© ཀལ༌ཏེས༌ བྲིས༌ཏེ༌ ཡོད༌ན༌ མན༌ནེ༌ འི༌ བྲིས༌ཁན༌ དང༌ སིལ༌ཁན༌ ཚང༌མའེ༌ Creative Commons Attribution-NonCommercial-NoDerivatives 4.0 International License འི༌ ལག༌ག༌ ཡོད༌། ℗ This work is licensed under a Creative Commons Attribution-NonCommercial-NoDerivatives 4.0 International License 

Ladakhi SIL (NT) NonDrama

གཙོ༌བོ༌ ཡེ༌ཤུ༌ ཆོད༌ཁང༌ནེ༌ བིང༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཁོང༌ངི༌ ལོབ༌ཕྲུགས༌ ཅིག༌གི༌ ཟེརས༌, “ལོབ༌བོན༌ལེ༌ འི༌ ཧ༌ལས༌ཤེས༌སི༌ ཆོད༌ཁང༌ང༌ ཟིགས༌སའང༌, ཙམ༌ཤིག༌གི༌ ཆེན༌མོ༌ རྡོའ༌གུན༌ རྩིག༌ཅེས༌ལ༌ ཀོལ༌ཏེ༌ ཨིན༌ནོག༌།”
ཡེ༌ཤུའི༌ ལན༌སལས༌, “ཁྱོ༌ཞ༌གུན༌ནི༌ འི༌ ཆོད༌ཁང༌ ཧ༌ལས༌ཤེས༌ རྩིགས༌ཁན༌བོ༌ ཐོང༌དུག༌ག༌? འི༌ རྡོའ༌ ཅིག༌གའང༌ ཅིག༌གི༌ཀ༌ རྩགས༌ཏེ༌ མི༌ལུས༌, ཚང༌མ༌ ཤིག༌ཨིན༌།”
ཆོད༌ཁང༌ངི༌ འ༌ངོ༌ ཆོགས༌སི༌ ལུང༌པའེ༌ ཨོ༌ལིཝ༌ཝི༌ རི༌ཀ༌ ཡེ༌ཤུ༌ ཞུགས༌ཏེ༌ ཡོད༌ ཟ༌ནེ༌, པི༌ཏྲར༌, ཡ༌ཀོབ༌, ཁོའེ༌ ནོ༌ ཡོ༌ཧཱ༌ནན༌ དང༌ ཨེན༌གྲིའུ༌ གུན༌ སུའང༌ གྱུས༌ཆའ༌ མ༌ཅུག༌ག༌ ཡེ༌ཤུ༌ ཡོད༌ས༌ ཡོངས༌ཏེ༌ ཏྲིས༌, “ང༌ཞའ༌ ཤད༌ད༌ ཛད༌དའང༌ ཏེ༌བོ༌ ནམ༌ ཇུང༌ཨིན༌, ཡང༌ ཏེ༌ ཚང༌མ༌ དྲན༌དྲ༌ གྲུབ༌ཅེས༌སི༌ སྟགས༌གུན༌ ཀ༌ཟུག༌ རིག༌ ཡོང༌ཨིན༌?”
ཡེ༌ཤུའི༌ ཁོང༌གུན༌ལ༌ མོལས༌, “སུ༌ཞིག༌གིའང༌ ཁྱོ༌ཞའ༌ གོབ༌སྐོར༌ ཏང༌མི༌ཅུག༌ཅེས༌ལ༌ ཤང༌ ཅོས༌, ཅིའ༌ཟེར༌ན༌ ‘ངའེ༌ མིང༌ ཁུར༌ཏེ༌ ང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌’ ཟེར༌ཁན༌ མང༌པོ༌ཞིག༌ ཡོངས༌ཏེ༌ མི༌ མང༌པོའ༌ གོབ༌སྐོར༌ ཏང༌ཨིན༌། ཁྱོ༌ཞ༌གུན༌ནི༌ མག༌ དང༌ མག༌གི༌ སྐོར༌ལ༌ འུ༌ཡ༌གུན༌ ཚོར༌ར༌ཅིག༌, ཇིགས༌ མ༌ཇིག༌ཤིག༌; ཏེ༌གུན༌ ཇུང༌གོས༌, ཨིན༌ནའང༌ ཐའ༌མའེ༌ ཏུས༌ ཏ༌རུང༌ མི༌ལེབ༌། གྱལ༌ཁམས༌ ཅིག༌ དང༌ ཅིག༌གི༌ ཡང༌ གྱལ༌སྲིད༌ ཅིག༌ དང༌ ཅིག༌གི༌ གྱབ༌གལ༌ལ༌ མག༌ ཏང༌ཨིན༌། ནས༌ས༌ མང༌པོའེ༌ ནང༌ང༌ མུ༌གེ༌ དང༌ སང༌གུལ༌ ཡོང༌ཨིན༌། ཨིན༌ནའང༌ ཏེ༌གུན༌ ནི༌ ཕྲུ༌གུ༌ སྐྱེ༌ཅེས༌སི༌ གོ༌ཟུག༌གི༌ ཟུག༌ཟེར༌བོ༌ ཙོགས༌ ཨིན༌།”
“ཏེ༌ཏུས༌ལ༌ ཁྱོ༌ཞ༌གུན༌ ཤང༌ ཅོས༌ཏེ༌ དུག༌། ཁྱོ༌ཞ༌གུན༌ ཏེན༌ན༌ ཡུལ༌ལི༌ ཝང༌སྲུལ༌པ༌གུན༌ནི༌ ལག༌ག༌ སྟད༌ཏེ༌ དུ༌ཁང༌གུན༌ནི༌ ནང༌ང༌ ཁྱོ༌ཞའ༌ རྟལ༌ལྕག༌ གྱབ༌ཅུག༌ཨིན༌། ངའེ༌ཀ༌ ཏད༌པ༌ ཡོད༌ཅེས༌པོའེ༌ ཁྲིམས༌ཅད༌ད༌ལ༌ ཀའ༌ལོན༌ དང༌ གྱལ༌པོ༌ གུན༌ནི༌ཀ༌ ཁྱོ༌ཞའ༌ ཁྱེར༌ཨིན༌, ཏེ༌ཏུས༌ ཁྱོ༌ཞའ༌ ངའ༌ སུ༌ ཨིན༌ཁན༌བོའེ༌ སྤང༌པོ༌ ཁོང༌གུན༌ལ༌ ཏང༌ཅེས༌སི༌ སྐབས༌ ཐོབ༌ཨིན༌། ཐའ༌མའེ༌ ཏུས༌ ལེབ༌བི༌ སང༌ སྔུན༌ལ༌, གའ༌མོའེ༌ ནས༌ཚུལ༌བོ༌ གྱལ༌ཁམས༌ ཚང༌མ༌ལ༌ ཤད༌གོས༌། ཁྱོ༌ཞ༌གུན༌ ཟུམས༌ཏེ༌ ཁྲིམས༌ཅད༌ཅེས༌ལ༌ ཁྱོང༌ང༌ཅིག༌, ཅི༌ ཟེར༌ཨིན༌ སམས༌ཏེ༌ སྔུན༌ལ༌ ཚེར༌ མ༌ཚེར༌། ཏེན༌ན༌ ཏུས༌ལ༌, ཁྱོ༌ཞའ༌ ཅི༌ ཟེར༌ཅེས༌ལ༌ སལ༌ལ༌ ཛད༌ནའང༌, ཏེན༌ན༌བོ༌ ཟེར༌, ཅིའ༌ཟེར༌ན༌ སྤེ༌ར༌ ཏང༌ཁན༌བོ༌ ཁྱོ༌ཞ༌གུན༌ མན༌པ༌, ཏམ༌པའེ༌ ཐུག༌ཉིད༌ ཨིན༌ནོག༌།”
“ཨ༌ཅོ༌གུན༌ནི༌ ནོ༌གུན༌ལ༌ ཡང༌ ཨ༌བའེ༌ བུ༌ཚའ༌ ཡང༌ ཕྲུ༌གུའི༌ ཕ༌མ༌གུན༌ལ༌ ངོ༌ལོག༌ ཅོས༌ཏེ༌ སད༌ཅུག༌ཨིན༌། ངའེ༌ཀ༌ ཏད༌པ༌ ཅོ༌ཅེས༌པོའེ༌ མི༌ཚང༌མའེ༌ ཁྱོ༌ཞ༌གུན༌ལ༌ ནཕ༌རད༌ ཅོའ༌ནོག༌, ཨིན༌ནའང༌ ཐའ༌མ༌ ཚོག༌པ༌ ངའེ༌ཀ༌ ཏད༌པ༌ སྟན༌པོ༌ བོར༌ཁན༌གུན༌ ཐར༌ཨིན༌།”
“ནམ༌ ‘ཁམ༌ལོག༌ ཚི༌ཏུ༌ ཅོ༌ཁན༌བོ༌’ ཏམ༌པའེ༌ ཆོད༌ཁང༌ངི༌ ནང༌ང༌ ཡོད༌ཅེས༌པོ༌ འོས༌པ༌ མན༌ཨིན༌ནའང༌ བོར༌ཏེ༌ ཐོང༌ང༌ཅིག༌ ༼སིལ༌ཁན༌གུན༌ནི༌ ངའེ༌ ཟེར༌ཅེས༌ཅན༌གུན༌ནི༌ཀ༌ སྣང༌ང༌ ཏོང༌༽ ཡ༌ཧུ༌དཱའེ༌ ཡུལ༌ཇོངས༌སི༌ ནང༌ང༌ དུག༌ཁན༌གུན༌ རི༌གུན༌ལ༌ ཤོར༌གོས༌། ཁང༌པའེ༌ ཁེ༌ཐོག༌ག༌ ཡོད༌ཁན༌གུན༌ ཡོག༌ག༌ བབས༌ཏེ༌ ཁང༌པའེ༌ ནང༌ང༌ ནོར༌གུན༌ ལེན༌ན༌ལ༌ མ༌ཆ༌། ཞིང༌ངི༌ཀ༌ ལས༌ ཅོ༌ཨིན༌ ཡོད༌ཁན༌གུན༌ ལོགས༌ཏེ༌ ཁང༌པའ༌ ཀོས༌ ཁྱོང༌ང༌ལ༌ མ༌ཆ༌། ཏེ༌ཏུས༌ལ༌ སྐྱེ༌ཅེས༌མ༌ དང༌ ཕྲུ༌གུའ༌ པི༌བི༌ ཏང༌ཁན༌ནི༌ ཨ༌མ༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌། འི༌གུན༌ དགུན༌ཏུས༌ལ༌ མི༌ཇུང༌ཅེས༌ལ༌ མོས༌ལམ༌ ཞུས༌, ཅིའ༌ཟེར༌ན༌ ཏེ༌ཏུས༌ལ༌ འི༌ཟམ༌ རྡུག༌ངལ༌ ཀྲག༌པོ༌ ཇུང༌ཨིན༌, ཀ༌བོ༌ དཀོན༌མཆོག༌གི༌ ཇིག༌རྟེན༌ ཛད༌པ༌ནེ༌ ཕར༌ལ༌ དག༌ས༌ ཚག༌པ༌ མ༌ཇུང༌ང༌ ཨིན༌ནོག༌ ཡང༌ སྟིང༌ཞིན༌ནའང༌ མི༌ཇུང༌། ཀལ༌ཏེས༌ གཙོ༌བོ༌ དཀོན༌མཆོག༌གི༌ ཏེ༌ཏུས༌པོ༌ ཉུ༌ངུན༌ མ༌ཛད༌པིན༌ན༌ སུ༌ཞིག༌གའང༌ སོན༌ཏེའ༌ ལུས༌ཏེ༌ མེད༌གྲོ༌, ཨིན༌ནའང༌ ཁོང༌ངི༌ ལྡམ༌མ༌ ཛད༌ཁན༌གུན༌ནི༌ ཏོན༌ལ༌, ཏེ༌ཏུས༌པོ༌ ཉུ༌ངུན༌ ཅོའ༌ ཛདས༌།”
“ཏེ༌ཏུས༌ལ༌ ཀལ༌ཏེས༌ སུ༌ཞིག༌གི༌ ཁྱོ༌ཞའ༌, ‘ལྟོས༌ཤིག༌ མ༌ཤི༌ཀ༌ འི༌ཀ༌ནེ༌ ཡ༌ འ༌ཀ༌ནེ༌ ཞུགས༌ཏེ༌ དུག༌’ ཟེར༌ན༌ ཨིད༌ཤེས༌ མ༌ཅོ༌། ཅིའ༌ཟེར༌ན༌ ཟུས༌མ༌ མ༌ཤི༌ཀ༌ དང༌ ཟུས༌མ༌ ལུང༌སྟོན༌པ༌གུན༌ ཡོངས༌ཏེ༌ ཛད༌པ༌ དང༌ ལྟས༌གུན༌ སྟན༌ཏེ༌ དཀོན༌མཆོག༌གི༌ ལྡམ༌མ༌ ཛད༌ཁན༌གུན༌ལའང༌ གོབ༌སྐོར༌ ཏང༌ཅེས༌སི༌ རྩོན༌གྲུས༌ ཅོ༌ཨིན༌ ཨིན༌ནའང༌ ཏང༌ མི༌ཉན༌། ཤང༌ ཅོས༌, ཏུས༌པོ༌ ལེབ༌བི༌ སང༌ སྔུན༌ལ༌ ངའེ༌ ཁྱོ༌ཞའ༌ ཅི༌ཚང༌མ༌ ཤད༌ཏེ༌ ཨིན༌།”
“ཏེ༌ཏུས༌ལ༌, རྡུག༌ངལ༌ལི༌ སྟིང༌ནེ༌
‘ཉི༌མ༌ མུན༌གྲིག༌ གྱུར༌ཨིན༌,
ཟླ༌ཝའེ༌ འོད༌ མི༌ཏང༌
ནམ༌ནེ༌ སྐར༌མ༌གུན༌ བུད༌ཨིན༌
ཡང༌ ནམ༌ཁའེ༌ ཝང༌གུན༌ སྲུག༌ག༌ ཛད༌ཨིན༌།’”
“ཏེ༌ནེ༌ མི༌ཚང༌མའེ༌, མི༌རིགས༌སི༌བུ༌ ཝང༌ དང༌ ཟིར༌རྗིད༌ ཀྲག༌པོ༌ ཉམ༌པོ༌ སྲིན༌ནི༌ཀ༌ ཞོན༌ཏེ༌ ཡོང༌ང༌ ཐོང༌ཨིན༌། ཡང༌ ཁོའེ༌, ཕོ༌ཉ༌གུན༌ ཇིག༌རྟེན༌ གང༌པོའེ༌ ནང༌ནེ༌ ཁོ༌རང༌ངི༌ ལྡམ༌ཁན༌གུན༌ ལྡུ༌ཅེས༌ལ༌ ཀལ༌ཨིན༌།”
“ཕིག༌ ཁ༌ཟས༌སི༌ ལྕང༌མའེ༌ ཀ༌ནེ༌ ལབ༌ཞ༌ ལེན༌ནའང༌; ཏེ༌བོའེ༌ ཡལ༌ག༌ སྔོན༌པོ༌ སོང༌ཏེ༌ ལོ༌མ༌ སོ༌མ༌ བིང༌ང༌ཅིག༌, ཡར༌ ཉེ༌མོ༌ ལེབ༌ཁན༌བོ༌ ཤེས༌ས༌ནོག༌། ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཏེ༌ སྟགས༌གུན༌ ཐོང༌ང༌ཅིག༌, ང༌ ལོགས༌ཏེ༌ ཡོང༌ཅེས༌སི༌ ཏུས༌ ཉེ༌མོ༌, སྒོའེ༌ དུན༌ལ༌ ལེབས༌ཏེ༌ ཡོད༌ཁན༌བོ༌ ཁྱོ༌ཞ༌གུན༌ནི༌ ཤེས༌ཨིན༌། ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ མི༌རབས༌པོ༌ མེད༌ཁན༌ ཆེ༌ སང༌ སྔུན༌ལ༌ ཏེ༌ ཚང༌མ༌ ཇུང༌ཨིན༌། ནམ༌ཁའ༌ དང༌ ཇིག༌རྟེན༌ ཉིས༌ཀོ༌ མེད༌ཁན༌ ཆེན༌, ཨིན༌ནའང༌ ངའེ༌ ཟེར༌ཁན༌གུན༌ མེད༌ཁན༌ མ༌ནེ༌ མི༌ཆ༌།”
“ཏེ༌ ཚང༌མ༌ ཇུང༌ཅེས༌སི༌ ཞག༌ ཡ༌ ཏུས༌ཚོད༌པོ༌ དཀོན༌མཆོག༌ ཡབ༌ ཅིག༌པོའ༌ མ༌ནེ༌ ཡང༌ སུའང༌ གྱུས༌མེད༌, ནམ༌ཁའེ༌ ཕོ༌ཉ༌ ཡ༌ བུ༌ཚའང༌། ཏེ༌ཏུས༌པོ༌ ཁྱོ༌ཞ༌གུན༌ལ༌ གྱུས༌མེད༌ པ༌སང༌, ཉིད༌ མ༌ཏང༌ང༌ ཤང༌ ཅོས༌ཏེ༌ དུག༌།”
“ཏེ༌བོ༌ ནི༌ མི༌ཞིག༌ ས༌ཆ༌ ཐག༌རིང༌ཞིག༌ག༌ བེས༌ལ༌ ཆའ༌ཁན༌ ཙོགས༌ ཨིན༌ནོག༌། ཁང༌པ༌ནེ༌ བིང༌ངི༌ སང༌ སྔུན༌ལ༌ ཁོའེ༌ ཡོག༌པོ༌གུན༌ལ༌ རང༌རང༌ངི༌ ལས༌ ཅོ༌ཅེས༌ལ༌ ཁག༌ ཀལ༌ཏེ༌ སྒོ༌ སྲུང༌པ༌བོའ༌ ཤང༌ ཅོས༌ཏེ༌ ཁོ༌ ལོགས༌ཏེ༌ ཡོང༌ཅེས༌ལ༌ སྲུངས༌ཏེ༌ དུག༌ ཟེར༌ར༌ནོག༌། ཏེ༌བོའེ༌ཕིའ༌ ཤང༌ ཅོས༌, ཅིའ༌ཟེར༌ན༌ ཁང༌དག༌ ཕི༌ཏོག༌, ཚན༌ནི༌ སྐྱིལ༌, ནམ༌ལངས༌སི༌ སང༌ སྔུན༌ལ༌, ཡ༌ ཉི༌མ༌ ཤར༌ཏེ༌ སྟིང༌ནེ༌, ནམ༌ ལོགས༌ཏེ༌ ཡོང༌ཨིན༌ ཁྱོ༌ཞ༌གུན༌ལ༌ གྱུས༌མེད༌ཏེ༌ ཨིན༌ནོག༌། ཀལ༌ཏེས༌ ཁོ༌ ཧུན༌མེད༌ལ༌ ལེབ༌ན༌, ཁྱོ༌ཞ༌གུན༌ ཉིད༌ལོགས༌ཏེ༌ ཡོད༌ཁན༌བོ༌ ཐོང༌ མ༌གོས༌། ངའེ༌ ཁྱོ༌ཞ༌གུན༌ལ༌ ཟེར༌ཁན༌བོ༌ ཚང༌མ༌ལ༌ ཟེར༌རད༌; ཤང༌ ཅོ༌ཤིག༌།”

Listen to མར༌ཀུས༌ 13