Luk 17

Sii Gboloma Dienyẹ

(Mat 18.6-7,21-22; Mak 9.42)

1Jizọs dugho ori ọḅụduaapụ pịrịm ḅẹẹ, <<Túminị́ mịẹsị sii ḅụ bịghịkoro mịẹmịẹ nyánam, kụ́ma anị siḅáá anị ḅara sághị ḅo bẹḅọ pịrịbẹm. 2Anị ibiḅaabẹm ḅẹ nnị opu nyẹ́gbẹ́ dapịrị pa ọ kọ́ngọ kpọ sị ọ pa tọ́rụ́bie gbi su, tụ́ma ọ mịẹsị mị káláapụ ma ḅụ gbẹ́rẹ́ḅọ siinyẹ mịẹ. 3Anịgo tọ́rụ́ diinma i mịẹarịnyẹ mịẹ!

<<Ḅọ́rọ́ i numboru owitụ́wọ siinyẹ mịẹmịẹ, igani ọ pịrị, o sii ma ḅụ pịghị pịghị, sii wáriso ọ pịrị. 4Ọ ḅọ́rọ́ gbẹ́rẹ́ éné bie sọ́nọ́ma sa pa siinyẹ pa ị mịẹmịẹ, ọ pịghị mị siiamịẹnyẹ ma miẹsa gonyẹ́ gonyẹ́ ori ị dámáḅoarị sị ḅẹẹ, <A sii ḅụ pịghịmam, ị siiḅụḅárási ọ pịrị nyánam.> >>

Minini Gboloma Dienyẹ

5Nfịrịmaapụ ma dugho Kị́nị́nyánáḅọ pịrịm ḅẹẹ, <<Mịẹsị wámịna minini gborogboroḅáa!>>

6Kị́nị́nyánáḅọ pagharam ḅẹẹ, <<Ị ḅọ́rọ́ minini nyáná ịrụ mọstad sịmgbọ́lụ na gbasịnyẹ, ị ine dugho mulberi sịị ma pịrịbẹm ḅẹẹ, <Ị́yẹ́ kune ḅụ wọrọ so, sị muu ịḅụ dipi tọ́rụ́bie,> anị pịghị ị dugho ḅara mịẹbẹm.

Ómóniḅọ Fịrị

7<<Ḅọ́rọ́ ḅẹẹ ọmịna ḅụ gbẹ́rẹ́ḅọ ómóniḅọ nyánam duakiri sughupịghị ọ pịrịarịḅọ, anịgha ánáná didighi ọ pịrịarịḅọ. O dua ḅụ saghị ḅo ḅo, warị ọ ḅẹẹ, <I ḅoma, ị́yẹ́ fị́nyẹ opuịkasị ọgọ́nọ́ imi. Sọḅo kpọrọfịnị sị ị́yẹ́ fị́nyẹ fịị.> 8Anị ọkọ fịnịgha! Tụ́ma ịrị ọ ḅẹẹbẹm, álála ị́yẹ́ ḅupiri fị́nyẹ mịẹ warị, si muu ịḅụ tẹ́lẹ́ma sị ḅo i didighi a nyẹ́fị, ị mịma mịẹ fama sa ị ine mú ị́yẹ́ anganyẹ fịbẹm sị pịghị ị́yẹ́ angaá nyẹ ḅụ? 9Ómóniḅọ ma nnị ịmịẹḅam pa ọ ḅẹ na ibi ḅẹẹ ori n tọ́ọ ọ pịrị fịrị nwángịm gosi, anị ọkọ fịnịgha? 10Anị gbẹ́rẹ́ ḅara ma anịị anị fịnị ọ pịrị ḅara ị n dugho ọ pịrịnyẹ ma mịẹ so sáá, ḅẹẹ, <Wamịnị papa ómóniapụ wamịnị wámịna fịrị nwángịmam.> >>

Jizọs Oyia Ḅụkọ-obii Kọapụ Gwọm

11Jizọs ọrẹ asọ dọghụ Jerusalem muarị sa, Sameriya na Galili ónú ilíghíma angaá ḅọ́rọ́m. 12Ọ gbẹ́rẹ́ káláama soarị sa oyi owiapụ ma, ḅụkọ-obii kọọarịapụ ọ nana donam, n warị ḅọlọ angaá ḅụ sẹ́ sị 13ilúghú, <<Jizọs Wányánáḅọ! Tọ́rụ́kụrụkụ́rụ́ nyáná wa pịrị!>>

14Jizọs nna arịm, warị n ḅẹẹ, <<O muu sị ọmịna ḅụ pa igwagwaapụ ma die.>> Nnị muarị sa asọogbo, anịị nna ḅụ ḅo gwọnyẹ. 15Nna ḅụ gbẹ́rẹ́ḅọ árị sa ḅẹẹ, ọ gwọmam, ọ pịghịma ḅom, ilúghú pụghọ pa Tamuno bomaarị. 16Ọ warị ọ ḅụ dighi kiri gbi Jizọs ḅụọ angaá sị ịmịẹḅam pa ọ ḅẹẹ, owitụ́wọ ma ori Sameriyaḅọ.

