Penan, Eastern for Malaysia 2011 MAS; Non-Drama (NT)

© 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia. Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia ℗ 2018 Hosanna; 

Penan, Eastern for Malaysia 2011 MAS; Drama (NT)

Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia

La'ah Yésus tebai irah éh bakéh Néh jah poloo' duah usah nah, ke' Néh nyohoo' réh mega' balei' ngan peka'o kelunan éh sakit péh, pekua' Iah péh omok mega' balei' ngan peka'o kelunan sakit. La'o inah Iah nyohoo' réh tai bara' tong jalan Allah pu'un Pengeja'au, ngan nyohoo' réh peka'o kelunan éh sakit. Ka' ha' Néh ngan réh, Mai keh mihin ineu'-ineu' lem pengelakau keh da', mai mihin sekot, mai mihin gaweng éh jalan keh menyat belunan, mai mihin penguman, mai mihin rigit, mai mihin kerayung keh duah. Semah irah éh alaa' keh ngan jian kenin, tong lamin kelunan inah keh mokoo' pah avéé' hun keh piso jin sinah kepéh. Hun keh lakau tong leboo' semah-semah péh hun réh bé' keloo' alaa' keh, piso keh jin leboo' inah. Hun keh piso, nepaga' agaa' tana' éh nyalit tong gem keh, seleket ha' keh bara', Ka'ah ke' tagong penyala' keh, seleket keh pané kenat ngan réh, ha' Néh.
La'o inah irah éh sohoo' Néh éh bakéh Néh ri', lakau tai siget-siget leboo' bara' Rengah Jian ngan peka'o kelunan sakit.


La'ah Herodis nah éh raja' tong tana' Galilia, iah pu'un menéng rengah tong penganeu' Yésus ngan irah éh bakéh Néh nah. Bang Herodis nah parap kenin, bé' éh jam seruh éh. Uban ha' jelua' kelunan bara', Yésus nah Yohanes Batis rai betéé' murip kepéh ine', ha' réh. Ha' jelua' réh kepéh, Nabi Elia rai poléng kepéh ine', ha' réh. Pu'un jelua' kelunan kepéh éh bara', Yésus nah, iah jah nabi éh bara' ha' Tuhan ngan kelunan sahau ine', inah iah betéé' murip kepéh, ha' jelua' nah. La'ah ha' Herodis, Akeu' jam Yohanes Batis rai matai mu'un éh uban akeu' éh nyohoo' réh ngulep ulun néh sahau, bang kelunan ineu' éh nenéng ké' pinaa' rengah hun iteu' nah, ha' néh. La'ah iah pitah jalan ke' néh omok na'at Yésus.


Moléé' lah irah lawah Yésus éh sohoo' Néh lakau nah, bara' kekat rengah ngan éh penganeu' réh tong pengelakau réh ngan Yésus. Boh Yésus mihin kekat irah inah tai tana' déhéé' leboo' Betsaida. Hun kelunan pinaa' nah jam réh tai sinah, inah irah kivu éh tai sinah kepéh. Inah Yésus alaa' kelunan pinaa' nah ngan jian kenin ngan Iah bara' tong jalan Allah pu'un Pengeja'au, la'o inah boh Yésus peka'o kelunan éh sakit.
Sioo' dau tahup inah, irah éh bakéh Yésus nah tuai tavin Éh ke' réh nyohoo' Éh nyohoo' kelunan pinaa' nah tai mokoo' ngan kuman ngan irah tong leboo', kenat péh ngan irah tong térék éh danii'-danii' sinah. Ka' ha' réh ngan Néh, Bé' pu'un ineu'-ineu' siteu' jalan réh omok pitah penguman réh, ha' irah.
Bang ha' Yésus ngan réh, Ka'ah mena' penguman ngan réh, ha' Néh.
Ha' réh mipa éh, Améé' bé' pu'un ka'an, lemah awah roti siteu' ngan duah de' ke' usah seluang. Kineu' kenin ko', keloo' ke' améé' tai melih ka'an pakan kelunan pinaa' nah? Ha' réh. La'ah tong kekat kelunan pinaa' nah, ngioo' lemah ibu kekat irah lakei' awah.
La'ah ha' Yésus ngan irah éh bakéh Néh nah, Jian keteleu' nyohoo' irah menyun tipet lemah poloo' usah tong jah vun, kenat péh tong jah kepéh, ha' Néh.
La'ah irah éh bakéh Néh nah nyohoo' kelunan pinaa' nah menyun kenat. Boh Yésus alaa' lemah roti ngan duah seluang nah ngan na'at tong langit ngan sebayang bara' jian kenin tong ka'an inah, boh Éh mutip éh ke' Néh mena' éh ngan irah éh bakéh Néh nah, jalan réh mena' éh ngan kelunan pinaa' nah kepéh. Irah kelunan pinaa' nah kuman éh pah avéé' réh beso. Hun réh lepah beso, irah bakéh Yésus tipun kekat la'an éh uban kinan réh nah, penoo' jah poloo' duah gaweng neu' néh.


