Cishingini: Uzuwakpani u Savu n Cishingini; n aba'in a na a Zagbai a Uzukpani New Testament

Uzuwakpani u Savu n Cishingini; n aba'in a na a Zagbai a Uzukpani

Ka̱bunda̱i ka uma a̱kpa̱n a̱kpa̱n ka banai u Yesu, ali ɗa a̱ ka̱na̱i madasanai uteku u le. Ɗa Yesu u danai mukumitoni n ni, “YaꞋin cicoꞋo mayin adama a kusasu ka Afarishi, adama a na ku ɗaɗa kapalaka̱shi ke le. Ili i na baci a palai dem i ta̱ a kupalukpa i ɗa. Ili i na yi usokongi dem i ta̱ a̱ kuta̱ka̱ i ɗa. Ili i na vu dansai a̱ ka̱yimbi dem i ɗa yi ta̱ a̱ kuta̱ e keteshe. Ili i na vu dansai n yemeni dem a̱ kunu, i ta̱ a kusala i ɗa, ka̱ta̱ a dansa i ɗa n kacaꞋa.


“Mi ta̱ a kudana ɗa̱, a̱ja̱Ꞌa̱ a̱ va̱, ka̱ta̱ i pana wovon wa aza a na a kuna ikyamba ba. I o kudoku a fuɗa a yaꞋan ili i yoku ba. Mi ta̱ o kuyotsongu ɗa̱ vuza na i a kupana wovon u ni: Panai wovon u Ka̱shile vuza na u kuna ikyamba, ka̱ta̱ kpamu u taɗuku wu a kpaꞋa ka akina. Mayun a̱yi ɗa u gaꞋin i pana wovon u ni. Ashe ashamgbaɗi a tawun a ɗa e ci denge iyum i re ba? Amma babu kashamgbaɗi ka na Ka̱shile ka cinukpai. Ko ka̱nji ka kaci ka̱ nu ka ki ta̱ ukeci. Ka̱ta̱ i pana wovon ba, i laꞋa ta̱ biꞋi ashamgbaɗi ka̱u.


“Mi ta̱ kudana ɗa̱, aza a na a̱ uta̱i e keteshe, ɗa a yaꞋin kadanshi ka̱ va̱, mpa Maku ma Vuma feu mi ta̱ a kuyaꞋanka le nannai e kelime ka alingata a̱ Ka̱shile. Amma aza a na a iwain mu e keteshe, mpa Maku ma Vuma feu mi ta̱ a kuꞋiwan le e kelime ka alingata a. Vuza na baci u nusakai Maku ma Vuma i ta̱ a kufuɗa a cinukpaka yi n unushi u ni. Amma vuza na baci u yaꞋin kadanshi ki ishikushi wa Ayinviki a̱ Ka̱shile a kucinukpaka yi n unushi u ni ba.
“A banka ɗa̱ baci a̱ ubuta̱ wa afada a̱ unu a avasa ko a̱ ubuta̱ wa aza o tsugono, ka̱ta̱ ka̱ɗu ka̱ ɗa̱ ka̱ muɗa̱, adama a ili i na i kudansa ba. Adama a na Ayinviki a̱ Ka̱shile i ta̱ o kuyotsongu ɗa̱ ili i na i kudansa a̱ ka̱tsuma̱ ka ayin a nan lo a.”

