 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

عِيسَى مٛوࢡْتِ ݠُکَرَعٜنْ سَݠّٛ عٜ طِطٛ، عٛحٛکِّ ࢡٜسٜمْبٜ عٜ بَاوْطٜ رِيوُغٛ رُوحُوجِ شٛࢡْطِ عٜ يَمْطِتِنْغٛ ࢩَوُجِ؞ عٛنٜلِ ࢡٜوَازِنغٛ لَامُ اَللَّه عٜ حُرْغُغٛ ࢩَوْࢡٜ؞ عٛوِعِ ࢡٜ‏: «تَا کٛوعٜ کٛو طُمٜ نغَمْ جَحَانغَلْ، کٛو سَوْرُ مَلَّ بٛورٛ، کٛو ࢩَامْدُ مَلَّ شٜىٰدٜ؞ کٛو مٛيْ، تَا جٛغٛ لِمْشٜ طِطِ بٛو؞ سَارٜ ندٜ ࢡٜمبٜىٰرْنِ عٛنْ ڢُو، نجٛوطٜ تٛنْ حَا تٛ عٛنْ ندِلِّ؞ تٛ يِمْࢡٜ شَلِ جَࢡَّاغٛ عٛنْ حَا وُرٛ، نغُرْتٜ وُرٛ مَنْ، ݠِطّٜ شٛلَّاجٜ کٛسْطٜ مٛوطٛنْ، طُمْ لَاتٛ سٜىٰدَمْکُ دٛوْ مَࢡّٜ؞» ࢡٜندِلِّ، ࢡٜنجٜحِ غُرٜ ڢٜىٰرٜ ڢٜىٰرٜ، ࢡٜنغَازِنِ کُبَرُوٛلْ شٜيْنٛووٛلْ عٜ ࢡٜنجَمْطِتِنِ ࢩَوْࢡٜ کٛو تٛيْ؞


حِرُدُسْ، عَرْدِيطٛ لٜسْدِ ندٜ نَنِ کٛ لَاتِ ڢُو، عٛسَکْلِ مَسِنْ؞ نغَمْ وٛطْࢡٜ مبِعِ‏: «يُحَنَّ عُمِّتَکٜ دِغَ شَکَ مَايْࢡٜ؞» وٛطْࢡٜ بٛو مبِعِ‏: «إِلْيَاسُ وَنغِ؞» ڢَحِنْ وٛطْࢡٜ مبِعِ‏: «غٛوتٛ حَا اَلنَّبِعٜنْ ࢡٛويْمَ عُمِّتَکٜ؞» عَمَّا حِرُدُسْ وِعِ‏: «مِتَعِ حٛورٜ يُحَنَّ؞ غٛطّٛ مٛيْ نَنَنْمِ ࢡٜمبِعَنْتَ کُوجٜ بَنَ طٜعٜ؟» عٛعَنِّنِ يِعُغٛ مٛ؞