La'ah jah koléé' kepéh tovoo' Yésus sebayang tengéé', inah irah éh bakéh Néh tuai tavin Éh. La'ah ka' ha' Yésus ngan réh, séé' Ku' kunah kelunan pinaa', ha' Néh.
Ha' réh mipa Éh, Ha' jelua' réh bara' ke' Yohanes Batis, pu'un jelua' réh bara' ke' kepéh, Elia, ngan pu'un jelua' kepéh éh bara' ke', jah nabi, murip kepéh, ha' réh mipa Éh.
Iah neteng réh de' ke' kepéh, Bang kineu' ha' ka'ah iteu', séé' Ku' kunah ka'ah, ha' Néh. Ha' Péterus mipa Éh, Ka'au' éh Kristus éh pejajii' Allah, ha' néh.


La'ah Yésus meta' réh mu'un-mu'un, bé' buhaa' réh bara' éh kenat ngan kelunan séé'-séé' péh. La'ah ha' Néh ngan réh, Adang Anak Kelunan jam keta mu'un neu' irah Kemiti Yahudi, ngan irah pengeja'au imam ngan neu' irah guru éh nebaraa' tong sohoo' lem Surat Musa, kekat réh béé juk mematai Éh. Bang tong keteleu' dau Tuhan juk pebetéé' Iah kepéh, ha' Néh.
La'ah ha' Néh ngan kekat kelunan pinaa' nah, Hun pu'un séé'-séé' péh éh juk kivu Akeu', mai éh kivu pengeloo' néh tengéé', bang siget-siget dau, jian éh alaa' salib néh tengéé' ngan kivu Akeu'. Kelunan éh seruh juk mihau urip néh tong tana' awah, tawang urip néh inah, kenat péh kekat pengeloo' néh kepéh. Bang kelunan éh bet kekat pengeloo' néh tengéé' ke' néh ngajung Akeu' dalem kekat penganeu' néh, kelunan inah éh omok murip mu'un. Ineu' gunah kelunan alaa' kekat éh tong tana' iteu' hun usah néh tengéé' tawang ngan béé? Bé' pu'un gunah néh. Uban kelunan séé'-séé' éh leko tong Akeu' ngan leko tong ha' tebaraa' Ké', Anak Kelunan leko tong iah sioo' savéé' Néh tuai kepéh dalem kekat pengaren Tamen Néh ngan pengaren meliket Néh péh. Jian keh seruh jian-jian, pu'un jelua' kelunan siteu' éh bé' omok matai pah avéé' réh jam Allah tuai Pengeja'au, ha' Néh ngan réh.


