Gola - 2019 LIB (NT) Drama

Gola New Testament Translation and Literacy Project © Bible Society in Liberia, 2019.

Aŋ Fɛlosiì yèè aŋ Sadusiì nyaŋ bà nyiŋ naŋ wa hnè koɓɛ̀ Jisɛ̀i wèè auŋ kùwìà ke gbaù sùà, weètii àŋ nauŋ wa dawè wèè wo nyɛ̀nɛ̀ŋ e kèè mèè weè nyiŋ wèè wo tɔɔ̀ kɛ̀ wo Dayà e yìwìà ko àìjɛnɛ̀ŋ nauŋ gè nyààŋ diɛŋ. Kɛɛ wo Jisɛ̀ naŋ nyiŋ fasàì wààŋ, “Sèè e gɔɛɛ̀ è deye yèè nìŋ yɛmɛ̀ ke nyiliɛ̀ kè wɛnɛŋ, nìŋ woà nààŋ, ‘Ko fùùiŋ do nàŋ nɔ̀ŋ tɛ̀ɛ̀.’ Kɛɛ sèè e nììɛsie maŋ nyiìŋ tɛ̀tɛ̀ nìŋ yɛmɛ̀ ke nyiliɛ̀ kè wɛnɛŋ yèè kò naŋ kùwò, nìŋ woà nààŋ, ‘Maŋ gɔ̀à maŋ yaà hinie maŋ sɔ̀à.’ Nàŋ nyìmàŋ kɛ̀ kiìŋ nàŋ do nàŋ kaaìŋ yèè naŋ niŋ woò sèè nìŋ yɛmɛ̀ ke nyiliɛ̀ ko fùùiŋ, kɛɛ niŋ nyimààŋ màŋ tɔ̀ɔ̀màŋsèì keì maŋ yaà nàaŋ kaaiŋ màŋ è teenga lɛɛ̀ sùà. Wèè kiìŋ anyùùŋ maŋ jùumù gò kɛ̀ɛ̀nɛ̀ŋ hààwe nyɛ̀nɛ̀ŋ hmɔŋtu nyɛɛ̀ŋ wɔŋ niìsìa wɛɛ̀ŋ sùà àŋ dawà wèè e tɔ̀ɔ̀mànsèì e kèè mèè? Kpele! E tɔ̀ɔ̀màŋsèì kèè mèèɛ nɔŋ mìŋ naiŋ ɓɛ̀nɛ̀ŋ kìɛŋ lɛ̀ nàŋ yaà e yèɛ naŋ wa kààìŋ wo Joonàŋ lɛ.”
Yèè wo Jisɛ̀ naŋ nyiŋ jòò wò naŋ kɔ̀.


