These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᓂᔅᑎᒻ ᒪᒃ ᐊ ᒋᓯᑲᔨᒡ ᐊᓂᔭ ᐊ ᒥᓇᔅᑕᑭᓂᔨᒡ ᓇᔅᒡ ᒪᒃ ᐎᐱᒡ ᐊ ᒐᒋᓴᐸᔭᔨᒡ ᐊᓐᒡ ᐃᔎᐅᒡ ᒋ ᐃᑐᑕᐅᒡ ᐊᓐᑕ ᑲ ᐛᑎᒂᐱᔅᑲᐃᑭᓄᐎᒡ ᐊᓂᔭ ᑲ ᐊᔭᔅᑯᔅᑕᒡ ᐊ ᐎᒋᒪᑯᓯᔨᒋ ᒐᒂᔪᐛ ᒐᒋ ᑐᒥᓇᒡ ᐊᓂᔭ ᒥᔭᔪᐤ᙮ ᒂ ᑎᑯᓯᒡ ᒪᒃ ᐊᓐᑕ ᑲ ᐛᑎᒂᐱᔅᑲᐃᑭᓄᐎᒡ ᓴᔅ ᒋ ᐃᒐᑎᑎᐱᓇᑭᓄᐎᓯᐱᓂ ᐊᓂᔭ ᐊᓯᓂᔭ ᐊᓐᑕ ᑲ ᒋᐱᓯᒪᑭᓄᔨᒋ ᒋᐱᔎᒡ᙮ ᒂ ᐱᒐᒡ ᐊᓐᑕ ᓇᒪ ᒪᒃ ᐅᒋ ᒥᔅᑯᒧᐛᐅᒡ ᐅᑎᐸᔨᒋᒐᐛ ᒋᓴᓴ ᐎᔭᔪᐤ᙮ ᒪᒂᒡ ᒪᒃ ᐊ ᒪᒥᑐᓇᔨᑎᒥᐃᑯᒡ ᐅᔭᔪᐤ ᓯᔅᒋᑯᒡ ᒋ ᐅᒋ ᓂᓯᔪᐛ ᓇᐸᐛ ᐊ ᐛᔅᑐᐛᔨᒡ ᐅᑦ ᐊᐱᒋᑕᐅᓂᔪᐛ᙮ ᐊᑯ ᓇᔅᒡ ᒂ ᓴᒋᓯᒡ ᒂ ᐊᑎ ᐅᑎᑎᐱᔪᐅᒡ ᐊᓐᑕ ᐃᔅ ᐊᔅᒋᒡ, ᒂ ᐃᑎᑯᒡ ᐊᓂᔭ ᓇᐸᐛ, “ᒐᒂᓐ ᐛᒋ ᓇᓂᑐᐛᐱᒪᒄ ᐊᓐ ᑲ ᐱᒪᑎᓯᑦ ᐅᑕ ᑲ ᓂᐱᔨᒋ ᐊ ᑕᔨᒋ ? ᓇᒪ ᑕᐤ ᐅᑕ᙮ ᐛᔅ ᒋ ᐅᓂᐤ᙮ ᒋ ᒋᔅᒋᓯᓇᐛᐤ ᐊ ᑕᓐ ᑲ ᐃᑎᑕᒄ ᒪᒂᒡ ᑲᓕᓕᒡ ᑲ ᑕᑦ, ᐊᒋ ᐃᓯ ᓂᑲᓐ ᐃᑕᒋᒥᑎᓱᑦ, ‘ᒋᑭ ᐱᔅᑎᓇᑭᓄᐎᒡ ᐅᒥᒋᑥᐅᒡ ᐃᔪᐤ ᐅᑯᓯᓴᓐ ᒐᒋ ᒋᔅᑕᔎᑕᒡ, ᑭᔭ ᒋ ᓂᔅᑐ ᒋᓯᑲᔨᒐ ᒥᓐ ᒋᑭ ᐅᓂᐤ᙮’ ” ᐊᑯ ᒪᒃ ᐊᓐᒡ ᐃᔎᐅᒡ ᒂ ᐅᒋ ᒋᔅᒋᓯᒡ ᑕᓐ ᑲ ᐃᔅᒋᔄᔨᒋ ᒋᓴᓴ᙮
ᒋ ᓂᑭᑎᒧᒡ ᒪᒃ ᐊᓐᒡ ᐃᔎᐅᒡ ᐊᓂᔭᔪᐤ ᒂ ᐛᑎᒂᐱᔅᑲᐃᑭᓄᐎᒡ, ᒂ ᒋᐛᒡ ᐊᑯ ᒂ ᐛᐎᑎᒧᐛᒡ ᐊᓂᔭᔪᐛ ᑲ ᐸᐃᑯᓴᐳᔨᒋ ᒋᔅᒋᓄᐊᒧᐛᑭᓇ ᑭᔭ ᒥᓯᐛ ᐊᓂᔭᔪᐛ ᑯᑎᑲ ᐊᐛᔪᐛ ᑲᒋ ᐛᐎᒐᐛᔨᒋ ᒋᓴᓴ ᒥᓯᐛ ᑕᓐ ᑲ ᐃᔅᐱᔨᒋ᙮ ᐊᐅᑯᓐᒡ ᐅᒡ ᐃᔎᐅᒡ ᐅᔭ ᑲ ᐃᓯ ᐛᐎᑎᒧᐛᒡ ᐊᓂᔭ ᐊᑈᔅᑕᓇᒡ, ᒪᕆ ᒪᒃᑕᓕᓐ ᑭᔭ ᒍᐛᓇ, ᑭᔭ ᑯᑎᒃ ᒪᕆ, ᐊᓂᔭ ᒋᒥᔅ ᐅᑲᐎᔭ ᑭᔭ ᑯᑎᑲ ᐃᔎᐛ ᐊᓂᔭᔪᐛ ᑲ ᐎᒐᐅᑯᒡ ᐊᓐᑕ ᑲ ᐃᑐᑕᒡ᙮ ᐊᑯ ᒥᒄ ᐊᓐᒡ ᐊᑈᔅᑕᓇᒡ ᓇᒪ ᐅᒋ ᑕᑈᑐᐛᐅᒡ ᐊᓂᔭᔪᐛ ᐃᔎᐛ, ᑭᑭᒋᔭᐛᒋᒧᐅᒡ, ᐊᒋ ᐃᑕᔨᒪᒡ᙮ ᐱᑕᕐ ᒪᒃ ᒋ ᐃᔅᐸᑕᐤ ᐊᓐᑕ ᑲ ᐛᑎᒂᐱᔅᑲᐃᑭᓄᐎᒡ ᐊᑯ ᒂ ᓄᐛᑲᐳᑦ ᒐᒋ ᐊᑯᓯᒂᔭᐸᑕᐧᒃ᙮ ᒥᒄ ᒪᒃ ᐊᓂᔭᔪᐛ ᐊᐱᒋᑕᐅᓇ ᑲ ᐎᔎᔭᒋᓇᑭᓄᔨᒋ ᒋ ᐛᐸᑎᒻ᙮ ᐊ ᐊᑎ ᒋᐛᑦ ᒪᒃ ᒋ ᒪᒥᑐᓇᔨᑎᒥᐃᑯᐤ ᑕᓐ ᑲ ᐃᔅᐱᔨᒡ᙮



ᐊᑯ ᒪᒃ ᐊ ᐸᐃᒂᒡ ᐊᓐ ᐊ ᒋᓯᑲᒡ ᓂᓱ ᒋᔅᒋᓄᐊᒧᐛᑭᓐᒡ ᒋ ᐃᑐᑕᐅᒡ ᐊᓐᑕ ᐅᑕᓇᔪᐤ ᐃᒪᔭᔅ ᑲ ᐃᓯᓂᐧᑲᑕᔨᒡ᙮ ᓴᓯᑲᓐ ᒪᒃ ᓂᔄᐅᑕᒡ ᒋ ᐃᔅᐱᓯᓇᑯᓂᔪᐤ ᒋᕈᓯᓕᒥᒡ ᐅᒡ᙮ ᒋ ᐊᔨᒧᑎᒧᒡ ᒪᒃ ᒪᒂᒡ ᐊ ᐱᒧᑕᒡ ᒥᓯᐛ ᒐᒂᔪᐤ ᑕᓐ ᑲ ᐸᒋ ᐃᔅᐱᔨᒡ᙮ ᒪᒂᒡ ᒪᒃ ᐊ ᐃᔨᒥᐃᑐᒡ ᒋ ᐅᑎᑎᑯᒡ ᒋᓴᓴ ᒂ ᐊᑎ ᐎᒐᐅᑯᒡ᙮ ᓇᒪ ᒪᒃ ᐅᒋ ᒥᔭᑭᓄᐎᒡ ᒐᒋ ᓂᔅᑐᐅᓄᐛᒡ ᐊᐛᔪᐛ ᐊᓂᔭ᙮
ᐊᑯ ᒂ ᑯᒂᒋᒥᑯᒡ, “ᒐᒂᓐ ᐅ ᑲ ᐊᔨᒧᑎᒪᒄ ᒪᒂᒡ ᐊ ᐱᒧᑕᔭᒄ ?”
