Luka 13
13
Kalan Shaan Ram rak Yin Kuusak
1Ta ayisa maryaa asum kaa tǝ tang a ɓan Yesu ka. Bilatus ɓan afuu maa pok mee ka kaa ɓor angaa Galili yen. Afuu maa pok ki ɓor yen kaa ta napɓan kwak Vitor maa ya. 2Yesu yiɓǝn yen ka, “Yin ɓyaaki kan kee angaa Galili maryai, a ɓyak dǝs maa angaan Galili shaan ram ni pang a kuushii kaɓan naa? 3Ng shee ka, ng kaɓan ni rak! Ng ɓaa yin ng yin ni kala shaa maa ram yin nak, yin ni maa yin kuusak kan kee ayen ni ri. 4Koo asum ware nyar nanas pan kǝ reɓetng lokng toor kǝshii Silowam pir shii yena kǝ ɓor yen nzup pan, yin ɓyaaki ka, a ɓyak angaan kaa ɗaaki kǝshii Urushalimaa shaan ram nyaa? 5Ng shee ka ng kaɓan ni rak! Ng yin ni kala shaa maa ram yin nak, yin kuusak kaɓan ket.”
Agarang Kǝtǝr Kooni kǝng Shaa Dugur rak
6Pang Yesu ɓan yen agara ri ka, “Sum yen ta kǝng ɗǝ kǝtǝr kooni kǝshii ɗǝn myaa, nak yarang dugur ta kǝtǝr kyaa pang sok awen nak. 7Shee ɓan mung kǝng ɓasang maa ɗǝn ki ka, ‘Ayee taat ni ri kǝng taaki yarang dugur ta kǝtǝr kooni ryaa, pang ng sokghaa awen nak. Kom ma fuyang. Ng dakghaa ara ni maad.’
8“Pang sum ki palta ka, ‘Viikuta, kala ma mang yee gaat ri koo ɓee, ng shiingaa nggǝs ki kǝng fur maa aburi. 9Taghari kǝtǝr ki shaa dugur taayeen, kun kun! Ng mee ni shii rak, shee kaa kom ma fuyang.’ ”
Yesu bar ɗǝ Yiin kǝng Gurum Viin Fednaa maa Yahudu
10Viin fedna maa angaa Yahudu yena, Yesu ta maksa asumaa ta arang Shamang shii maa angaa Yahudwaa. 11Shee yii yen ta kǝ ayiɓi vishii vǝvǝr ma mang yee ware nyar nanas kǝ ryak dǝbari mee pen, ng shama Shambala kǝ nap ma rak. 12Kǝ Yesu ɓee ma shee tok ma kǝ taa nggena, pang ɓan ma ka, “Yii, a ɓwak ku foo yaa ta womnak mu ryaa.” 13Pang ˈyii kwak mee ta shiin yii kyaa, shee yii ki nap ndus mee nyee, pang mak Vitor.
14Mushorin arang Shamang shii maa angaa Yahudu ki tura kap ma, tung ka Yesu bar ɗaa sum viin fedna maa angaa Yahudu, shee ɓan asum kyaa ka. “Ayisa shaan ta mang kaa shaa ɗǝn, tarang ta ayisa kyaa kaa bar ɗǝ yin, viin fedna maa angaa Yahudu ni rak.”
15Pang Mulok pal ma ta ka, “Yinaa angaa tǝlǝm mɓaa! Ng ta ka, nzup yin, yin ɗǝ ɓasa akala koo azung lok yin viin fedna maa angaa Yahudu, tung ka kǝ yin ta na yen min rakghaa? 16Pang yii ri kǝng tǝɗong Ibrahim ni, kǝ Shetan shiir ma ˈyii mang yee ware nyar nanas. Kun kaa bun ma foo viin fednaa maa Yahudwaa rakghaa?”
17Kǝ shee kaɓan ki, shee ndoo kap angaa vana mee ki. Asum kaa ta tang a shii katla maa aɗoo shiin maa awung shiisan ndus kǝ shii.
Agara Shin Ketlin Mastad ɗǝ Iyis
(Mat 13.31-32; Mar 4.30-32)
18Pang Yesu yiɓǝn ka, “Tǝruun Vitor ng kan kee yeni paa? Yani pang ng gamzala ma ɗǝ mee paa? 19Tǝruun Vitor ng kan kee ketlin mastad ri ni, Sum yen naa ta kwan ta ɗǝn myaa. Kǝ mak pang shii kǝtǝr, amuyen taa lokshii akǝshii yen taa kwak kǝtǝr kyaa.”