Nààŋ anyùùŋ màŋjɛ̀wɛ̀ nyaŋ naŋ wa nìè wɔŋ juwoɔ̀ wɔŋ fàa bàa, àŋ naŋ wa nyɛɛnɛ̀ŋ wèè aŋ kòà e gbɔ̀u. Wo Jisɛ̀ naŋ nyiŋ fè e gòo wààŋ, “Yɛ̀mɛìŋ nyɛ̀iŋ bi diɛŋ wèè e sòi jùwìà e gbɔ̀ù aŋ Fɛlosiì nyaŋ yaà e sòi jùwìà e gbɔ̀ù aŋ Sadusiì nyaŋ.”
Anyùùŋ màŋjɛ̀wɛ̀ Jisɛ̀ nyaŋ naŋ tɛɛ̀ tɔ̀ɔ̀tù maŋdi ɓùlia nyiŋ wouwòù e fèemàŋ nyààŋ, “Wò naŋ tɛɛ̀ wòo wèè e gòiŋ hìàŋ è gbɔ̀u lɛ̀.”
Wo Jisɛ̀ wa nyìmàŋ kɛ̀ kiìŋ àŋ yaà wa woo nyiŋ bi e fèemàŋ, yèè wò naŋ nyiŋ dawè wààŋ, “Wèè kiìŋ nìŋ yaà woo kɛ̀ niŋ kuwà è gbɔ̀u? Wèè kiìŋ nìŋ yaà yɛi anyuùŋ kɛ̀ɛ̀nɛ̀ŋ hààwe jɔa? Kòò nìŋ nyìmè nɔŋ è keì gbiŋ fèemàŋ kpɛ? Yèè niŋ fè jàà è keì jii e teengaà mìŋ naŋ wa nyìmè nyìmè e gbɔ̀ù kpùnàŋ nɔɔnɔɛ̀ŋ wèè anyuùŋ tààsùùŋ nɔɔnɔŋ (5,000) nyàŋ lɛ? E gòiŋ kpɛ̀nɛ̀ŋ àŋ jɔùŋ yèè àŋ jɔ̀àkàiŋ. E gbɔ̀u kpuu kpùù gbànaàŋ àŋ naŋ wa soòò lɛ, nìŋ naŋ niŋ wa tùɔ̀ŋ, pòùm gbèègbèè dìà kiìŋ nìŋ naŋ miŋ wa sìèò sùà? Yèè e teengaà mìŋ naŋ wa nyìmè nyìmè e gbɔ̀ù kpùnàŋ nɔɔnɔŋ le tìyèeɛ̀ wèè anyuùŋ tààsùùŋ tiinàŋ (4,000) nyaŋ lɛ̀, e gòiŋ kpɛ̀nɛ̀ŋ àŋ jɔùŋ yèè àŋ jɔ̀àkàiŋ, e gbɔ̀u kpuu kpùù gbànaàŋ àŋ naŋ soòò lɛ, nìŋ naŋ niŋ tùɔ̀ŋ, maŋ pòùm gbèègbèè dìà kiìŋ nìŋ naŋ miŋ wa sìèò sùà? Kòò nìŋ nyìmè nɔŋ kɛ̀ miŋ fèìŋ weè wòò è kèè è gbɔ̀u? Yɛ̀mɛìŋ nyɛ̀iŋ bi diɛŋ wèè e sòi jùwìà e gbɔ̀ù aŋ Fɛlosiì nyaŋ yèè aŋ Sadusiì nyaŋ.”
Kpeiŋ àŋ naŋ ngàà nyìmè kɛ̀ wo Jisɛ̀ fè nyìŋ weè kìɛ̀ŋ sùà è gòo wèè è nyaàiŋ dè è sòi jùwìà gbɔ̀uɛ̀, kɛɛ aŋ yɛmɛ̀ nyiŋ bi diɛŋ wèè e kàà aŋ Fɛlosiì nyaŋ yèè aŋ Sadusiì nyaŋ.


