Luk 14
14
E Iesu e kato hanigei a katuun turu Lan u Göagono
1Turu töa u Lan u Göagono, e Iesu ena nouia i luma tara töa katuun pan turu Parasi. Ba u katuun e taratara kap ner ta saha ka tego katoeien. 2Na e kamei a töa katuun, a mounen na limanen e puku hapan koru me laua nama tere Iesu. 3Be Iesu e rangata rena u tson hihatuts tara Lo na u Parasi me poeiena, “A Lo i tarara e haniga nena tegi kato haniga pouts menai a katuun turu Lan u Göagono, tsi e möa?” 4Kaba nori ima ranga nai ta ka. Be Iesu e luena nonei a katuun, me kato haniga poutsenen nen me hala ba nanen. 5Ba nonei e poeiena i taren, “Ga sanena ta töa i tamilimiou ega ka mei ta pien tson tsi ta bulmakau bate tsirukuna tara kioun ramun turu Lan u Göagono, e hana alimiou ema las sei pouts hase moien turu Lan u Göagono?” 6Kaba nori ima ranga palise ii u harangata teka.
Aragi hala putei a peisarara
7E Iesu e tarer u katuun ti la uama tara kannou teka i ngilin gum lasia turu gumgum tara pal kapan. Ba nonei e hala raneien u haharuei teka. 8“Pöata te ngö mena nei lö a katuun tara kannouna tara hitöl, möa tuna gum ia turu gumgum turu tsunono. E möa. Alö ema atei silemi tegi ngö menai ta katuun te pan bala nanoulö. 9Te markato tala uanouen teka, ba katunun hihanou, te ngö hoboto raiou limiou, te la nama romana bate poeiena i tamölö, ‘Alö go hale ii a makum teka a katuun pan ili.’ Ba lö te matsingolo tala mou batena gum moua tara makum turu katuun papala koru. 10Kaba tega ngöeia ta katuun alö ba lö te lam tara kannou, ba lö tena gum mia tara makum turu katuun papala koru. Ba katuun te ngöe lalou lö te la nama romana bate ranga menoulö, ‘O hahikapien, alö gomi gum ia tara makum turu tsunono.’ Te markato uanen teka, ba lö te ka memou a solo pan i matar u katuun hoboto te nou gono merioulö. 11Taraha? A katuun te hapanena a solonen e hala puteier romana. Na katuun te hala puteiena a solonen, nonei ena luena romana a solo pan.”
12Be Iesu e poeiena tara katuun te ngö meraleien tara kannou, “A pöata te katoe mia lö a kannou, ba lö tema antunan ngö rami u hahikapien i tamölö, tsi u toulamölö, tsi u katuun i tamölö, tsi u katunun moni te atei sil remölö. Taraha? Nori e ngö hase riou lö romana tara kannou i taren bate hamatana poutse rioulö. 13Pöata te katoe mia lö a kannou, ngöri u katuun ti möa ta ka, na u tuenrei omi, nu mou omi, na u matakiou. 14Ba lö te sasaalam romana. Nori ema antunan hamatana poutse roui lö romana. Kaba e Sunahan e hamatane nou lö romana tara pöata te takei pouts ria u katuun u niga tara tou mate.”
U haharuei tara kannou pan
(Matiu 22:1-10)
15A töa katuun te gum ia tara kannou e hengo a ka teka me poeiena tere Iesu, “A katuun tena nouna romana tara kannou tara Nipepeito tere Sunahan ega sasaala koru.” 16Be Iesu e poeiena i tanen, “A töa katuun e kato a kannou pan, me ngö rena u katuun u para. 17Tara pöata tara kannou, nonei e hatataalela a katunun kui i tanen egona tahul rema u katuun bate poeiena, ‘La muma, a pöata hamanasa tara kannou!’ 18Ba nori hoboto e ramar, me katoeier u mamana u mar ranga tegima la uaien tara kannou. A töa katuun e ranga mei a katunun kui, ‘Alia u holi a töa kui, na lia ena ngilin tara nagen. Alia e rangate goulö, alö go haniga tegoma la uai lia.’ 19Ba tai e poeiena, ‘Alia u holi a maloto a bulmakau, na lia ena ngilin torohana ragen. Alia e rangate goulö, alö go haniga tegoma la uai lia.’ 20Ba tai e poeiena, ‘Alia e hagou hitöl gi, nonei tema antunan la megi lia.’ 21Ba katunun kui e la poutsuna mena hateie nei a tsunono i tanen a manka teka. Ba torina a tsunono e si koruna me poeiena tara katunun kui i tanen, ‘Hasesei boroboro uu tara man maroro a man kapan na tara maroro a man tetenei iahana taun teka. Ba lö tena lu ramuma u katuun ti möa ta ka, na u tuenrei omi, nu matakiou, na u mou omi, ba lö temi piou ramien i luma i tar.’ Ba katunun kui ena markato has uana teka. 22E ma manasai ba nonei emi poeiena tara tsunono i tanen, ‘O tsunono, alia e katoe gula a ka te ranga namula lö, kaba a kannou e antuna hasina, a palai gi la noama.’ 23Ba tsunono e poeiena i tanen, ‘La tala uu tara man maroro pan na man maroro a man tetenei ielesala tara taun, ba lö te las mera mumei u katuun tara kannou. Alia e ngilegu a luma i tar ega saputu. 24Alia e hateie goulö, e möa ta töa turu katuun ti ngö mam rela tegimi nouia romana tara kannou i tar!’”
Ime temar butun katunun tsitsilo uaier?
(Matiu 10:37-38)
25-26A katuun a parpara koru i tataala gono mei e Iesu. Ba nonei e habiritsina me poeiena i taren, “A katuun te la uanama i tar ega ngil bala korue ioulia, na u ngil teka ega pan balein u ngil i tanen temar ngil mena neien e tamanen ne tsinanen na tahol i tanen na galapien i tanen, na u toulanen na u hahinanen na nonei has. Te möa nen, nonei ema antunan katunun tsitsilo uanei i tar. 27Esi tema antunan söata nanei a kuruse i tanen ema antunan katunun tsitsilo uanei i tar. 28Tega hakats naia ta töa i tamilimiou tega kui menaien ta luma ta pia, nonei e ha nou? Nonei e gum mam bunou bate hakats nena a lahisa moni te antunenou a luma teka. Ba nonei te hakats has nanou tega antuna uu a moni tega hakapa meien a luma. 29-30Te möanen, nonei e tanie nou a luma, ba nonei tema antunan hakape noien. Ba eresi te tarer a ka teka te gol sile ren romana bate poeier, ‘A katuun teka e hatanian hatakei a luma, kaba ema antunan hakapa naneien!’
31“Na sanena ta töa ta king ega katsin la gono mei u 10,000 tara soldia i tanen, batena hiatatung gono mena a tana king tega ka mei u 20,000 tara soldia, ba nonei te gum mam buna bate hakats nena tega tagala hantuna uaien. 32Tema antuna neien, ba nonei te hala nena u katunun raranga i tanen bate la kap ner a tana king tara pöata te lehana noa nen, ba nonei te rangata nena tegi antunan hiakaka haniga pouts uaien. 33Na e markato has uana iesana i tamilimiou a man tötöa. Alö go tula ban a mamanaka te ka memölö. Te möa nen, alö ema antunan katunun tsitsilo uamoi i tar.”
U sol tema mal lel nei
(Matiu 5:13, Mak 9:50)
34Be Iesu e poeiena, “U sol e nigana, kaba te taia na a nimal i tanen, e möa lel ta maroro tegi kato haniga pouts menaien. 35U mar sol teka ema antunan taguhu nanei u tsiktsiki tsi a man kaan leba tara kui. Ara e tatei kato baba tuun las naren. A katuun te ka mena u talingan hengo ega hengo!”
المحددات الحالية:
Luk 14: HLA 2020
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© (Active) Wycliffe Bible Translators, Inc. All rights reserved.