لشهر أبريل؛ رحمات جديدة كل صباحعينة

راه نعمة باش مانكونوش مشلولين بالندم. الصليب كيعلّمك بلّي راك ماشي حاصل، وماشي ملعون باش ديما تخلّص على الدنوب ديال الماضي ديالك.

هو گلس قدّامي وحاني راسه لتحت وبقا كيقول بزّاف د المرّات: "أنا غير كنتمنا نرجّع كلشي. كنتمنّا غير كون نقدر نبرك على شي بطونة ونرجع من اللّول. كنتمنّا كون عرفت شنو أنا كنعرف دابا. كنتمنّا كون نقدر نحاول عاوتاني، ولكن مانقدرش". ممكن هو قال بحال هادشي شي عشرة ديال المرات. هو كان مضطرب وندمان بزّاف، ولكن في نفس الوقت هو كان في أفضل حالة روحية عمره كان فيها. بالحق حسّيت بالألم دياله وكنت فرحان بزّاف حيت حتى هو حس هاكدا، حيت كنت عارف بلّي داكشي اللّي كان كيدوز منّه هو الألم ديال النعمة.

هو كان راجل قاسح ومتطلب بزّاف واللّي ديما زاد القدّام واخّا يوقع اللّي وقع وماعمره شاف اللّور. ماكانش كيهتم بالدمار اللّي كان كيخلّي موراه. هو كان راجل ناجح. كان عارف هادشي وكان باغي كل واحد يعرف هادشي. كان كيبغي خدمته كتر من عائلته، وفي هادشي هو خسرهم بجوج. مشا كلشي- العائلة، الخدمة، والتروة. دار كلشي براسه ومن أجل راسه، وخسر بزّاف. ولكن دابا عينيه كانو مفتوحتين، وهادشي هرّس قلبه.

مُفلس و وحيد، شاف بحزن في الماضي في كل لحظة مغرورة. كان هادشي مؤلم ولكن كانت نعمة. كان الله كيخلّي عينيه يشوفو باش مايرجعش لتمّا عاوتاني.

هي نعمة باش تندم. النعمة كتخلّيك تواجه خطيتك وتعترف بيها وماتلومش شي واحد أخر. ولكن حتى راه النعمة هي اللّي كتغفر داكشي اللّي تكشف. النعمة كتخلّيك تحس بالألم ديال الندم ديالك، ولكن ماعمّر كتطلب منك تخلّص الدين اللّي عليك، حيت يسوع ديجا خلّص التمن. رسالة كولوسي 2: 14 كتهدر على كيفاش هو مسح "الْحُجَّة دْيَالْ الْفْرَايْضْ اللِّي كَانْتْ ضْدّْنَا " من خلال تضحية يسوع. تقدر تشوف اللّور، ولكن ونت عارف بلّي التقل ديالك ترفع بالنعمة اللّي كتغفر. مزيان نشوفو اللّور ونفرحو بالنجا ديال النعمة. مزيان نحزنو على الدنوب ديال الماضي. ماشي مزيان يخلّيونا نكونو مشلولين ومانتحركوش. النعمة كتعيش في الطريق بين وضوح البصر والأمل في المستقبل. وهاد النعمة هي ديالك باش تاخدها. نت مامضطرش تعاود تكتب الماضي ديالك، وتخلّي راسك تبان تقي كتر من اللّي كنتي قبل. تقدر تبقا تشوف في القلب ديال الحق بسباب داكشي اللّي دار يسوع من أجلك. تقدر تملك شنو خاصّك تملك وتعتارف بشنو خاصك تعتارف، ومن بعد زيد القدام باش تعيش بطريقة جديدة وأحسن. نفس النعمة اللّي كتغفر الماضي ديالك كتخلّيك تعيش بطريقة جديدة في المستقبل.

هادشي علاش شوف اللّور وزيد لقدّام. نعمة الله كتخلّيك تدير هاد جوج الحوايج بجوجهم، تفرح بالغفران ديال الماضي وتقبل القوة من أجل مستقبل جديد وأحسن. غير النعمة ديال الله اللّي كتعطيك سلام مع الماضي ديالك والأمل في مستقبلك.

من أجل دراسة وتشجيع كتر: فيلبي 3: 12-21