata pweyawatanu. Pma mimatletanutu ptshinanno.
Hepi Yohlolewapi Piranapni
35Jesus wan-tshinatnakna:
— Pa kata mitshi nyokanathi tiyiro manikkanhi, tsapantshi, sandalha koxa manikkanhi. Kluhe mitshi hmahaxyatka? Waneya wanna wan-tshina:
— Hike wmahaxyatka.
36Waneya Jesus wan-tshinna:
— Seyni xawakni wane ntshinhi, tiyiro mapa himwatshri ranikanru. Hiyrun-koxa tsapantshi himwatshri, ranikanru. Yohlolewapi mimwakatu, ruchankanru himkalu, yohlolewapi ranjixyawakapa.
37Klu tshinanu halikaka wane ntshinhi: Xye nopirana, yonatkaluru Hoyakalu tokanuya haluk-hiphujewnaletanu hitayma. Wla htshina yonatkaluru, nopirana: “Hektutu kamhatshine yehi nwanu.” Xye tokantshi yonatkaluru hitayma ruphujewnanu.
38Waneya rasruklene wan-tshina:
— Tsru Hixikatshriwa petanu. Hewitkalu hepi yohlolewapi.
Waneya Jesus wan-tshina:
— Hehe hpoyahota.
Jesus Himriji Oliveiras Tshinikowaka Hyiywaka Piranapni
39Waneya hyatka Jesus. Himriji Oliveiras tshinikowaka hya, rixjexyawaka pixka. Rasruklen-koxa homkahitlu.
40Waneya wane rapojinixkana, Jesus wan-tshinna:
— Hanjihohnetanu hmallixikowakanupa.
41Waneya pnutejiji hya ho trinta metro pchinrahe. Hyoptsojita waneya hyinuwaka hanjihohnereta.
42Wla htshina hanjihohnereta:
— Nuru! Palujinipa putneprikkajinno twu copa salewaktshi yehi. Seyni hi hitako nalujyawaka pkamhanu halikaka.
43Satu hiwejikaluru Hoyakalu towreru tenhohne hajeru hiphujewnayehitlu. Hmixkowkaklu.
44Jesus salewnahchinikanuta tsru potuko hiyáhoni hmixkowa hanjihohnereta wane pnute. Ruhkokha hrahtshi pixka rixa. Rutspihle tshiji rapoka.
45Waneya rali hanjihohnerexini, hpalna hsatoka rasruklene nwaka. Retamtna himkatshine. Hwamonuymana.
46Waneya wane htshinanna:
— Haklu tshinanhe himkakanata? Hpalnanu. Hanjihohnetanu hmallixikowakanupa.
Jesus Kachixikowaka Piranapni
47Hyanumakanatawa Jesus runatkana hixolune yine. Judas tshinkaluru, satu doze rixinri, kosekamtna hixolune yine. Waneya rapokastsitlu Jesus ramluxyawakaplu.
48Seyni Jesus wan-tshinru Judas:
— Judas, pkamnitluhe Jeji Whene satu hamluruyma?
49Waneya Jesus-ymalune rexinrina riknohjerutka wane htshinruna:
— Tsru Hixikatshriwa, yohlolewaplahe wustaklewaxini?
50Waneya satu repirna kastakjepitlu tsru sacerdote towrer-jepi. Hkastaklu hpotukle jepi.
51Seyni Jesus hitukjixna, wla htshina:
— Hitshi hi wan-hixanu. Waneya hkamruklu hijepi hwakanaxyawaka. Waneya ruhlewata.
52Waneya Jesus wan-tshinna tsru hixikatshinwa sacerdote-ne, Hoyakalupji hinotatshine chefe-tene, tsrukakalune judeu-ne koxa hkachpiratjene:
— Ha hixa wkata hina yohlolewapikakayma, hahajekakayma koxa hkachixyawakapno? Hatatjewa katshowhurlanohe?