نٜلَاࢡٜ نغَرْتِ، ࢡٜنغٜشِّ عِيسَى کٛ ࢡٜمبَطِ ڢُو؞ عٛحٛوسِ ࢡٜ ڢٜىٰرٜ مَࢡّٜ، ࢡٜعُمِّ، ࢡٜندِلِّ وُرٛ وِعٜتٜىٰنغٛ بَيْتِسَيْدَ؞ عَمَّا ندٜ يِمْࢡٜ نَنِ طُمْ، ࢡٜتٛکِّمٛ؞ عِيسَى جَࢡِّ ࢡٜ، عٛوٛلْوَنِ ࢡٜ حَبَرُ لَامُ اَللَّه، عٛيَمْطِتِنِ مَرْࢡٜ حَاجٜ يَمْطِتِنٜىٰغٛ بٛو؞
ندٜ نَانغٜ ࢡَدَکٜ مُتُغٛ، ݠُکَرَعٜنْ سَݠّٛ عٜ طِطٛ غٛ ࢡَدِتِمٛ، مبِعِمٛ‏: «وِعْ يِمْࢡٜ ࢡٜندِلَّ حَا غُرٜ عٜ کَوْيٜىٰجِ، نغَمْ ࢡٜکٜࢡَ کٛ ࢩَامٜ عٜ وٜىٰرْدٜ، نغَمْ حَا لَدّٜ نغٛنْطٜنْ؞» عِيسَى وِعِ ࢡٜ‏: «ندٛکّٜ ࢡٜ کٛ ࢡٜࢩَامَ، عٛنٛنْ بٜى کٛعٜ مٛوطٛنْ؞» عَمَّا ࢡٜنجَابِ‏: «مِنْ نغٛودِ سٜيْ تَمْسٜىٰجٜ جٛوِ عٜ لِطِّ طِطِ تَنْ؞ سٛنَا تٛ عَيِطِ مِنْ نجَحَ، مِنْ شٛودَنَ يِمْࢡٜ ࢡٜعٜ ڢُو ࢩَامْدُ کَمْ؞» لِمْغَلْ يِمْࢡٜ مَنْ دِلَّنِ عُجِنٜ نجٛوٛ؞ عِيسَى وِعِ ݠُکَرَعٜنْ مُوطُمْ‏: «نجٛعِّنٜ ࢡٜ شَݠَّنْطٜ نجٛوٛ شَݠَّنْطٜ نجٛوٛ؞» ࢡٜمبَطِ بَنَ نٛنْ، ࢡٜنجٛعِّنِ ࢡٜ ڢُو؞ عِيسَى حٛوعِ تَمْسٜىٰجٜ جٛوِ عٜ لِطِّ طِطِ غٛ، عٛتِجِّ دٛوْ، عٛيٜتِّ اَللَّه نغَمْ مَنْ، عٛيٜوِ طُمْ، ندٜنْ عٛحٛکِّ ݠُکَرَعٜنْ نغَمْ ࢡٜشٜنْدَنَ يِمْࢡٜ؞ ࢡٜ ڢُو ࢡٜࢩَامِ، ࢡٜکَارِ، ࢡٜمٛوࢡْتِ لُتُّطُمْ تَمْسٜىٰجٜ، طُمْ حٜبِّنِ شِلَاجٜ سَݠّٛ عٜ طِطِ؞


ࢩَنْدٜ ڢٜىٰرٜ عِيسَى طٛنْ وَطَ دٛعَ ڢٜىٰرٜ مُوطُمْ؞ ݠُکَرَعٜنْ طٛنْ نغٛنْدِ بٜى مَاکٛ؞ عٛࢨَمِ ࢡٜ‏: «مٛوࢡٜ طٛنْ مبِعَ مِنْ مِ مٛيْ؟» ࢡٜنجَابِ‏: «وٛطْࢡٜ طٛنْ مبِعَ عَنْ وٛنِ يُحَنَّ بَطٛووٛ بَݠْتِسْمَ، وٛطْࢡٜ طٛنْ مبِعَ‏: إِلْيَاسُ، ڢَحِنْ وٛطْࢡٜ بٛو طٛنْ مبِعَ عَ غٛوتٛ اَلنَّبِعٜنْ ࢡٛويْمَ مٛ عُمِّتِ دِغَ مَايْدٜ؞» عٛࢨَمِ ࢡٜ‏: «عٛنٛنْ بٛو، عٛنْ طٛنْ مبِعَ مِ مٛيْ؟» ݠِيٜرْ جَابِ‏: «عَنْ وٛنِ اَلْمَسِيحُ مٛ اَللَّه؞»


