Luk 12
12
Ɛbɛlɛbɛlɛ arigɛ kɛrɔetimɔ
(Mat 10:26-27)
1Ndi ɔkɨmkɨm rɛkau re tugɛlɛnɛ, ta ani wa maŋa achɛmɔ ra ɛkpa, Jisɔs ɔrɨŋɛtɨma ɔkani atɔramɔ na: “Ri bagɛlɛnɛ ɛkpa ri baŋa Ɛkɔgɛkɔgɛ a Farɛsi, nyi ɛra ikparobug. 2Mbum wɔda mbu wɔ ra kɨbɛkɨbɛ mbu wara kɨbala bɛ, mɨnɛ mbum rambunɛ mbu wa dɨbɔdɨb, kɨn wɔ yaŋinɛ. 3Mbum rambunɛ mbu alamɔ ra kɛrɨrɔ, kɨn wɔ yaŋinɛ ra kumkaja, mɨnɛ mbum rambunɛ mbu akani oni wunɛ rikalɔ ra ɛmaŋɔŋ, kɨn wa dimɔ bɛ ra eful ɛtɔ.
Oni nwu efuu na awɔlɔ
(Mat 10:28-31)
4“Nkani wun achɛmɔ abam, ɛrau enisii wun ra ani mba wa wula ɛkpaju ayayɛ, wa biyaa wa si mbum odudu wa siŋɔ ɛduayi. 5Gbɔ ami kɨn kɔgɛle wun oni nwu nla ɛrau enɨŋo si wun ra: Ri wɔlɔ oni nwu obo wu ɛkpaju, ɔfɔnɔ nsɨm nwu ɔnɨŋɔ tuyɛ rikalɔ ra kum kesinisini. Nkani wun, riwɔlɔ mɔ. 6Mikurokpo mitan kikɛ wa kula agbuga afaa? Gbɔ Ɛbɨrɔkpabi ɛra yiŋa tum finɛ. 7Tum dɨlɔ retu riwun mɨnɛ wa bag dɛ. Ɛrau enisii wun, kum rijagɔ ɛtɨma risiŋɛ mikurokpo.
Kani ani adudu abaŋa Kɨraist
(Mat 10:19; 10:32-33; 12:32)
8“Nkani wun, oniranwunɛ nwu ɔkani ani ɔbaŋa mɛ ra roisɔ rani, Wɔna Oni kɨn ɔlamɔ ɔbaŋa mɔ ra roisɔ ra ayilarotumɔ Ɛbɨrɔkpabi. 9Gbɔ oniranwunɛ nwu ofumɔ mɛ ra roisɔ rani, ami kɨn fumɔ mɔ ra roisɔ ra ayilarotumɔ Ɛbɨrɔkpabi. 10Mɨnɛ oniranwunɛ nwu osii kebinɛ ridɨnɔ ra Wɔna Oni, kɨn wa tɨmɔnɛ wanyɛ mɔ. Gbɔ oniranwunɛ nwu ɔlamɔ kebia, obinɛ ridɨnɔ ra Ɔwanɛwanɛ Roifɛ, wa biyaa wa fɔrɛ mɔ.
11“Wa botim wun wa nɔlɔ ra Itɔa nyɔm a Jus, akɔratu, akɨla akɔ nsɨm, rika wulɔnɛ ratu ribaŋa kɛmanchi ri bara ra ikpaju iwun arigɛ bumbu rinɨŋɔ lam. 12Kum ra kɛgbɔ achifɛ, Ɔwanɛwanɛ Roifɛ kɨn ɔkani wun bumbu rinɨŋɔ lam.”
Rɛkanɔ keful ka ɛfaŋanɛ
13Kadi oni rikalɔ rɛkau ɔkani Jisɔs na, “Ɔkɔgakɔga, kɔɔ remu kani ɔmalowum onemi ifɔnɔ iyɨl rami.”
14Jisɔs ofini mɔ na, “Odumini, moni mosi mɛ ɔkɨba kɛlam din onema birɛ owun?” 15Kadi ɔkani bɛ na, “Riyɛrɔ! Ribagɛlɛnɛ ɛkpa ribaŋa ifɔnɔ etugelɛtugɛlɛ, kum wara luma rokpin roni ra ifɔnɔ nyi ɔfɔnɔ.”
16Mɨnɛ ɔkani bɛ rɛkanɔ ndifa, “Kɛkɔ ka ɛfaŋanɛ wunɛ kewugɔ radɨnoti esii. 17Ɔfɔnɔ nkatir ɔbaŋa ɛkpaju ɛyɛn na, ‘Mambum bɛ ɔnɨŋosi-e? Nkum kanida ra mikaŋa mimɨm nka nlua radɨnoti ndafa.’
18“Kadi ɔlamɔ na, ‘Nfa bumbu nnɨŋo si. Kɨn muga eku ɛyɨm, nri nyi egbugagbuga, afɛ dɛ nnɨŋɔ wulɛ omuu radɨnoti radam. 19Kadi nkani ɛkpaju ɛyɨm na, “Afɔn ifɔnɔ esii ra jɛ ndi rinɨŋɔ wɔ. Fuɛnɛkpa, jɛ, ŋɔ mɨnɛ dɔmɛnɛ etimɔ.” ’
20“Gbɔ Ɛbɨrɔkpabi ɛkani mɔ na, ‘Awu keful koni! Jɔ ndifa, kɨntama wu rokpin. Moni kadi mɔ ɔnɨŋo tim ifɔnɔ nyi abo rumi nla?’
21“Nfa kɛmanchi enɨŋo tumɛ ra oniranwunɛ nwu owula ifɔnɔ olua ɛkpaju ɛyɛn nka ra kekul, gbɔ obi faŋɔ ra ɛtɨma Ɛbɨrɔkpabi.”
Ka juŋa nɛ etimɔ
(Mat 6:25-34)
22Kadi Jisɔs ɔkani atɔramɔ na, “Rɛfɔ ndifa, ami nkani wun, rika juŋa nɛ etimɔ ribaŋa rokpin rowun, bumbu rinɨŋɔ jɛ, arigɛ ibɔwɛ ɛkpaju nyi rinɨŋɔ rɔnɛ. 23Rokpin rosiŋɛ kɔjɛ, mɨnɛ ɛkpaju esiŋɛ ibɔwɛ. 24Ri chɛ oninɔɔn, wɔ ra kpaŋa, wɔ ra tua, tum kewulɛ birɛ ra eku wo bi fɔnɔ, gbɔ Ɛbɨrɔkpabi ɛnyaŋa bɛ kɔjɛ. Ri gbɛra na rijagɔ ɛtɨma risiŋɛ oninɔɔn! 25Moni mɔ etimɔ ejuŋajuŋa ɛnɨŋɔ kɨla egbigbɛd kɛgbɔ ra rokpin rɔdɛn? 26Kum ribiyaa risi egbigbɛd a bumbufa, igbɛ ri juŋanɛ itimɔ ribaŋa birɛ mbilɛkɨlɛ?”
27“Ri fɔnɔ nkatir ribaŋa kɛmanchi ifua gbanɔ irua ra mifa! Ira yibanɛ, ira nyɨma ibɔwɛ nyi irua nɛ; gbɔ nkani wun na, tum ɔkɨm Sɔlɔmɔn, ra eluŋɛlɛ ɛyɛn fɛb, obi rɔnɛ ibɔwɛ nyi iliwɔ ijagɔ ifua gbanɔ nyi. 28Abɔ Ɛbɨrɔkpabi eyua gbanɔ mbu wɔ ra ra ifa ɛduayi, mbu achia bɛ ɛdɛn, refu wa digɛ bɛ ra rokun, mɛdɔ ibɔwɛ yɛ ebiyaa ɛnye wun mba rifɔnɔ egbigbɛd kɛsɨmɛkpa! 29Mɨnɛ ri ka rɔ itimɔ iwun ra bumbu rinɨŋɔ jɛ akɨla ri nɨŋɔ ŋɔ, ri ka juŋa nɛ itimɔ. 30Kum ani mba wabi lɔɔ raikpɛ ra kekul wa juŋa nɛ itimɔ wa baŋa birɛ mbifa. Mitɛ owun ɔgbɛra nachɛ efuufu na rifɔnɔ birɛ mbifafa. 31Otukɛ, ridugɔ rɛkɨm ra Ɛbɨrɔkpabi, mɨnɛ kɨn ɛkɨla wun birɛ mbika fɛb.
Ifɔnɔ ra kayu
(Mat 6:19-21)
32“Awun kɛdɔŋ ka atɔramɛ ɛrau enisii wun, kum ɛra kɛdɔmetimɔ ka Mitɛ owun ɔnyɛ wun rɛkɨm. 33Ri kulɛ ifɔnɔ iwun rinyɛ rikpag. Ri nyɨmɔ rakpa ra agbuga nda abɔ rara sarasara, ɛduayi, kɨn ri wulɛ ɛfaŋ ra kayu! Kum ɛfaŋ kɛfɨrɔ ka Ɛbɨrɔkpabi ɛra wiawia. Ɛfaŋ ewun ɛra lɨma, ɔyɨbakayɨb obiyaa ɔyɨbɔ yɛ, mɨnɛ ɔkɔkpa obiyaa ɔnɔlɔ ɔka binɛ yɛ. 34Kumka ɛfaŋ eyi ɛra, afɛ dɛ etimɔ eyi mɨnɛ etuma.”
Ɛlɔmɛnyɛ na amɔlɛ nɛ ɛkpa
(Mat 24:45-51)
35Jisɔs ɔkani bɛ mɨnɛ na, “Ri mɔlɛnɛ ɛkpa kɛgbɔ ranchinɛ ri dimana ɛkɨlɛkɨlɛ ɛyɨm, ri rɔnɛ ibɔwɛ kɛma kani rotumɔ mɨnɛ ri lɔɔ ira iwun iwumana kɛgbɔ ranchinɛ. 36Kɛmaka arin mba wa dimana ɔkɔkɔ ɔbɛ ɔkɨlɛ kɛtɔmɔ rɛbalɔ. Fɛɛ esiafɛ ɔbɔwɔ ɔwa kɨb, wa kugɛlɛ mɔ okegere ɔmɔmɛ. 37Ɛmɔlɛmɔlɛ ɛfɔnɔ arin mba ɔkɔkɔ ɔbɛ ɔnɨŋɔ kɔga bɛ wa bagala ɔbɔ kɨlɛ. Nkani wun raikpɛ, kɨn ɔmɔlɛnɛ ɛkpa amɔm orin, ɔkani bɛ wa tumetumɛ ra ɔkpokoro, ɔnyɛ bɛ kɔjɛ. 38Ɛmɔlɛmɔlɛ ɛfɔnɔ arin mba ɔkɔkɔ ɔbɛ ɔnɨŋɔ kɔga bɛ wa mɔlɛnɛ ɛkpa wa bagala, tum ɔwɔ matii ma jɔ, din sisiisɔu. 39Gbɔ rigbɛra mbufa: abɔ ɔkɔɛtɔ ɔgbɛra kɛgbɔ nchi ɔyɨbakayɨb ɔnɨŋɔ wɔ, nla ɔra lua mɔ ɔwayɨb mɔ birɛ. 40Awun mɨnɛ, ɛlɔmɛnyɛ na ri mɔlɛnɛ ɛkpa, kum Wɔna Oni kɨn ɔwɔ kɛgbɔ nchi ribi rigɛ etimɔ.” 41Pita ɔbɨbɔ mɔ na, “ƆKƆKƆ, rɛkanɔ ndifa, awulawul bɛ akani din ani fɛb?”
42ƆKƆKƆ ofini bɛ na, “Moni mɔ ɔra oniretu nwu osia raikpɛ mɨnɛ ɔfɔnɔ kɛgbɛrakɔtag, nwu ɔkɔkɔ ɔwɛn ɔnyɛɛ mɔ nsɨm ra ɛtɔɛyɛn, ɔnyɛ kɛdɔŋ ka arin mbaka kɔjɛ ra bɨrika kɛgbɔ? 43Ɛmɔlɛmɔlɛ ɛfɔnɔ orin awufɛ, abɔ ɔkɔkɔ ɔwɛn ɔkɨlɛ ɔwa kɔga mɔ osia bumbu otigɛ mɔ osi. 44Nkani wun raikpɛ, kɨn osi mɔ oniretu-a ifɔnɔ iyɛn fɛb. 45Gbɔ abɔ orin awu ɔlamɔ ra etimɔ ɛyɛn na, ‘ƆKƆKƆ owum ɔra kɨla faŋandi,’ kadi ɔbɨnɛ odua arin adumini akɨla arin awani mbaka, mɨnɛ ojia, oŋua, obuma matug. 46ƆKƆKƆ orin awufɛ kɨn ɔwɔ ra reyi ndi obi rigɛ etimɔ, akɨla kɛgbɔ nchi obi gbɛra. Kɨn ɔnyɛ mɔ esinisini ebiebi, kadi ɔtɨlɛ mɔ ɔrɔ ra kɛkpɛna kania ntau kɛsɨmɛkpa.