Vuma vi yoku a̱ ka̱tsuma̱ ka uma ka u danai Yesu, “Malum, dana vuza va̱ u pece nu mpa uciyi u na esheku a̱ tsu a̱ kuwa̱i a̱ ka̱sa̱kpa̱ka̱i tsu.”
Yesu u danai ni, “Ka̱ja̱Ꞌa̱ ka̱ va̱, yayi u zuwai mu mo okpo keyevikafada ka̱ ɗa̱ ka na n kupeceke ɗa̱ uciyi?” Ɗa u danai uma a na i lo va dem, “U gaꞋan ta̱ i yaꞋan cicoꞋo, ka̱ta̱ i yaꞋan ulyopi n ili i uma ba. Ili i bura wuma u ɗa̱ n uciyi ba.”
Ɗa Yesu u danai agisana a nam pa: “Vuza vu uciyi vi yoku vu ɗa. Vuza na kashina ka̱ ni ka matsai n a̱bunda̱i. Ɗa u ka̱na̱i kusheshe n ka̱ci ka̱ ni, ‘Mi n ubuta̱ u na ma kuzuwa ilya i va̱ ba. Yi ɗa̱i ma kuyaꞋan? Ili i na ma kuyaꞋan i ɗaɗa na, yaꞋan m ɓoso mpon n va̱ dem, ka̱ta̱ m maꞋa m gbagbaꞋin a̱ ubuta̱ u na ma kuzuwa ilya ya n ili i na i buwai. Ka̱ta̱ n dana ka̱ci ka̱ va̱, “Vuma vu uciyi, vi ciya̱ ta̱ ili i singai ya adama a̱ a̱ya̱ n a̱bunda̱i. Yongo mayin, lyaꞋa ka̱ta̱ vu soꞋo adama a na vu pana uyoꞋo.” ’
“Amma ɗa Ka̱shile ka danai ni, ‘Avu kalau! Anana n kayin ka nam pa i ta̱ a kuciga wuma u nu. Ka̱ta̱ ce ene ko yayi u kulyaꞋaka wu ili i na vi ciya̱i va.’ ”
Ɗa Yesu u danai, “Ta aza a na i o kuɓolonguku ka̱ci ke le uciyi i nannai, amma i n uciyi a̱ ubuta̱ u Ka̱shile ba.”


Ɗa Yesu u danai mukumitoni n ni, “Ka̱ta̱ yo oꞋuso ka̱ci ka̱ ɗa̱ adama a ili i na i kulyaꞋa, ko akashi a na i kuꞋuka a ikyamba i ɗa̱ ba. Wuma u ɗa̱ u laꞋa ta̱ ilikulyaꞋa, ikyamba i ɗa̱ kpamu i laꞋa ta̱ akashi. La̱na̱i agawun: a̱ ci ca̱Ꞌa̱ ba, ko a kyaꞋa, i kpamu n ubuta̱ u kuzuwa ilikulyaꞋa ko mpon ba. Amma Ka̱shile ke ci neke le ta̱ ilikulyaꞋa. A̱ɗa̱ i laꞋa ta̱ nnu. A̱ ka̱tsuma̱ ka̱ ɗa̱, yayi u koꞋuso ka̱ci ka̱ ni, ka̱ta̱ u fuɗa kudoku ayin a wuma u ni? Ana ya kufuɗa ya yaꞋan ili i kenu i nam pa ba, yi ɗa̱i kpamu yi o koꞋuso ka̱ci ka̱ ɗa̱ adama a ili i na i buwai?
“Indanai biꞋi uteku u na a̱pa̱lu o tsu gbonguro. A ci yaꞋan ulinga, ko a yaꞋanka ka̱ci ke le aminya ba. YaꞋan n dana ɗa̱, ko Mogono Sulemanu n uciyi u ni dem wi n aminya a na a yawai tsuloboi tsa̱ a̱pa̱lu a nam pa ba. Ka̱shile kaꞋa ka̱ tsu la̱na̱ mita̱ ma na mi anana, ka̱ta̱ mkpaꞋa kpamu o songu le. A̱yi wi ta̱ a kufuɗa wa̱ la̱na̱ ɗa̱ ali u laꞋa nannai. A̱ɗa̱ aza a uneki wa̱ a̱ɗu u kenu! Ka̱ta̱ yo oꞋuso ka̱ci ka̱ ɗa̱ adama a ili i na i kulyaꞋa ka̱ta̱ i soꞋo ba. Adama aza a na e yevei Ka̱shile ba, i ta̱ a̱ kula̱nsa̱ i ɗa ayin tutu. Esheku a̱ ɗa̱ e yeve ta̱ yi ta̱ a kuciga ili i nam pa. Adama a nannai, zuwai a̱ɗu a̱ ɗa̱ a̱ ubuta̱ u tsugono tsu Ka̱shile, wi ta̱ e kuneke ɗa̱ ili i na i buwai dem an avakana.