عِيسَى عُمْرِ ࢡٜ بٜى شَاتَلْ نغَمْ تَا ࢡٜمبِعَ طُمْ کٛو مٛيْ؞ عٛࢡٜسْدِ وِعُغٛ‏: «حَانِ ࢡِي-نٜطّٛ يَرَ بٛنٜ طُوطُّمْ، ندٛتِّعٜنْ عٜ مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ نغُدِنَ مٛ؞ ࢡٜمبَرَنْ مٛ، عَمَّا ࢩَلَادٜ تَتَࢡْرٜ ࢡَاوٛطٛنْ، عٛعُمِّتِتّٛ؞» عٛوِعِ يِمْࢡٜ ڢُو ڢَحِنْ‏: «تٛ غٛطّٛ يِطِ تٛکَّاغٛ يَمْ، سٜيْ عٛعَشَّ مُويٛ مَاکٛ، عٛرٛونْدٛ غَاڢَانغَلْ مَاکٛ ࢩَلَادٜ ڢُو عٜ عٛتٛکّٛ يَمْ؞ نغَمْ کٛو مٛيْ يِطِ حِسْنُغٛ يٛنغْکِ مُوطُمْ، مَجِّنَنْ کِ؞ عَمَّا مٛ مَجِّنِ يٛنغْکِ مُمْ نغَمْ عَمْ، حِسْنَنْ کِ؞ طُمٜ طُمْ نَڢَتَ غٛطّٛ تٛ عٛحٜࢡِ دُنِيَارُ ڢُو عَمَّا عٛمَجِّنِ يٛنغْکِ مَاکٛ مَلَّ عٛحَلْکِ حٛورٜ مَاکٛ؟ تٛ غٛطّٛ سٜمْتِ يَمْ عٜ بٛلّٜ عَمْ، ࢡِي-نٜطّٛ سٜمْتَنْ مٛ يَاکٜ عٛوَرَتَ ندٜرْ تٜدُّنغَلْ مَاکٛ عٜ ندٜرْ نغَلْ بَابِرَاوٛ مَاکٛ عٜ ندٜرْ نغَلْ مَلَاعِکَعٜنْ سٜنِيࢡٜ؞ غٛونغَ مبِعَنْ مِ عٛنْ، وٛطْࢡٜ شَکَ وٛنْࢡٜ طٛ جٛنْتَ مَايَتَا سٜيْ تٛ ࢡٜنغِعِ لَامُ اَللَّه؞»


بَلْطٜ جٛوٜىٰتَتِ ࢡَاوٛ عٛوٛلْوِ بٛلّٜ طٜعٜ، عِيسَى حٛوسِ ݠِيٜرْ عٜ يُحَنَّ عٜ يَاکُبَ، عٛوَعِّ حٛوسٜىٰرٜ نغَمْ وَطُغٛ دٛعَ؞ ندٜ عٛطٛنْ دٛعٛ، يٜىٰسٛ مَاکٛ سَنْجِ، لِمْشٜ مَاکٛ ندَنْوِ تَلْ، طٜلْکِ؞ طٛنْ نِي، وٛرْࢡٜ طِطٛ طٛنْ نغٜىٰوْتِدَ بٜى مَاکٛ‏: طُمْ مُوسَى عٜ إِلْيَاسُ؞ ࢡٜمبَنغِ ندٜرْ تٜدُّنغَلْ، ࢡٜمبٛلْوِ دٛوْ دِلُّکِ عٜ دٛوْ نٛ مَايْدٜ مَاکٛ لَاتٛرْتٛ حَا عُرُسَلِيمَ؞ ݠِيٜرْ عٜ وٛنْدُࢡٜ بٜى مَاکٛ طٛيْطِ تٜدَّنِ ࢡٜ، عَمَّا ࢡٜݠِنِ، ࢡٜنغِعِ تٜدُّنغَلْ عِيسَى عٜ وٛرْࢡٜ طِطٛ وٛنْدُࢡٜ بٜى مُوطُمْ؞ ندٜ يِمْࢡٜ طِطٛ غٛ طٛنْ شٜىٰدَ بٜى عِيسَى، ݠِيٜرْ وِعِمٛ‏: «جَاغٛرْطٛ، طُمْ بٛوطُّمْ عٜنْ نجٛوطٛ حَا طٛ‏! نغَطٜنْ بُکَّاجِ تَتِ، وٛورُ نغَمْ مَاطَ، وٛورُ نغَمْ مُوسَى عٜ وٛورُ بٛو نغَمْ إِلْيَاسُ‏!» عٛعَنْدَانٛ کٛ عٛوِعَتَ؞ ندٜ عٛطٛنْ وٛلْوَ طُمْ، رُولْدٜرٜ وَرِ، سُدِّ ࢡٜ؞ ݠُکَرَعٜنْ کُلْتٛرِ ندٜ ࢡٜنغِعِ ࢡٜنَسْتِ رُولْدٜرٜ؞ سَوْتُ وُرْتِ رُولْدٜرٜ غٛ، وِعِ‏: «عٛو وٛنِ ࢡِطّٛ عَمْ شُࢡَاطٛ، نَنَنٜ مٛ ‏!» ندٜ سَوْتُ غٛ وٛلْوِ، ࢡٜنغِعَايْ غٛطّٛ ڢٜىٰرٜ، سٜيْ عِيسَى تَنْ؞ ݠُکَرَعٜنْ نجٜىٰطِ، ࢡٜمبٛلْوَنَايْ کٛو مٛيْ سَاعِ مَنْ کٛ ࢡٜنغِعِ؞