ᒋ ᒋᐱᒋᑲᐳᐅᒡ ᒪᒃ ᓇᔅᒡ ᐊ ᒥᒐᔨᑎᒧᐅᓇᑯᓯᒡ᙮ ᐊᑯ ᐊᓐ ᐸᐃᒄ ᑲᓕᐅᐸᔅ ᐊ ᐃᓯᓂᐧᑲᓱᑦ ᒂ ᐎᑎᒧᐛᑦ ᐊ ᐃᑕᑦ, “ᐊᐅᒄ ᐊ ᒋᔾ ᒥᒄ ᐱᔭᐃᑯᓯᔨᓐ ᐊᓐᑕ ᒋᕈᓯᓕᒥᒡ ᐊᑲ ᒋᔅᒐᔨᑎᒥᓐ ᐅᔭ ᒐᒂᔪᐛ ᑕᓐ ᑲ ᐃᔅᐱᔨᒋ ᓇᒪ ᓇᔅᒡ ᐛᔅᑭᒡ ?”
ᐊᑯ ᑲ ᑯᒂᒋᒥᑯᒡ, “ᒐᒂᔪᐛ ᒪᒃ ᐊᓂᔭ ᑲ ᐃᔅᐱᔨᒋ ?” ᐊᑯ ᒂ ᑎᐸᒋᒧᔅᑐᐛᒡ, “ᒥᓯᐛ ᑕᓐ ᑲ ᐃᑐᑐᐛᑭᓄᔨᒋ ᒋᓴᓴ, ᓇᓴᕆᑎᒡ ᑲ ᐅᒋᔨᒋ,” ᐊ ᐃᑕᒡ᙮ “ᐅ ᒋᓴᔅ ᒋ ᐅᒋᔅᒋᐛᐃᒐᓱᐤ᙮ ᒋᓴᒪᓂᑐᐛ ᑭᔭ ᐊᓂᔭ ᐃᔪᐛ ᒋ ᐃᑕᔨᑎᒥᔪᐛ ᒥᓯᐛ ᐊᓂᔭ ᒐᒂᔪᐛ ᑲ ᐃᑐᑕᐧᒃ ᑭᔭ ᐊᓂᔭ ᑲ ᐃᓯ ᐎᑕᐧᒃ ᓇᔅᒡ ᐊᒋ ᓱᒐᔨᑕᑯᓂᔨᒋ᙮ ᒋ ᐱᔅᑎᓂᑯᐤ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐃᔪᐛ ᒐᒋ ᓂᓱᐅᓇᒋᒪᑭᓄᐅᑦ᙮ ᒂ ᓂᔅᑯᒧᒡ ᒐᒋ ᓂᐸᐊᑭᓄᔨᒋ ᑭᔭ ᒂ ᒋᔅᑕᔎᑕᒡ᙮ ᓂᒋ ᐱᑯᓴᔨᒪᓇᓐ ᒪᒃ ᐎᔾ ᒐᒋ ᐱᒪᒋᐊᑦ ᐃᔅᕋᐃᓪ ᐃᔪᐛ᙮ ᐊᐅᒄ ᒪᒃ ᐅ ᐊᓄᒡ ᓂᔅᑐ ᒋᓯᑲᐛ ᒥᓯᐛ ᑲ ᐃᔅᐱᔅ ᐃᔅᐱᔨᒡ ᐅ᙮ ᐊᑯ ᒪᒃ ᐅᑕ ᒥᓐ ᐱᔅᒐ ᐊᓐᒡ ᐃᔎᐅᒡ ᐊᓐᑕ ᐊ ᑎᓯᔭᒡ ᒋ ᒥᔅᑲᓯᑕᑯᓱᐅᒡ ᑕᓐ ᑲ ᐃᑕᒋᒧᒡ, ᐎᐱᒡ ᒐᒋᓴᑉ ᒋ ᐃᑐᑕᐅᒡ ᐊᓐᑕ ᑲ ᐱᒥᓯᒪᑭᓄᔨᒋ ᒋᓴᓴ᙮ ᓇᒪ ᒪᒃ ᐅᒋ ᒥᔅᑭᒺᐅᒡ ᐎᔭᔪᐤ᙮ ᑲ ᑎᑯᓯᓂᒡ ᒋ ᐃᔅᒋᔄᐅᒡ ᐊᒋ ᓄᑯᓯᔅᑕᑯᐅᒡ ᐊᓐᒋᓇ ᐊ ᐃᑎᑯᒡ, ‘ᐱᒪᑎᓯᐤ ᐛᔅ ᐊᓐ᙮’ ᐊᑯ ᐱᔅᒐ ᐊᓐᑕ ᐊ ᑎᓯᔭᒡ ᒋ ᐃᑐᑕᐅᒡ ᓇᑕ ᑲ ᐱᒥᓯᒪᑭᓄᔨᒋ᙮ ᑕᑈ ᒪᒃ ᐊᑯᓐ ᑲ ᐃᓯᓇᑯᓂᔨᒡ ᑕᓐ ᑲ ᐃᑕᒋᒧᔨᒋ ᐊᓂᔭ ᐃᔎᐛ᙮ ᓇᒪ ᐅᒋ ᑕᔪᐛ ᐊᓐᑕ ᒋᓴᓴ᙮”
ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒂ ᐃᑎᑯᒡ ᒋᓴᓴ, “ᒋᔨᐛᐤ ᓇᐸᑐᒄ, ᑕᑈ ᐊᑲ ᐃᑕᔨᑎᒪᒄ, ᑕᓐᑕ ᐛᒋ ᐊᑲ ᐅᒋ ᑕᑈᑐᐛᑯᒡ ᑕᓐ ᑲ ᐃᓯ ᓂᑲᓐ ᐎᑕᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ᙮ ᑕᑈ ᐊᐅᑯᓐ ᑲ ᐃᓯ ᓂᑐᐛᔨᑕᒂᒡ ᒐᒋ ᐃᔅᐱᔨᒡ, ᐊᐅᒄ ᐅ ᙭ ᒐᒋ ᐎᓯᒐᔨᑎᒧᒂ ᑭᔭ ᐊᓐᑕ ᒐᒋ ᐅᒋ ᒋᔅᑕᔨᑕᑯᓯᑦ᙮” ᐊᑯ ᒋᓴᔅ ᒂ ᒋᒋ ᐛᐎᑎᒧᐛᑦ ᐊᓂᔭᔪᐛ ᓇᐸᐛ ᒥᓯᐛ ᑕᓐ ᑲ ᐃᑎᓯᓇᐃᑭᓄᐎᒡ ᐊ ᐊᔨᒧᒪᑭᓄᐅᑦ ᐊᓐᑕ ᒋᓴᒪᓂᑐᐛ ᐅᑦ ᐃᔨᒧᐅᓂᔨᒡ᙮ ᒧᓱᔅ ᑕᓐ ᑲ ᐃᑎᔅᑕᔨᒡ ᐊ ᐊᔨᒧᒥᑯᑦ ᒋ ᐅᒋ ᒋᒋᐱᔨᑕᐤ ᒐᒃ ᒂ ᐅᑎᑕᐊᐧᒃ ᑕᓐ ᑲ ᐃᓯ ᒥᓯᓇᐊᒥᔨᒋ ᐊ ᐊᔨᒧᒥᑯᑦ ᐊᓂᔭᐧᑲ ᐅᒋᔅᒋᐛᐃᒐᓱᐛ᙮
ᐃᔅᐱ ᐊ ᐊᑎ ᐸᓱᐛᐸᑕᒡ ᐊᓂᔭ ᐅᑕᓇᔪᐤ ᐃᒪᔭᔅ ᑲ ᐎ ᐃᑐᑕᒡ ᐊᑯ ᒂ ᐃᓯᓇᑯᓯᑦ ᒋᓴᔅ ᒧᔭᒻ ᒐ ᐊᑎ ᓴᐳᑐᐛᑕᑦ᙮ ᒋ ᐊᔨᐧᑭᒥᐊᐅᒡ ᒪᒃ ᒋᓴᓴ ᐊᑲ ᐊᑐᐎᔅ ᒐᒋ ᔅᑐᑕᔨᒋ, ᐊ ᐃᑕᒡ, “ᐊᑯᑕ ᐅᑕ ᐃᑕ, ᐛᔅ ᓴᔅ ᐅᑕᑯᓯᐤ, ᓴᔅ ᐎᐱᒡ ᒋᑭ ᑎᐱᔅᑲᐤ᙮” ᐊᑯ ᒋᓴᔅ ᒂ ᐊᑎ ᐎᒐᐛᑦ ᐊ ᒋᐛᔨᒋ᙮