20Pang Yesu por yiɓǝn yen ka, “Ɗǝ yeni pang ng gamzala tǝruun Vitor paa? 21Ng kee iyis#13.21 Iyis: Mee ni awung kaa ɓona fura ki mung pampam maa tung kǝ bumsul ma ta. ri ni kǝ yii yen ɓon ma ɗǝ mung damai pang iyis ki bumsul mung ki nzup.”
Nzatar Karkǝshii
(Mat 7.13-14,21-23)
22Kǝ Yesu cir shii naaki Urushalimaa shee bii andar maksar ɗaa mang nyseeshii kǝng maksa asum maa. 23Muɗakghai yiɓǝn ma ka, “Viikuta, asum njot ni sokghaa ɓwakghaa?”
Pang pal yen ta ka, 24“Darang yin ta kǝ yin sok lǝri ta nzatarng karkǝshii kyaa, tung ka, asum ɗǝng a dara ka kaa lǝri, nzup ɗǝ kaɓan a shama rak. 25Mulok ki ni nanzu nyee puk karkǝshii ki, yin taa Shambala karkǝshiin lok kyaa pang yin ɗǝ kǝ wuna karkǝshii ki, kǝ yin sheeki ka, ‘Mulok, pǝl war maa karkǝshii ki.’
“Mee ki pala yin ta ka, ‘Poran tǝɓii ng yok yin nak, ɗaa arang kǝ yin war ta.’
26“Pang yin shee ka, ‘Wo rii wo soo ɗǝ wok, a makshii ta ashii waraa.’
27“Nzup ɗǝ kaɓan ng ɓana yin ka, ‘Ng yok arang kǝ yin war ta rak. Poran tǝɓii yinaa angaa shaan vishii maa awuu!’
28“Tang ni pang yin shiidna ɗǝ rinza maa kinǝng! Ng yin ɓee Ibrahim ɗǝ Ishaku ɗǝ Yakub ɗǝ nzup maa angaa fwaa nung Vitor kǝshii tǝruun Vitora. Pang yini a pun yin. 29Asum waraa tasvii yaa, ɗǝ sharvii yaa ɗǝ shangvii yaa ɗǝ langvii yaa, kaa taa ri awura ryaa kǝshii tǝruun Vitora. 30Zheri Kǝ duk dukghaa, angaan kaa dǝbaryaa zheri, ayen ni nakghaa nggena, angaan kaa nggena zheri ayen ni nakghaa dǝbaryaa.”
Yesu Shii shiirka maa ɗoo shiin Urushalimaa
(Mat 23.37-39)
31Ta dǝtsheemin mbana, Afarisi yen taa ta Yeswaa a ɓan ma ka, “War kaa kala tii tung ka Hirudus ruɗa wuna ku.”
32Pang ɓan yen ka, “Naan kǝ yin naa ɓan pooni pan ka, ‘Ng bursa ayiɓi, ng bara ɗaa sum ɓari, ɗǝ nas, ɗaa yisa taat mang kǝng taaki ng kǝɗa shaan ɗǝn min.’ 33Nzup ɗǝ kaɓan, ng ryaa nggena ɗǝ sǝra min ɓari ɗǝ nas ɗǝ shala. Kǝduk-dukghaa, mu fwaa nung Vitor kun kǝ kuu kǝshii Urushalimaa ni.
34“Wokghai Urushalima, Urushalima ndar kǝng ɓora angaa fwan nung Vitor, yin ɓor angaan kaa tok yen ta yinaa ɗǝ foosa maa tǝtar. Ɓol mak ni pang ng ruɗaki kǝng tokshii yin kan kee nakurin kǝng toksa awan mee kǝshii gungwangaa, nzup ɗǝ kaɓan yin vanshii! 35Yiran, lokng Vitor yin, nakghaa atool. Ng ɓana yin, yin yaa ɓyaan mi ta rak, shee viin kǝ yin ni shee ka, ‘Mu nggen kal ni mung kǝ tari kǝshii tǝsakng Mulok Vitora.’#13.35 And 118.26. ”
المحددات الحالية:
Luka 13: (Boi) Tiyaa
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©️2022 Luke Initiative for Scripture Translation