ندٜ ࢡٜنجِݠِّ حٛوسٜىٰرٜ جَنغٛ مَنْ، مٛوࢡْرٜ طُوطْندٜ وَرِ، ڢٛتِّ بٜى عِيسَى؞ غٛطّٛ حٛولِ ندٜرْ مٛوࢡْرٜ غٛ، وِعِ‏: «مٛودِبّٛ، مِتٛرِ مَ، لَارْ ࢡِنغٜلْ عَمْ غٛرْغٜلْ، نغٜلْ بَجّٜلْ‏! وَکَّتِ ڢٜىٰرٜ رُوحُوٛلْ طٛنْ نَنغَ نغٜلْ، لَوْ نغٜلْ وٛوکَ، نغٛلْ طٛنْ دِمْبَ نغٜلْ بٜى سٜمْبٜ، وَطَ نغٜلْ نغُوڢٛ حَا حُنْدُکٛ، نغٛلْ طٛنْ تٛرَّ نغٜلْ؞ طٛنْ سَطَ سٜطَّ حَا نغٛلْ عَشَّ ࢡِنغٜلْ نغٜعٜلْ، سٜيْ تٛ نغٛلْ تَمْݠِنِ نغٜلْ مَسِنْ؞ مِتٛرِ ݠُکَرَعٜنْ مَ ࢡٜندِيوَ نغٛلْ، عَمَّا ࢡٜمبَاوَايْ؞» عِيسَى جَابِ‏: «حٜيْ يِمْࢡٜ سٛويَ نُطِّنْکِعٜنْ، وٛنِّيࢡٜ‏! حَا ندٜيْ تٛکّٛتٛومِ وٛنْدُغٛ بٜى مٛوطٛنْ عٜ مُࢩَنْغٛ عٛنْ؟ وَدُّ ࢡِنغٜلْ مَ حَا طٛ‏!» ندٜ نغٜلْ طٛنْ وَرَ، رُوحُوٛلْ دٛعِّ نغٜلْ، دِمْبِ نغٜلْ بٜى سٜمْبٜ؞ عَمَّا عِيسَى تٜلْࢡَنِ رُوحُوٛلْ شٛࢡْنغٛلْ نغٛعٛلْ، يَمْطِتِنِ ࢡِنغٜلْ غٛ، حٛکِّتِ نغٜلْ بَابَ مَاغٜلْ؞ ࢡٜ ڢُو ࢡٜکَيْطِنِ نغَمْ دَلِيلَ مَنغُ اَللَّه؞


ندٜ کٛو مٛيْ حَيْطِنِ دٛوْ کٛ عِيسَى وَطِ ڢُو، عٛوِعِ ݠُکَرَعٜنْ مَاکٛ‏: «کٜطِتٜ بٛوطُّمْ کٛ مبِعَنْمِ عٛنْ جٛنْتَ‏: ࢡٜندٛکَّنْ ࢡِي-نٜطّٛ حَا جُوطٜ يِمْࢡٜ؞» عَمَّا ݠُکَرَعٜنْ ݠَامَايْ مَانَ مَاکَ، کَ لَاتِ شُوطِيکَ حَا مَࢡّٜ نغَمْ تَا ࢡٜݠَامَ؞ ࢡٜکُلِ بٛو ࢨَمُغٛ مٛ دٛوْ مَاجُمْ؞


ندٜنْ ݠُکَرَعٜنْ ݠُطِّ ࢨَمْࢨَمْتِرْغٛ مٛيْ لَاتٛتٛ مَوْطٛ شَکَ مَࢡّٜ؞ عَمَّا ندٜ عِيسَى عَنْدِ دٛوْ طُمٜ ࢡٜطٛنْ ࢨَمْࢨَمْتِندِرَ، عٛحٛوعِ ࢡِنغٜلْ ݠَمَرٜلْ، عٛدَرْنِ نغٜلْ کٛمْبِ مَاکٛ، عٛوِعِ ࢡٜ‏: «کٛو مٛيْ جَࢡِ ࢡِنغٜلْ ݠَمَرٜلْ نغٜلْ نغَمْ عِنْدٜ عَمْ، مِنْ عٛجَࢡِ؞ کٛو مٛيْ جَࢡِ يَمْ بٛو، جَࢡِ نٜلْطٛ يَمْ؞ نغَمْ ࢡُرْدُطٛ ڢَمْطُغٛ شَکَ مٛوطٛنْ ڢُو، کَنغْکٛ وٛنِ مَوْطٛ؞»