Ngioo' jah migu la'o Yésus pané ngan réh kenat, inah Iah mihin Péterus ngan Yohanes ngan Yakub pemung ngan Néh tai jah tokong ke' Néh sebayang sitai. Lem Néh sebayang, paléu layan da'in Yésus, ngan kekat pakai Néh mebéng ngilap. Tioo pu'un duah usah pané ngan Néh, inah éh Musa ngan Elia, rawah inah lepah matai ngan poléng kepéh dalem kekat pengejian roh. Inah rawah pané ngan Yésus seruh tong pematai Néh tong leboo' Yérusalem kivu pengeloo' Allah nah. Péterus réh teleu' bakéh néh ri' pegen marut, bang hun réh to'ot, boh réh na'at pengaren Yésus ngan na'at kepéh duah kelunan éh nekedéng ngan Yésus nah. Tovoo' rawah inah juk piso jin Yésus boh Péterus bara' ngan Yésus, Guru, jian tam mokoo' siteu', améé' juk maneu' teleu' lamin pai siteu', jah anah ko' da', jah anah Musa, jah anah Elia, ha' néh. Iah ulak pané kenat bang bé' iah jam kineu' ha' néh kenat.
Lem Péterus to pané kenat nah, inah jah avun tuai, neu' ada avun inah lihep tong Yésus ngan Musa rawah, irah éh bakéh Yésus nah medai na'at lihep nah kenat tong réh teleu'. Boh réh menéng jah ha' jin lem avun nah éh bara', Iteu' éh Anak Ké' éh kevéléé' Ké', jian keh menéng ha' Néh, ha' jin lem avun nah.
La'o réh menéng ha' néh kenat, bé' pu'un séé'-séé' lah ta'an réh sinah, bang Yésus nah awah to sinah ta'an réh. La'ah irah bakéh Yésus nah kelem awah tong kekat éh ta'an réh nah, bé' irah bara' éh ngan kelunan séé'-séé' péh.


Barei' sagam irah tuhun jin tokong inah, ngan pu'un kelunan pinaa' temeu' ngan Yésus. Jin belah kelunan pinaa' nah tioo pu'un jah usah mejui. Ka' ha' néh, O Guru, ko' pika akeu', ko' na'at anak ké' teu', jah awah de' ke' anak ké', anak lakei', ha' néh. Pu'un jah balei' éh ngelayau maneu' éh, balei' nah ngeradau ngan nguba' anak ké' nah, boh anak nah ngebura' ujun, ngelayau balei' nah ngesakit éh, bé' éh keloo' pega' jin néh. Akeu' nyohoo' irah éh bakéh ko' nah mega' éh rit, bang bé' réh omok, ha' lakei' inah.
Ha' Yésus mipa éh, Ka'ah kelunan éh mahéng kenin ngan bé' ngelan, kuraa' kelebéé' la'ah Akeu' mokoo' ngan keh da' boh keh omok ngelan? Kuraa' kelebéé' la'ah Akeu' kebit kenin ngan keh, ha' Néh. Boh Éh pané ngan lakei' inah nyohoo' éh mihin anak néh tuai.
Tovoo' anak inah tuai, inah balei' nah nguba' éh kepéh ke' néh ngebura' ujun. Pelapah Yésus meta' balei' nah ngan Iah peka'o anak inah ke' Néh mena' anak inah ngan tamen néh kepéh. Béé kenin kekat kelunan pinaa' nah na'at penyukat Allah éh ja'au mu'un.


Lem kelunan pinaa' nah béé kenin seruh tong penganeu' Yésus nah, boh Yésus pané ngan irah éh bakéh Néh. Ka' ha' Néh, Jian keh mihau tong ha' éh juk benara' Ké' teu' da', inah éh, adang réh pu'un mena' Anak Kelunan lem kamit kelunan, ha' Néh. Bang bé' réh nesen sin ha' Néh kenat, uban bé' Éh pané petek ngan réh uban Néh bé' keloo' ha' Néh inah tioo lenaa' mu'un. Bé' réh nesen ha' Néh inah, ngan medai réh neteng Éh sin néh.


Irah bakéh Yésus paneu' uban réh seruh, séé' éh ja'au jin belah réh. Kejam Yésus kekat éh seneruh réh kenat, inah Iah alaa' jah anak ke' Néh petekedéng éh tepih Néh. La'ah ha' Néh ngan réh, séé'-séé' éh alaa' anak kenat lem ngaran Ké', inah iah alaa' Akeu', ngan séé'-séé' éh alaa' Akeu', inah iah alaa' Iah éh nyohoo' Akeu' tuai. Kenat péh séé'-séé' éh ra' belah ka'ah, iah ke' éh ja'au mu'un belah keh kepéh, ha' Néh ngan réh.


La'ah ka' ha' Yohanes ngan Yésus, O Guru, pu'un améé' na'at jah kelunan mega' balei' dalem ngaran ko', ngan pu'un mé' meta' éh bé' kejeraa' éh maneu' kenat, uban bé' éh pu'un pemung ngan uleu' iteu', ha' néh.
Ha' Yésus ngan néh, Mai keh meta' éh, uban kelunan séé'-séé' éh bé' ngelawan keh, inah éh seleket bakéh keh, ha' Néh.

Hun danii' jaka' Yésus juk moléé' tai seruga kepéh, lakau Éh ke' Néh tai leboo' Yérusalem ngan jah awah kenin. Inah Iah nyohoo' kelunan lakau tenah. Lakau lah kelunan éh sohoo' Néh nah tai jah leboo' tong tana' Samaria ke' réh petenup kekat jalan Néh sinah. Bang bé' irah Samaria keloo' alaa' éh uban réh jam éh juk tai leboo' Yérusalem. Yakub ngan Yohanes nah bakéh néh, hun rawah jam irah leboo' inah bé' keloo' alaa' Yésus nah, boh roh pané ngan Yésus. Ka' ha' roh, O Tuhan, kineu' kenin Ko', keloo' ke' amo nyohoo' Allah ngelohoo' luten jin langit motong réh, ha' roh.
Pupah Yésus ngan meta' roh pané kenat. La'o inah lakau kepéh réh tai leboo' éh jah la'ah.


Lem réh lakau tai kenat, pu'un jah kelunan pané ngan Yésus. Ka' ha' néh, Semah-semah ke' tai, akeu' juk kivu Ke', ha' néh.
La'ah ka' ha' Yésus ngan néh, Kekat munin pu'un luvang néh ngan kekat juhit péh pu'un sala néh, bang Anak Kelunan bé' pu'un jalan Néh mokoo', ha' Néh. Boh Éh pané ngan kelunan éh jah kepéh, ka' ha' Néh, Jian ke' kivu Akeu', ha' Néh.
Bang ha' kelunan inah mipa éh, Oo', keloo' akeu' kivu ka'au' dat, bang jian ku' tai tenah mokoo' ngan tamen ké' pah avéé' néh matai, hun néh matai boh ku' kivu ke' da', ha' néh.
Ha' Yésus mipa éh, Turut ke' irah jah éh mokoo' seleket matai nah, nanem irah éh matai nah, bang ka'au' iteu', jian ke' tai bara' tong jalan Allah pu'un Pengeja'au, ha' Néh.
Ka' ha' jah kelunan éh jah kepéh, O lakei' ja'au, akeu' juk kivu ke' dat, bang jian ke' kejeraa' akeu' tai bara' tabi' ngan kekat lua' ké' jak, ha' néh.
Bang ha' Yésus mipa éh, Kelunan éh ngamit kayeu' éh nihit kelubau ngalei' tana', hun néh na'at saa' murin néh bé' éh omok ngalei' tana'. Kenat péh kelunan éh ngelayau na'at saa' murin néh awah, bé' éh tekep maneu' kereja' Allah éh Pengeja'au, ha' Néh.

Listen to LUKAS 9