ᐃᔅᐱ ᒪᒃ ᐛᒋᒥᒋᓱᒪᑦ ᒋ ᐅᑎᓇᐤ ᐸᒂᓯᑭᓇ, ᒋ ᓂᓇᔅᑯᒧᐤ ᑭᔭ ᒋ ᐸᒂᓇᐤ ᐊᑯ ᒂ ᒪᑎᓂᒧᐛᑦ᙮ ᐊᑯ ᒪᒃ ᒧᔭᒻ ᐊ ᓴᓂᐱᔨᒋ ᐅᔅᒋᓯᑯᐛᐤ ᒂ ᐃᑕᔨᑕᒡ᙮ ᐊᑯ ᒂ ᓂᔅᑐᓄᐛᒡ ᒋᓴᓴ᙮ ᓯᔅᒋᑯᒡ ᒪᒃ ᓇᒪ ᐅᒋ ᐛᐱᒪᐅᒡ᙮ ᐊᑯ ᒪᒃ ᒂ ᐃᔅᒋᔄᒡ, “ᑕᑈ ᔅᒋ ᒥᔽᔨᑕᓇᓄᐤ ᒋᑕᐃᓇᒡ ᐊ ᐊᑎ ᓂᔅᑐᑎᒪᐧᒄ ᑕᓐᑕ ᑲ ᐃᔅᒋᔄᒥᑭᓂᔨᒂ ᒋᓴᒪᓂᑐᐤ ᐅᑦ ᐃᔨᒧᐅᓐ ᐊᓐᑕ ᑲ ᐊᔨᒧᒪᑭᓄᐅᑦ ᑭᔭ ᑕᓐ ᑲ ᐃᓯ ᐎᑎᒪᑕᐧᒄ ᒪᒂᒡ ᑲ ᐱᒧᑕᔭᐧᒄ ᐊᓐᑕ ᒪᔅᑭᓇᒡ ?”
ᒋ ᐱᓯᑯᐅᒡ ᐊᑯ ᑎᐛᒡ ᑲᐤ ᒂ ᐃᑐᑕᒡ ᐊᓐᑕ ᒋᕈᓯᓕᒥᒡ ᒐᒋ ᐎᑎᒧᐛᒡ ᒋᔅᒋᓄᐊᒧᐛᑭᓇ᙮ ᒂ ᒥᔅᑯᐛᒡ ᐊᓂᔭ ᑲ ᐸᐃᑯᓴᐳᔨᒋ ᒋᔅᒋᓄᐊᒧᐛᑭᓇ ᑭᔭ ᑯᑎᑲ ᐊᐛᔪᐛ ᐊᒋ ᒪᒧᐎᒂᓂ᙮ ᐊᑯ ᒂ ᐃᑎᑯᒡ, “ᑕᑈ ᐛᔅ ᐊᓐ ᒋ ᐅᓂᐤ ᐅᑎᐸᔨᒋᒐᐤ, ᐛᔅ ᒋ ᓄᑯᓯᔅᑕᑯᐤ ᓴᐃᒥᓇ᙮” ᐊᑯ ᒂ ᐎᑕᒡ ᐎᔨᐛᐤ ᑕᓐ ᑲ ᐃᔅᐱᔨᒡ ᒪᒂᒡ ᐊᓐᑕ ᑲ ᐱᒧᑕᒡ ᒪᔅᑭᓇᒡ ᑭᔭ ᐊᓂᔭ ᑲ ᐸᒂᓇᔨᒋ ᐸᒂᓯᑭᓇ ᐊᓐᑕ ᑲ ᐅᒋ ᒋᔅᒐᔨᒪᒡ ᐊ ᐊᐎᔨᒋ ᒋᓴᓴ᙮



ᒪᒂᒡ ᒪᒃ ᐊ ᐊᔨᒧᒪᒡ ᒋᓴᓴ, ᒋ ᐅᒋ ᓄᑯᓯᔪᐛ ᒪᒂᒡ ᐊᓐᑕ ᐊ ᑕᒡ᙮ ᐊᑯ ᒂ ᐃᑎᑯᒡ, “ᒋᔭᒪᔨᑎᒧᒄ᙮”
