الإنجيل زي ما كتبه مَتَّى 3

يوحنا المعمدان يجهز الطريق

1و في داك الوقت، ظهر يوحنا المعمدان في برية اليهودية، يبشر 2ويقول: "توبوا، هكو قرَّب ملكوت الله!" 3ويوحنا هدا هو إلا جا دكره على لسان النبي إشعياء يوم قال: "صوت ينادي في البرية: جهزوا طريق الرب، وخلوا سبيله مستقيم!" 4و كان يوحنا يلبس ثوب من وبر الجمال، ويلبس حزام من جلد، وياكل جراد وعسل بري. 5فقاموا طلعوا له أهل أورشليم ومنطقة اليهودية كلها و كل القرى القريبة من نهر الأردن؛ 6كانوا يتعمدوا على إيده في نهر الأردن ويعترفوا بخطاياهم.

7و لما شافوا الفريسيين و الصدوقيين ناس واجد يجوا ليوحنا عشان يعمدهم، قال ليهم: "يا أولاد الحيات، من حدركم عشان تهربوا من الغضب الجاي؟ 8أثمروا ثمر يستاهل التوبة. 9ولا تفكروا بينكم وبين نفسكم وتقولوا: إبراهيم أبونا! لأني أقول ليكم: إن الله يقدر أن يطلع من هدي الحجارة أولاد لإبراهيم. 10وهدكوا الفاس أنرمى على أصل الشجر، فكل شجرة ما تثمر ثمر زين لازم تنقطع وتنرمى في النار. 11باعمدكم بالماي عشان أتوبوا، و لكن إلا جاي بعدي هو أقدر مني، و أنا ما أستاهل حتى أحمل نعاله. هو بيعمدكم بالروح القدس، وبالنار. 12هو يحمل المذرى بيده، و راح ينقي عدل كل إلا حصده: فبيجمع قمحه في المخزن، لكن التبن بيحرقه بنار ما تنطفي!"

معمودية يسوع

13و بعدين يسوع طلع من منطقة الجليل إلى نهر الأردن، و راح إلى يوحنا عشان يتعمد على إيده. 14لكن يوحنا حاول يمنعه و قال له: "أنا إلا محتاج أني أتعمد على إيدك، وأنت جاي ليي!" 15و يسوع رد عليه و قال: "أسمح ليي الحين بهالشي! بهالطريقة لازم نكمل كل تقوى وصلاح." و بعدين سمح له. 16و لما تعمد يسوع، طلع من الماي و على طول السماوات أنفتحت له وشاف روح الله جاي مستقر عليه كأنه حمامة. 17و إلا صوت من السماوات يقول: "هدا هو أبني الحبيب، إلا فرحتي به فرحة عظيمة!"

المحددات الحالية:

الإنجيل زي ما كتبه مَتَّى 3: QNAV

تمييز النص

نسخ

هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول