ɄLʉfingo ʉLʉpia mu njovele ja Kɨvwanji

Ɨkɨghono kɨla kɨla, ʉYesu akahʉma mʉ nyumba jɨla, akalʉta, akikala mʉlʉbale mʉ lɨsʉmbe. Avaanhu vinga amapʉgha na mapʉgha vakalʉta, vakakongʼhaana pa mwene, kuhanga akalamʉla pikwingila mʉ ngalava akikala. Avaanhu vala vakɨɨma kʉnji kʉ lɨsʉmbe. Pepano akavavʉʉla si nyinga mʉ fihwanɨkɨsio akati, “Ʉnkesa mbeju jʉmonga alyalʉtile kukesa ɨmbeju. Ye ikesa, ɨmbeju jɨmonga jɨkaghua pa sɨla, injuni sikiisa, sikahola. Ɨjɨngɨ jɨkaghua pa lɨnhalavue, jɨkamela ngʼhaningʼhaani, ʉlwakʉva ɨlɨhanga lyale lɨdebe. Ye jɨmelile ʉlʉjʉva lʉkanyaanya, jɨkʉʉma, ʉlwakʉva indela sikakunua kukwika paasi. Ɨjɨngɨ jɨkaghua pa malela gha madasia, jɨkamela, neke amalela ye ghalembile ghakafweta. Ɨjɨngɨ jɨkaghua pa lɨhanga ɨlɨnofu, jɨkamela, jɨkakʉla na kukoma vʉnono, jɨmo ifipeke kɨlʉndo, ɨjɨngɨ fijigho ntanda, ɨjɨngɨ fijigho fitatu. Ʉnya kʉpʉlɨka, apʉlɨkaghe!”


Pepano avavʉlanɨsɨvua vaake vakalʉta vakamposia vakati, “Kɨki ghujova na vaanhu mʉ fihwanɨkɨsio?” ɄYesu akavamʉla akati, “Ʉmue ʉNgʉlʉve avapeliile kukagʉla isa vʉsyefu ʉvwa Vʉtwa vwa kʉkyanya, looli aveene navapelilue ʉluo. Ʉlwakʉva ʉmuunhu ghweni jʉno alɨ nʉ vʉkagʉsi vwɨmɨla ʉVʉtwa vwa Ngʉlʉve, ʉjuo ikwongelesivua. Looli jʉno nsila vʉkagʉsi ʉvuo, nambe ʉvʉkagʉsi ʉvʉdebe vʉno alɨ navwo, ikunyua. Ʉluo lwe lʉno lʉkʉmhelela kujova navo mʉ fihwanɨkɨsio, ʉlwakʉva vilola, neke navikʉsivona; vipʉlɨkɨsia, neke navipʉlɨka nambe kʉkʉsitangʼhania. Isi sivombeka kʉ veene kukwɨlanɨsia sino ʉmʼbɨli ʉYesaya alyalembile kuuti,
‘Kupʉlɨka mupʉlɨkagha, neke namʉkʉsitangʼhaniagha.
Kulola mulolagha, neke namʉkʉsivonagha.
Ʉlwakʉva avaanhu ava, vasiiti kukwɨtɨka.
Vadindile imbulughutu saave, vadindile amaaso ghaave.
Vale valeke ʉluo, amaaso ghaave ghaale ghilolagha,
imbulughutu saave sale sipʉlɨkagha,
nagha moojo ghaave ghaale ghikʉlʉtangʼhaniagha.
Mʉ ʉluo vale vikʉsyetʉkɨla ʉne, na jʉʉne nale nɨkʉvapoka.’
“Looli mʉfunyilue ʉmue, ʉlwakʉva amaaso ghiinu ghilola nasi mbulughutu siinu sipʉlɨka. Kyangʼhaani nɨkʉvavʉʉla kuuti, kwevalyale avavɨli na vagholofu vinga vano valyale vilonda kʉkʉsivona sino mʉkʉsivona ʉmue, neke navalyasivwene. Kange, valyale vilonda kupʉlɨka sino mupʉlɨka ʉmue, neke navalyasipʉliike.