53Hixayma nwakanata ptowru hohneruka. Hoyakalupji nasrukjekanaxyahi. Seyni hi hkachitno. Seyni xawakni hipapkolutkani Hoyakalu hitshixyawaklu hixa tshinanu. Xawakni pixkontshi mapchahawaka hwatshri papkolni.
Pedro Wan-tshina Hi Rimathetlu Jesus Piranapni
54Waneya hkachitluna Jesus. Ranikluna tsru sacerdote-pji nwaka. Seyni Pedro hohatjini hwamta romkahyehitlu Jesus.
55Waneya hiputu hanikajite hpawatna, rituplakakna. Waneya Pedro tshinkalur-koxa wannayma htuplata.
56Seyni sato towretshro hetlu Pedro tshitshmero rolkakanaxyawaka. Tyopukhatlu, waneya wane ttshina:
— Xye jeji koxa Jesus-ymakakalutu.
57Seyni wale weyawata, wane htshina:
— Suxo, hi koxa nimathetlu.
58Waneya pchini hohnejiji satutnaka hetlu waneya wla htshina:
— Pix-koxa satu wannaymalutyi.
Seyni Pedro wan-tshinru:
— Jeji, hita hi wannaymalutno.
59Waneya satu hora hetko hiknohatka waneya satu hipokananu wan-tshinru:
—Ha hi wkaheklu, wimatlu xye jeji satu Jesus-ymalutni klu tshinanu wale Galileia tshijne hajerni.
60Waneya Pedro wan-tshinru:
— Jeji, hi nimata klukta ptshina. Waneya waneklukawa potuko, hyanumaxiniwa Pedro, patlapa yanumatatka.
61Waneya Tsru Hixikatshriwa Jesus heknokyehitlu Pedro. Waneya Pedro hichinkaplu Tsru Hixikatshriwa Jesus tokanu, htshinakanaxyawaklu: “Xawakni hma yanumatkanuklunuwa patlapa, pixa map-kata hi pimathetno ptshinanu.”
62Waneya Pedro wane hichpajya, kahnete hya. Waneya hyinuwaka tshiyahlepotuta.
Soldado-ne Hapnokaxyawaklu Jesus Piranapni
63Waneya soldado-ne Jesus kachitatshine yinuwaka heyikletlu. Ruylakluna.
64Ruchyahojitluna. Waneya repomhaluna. Wla htshinna:
— Pmetanutu punkaklewatanu, kathe hiylakyi?
65Hi heppik-pirana htshinruna, hektuwaka potuko htshinruna.
Tsrukakalune Jemahchinikankakyehixyawaklu Jesus Piranapni
66Waneya hohi rixinixka rapatjetna tsrukakalune judeu-ne, tsru hixikatshinwa sacerdote-ne, kasruklewaklerune hinanchitkaluru pirana hasruklewatatshin-koxa. Waneya ranikjixluna Jesus jemahchinikankakjexikowakaya, judeu chefe-tene hapatjewakle.
67Waneya repomhaluna Jesus, wane htshinna:
— Punkakanwu. Pixlahe Messias tshinkaluryi?
Waneya wale wan-tshinna:
— Hehe ntshininiphi hi hetko halixanno.
68Hiyrun-koxa hixa pa pirana nepomhiniphi hi hetko hihitanno hita.
69Seyni xawaknikotka Jeji Whene tshinkaluru, Hoyakalu ptowru potuko himukatatshri potukle sreta htuplatanu.
70Waneya wanna ptowruneka hepomhatkalu:
— Hiyáhoni, pixlahe Hoyakalu Whenyi?
Waneya wale wan-tshinna:
— Htshinyawakno, hitakni.
71Waneya wanna wan-tshina:
— Hi rujhatkalu hiphujtatkaluru wane pnute. Hixako wjemlu waleko htokanu, hikolujyawakatkalu.
المحددات الحالية:
Lucas 22: mpdBiblia
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil