لشهر أبريل؛ رحمات جديدة كل صباحعينة

قصة الله عندها بداية ونهاية ماكتساليش، وإلا كنتي ولد الله، فراه القصة دياله دابا هي سيرتك الذاتية. واو!

تقدر تكون بحالي - كيعجبوك القصص المزيانين. سواء كانت دراما في التلفزة أولا فيلم ناجح أولا رواية مشهورة، فراه حنا كنبغيو نسمعو قصص مزيانة. أولا تقدر تكون گالس في شي مطعم أولا مجمعّين على عافية في المخيم، وبداو صحابك كيعاودو القصص. كل واحد كيعاود قصة، كيكون حسن من اللّي قبل منّه.

ولاّ هادشّي بحال شي مسابقة. كيبان بحال إلا كل واحد كيحاول يتفوّق على لاخر. هادشي علاش بديتي كتقلّب في الصفحات في عقلك على قصصك الشخصية باش تشوف إلا عندك شي قصة تقدر تربح. أولا ربما شي واحد قال ليك شي قصة زوينة بزّاف وماتقدّرش تتسنّا الفرصة باش تعاودها لشي واحد آخر. أه، كلنا كيعجبونا القصص المزيانين.

دابا، أغلبية القصص الزوينة كيكونو زوينين حيت كيعطيو نهايات زوينين من خلال بزّاف د الشخصيات والعلاقات والمواقف والبلايص. ملّي كيهدر معاك شي واحد على شي فيلم زوين يالّاه شافه أولا كتاب واعر يالّاه قراه، غالبًا ما كيقول، "ماغتصدّقش النهاية"! ولكن أحسن قصة تعطات وتكتابت وتمتلات في الحياة الواقعية هي أحسن قصة حيت بالخصوص هي ماكتساليش. القصة الوحيدة اللّي خاصّك تعرفها وتفهمها وتعطي قلبك ليها هي قصة عامرة بالأمل والتشجيع وكتغيّر الحياة حيت هي كتقدم ليك جوج حوايج واعرين اللّي حتّى قصة خرا تقدر تقدمهم ليك. أولاً، كتقدّم ليك بلاصة في القصة، بلاصة تصاوبات من أجلك وقت طويل قبل ما تكتبات هاد القصة. ولكن حتى كتقدّم ليك حاجة صعيب على العقل البشري يفهمها وصعيب على الخيال البشري يتصوّرها. هي كتقدّم ليك حياة ماعمّرها كتسالي.

حنى كلنا تعوّدنا على الموت لدرجة أننا للأسف كنفكرو فيه كجزء طبيعي من الحياة. كلشي كيموت، الناس كيموتو، نهاية القصة. ولكن هادي ماشي هي النهاية ديال هاد القصة. قصة الفداء الرائعة اللّي كتبها الله ليك في الصفحات ديال كتابك المقدس مختلفة بزّاف حيت في هاد القصة الموت براسو غيموت. أه قريتي هادا مزيان. الشخصية الرئيسية في قصة الله (اللّي هي قصتك إلا كنتي ولده) كيجي للأرض وكيهزم الخطية والموت، وهاكدا كيقدّم لينا الحاجة الوحيدة اللّي حتى شخصية خرا تقدر تقدّمها لينا - حياة حقيقية دابا والحياة الأبدية اللّي جايّة.

بغض النظر على أي حاجة حققتيها أولا كسبتيها أو ستحقيتيها كولد الله، راه تفتحو الأبواب قدّامك في أحسن قصة كاينة بالنعمة وبالنعمة بوحدها. ونشكرو الله، هاد القصة اللّي هي قصتك عندها نهاية ماكتساليش.

من أجل دراسة وتشجيع كتر: يوحنا 5: 19-24