“Lɨno, mʉpʉlɨkɨsie ʉmʉlʉvo ghwa kɨhwanɨkɨsio ɨkya nkesa mbeju. Pa sɨla pano ɨmbeju jɨlyaghwile, ghwe muunhu jʉno ipʉlɨka ɨlɨsio lya Vʉtwa vwa Ngʉlʉve, neke naɨkʉlɨtangʼhania, ʉMhosi ʉSetano ikwisa na kutoola kɨno kɨvyalilue nkate mʉ mwojo ghwake. Pa lɨnhalavue, pano ɨmbeju jɨlyaghwile ghwe muunhu jʉno ipʉlɨka ɨlɨsio lya Ngʉlʉve, ʉnsiki ʉghuo ɨkʉlyʉpɨla nʉ lʉkeelo. Neke ʉlwakʉva ɨlɨsio lɨla lɨsila ndela mʉ mwojo ghwake, igadɨlɨla ʉnsiki nʼdebe, lʉngavoneke ʉlʉtalamu lʉmonga, nambe isa kʉmpumusia vwɨmɨla ɨlɨsio lya Ngʉlʉve, ʉnsiki ghʉghuo ye ɨkʉlʉlekagha ʉlwɨtɨko. Pa madasia, pano ɨmbeju jɨlyaghwile ghwe muunhu jʉno ipʉlɨka ɨlɨsio lya Ngʉlʉve, neke imbombo sa mʉ ɨɨsi, kuyasʉka vwɨmɨla ʉvʉkavi vwa kyʉma fifweta ɨlɨsio, neke nalikoma ifipeke. Looli pa lɨhanga ɨlɨnofu pano ɨmbeju jɨlyaghwile, ghwe muunhu jʉno ipʉlɨka ɨlɨsio lya Ngʉlʉve na kʉkʉlɨtangʼhania. Ʉjuo ghwe jʉno ikoma ifipeke kɨlʉndo, ʉjʉnge fijigho ntanda, ʉjʉnge fijigho fitatu.”

ɄYesu akavavʉʉla ɨkɨhwanɨkɨsio ɨkɨngɨ akati, “ɄVʉtwa vwa kʉkyanya vʉhwaniine nʉ muunhu jʉno alyavyalile ɨngano mʉ mʉghʉnda ghwake. Neke pakɨlo avaanhu vooni ye vighona, ʉmʉlʉgʉ ghwake akiisa, akavyala ɨlɨsoli mʉ ngano, akavʉʉka ilʉta. Pambele fyoni fikamela. Ɨngano ye jipongola, ɨlɨsoli lɨkatengʉla pikuvonesia.
“Avavombi va muunhu jʉla ʉnya mʉghʉnda vakalʉta kʉkʉmposia vakati, ‘Ghwe ntwa, tʉkagwile kuuti ʉkavyalile ɨngano mʉ mʉghʉnda ghwako, lɨno ɨlɨsoli lɨla lɨhʉmile kʉʉghi?’ Ʉmwene akavamʉla akati, ‘Ʉmʉlʉgʉ ghwe jʉno avombile ʉluo.’ Avavombi vaake vakamposia vakati, ‘Ghulonda tʉlʉte tʉkakulule ɨlɨsoli ɨlio?’ Ʉmwene akati, ‘Ndali, namʉngakululaghe, ʉlwakʉva pano mukulula ɨlɨsoli ndepoonu mukulula najɨ ngano. Mʉleke fyoni fikʉlaghe palɨkɨmo kuhanga ʉnsiki ghwa kʉbena. Ʉnsiki ʉghuo, nilikʉvavʉʉla vano vibena kuuti, vakongʼhaniaghe taasi ɨlɨsoli na kupinya ifinyagha kuuti finyanyue. Neke ɨngano vakongʼhanie na kuvuta mʉ kɨhenge kyango.’ ”


ɄYesu akavavʉʉla ɨkɨhwanɨkɨsio ɨkɨngɨ akati, “ɄVʉtwa vwa kʉkyanya vʉhwaniine nɨ mbeju ɨndebe fiijo, jɨno ʉmuunhu jʉmonga alyatolile na kuvyala mʉ mʉghʉnda ghwake. Napano ɨmbeju ɨjio ndebe kukila sooni, jɨngamele, ghuuva mmela nkome kukila amamela ghooni agha nyafu. Ghukʉla ghuuva mpiki, nasi njuni sitenga ifivwasu mʉ nhaafi saake.”


ɄYesu akavavʉʉla ɨkɨhwanɨkɨsio ɨkɨngɨ akati, “ɄVʉtwa vwa kʉkyanya vʉhwaniine nɨ kɨlʉle kɨno ʉmʉkɨjʉʉva jʉmonga alyatolile, akakandɨla ɨlɨkandua ɨlya mateneka ghatatu agha vʉtine. Ye akandile, ɨkɨlʉle kɨla kɨkalʉsia ɨlɨkandua lyoni.”


ɄYesu alyavavʉlile avaanhu isio sooni mʉ fihwanɨkɨsio. Naakajovagha kɨmonga kʉ veene kɨsila kɨhwanɨkɨsio. Akavombagha ʉluo kukwɨlanɨsia ɨlɨsio lɨno alyajovile ʉmʼbɨli kuuti,
“Nijovagha na vaanhu mʉ fihwanɨkɨsio.
Nɨkʉvavʉlagha sino sifisiime kuhʉma ʉNgʉlʉve ipela ɨɨsi.”

Pambele ʉYesu akahwesia ɨlɨpʉgha lɨla, akingila mʉ nyumba. Avavʉlanɨsɨvua vaake vakalʉta pa mwene, vakajova vakati, “Ʉtʉvʉʉle ʉmʉlʉvo ghwa kɨhwanɨkɨsio kɨla ɨkya lɨsoli mʉ mʉghʉnda ghwa ngano.”
ɄYesu akavamʉla akati, “Ʉnya kʉkesa ɨngano ghwe Mwana ghwa Muunhu. Ʉmʉghʉnda je ɨɨsi, ɨngano ve vaanhu vano valɨ mʉ Vʉtwa vwa Ngʉlʉve, neke ɨlɨsoli ve vaanhu ava Mhosi jʉla. Ʉmʉlʉgʉ jʉno akavyalile ɨlɨsoli, ghwe Setano. Ʉnsiki ʉghwa kʉbena kye kɨghono kya vʉsililo vwa ɨɨsi, vano vibena ve vanyamhola.
“Lɨno, ndavʉle ɨlɨsoli vʉle likongʼhanɨsɨvua na kunyanyua pa mwoto, fye luliiva ɨkɨghono ɨkya vʉsililo vwa ɨɨsi. Ʉne ne Mwana ghwa Muunhu nilisuungʼha avanyamhola vango, vavakongʼhanie avaanhu vooni mʉ Vʉtwa vwango vano vipelela avange kuvomba ʉvʉhosi na vano vivomba ʉvʉhosi. Avanyamhola vilikʉvataagha avaanhu avuo mʉ mwoto ghʉno naghusima lʉsiku. Ʉkuo kwe vililɨlagha na kugwegwenʉla amiino, ʉlwakʉva valɨ mʉ vʉvafi ʉvʉkome. Pe avagholofu vilivalatɨkagha ndavʉle ɨlɨjʉva mʉ Vʉtwa vwa Nhaata ghwave. Ʉnya kʉpʉlɨka, apʉlɨkaghe!

“ɄVʉtwa vwa kʉkyanya vʉlɨ ndavʉle ɨkɨɨnu ɨkya ndalama nyinga kɨno kɨlyafisilue mʉ mʉghʉnda. Neke ʉmuunhu jʉmonga akakyagha, akafisa vʉnono. Pepano akalʉta nʉ lʉkeelo kughʉsia ifiinu fyoni fino alyale nafyo, akaghʉla ʉmʉghʉnda ghʉla.
“Kange, ʉVʉtwa vwa kʉkyanya vʉlɨ ndavʉle ʉmʉghʉsia fiinu jʉmonga jʉno akalondagha ɨlulu jɨno jaale ja ndalama nyinga. Ye ajaghile ɨlulu ɨjio, akalʉta kughʉsia ifiinu fyoni fino alyale nafyo, akaghʉla.

“Kange, ʉVʉtwa vwa kʉkyanya vʉlɨ ndavʉle ʉlwafu lʉno avalovi va samaki vakisisie mʉ nyanja. Mʉ lwafu ʉluo sikaghwɨlɨla isamaki sino sili papinga. Neke ʉlwafu ye lʉmemile, avalovi vakakwesela kʉnji kʉ nyanja. Pe vakikala paasi, vakakongʼhania, isamaki inofu sino vavilia, vakavɨɨka mʉ fisenjele, neke isamaki sino navavilia, vakataagha. Fye luliiva ɨkɨghono ɨkya vʉsililo vwa ɨɨsi. Avanyamhola va Ngʉlʉve vilikwisa, vilikʉvabaghʉla, avahosi viliiva paajo na vagholofu. Avanyamhola avuo vilikʉvataagha avahosi kʉ mwoto ghʉno naghusima lʉsiku. Ʉkuo kwe vililɨlagha na kugwegwenʉla amiino, ʉlwakʉva valɨ mʉ vʉvafi ʉvʉkome.”

Pepano ʉYesu akavaposia avavʉlanɨsɨvua vaake akati, “Asi, mʉsitangʼhinie sooni isio sino nɨvavʉlile?” Aveene vakamʉla vakati, “Eena, tʉsitangʼhinie.” Pe akavavʉʉla akati, “Lɨno, ʉmʼbʉlanɨsi ghwa ndaghɨlo sa Moose jʉno mʼbʉlanɨsɨvua mʉ Vʉtwa vwa kʉkyanya, alɨ ndavʉle ʉnya nyumba jʉno ivutula mʉ kɨhenge kyake ifiinu ifipia ni fikʉʉlʉ.”


ɄYesu ye amalile kujova ifihwanɨkɨsio ifio, akavʉʉka pala, akalʉta kʉ kɨkaaja kyake. Ʉkuo akatengʉla kuvʉlanɨsia avaanhu mʉ sinagogi jaave. Avaanhu vala vakadegha, vakaposania viiti, “Ʉmuunhu ʉjʉ avwaghile kʉʉghi ʉvʉkagʉsi ʉvʉ ni ngʉfu isa kʉvomba ifidegho ifi? Asi, ʉjʉ naghwe mwana ghwa mpʉlʉla mbavo? Ʉngʼina naghwe jʉno itambʉlua Maliya? Nava vanuuna vaake naghwe Yakovo, ʉYosefu, ʉSimoni nʉ Yuuda? Asi, avalʉmbʉ nave vano tukukalania pa kɨkaaja apa? Lɨno, ʉmwene asaghile kʉʉghi sooni isi?” Mʉ ʉluo vakakaana kʉkʉmwɨtɨka. Pe ʉYesu akavavʉʉla akati, “Ʉmʼbɨli mwoghopua imbale sooni, ʉlwene naikwoghopua na vaanhu ava mʉ kɨkaaja kyake na mʉ nyumba jaake.” Ʉlwakʉva avaanhu vala navalyamwɨtiike, ʉYesu naakavomba ifidegho finga kʉla.

Listen to Mataayi 13