ᐊᑯ ᓇᔅᒡ ᑲ ᑯᔅᑯᐱᔨᒡ ᑭᔭ ᒋ ᓴᒋᓱᐅᒡ, ᒋᐱᔾ ᐅ ᓂ ᐛᐱᒪᓇᓐ ᒋ ᐃᑕᔨᑎᒧᒡ᙮ ᐊᑯ ᒂ ᐃᑎᑯᒡ ᒋᓴᓴ, “ᒐᒂᓐ ᐛᒋ ᓇᔅᒡ ᒥᑯᔅᑲᑕᔨᑎᒪᒄ ᑭᔭ ᐛᒋ ᒥᔅᑎ ᐊᓏᑎᒪᒄ ? ᐸᒋ ᑭᓄᐛᐸᑎᒧᒄ ᒪ ᓂᑎᒋᔭ ᑭᔭ ᓂᓯᑕ ᒐᒋ ᐅᒋ ᒐᔅᑎᓇᐅᔭᒄ ᓇᔅᒡ ᑕᑈ ᓂᔾ ᐊ ᐊᐎᔭᓐ᙮ ᐸᒋ ᑕᒋᓂᒄ ᐛᔅ ᒋᐱᔾ ᑕᐸ ᐊᔭᐤ ᐎᔭᓯᔪᐤ ᒪᒃ ᐅᔅᑭᓇ ᑕᓐ ᐊ ᐃᓯ ᐛᐱᒥᔭᒄ ᓂᔾ ᐊ ᐃᓯ ᐊᔭᔭᓐ᙮”
ᐃᔅᐱ ᒋᓴᔅ ᑲᒋ ᐃᓯ ᐃᔨᒥᑦ ᒋ ᐛᐸᑎᔭᐤ ᐅᑎᒋᔭ ᑭᔭ ᐅᓯᑕ᙮ ᐃᔭᐱᒡ ᒪᒃ ᓇᒪ ᑕᑈ ᐅᒋ ᑕᑈᑎᒧᒡ ᒋᓴᓴ ᐊ ᐊᐎᔨᒋ, ᑲ ᐃᔅᐱᔅ ᒥᔽᔨᑕᒡ ᑭᔭ ᑲ ᐃᔅᐱᔅ ᒥᒥᑯᔅᑲᑕᔨᑕᒡ᙮ ᐊᑯ ᒂ ᑯᒂᒋᒥᑯᒡ, “ᑎᑯᓐ ᐊ ᒐᒂᓐ ᐊ ᒥᒋᓇᓄᐅᒡ ?” ᒂ ᒥᔭᒡ ᓂᒪᓴ ᐊᒋ ᑎᑭᓱᔨᒋ᙮ ᒂ ᓂᓇᑭᑐᐛᐱᒪᒡ ᒪᒂᒡ ᐊ ᒥᒋᓱᔨᒋ᙮
ᐊᑯ ᒋᓴᔅ ᒂ ᐃᑎᑯᒡ, “ᐊᐅᒄ ᒪᒃ ᐅ ᑲ ᐃᓯ ᐛᐎᑎᒪᑎᑯᒡ ᐊᔅᒄ ᒪᒂᒡ ᐊᒋ ᐎᒐᐅᑎᑯᒡ ᑲ ᐃᔅᒋᔄᔭᓐ, ᒐᔅᑎᓇᔅ ᒋᑭ ᑎᐱᐱᔪᐤ ᒥᓯᐛ ᐊ ᐃᓯ ᐊᔨᒧᒥᑯᐅᔭᓐ ᐊᓐᑕ ᒧᓱᔅ ᐅᐎᓱᐛᐅᓂᒡ ᑭᔭ ᐊᓐᑕ ᐅᒥᓯᓇᐃᑭᓂᐛᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ, ᑭᔭ ᑎᐱᑦ ᐅᓂᑭᒧᐅᓂᒡ᙮”

ᐊᑯ ᐅᔭ ᒂ ᐃᓯ ᐎᑎᒧᐛᑦ ᒐᒋ ᐱᔭᑭᔅᒡ ᓂᔅᑐᑎᒥᔨᒋ ᑕᓐ ᐊ ᐃᓯ ᐎᑎᒪᒐᒥᑭᓂᔨᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔨᒡ᙮ ᐊ ᐃᑕᑦ, “ᐃᑎᔅᑕᐤ ᙭ ᔭᐃᑕᔾ ᒐ ᐎᓯᒐᔨᑕᐧᒃ, ᑭᔭ ᑲᐤ ᒐ ᐅᓂᔅᑲᑦ ᓂᐳᐅᓂᒡ ᐅᒡ ᒋ ᓂᔅᑐᒋᓯᑲᔨᒐ᙮ ᐊᑯ ᒪᒃ ᒋᐸ ᐛᐎᑎᒧᐛᑭᓄᐎᒡ ᒥᓯᐛ ᐊ ᐃᑎᔅᑲᓇᓯᒡ ᐊᐛᓐᒋ ᒐᒋ ᒂᔅᑲᑎᓯᒡ ᑭᔭ ᒐᒋ ᐛᐸᔨᑎᒧᐛᑭᓄᐎᒡ ᐅᒥᒋᑥᐅᓄᐛᐛ ᓂᔾ ᐸᒋ ᓇᓯᑥᐛ᙮ ᒋᕈᓯᓕᒥᒡ ᒪᒃ ᓂᔅᑎᒻ ᒋᑭ ᐅᒋ ᒥᓯᑕᐱᔪᐤ ᐅ ᒐ ᐃᓯ ᐛᐎᑕᑭᓄᐅᒡ᙮ ᒋᔨᐛᐤ ᒪᒃ ᔅᒋ ᐛᐸᑕᓇᐛᐤ ᑕᓐ ᑲ ᐃᔅᐱᔨᒡ, ᒐᒋ ᐎᑎᒧᐛᑯᒡ ᑯᑎᑭᒡ ᐊᐛᓐᒋ᙮ ᐊᑯ ᒪᒃ ᒐ ᐸᒋ ᐃᑎᓴᐊᒪᑎᑯᒡ ᐊᓐ ᑲ ᐸᔭᒋᓯᑦ ᐊᒐᐧᒄ ᐊᓂᔭᔪᐛ ᓄᑕᐎᔾ ᑲ ᐃᔅᒋᔄᑦ ᒐᔅᑎᓇᔅ ᒐ ᐸᒋ ᐃᑎᓴᐛᑦ᙮ ᐊᓱᐛᐱᒄ ᒪᒃ ᐊᓐᑕ ᒋᕈᓯᓕᒥᒡ ᐸᑐᔅ ᒋ ᐅᑎᑕᐅᑯᔭᒂ ᓱᒐᔨᑕᑯᓱᐅᓐ ᒋᒋᒋᓯᑯᒡ ᑲ ᐅᒋᐱᔨᒡ᙮”


ᐃᔅᐱ ᒪᒃ ᑲ ᐃᓯ ᒋᔅᒋᓄᑕᐊᑦ ᒥᒋᒪ ᐊᓐᑕ ᐅᑕᓇᔪᐤ ᐸᑕᓂ ᑲ ᐃᓯᓂᐧᑲᑕᔨᒡ, ᐊᑯ ᒂ ᐅᐱᓂᔅᒐᔨᑦ ᐊ ᓱᐛᔨᒪᑦ᙮ ᐊᔅᒄ ᒪᒃ ᒪᒂᒡ ᐊ ᓱᐛᔨᒪᑦ ᐊᑯᑕ ᒂ ᐅᒋ ᓂᑭᑕᑦ, ᒋᒋᒋᓯᑯᒡ ᒂ ᐃᓯ ᐅᐱᔨᑦ᙮ ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒋ ᐊᔭᒥᐊᔅᑐᐛᐅᒡ ᐅᑎᐸᔨᒋᒐᐛ ᐊᑯ ᑲᐤ ᒂ ᒋᐛᒡ ᒋᕈᓯᓕᒥᒡ ᓇᔅᒡ ᐊ ᒥᔽᔨᑕᒡ᙮ ᑭᔭ ᒧᓯᓇᐤ ᒋ ᑕᐅᒡ ᒋᓴᐊᔭᒥᐊᐅᒋᐛᐱᒡ ᐊ ᒪᒥᒋᒪᒡ ᑭᔭ ᐊ ᒋᔅᑕᒋᒪᒡ ᒋᓴᒪᓂᑐᐛ᙮ ᐊᒥᓐ᙮

Listen to ᓗᒃ 24