يُحَنَّ وِعِ‏: «جَاغٛرْطٛ، مِنْ نغِعِ غٛطّٛ طٛنْ رِيوْرَ غِنَّاجِ بٜى عِنْدٜ مَ؞ مِنْ نغِطْنٛ حَطُغٛ مٛ، نغَمْ عٛتٛکَّاکِ مَ بٜى عَمِنْ؞» عِيسَى جَابِمٛ‏: «تَا کَطٜ مٛ، نغَمْ کٛو مٛيْ مٛ حٛنَّاکِ عٛنْ، طٛنْ بٜى مٛوطٛنْ؞»

ندٜ وَکَّتِ دِلُّکِ مَاکٛ حَا عَسَمَ ࢡَدَکٜ، عٛوَطِ عَنِّيَ تِمُّکَ يَحُغٛ عُرُسَلِيمَ؞ عٛنٜلِ نٜلَاࢡٜ يٜىٰسٛ مَاکٛ؞ ࢡٜندِلِّ، ࢡٜنَسْتِ وُرٛ سَمَرِيَعٜنْ نغَمْ تَاسْکَنَنغٛ مٛ وٜىٰرْدٜ؞ عَمَّا وٛنْࢡٜ ندٜرْ وُرٛ نغٛ نجَࢡَّاکِمٛ، نغَمْ عٛطٛنْ تِيتِ يَحُغٛ عُرُسَلِيمَ؞ ندٜ يَاکُبَ عٜ يُحَنَّ نغِعِ طُمْ، ࢡٜمبِعِ‏: «جَوْمِرَاوٛ، عَيِطِ مِنْ عٜوْنٛ يِيتٜ جِݠّٛ دِغَ عَسَمَ، وُلْدَ ࢡٜ نَ؟» عَمَّا عِيسَى يٜىٰسِتِ، ڢٜلِ ࢡٜ؞ ندٜنْ ࢡٜندِلِّ وُرٛ وٛطْنغٛ؞


ندٜ ࢡٜطٛنْ دٛوْ لَاوٛلْ، غٛطّٛ وِعِمٛ‏: «مِتٛکّٜتٜ کٛو تٛيْ نجَحَتَ ڢُو؞» عِيسَى جَابِمٛ‏: «دٛلْدٛلْطٜ نغٛودِ غَسْطٜ، شٛلِّ بٛو نغٛودِ شَࢡّٜ، عَمَّا ࢡِي-نٜطّٛ وَلَا حَا وَلِّنَ حٛورٜ مُمْ؞» عٛوِعِ غٛطّٛ ڢٜىٰرٜ‏: «تٛکَّمْ‏!» غٛطّٛ مَنْ وِعِمٛ‏: «دُنغَنَمْ مِيَحَ، مِعُوٛيَ بَابَ عَمْ تَوٛنْ؞» عَمَّا عِيسَى وِعِمٛ‏: «عَشُّ مَايْࢡٜ عُوَ مَايْࢡٜ مُوطُمْعٜنْ، عَمَّا عَنْ، يَحْ وَازِنْ لَامُ اَللَّه؞» غٛطّٛ ڢٜىٰرٜ بٛو وِعِمٛ‏: «مِتٛکّٜتٜ، يَا جَوْمِرَاوٛ، عَمَّا دُنغَنَمْ مِجَࢡِّتٛ يِمْࢡٜ سَارٜ عَمْ تَوٛنْ؞» عِيسَى وِعِمٛ‏: «کٛو مٛيْ وَلِّنِ جُنغٛ دٛوْ بَانٜىٰوٛ غَعِ، ندٜنْ لَارِ ࢡَاوٛ، وَلَا نَڢُودَ نغَمْ لَامُ اَللَّه؞»

Listen to لُکَ 9