Luka 4
4
Shetan Kam Yesu
(Mat 4.1-11; Mar 1.12-13)
1Pang Yesu war kuɓor Urdun shiilaa ɗǝ Awurkin Vitor. Awurki ki wunak ma kǝshii maa pokghaa. 2Tang ni pang Shetan kam ma mang yisa warkǝ nangs. Kǝ rii awura ryaa yaa rak, kǝ ayisa ki naa masalaki, shee ɗama kap ma.
3Shee Shetan ɓan ma ka, “Wani fan Vitor ni, ɓan tǝtar ri kǝ nak pampam.”
4Pang Yesu pal ma ta ka, “Ng warangaa ni ka, ɗǝ pampam ni en pang sum bara rak.”
5Shee Shetan turi ɗǝ mee ara yena zuk zuk, shee zhak shii ma nzup maa tǝruu ma par ryaa nyee. 6Pang Shetan ɓan ma ka, “Ng naa ku nzup ɓyakghaa ɗǝ nzup maa awuu maa par ryai. Tung ka nzup awuna maryaa a ɓwak nami yaa, ng maa ni rud ng naa nzup mung kǝng ruɗaki kǝng na ma. 7Nzup awung kaa ɓee ri nakghaa mamu, ng woni fur kurung ndaa kaa makng mi.”
8Yesu pal ma ta ka, “Nung Vitor shee ka, ‘Kaa mak, Mulok Vitor mu, meni en mung kaa bungaan maa.’ ”
9Shee Shetan cir ma wunak Urushalima pang turi ɗǝ mee reɓetng lokng Vitora, pang ɓan ma ka, “Ng woni fan Vitor ni, nyari kaa jiri ndaa. 10Ng warangaa ni, kǝshii nung Vitora ka,
“ ‘Vitor ɓana awan tokghaa zar mee nung kaa
ta gak ku.
11Awan tokghaa zar mee ki,
a gakghaa ku ɗaa kwak yen tung ka, kaa wun kuɓol mu shiin tǝtara rak.’ ”
12Pang Yesu pal ma ta ka, “A ɓwak warangaa ka, kaa kam Mulok Vitor#4.12 Por 6.16. mu rak.”
13Kǝ Shetan kǝd kama ma, shee niyang kala ma, shee viin ɗakghai ya tǝkwak ta.
Yesu Kab Ɗǝn mee Galilyaa
(Mat 4.12-17; Mar 1.14-15)
14Kǝ Yesu por Galili ɗǝ shednan Awurkin zarng Vitor, Awurkin zarng Vitor taa bii ɗǝ mee, a sheeri nung ki ta nzup maa ndarng kaa pyet-pyet. 15Kǝ ng ta maksa asum maa ta arang Shamang shii maa angaa Yahudu, pang asum ɗǝ kǝ makghaa ma.
A Van Yesu Kǝshii Nazarat
(Mat 13.53-58; Mar 6.1-15)
16Shee Yesu kala tang pang nak Nazarat, ta arang kǝ mak ta, shee lǝr arang Shamang shii maa angaa Yahudu, viing fedna maa angaa Yahudu, kan kee mang kǝng ɗǝ shaaki, pang nanzu tung kǝ kori nung Vitor. 17Shee a na ma warangaan kǝ Ishaya mu fwan nung Vitor warang, shee pǝl pang sok arang kǝ shee ka,
18“Awurkin Mulok Vitor ng ɗǝ mak,
tung ka mok mi kwakghaa shaa
kǝng ɓan nung zar angaan shoor.
Tok mi ka kǝng naa ɓan angaan kaa shiirshii yena ka a bunshii yen furi yaa,
arub sokghaa ɓyaan yis,
angaan kaa vǝvǝra yen kǝng ɓwak yen furi,
19Kǝng ɓan asum ka, ayisang kǝ Mulok Vitor ɓwakghaa aswaa mee taa gangaa.”
20Mee kǝ kǝd koraki, shee puk nung Vitor ki pang na mung kǝng ɗǝ ˈyaa nung Vitor, pang ɗa ndaa. Nzup maa sum kaa ta arang Shamang shii maa angaa Yahudaa, shee a fur yis pang a ɓyaa ma ta. 21Pang Yesu ɓan yen ka, “Awung kǝ a warang kǝshii nung Vitora, mang kǝ yin yiri ɓari ɗǝ kutu yin nakghaa duk.”
22Nzup yen kaa ta tang a shee nung zar shiin awung kǝ sheeri kǝ shiishii yen maa ndus pang a shii ta koora maa ɗoo pang a shee ka, ng ta ka fan Yusufu ni mari rakghaa?
23Yesu pal yen ta ka, “Ng yokghai yin ɓanaan mi agara mari, ‘Mu naan nggal bar ɗǝ shii mu raa.’ Yin ɓana mi ka kǝng shii awung kǝ wo yiri ka shii ta Kafarnahum, shii tǝɓii ta ndar mwaa ket.”