“Ka̱ta̱ i pana wovon ba, a̱ɗa̱ ushiga u kenu. Esheku a̱ ɗa̱ a tsu pana ta̱ uyoꞋo u neke ɗa̱ tsugono tsu Ka̱shile. Dengei ili i na yi n i ɗa, ka̱ta̱ i neke aza a unambi. Zuwakai ka̱ci ka̱ ɗa̱ ili o nsolo n na n kuta̱sa̱ ba. I zuwa uciyi u ɗa̱ gaɗi a̱ ubuta̱ u na i ɗa i kujebe ba. Koboki kpamu ki lo a kuɗika ba. KayaꞋan kpamu ka kulyaꞋa ba. Adama a na ka̱ɗu ka vuza ki ta̱ o kuyongo a̱ ubuta̱ u na uciyi u ni wi.”

Yesu u lyaꞋi kelime, “Yongoi ufoɓushi adama a ili i na i kuta̱wa̱ wa̱ ɗa̱ dem nu nkuni n ɗa̱ kpamu utashiki, an agbashi a na i a kuvana vuzagbayin vi le u bono a̱ ubuta̱ u ka̱ɗiva̱ ko yolo. Ayin a na baci u yawai, ɗa u ka̱la̱i, ka̱ta̱ gogo lo a̱ ɓa̱yuwa̱ka̱ yi. Agbashi a i ta̱ a kuyaꞋan ma̱za̱nga̱ ayin a na baci vuzagbayin vi le u yawai, ɗa u cinai le wuma ele kpamu a kuvana yi. Mi ta̱ a kudana ɗa̱, wi ta̱ o kufoɓuso ka̱ta̱ a̱ da̱sa̱ngu adama a na u neke le ilikulyaꞋa. Wi ta̱ a kufuɗa wa̱ ta̱wa̱ e mere ma kayin ko m kpasani, u ta̱wa̱ baci aza a nan lo i ta̱ a̱ kuciya̱ katsupu wa̱ ni.
“U gaꞋan ta̱ vi yeve: Vuza u yeve baci a na koboki ki lo a̱ kuta̱wa̱, u kuka̱sa̱kpa̱ ka ka uwa ba. U gaꞋan ta̱ vi yongo ufoɓushi ayin dem, adama a na Maku ma Vuma mi ta̱ a̱ kuta̱wa̱ ayin a na i yevei ba.”


Ɗa Biturusu we ecei ni, “Agisana a nam pa adama a̱ tsu a ɗa koci, ko n aza a na a buwai dem ɗa?”
Ɗa wu ushuki, “Yayi wo ta na kagbashi ka singai n vuza vu ugboji? A̱yi ɗa vuza na vuzagbayin vi ni u kuzuwa yi u la̱na̱ ili i kpaꞋa dem. Ka̱ta̱ u neke agbashi a na a buwai utalu a ayin a na a cigai. Ayin a na baci vuzagbayin va u yawai u cinai ni a kuyaꞋan ili i na i gaꞋin u yaꞋan, kagbashi ka nan lo wi ta̱ a̱ kuciya̱ katsupu. Mi ta̱ a kudana ɗa̱ vuzagbayin vu nan lo wi ta̱ a kuzuwa kagbashi ka nan lo wo okpo vuza kelime va aza a na a buwai, n ili i na i buwai dem. Amma ishi baci kagbashi ka nan lo ki ishi ka dana ka̱ci ka̱ ni, ‘Vuzagbayin vu va̱ wo kubono gogo na ba.’ Ɗa u ka̱na̱i kulapa aza a na a buwai, a̱ma̱ci n ali dem. Ɗa u ka̱na̱i kulyaꞋa n soꞋi n u ga̱la̱i washi. Ka̱ta̱ vuzagbayin vi ni vi yawa a ayin a na u yevei ba. Ana u yawai, ɗa u nekei ni atakaci ka̱u, ali ɗa u bonokoi ni a̱ ubuta̱ wa aza a gbani-gbani.
“Kagbashi ka na ke yevei ili i na vuzagbayin vi ni u cigai u yaꞋan, amma u foɓuso ka̱ci ka̱ ni ka̱ta̱ u yaꞋan ba, i ta̱ a kutakacika yi n a̱bunda̱i. Amma kagbashi ka na ke yevei ili i na vuzagbayin vi ni u cigai ba, ɗa u yaꞋin ili i na i gaꞋin a lapa yi, i ta̱ e kuneke yi atakaci kenu. E neke baci vuza ili n a̱bunda̱i, i ta̱ a kuciga a isa ili ya̱ a̱bunda̱i kpamu wa̱ ni. Vuza na kpamu a laꞋi n kuneke utsura n a̱bunda̱i, i ta̱ a kuciga yi u yaꞋanka u ɗa ulinga n a̱bunda̱i.”