17Jizọs warị gbíla ḅẹẹ, <<Oyiapugha gwọapụ isi ésénieapụ n tẹ́ angaá imi? 18Tegó sị mị igoniḅọ ma ngéré anịị pịghịma ḅo sị ịmịẹḅam pa Tamuno pịrịḅọ.>> 19Jizọs warị ọ ḅẹẹ, <<Saghị sị soo, ị́yẹ́ minini mịẹmam sị ị́yẹ́ oju kụ́rọ.>>

Ḅoarị Tamuno Ásẹ́mẹ́kiri

(Mat 24.23-28,37-41)

20Jẹa Farisiiapụ Jizọs gbilam, Tamuno Ásẹ́mẹ́kiri ma ḅoo bẹ sa. Ọ warị n pagharaa ḅẹẹ, <<Tamuno Ásẹ́mẹ́kiri ma ḅo ḅogha túminị́ anị árị bẹ ḅara. 21Gbẹ́rẹ́ḅọ sọ dughobịgha ḅẹẹ, <Dighi mị anị,> anịgha ḅẹẹ, <Anị aningáa imi,> tegó Tamuno Ásẹ́mẹ́kiri ma ị ḅụbie imi.>>

22Anịsáa, ọ warị ọḅụduaapụ ma ḅẹẹ, <<Sáá ḅoobẹm o dọghụ bẹ sa ḅẹẹ ọmịnị ine Tumḅọ yii Tụwọ ma gbẹ́rẹ́ éné árị, kụ́ma ọ mịnị anị arịbịgha. 23Túminị́ ḅẹẹbẹm, <Anị angaá ori imii,> anịgha <Mịị angaá ori imii.> Kụ́ma pághá muu ma ḅẹẹ, ị nnị dọghụarị. 24Tumḅọ yii Tụwọ ma ḅoo bẹ éné fịnị bẹ ḅara, sọ́ḅọ́rọ́ sofịnị kọrị bẹnyẹ si baá pa so tọ́rụ́ ma pịrị, gbẹ́rẹ́ angaá akị mú isi angaá láa. 25Kụ́ma parị ori opuma tọ́rụ́siarị árịbẹm, mịị ḅụ́ọ́apụ ma pịghị ọ sịghịbẹm.

26<<Anị fịnị ḅara Nuwa sáá, anịị anị pịghị fịnị bẹ ḅara Tumḅọ yii Tụwọ éné ma ḅụ. 27Kị́nị́mamgba fịịarị, pịghị ḅuuarị, ẹ́rẹ́ámáapụ na owiapụ na yaarị akị muu Nuwa árụ́ ma ḅụlọ éné láa. Opu mingi ma warị ḅo nnị kị́nị́mamgba ḅa fama.

28<<Lọti sa anị fịnị ḅara anịị anị pịghị fịnị bẹ ḅara. Kị́nị́mamgba fịarị pịghị ḅuuarị, nyẹ́fẹarị pịghị nyẹ dẹrịarị, nyẹ dipiarị pịghị warị námáarị. 29Lọti Sodom wáriso éné fịnị na ọpọli ḅuruma kóróḅom sị, nnị kị́nị́mamgba ḅa faá ma.

30<<Anịị anị fịnị bẹ ḅara n Tumḅọ yii Tụwọ pa diepágháma bẹ éné. 31Anị éné warị osu ḅụ fịnịḅọ kóró warị ma sọḅo ma sị muu n ḅọ nyánányẹ akị, anị gbẹ́rẹ́ ḅara ma duakiri fịnịḅọ pịghịma warị ḅo ma. 32Lọti taa pa biekóróma! 33Ḅụ́kọ́rọ́ma amịna duma ḅọrọma bẹḅọ gonyẹ́ gonyẹ́ anị ḅumabẹm amịna duma ḅuma bẹḅọ gonyẹ́ gonyẹ́ anị ḅọ́rọ́mabẹm. 34A dugho ọ pịrịm, anị dii mmẹapụ mụ́nọbẹm gbẹ́rẹ́ múnonyẹ ọgọ́nọ́, n gbẹ́rẹ́ḅọ sị ákịbẹm sị isi angáḅọ wáriso. 35Mmẹẹ́ ẹ́rẹ́ámáapụ nyẹ gbẹ́ẹ̄ gbólomaarị, n gbẹ́rẹ́ḅọ sịakịbẹm, nnị isi angáḅọ wárịsóbẹm.>> [36Mmẹẹ́ owiapụ fịrịnwangị angaá gbẹ́rẹ́ duakiri, n gbẹ́rẹ́ḅọ ákịbẹm sị isiḅọ wáriso.]

37Ọḅụduaapụ ma warị ọ gbíla, <<Kị́nị́nyánáḅọ tẹ́ angaá?>>

Jizọs warị n pagharaa ḅẹẹ, <<Fịị dua fịnị angaá gonyẹ́ gonyẹ́ ẹ́dẹlẹ aningáa kobirịbẹm.>>

المحددات الحالية:

Luk 17: IBY

تمييز النص

نسخ