24“Duk dukghaa, ng ɓaa yin ka, mu fwan nung Vitor a makghaa ma ndar myaa rak. 25Kǝduk-dukghaa pang ng ɓaa na yin, ayisang kǝ Iliya mu fwan nung Vitor ta, ayiiɗok a pyak ndarng Isaraila. Ayisa kyaa ni pang a shii korok rak mang yee taat ɗǝ pee shaan pang ɗama lǝr ta nzup ɗaar kyaa. 26Nzup ɗǝ kaɓan a tok Iliya mu fwan nung Vitor ta mu ɗakghai ya rak, shee ta yiiɗok yena kǝshii Zarifat mang kǝng kǝshii ndar Sidona, pang a tok ma tang. 27Ta yisang kǝ Ilisha mu fwan nung Vitor ta, a shii adǝbabci damai kǝshii ndar Isaraila, nzup ɗǝ kaɓan Naˈaman mu ndarng Suriya ni pang a bar ɗǝ mee en.”
28Kǝ nzup maa sum kyaa kaa ta arang Shamang shii maa angaa Yahudu, yening kaa yir kaɓan shee a shii tura. 29Shee a nanzu pang a war ɗǝ Yesu abonjin ndar yenaa, a wunak ma shii maa agenak ka lok ndar yen ki ta. Ta shii ma genak kyaa pang a rud kaa wuu ton ma foo ta nggǝs maa genak kyaa tung ka kǝ kuu. 30Nzup ɗǝ kaɓan bii tǝɗoo yena pang niyang awuu mee.
Yesu bar ɗǝ Mu Vishii Maa Yiɓi
(Mar 1.21-28)
31Shee Yesu cir shii jira naaki Kafarnahum, ndar ɗakghai ni kǝshii Galiliyaa. Tang ni pang ng maksa yen maa viin fedna maa Yahudwaa. 32Awung kǝng sheeki shiishii yen wuu, tung ka, ng maksa yen maa kan kee nung ki ma mee ni.
33Ta arang Shamang shii maa angaa Yahudu kyaa, sum yen mu vishii maa yiɓi ta tang. Shee foo wuri pang shee ka. 34“Por tǝɓii Yesu mu Nazarat, Yeni cir ku ɗǝ war paa? A tari tung ka kaa kuɗuk war nyaa? Ng yok ku yaa woni sum zar mang kǝ Vitor ton!”
35Yesu gwang ayiɓi ki gyer! Pang shee ka, “Ɗa maad! Wari ta ndus sum ryaa.” Ayiɓi ki zan sum ki ndaa ta nggen yena, shee ayiɓi ki war kala ma, a ngikshii ma rak.
36Shee nzup maa sum kaa ta tang ˈyii kwak nungaa, “A ɓana aɗakghai yen ka, Yeni mari kan paa? Ɗǝ gwangsan gyer ɗǝ shedna, sum ki pun vishii maa ayiɓi kyaa pang a wari!” 37Awung kǝ Yesu shiiri, ryak a ɗǝ kǝ shee nung ki nzup taa longgor maa ndar kyaa.
Yesu Bar Ɗaa Sum Pyak
(Mat 8.14-17; Mar 1.29-34)
38Yesu war kala arang Shamang shii maa angaa Yahudu, pang lǝr lok Simana. Kak mee wommi rak, ndus mee nyaaki. Shee a kwarshii Yesu kǝ ɓwak ma. 39Nakghai shambal pyet ɗaa rang kǝ yii ki yisaki ta, pang mok womnak ki nung, womnak ki kala ma, shee nanzu nyee, pang ɗǝs yen ma awura ryaa.
40Ta Kǝryakghan kyaa, nzup angaa kaa ɗaa angaa kwanan ndus ɗaa nzup maa womnak, a wutaa yen ta Yeswaa shee ɗǝ kǝ gunza yen ɗǝ kwak pang a bar nzup yen. 41Ayiɓi war kala asum pyak, ɗǝ foosan wuri a ɗǝ kǝ shee ka, “A fan Vitor ni!” Tung kaɓan Yesu gwang yen gyer, shee kala yen kaa shee nung rak, tung ka a yokghai ka meni Kǝristi.
Yesu Shee Nung Vitor Arang Shamang shii maa Yahudu
(Mar 1.35-39)
42Kǝ araa tashii shee Yesu war kala kǝshii ndar ki pang nak arang kǝ mwen ta rak. Asum kyaa shii ta yara araa mee pang a sok ma. A yar shiin kaa kaɓa ma ˈyaak ka kǝ nak saɗakghai yaa tǝkwak ta rak. 43Nzup ɗǝ kaɓan ɓan yen ka. “Kun kǝng wunak nung zar mang tǝruun Vitor ri ndar ma dǝshaa ket, tung kaɓan ni pang a ton mi.” 44Shee shii ta sheen nung zar mang Vitor arang Shamang shii maa angaa Yahudu ɗa ndar Yahudiya.
المحددات الحالية:
Luka 4: (Boi) Tiyaa
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©️2022 Luke Initiative for Scripture Translation