Yesu u lyaꞋi kelime, “N ta̱wa̱ ta̱ adama a na n tuka̱ n akina a aduniyan. N ciga ta̱ ishi de a yaꞋan ta̱ ɗe utashiki! Mi ta̱ n kusumbu ka akucina ka atakaci ku na n kisa, amma ali a kubana ayin a nan lo ka̱ɗu ka̱ va̱ ki ida̱shi ba. A̱ɗa̱ i dana ta̱ n ta̱wa̱ ta̱ adama a na n tuka̱ m ma̱ta̱na̱ a aduniyan? A̱Ꞌa̱, ma̱ta̱na̱ maꞋa ba, sai upecu. Uteku n gogo na, kpaꞋa ku na ki n uma a tawun, i ta̱ e kupecuku ku ɗa ugboku u re: uma a tatsu a kuꞋiwan aza e re adama a̱ va̱. Ko aza e re kpamu a kuꞋiwan uma a tatsu nannai. Isheku n olobo e le i ta̱ a kuꞋiwanai adama a̱ va̱. Ina̱ku ni nkere n le i ta̱ a kuꞋiwanai feu nannai. Ejene n ina̱ku i le feu i ta̱ a kuꞋiwanai.”


Ɗa Yesu u danai uma a, “Ye ene baci eleshu a̱ kuɗenga̱ a̱ kasana, yi ta̱ a kudana, ‘Wi ta̱ o kuyoꞋo.’ Wi ta̱ ta na o kuyoꞋo. Ye ene baci wunla̱i u ɗaka u lapai, vi ta̱ a kudana, ‘Anana wi ta̱ a kuyaꞋan usuɗukpi.’ Wi ta̱ ta na a kusuɗukpa. A̱ɗa̱ aza a kapalaka̱shi, yi ta̱ a kufuɗa ya kinda iɗika n eleshu, ka̱ta̱ i dana, ‘Anana ili yo okpo nannai.’ Ka̱ta̱ ta na i ɗa i yaꞋan nannai. Yi ɗa̱i i zuwai ɗa i kpa̱ɗa̱i kuyeve icuꞋu i ayin a nam pa?


“Yi ɗa̱i i zuwai ɗa yi kula̱na̱ kadanshi ka̱ta̱ i yeve ili i na i gaꞋin i yaꞋan ba? Vuza u yaꞋanka wu baci nsata ɗa u bankai nu a̱ ubuta̱ wa afada, yaꞋan kataci lo a uye wa ka̱ta̱ i la̱na̱ kadanshi ka mayin kafu i yawa ɗe. I la̱na̱ baci kaꞋa ba, i ta̱ a kuɗika wu a kubana a̱ ubuta̱ wa afada, ka̱ta̱ a banka wu a̱ ubuta̱ wa a̱duga̱ri, ka̱ta̱ a banka wu a ugbashi. Ta ɗe vi a kushamgba. Mi ta̱ a kudana ɗa̱, a̱ kuka̱sa̱kpa̱ yi ba, sai u tsupa le ra̱ka̱ ra̱ka̱.”

Listen to Luka 12