47“Orin nwu ɔgbɛra bumbu ɔkɔkɔ ɔwɛn odugɔ, gbɔ obi sii, kɨn wa dumɔ mikpa esii. 48Gbɔ orin nwu obi gbɛra bumbu ɔkɔkɔ ɔwɛn odugɔ, mɨnɛ osi birɛ mbi ɛlɔmɛnyɛ na ɔtama esinisini, kɨn wa dumɔ giriri. Oni nwu Ɛbɨrɔkpabi ɛnyɛ birɛ esii, eduga ɛtama birɛ esii ra ibɔ iyɛn, mɨnɛ oni nwu Ɛbɨrɔkpabi ɛnyɛ mɔ birɛ esiesi, eduga ɛtama birɛ esiesi ra mɔ mɨnɛ.”
Jisɔs ɔwɔŋa ra eneminemi
(Mat 10:34-36)
49Jisɔs ɔkani bɛ na, “Nwɔ nwa rɔ rokun ra kekul, ra nkatir owum, nla rɔbɨnɛ rowumana. 50Kɨntama ichɛŋa ɛfɔrafɔra, nyɛ nɛ ilumɛ nyi ijanijani, ntumɛ ra ɔsɛŋɛ esii tata roira ndufa rɔwɛ. 51Nkatir owun ɔra na nwɔ nwa nyi kekul kumkafuɛɛ? Ei! Nkani wun, kumkafuɛ kikɛ, gbɔ eneminemii. 52Gbɔ bɨnɛ faŋandi, rɛfɔ rɛdɨm, kɛtɨb ka ani atan kɨn keneminɛ, atal (3) wa wuna ra afaa (2), mɨnɛ afaa (2) wa wuna ra atal (3). 53Kɨn wa neminɛ, mitɛ ɔwaminɛ ra wɔn odumini ɔwɛn, wɔn odumini ɔwaminɛ ra mitɛ ɔwɛn. Mika ɔwaminɛ ra wɔnɔwani ɔwɛn, wɔnɔwani ɔwaminɛ ra mika ɔwɛn. Mika odumɔ ra ɔwaa wɔnɔwɛn, ɔwaa nwɔn ra mika odumɔwɛn.”
Ɛgbɛragbɛra ichɛŋa kɛgbɔ
54Kadi ɔkani rɛkau na, “Ribɔ chɛ ɛkpakayu ɛkɨbɛnɛ ra ɛkpa-kofid, ɔmɔmɛ rilama na ɔyalɔ ɔnɨŋɔ tɔu, mɨnɛ ɛjaga ɛduayi. 55Mɨnɛ roifɛ ra ɛkpa-ntɔla robo fugnɛ, rikana na, ‘Kɛkɨmɔ nkum kɨn ketumɛ ɛdɛn,’ mɨnɛ etuma ɛduayi. 56Ani ikparobug! Rigbɛra kɛmanchi ri chimana ichɛŋa rɔchɛ akɨla nyi kayu. Gbɔ rɛfɔ nnan dɛ ribiyaa ri chimini birɛ mbi wɛjaga faŋandi?
57“Ri biyaa ri kɨbi kɛlam rinyɛ ɛkpaju ewun ra bumbu wɔ wanɛwanɛ? 58Abɔ oni ɔwɛɛ ɛja ɔlagɛwu, ɔnɨŋɔ tim wu odulɔ ɛtɔ kɛlam, bumɔ sii kumkafuɛ ramɔ nka ekpirɨmɔ. Sɔsɔɔ kɨn ɔyama wu odulɔ ɛkpa ɔkɨba kɛlam, nwu ɔnɨŋɔ tɨlɛ wu ɔnyɛ akɔrakpa waro wu ra ɛtɔajɔu. 59Lɔɔ nkani wu, ara jaga ra ɛtɔajɔu ayifɛ tata abinɛ egbigbɛd agbuga mba afɔnɔ fɛb.”
المحددات الحالية:
Luk 12: Olulumo-Ikom
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©️2024 Luke Initiative for Scripture Translation