Kpeiŋ wo Jisɛ̀ yèè anyùùŋ màŋjɛ̀wɛ̀uŋ nyàŋ naŋ kɔ̀ maŋ kpàlàùŋ kpàlàùŋ maŋ naŋ gbɛ̀ɛ̀ e jawaà Sesèlià Fèlepì. Nààŋ àŋ yaà wa kɔɔyɛ, wò Jisɛ̀ naŋ nyiŋ dawè wààŋ, “Ɓòò anyùùŋ nyaŋ naŋ woò nyààŋ miàim wo Jɔ̀àfèlàà Nyuùŋ Kpùnɔɔ̀ŋ mìŋ yaà?”
Àŋ nauŋ fasàì nyààŋ, “Aŋ bà nyiŋ nyààŋ muàŋ nàŋ yaà wo Jɔ̀ɔŋ Gùà Nyùnɔ̀ɔŋ, aŋ bà nyiŋ nyààŋ muàŋ nàŋ yaà wo Ìlaajà, e kìlà aŋ bà nyiŋ nyààŋ, muàŋ nàŋ yaà wo Jɛ̀lèmaayà ɔ̀ɔ̀ wo kèèlà gɔ̀ù Dayàa bà guùŋ.”
Kpeiŋ wò naŋ nyiŋ dawè wààŋ, “Kɛɛ nyɛ̀iŋ bi zà, ɓòò nààŋ mìŋ yaà?”
Wo Saimɔŋ Piilɛ̀ nauŋ fasàì wààŋ, “Muàŋ nàŋ yaà wo Kulaìɔ, wo Jɔ̀àfèlàà Dàyà nyiiŋ gèeɔ̀.”
Yèè wo Jisɛ̀ nauŋ woò wààŋ, “E kpùùmaŋ è yaà weèum Saimɔ̀ŋ, jɔ̀àfèlàà Joonàaŋ! Muŋ gò tɛɛ̀ nyìmàŋ e yìwìà kè kpùnàŋ nyuùŋkpùuŋ yèè màŋ sɛ̀ìŋ, kɛɛ wo Dèda miɔ̀ŋ ko àìjɛnɛ̀ŋ naum kìɛ̀ŋ e jiikɛ̀ɛ bi. Tɔ̀ miŋ woòum Piilɛ̀, muàŋ naŋ yaà wo Piilɛ̀, ke dùòɛ, yèè ke dùò yɛɛ̀ diɛŋ mìŋ do nàŋ nyɛ̀lɛ̀ ke sààŋ zòòlò ke gbòò anyuùŋ hààwe nyàŋ, e kìlà e ɗùùnyàŋ anyuùŋ fàa nyàŋ e naàŋ kɛ̀ɛ̀nɛ̀ŋ è gààŋ kò diɛŋ nyiŋ. Mìŋ doum nàŋ kìɛ̀ŋ maŋ jììŋ e Kànà àìjɛnɛ̀ɛŋ. E yèɛ gbiŋ muŋ gò jàà kùàŋ dìì è ɗuunyaàŋ lɛɛ̀ sùà lɛ, wo Dayà ko àìjɛnɛ̀ŋ naàŋ niìŋ jàà kùàŋ dìì. Yèè e yèɛ gbiŋ mùŋ do nàŋ jàà kùàŋ dìì e ɗuunyaàŋ lɛɛ̀ sùà lɛ, wo Dayà do niŋ nàŋ jàà kùàŋ dìì ko àìjɛnɛ̀ŋ.”
Kpeiŋ wo Jisɛ̀ naŋ nàà anyùùŋ màŋjɛ̀wɛ̀uŋ nyàŋ kɛ̀ ɓɔ̀ àŋ woò wò nyùùŋ gbiŋ kɛ̀ wuŋ nàŋ yaà wo Kulaìɔ.


E yìwìà e teenga lii wo Jisɛ̀ naŋ tɔ̀ɔ̀tù anyùùŋ màŋjɛ̀wɛ̀uŋ nyàŋ wòo janyai wààŋ, “Mìŋ yaà kɔ̀ɔ̀yɛ̀ ko Jùlusɛ̀làm yèè mìŋ do nàŋ kɔ̀ e nìmìlà maŋ keì zimgbe dìì e yìwìà aŋ màmànkùmɛ̀ŋ fuɔŋ nyàŋ, aŋ kànà sìèfèìŋ zòòlo nyàŋ, yèè aŋ kààmɔ̀ɔ̀ŋ maŋ Sàwà Dayà nyaŋ. Àŋ doim nàŋ jìwè, yèè sèè e gɔ̀ɛ̀ɛ̀ taai maaŋ, ka yèwà e fàaà dìì wɔŋ nyiiŋ gèeo sùà.”
Kpeiŋ nààŋ wo Pììlɛ naŋ tɛɛ̀ kòmò, wò naŋ kɔ̀ɔ̀ wo Jisɛ̀ e ɓula yèè wò nauŋ gbuuyè wààŋ, “Wo Dayà gbaaì niŋ, Kanaà. Julɔfɔ tɛɛ̀ ɓɔ̀ è kaàum.”
Kɛɛ wo Jisɛ̀ naŋ kìlè yèè wò naŋ wòò wo Pììlɛ wààŋ, “Kɛ̀ɛ̀im maŋjɛ̀wɛ, Sɛ̀tanàaŋ! Ɓɔ̀ mùŋ kiliàim kùàŋ feìŋ. E gòngo mɔ̀ɛ̀ yiwià koɓɛ̀ Dayài, kɛɛ è yewe ke nyɛ̀nɛ̀ŋ nyuùnkpùuŋ sùà.”
Kpeiŋ wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Sèè wo nyùùŋ gbiŋ manaŋ wèè woim dè maŋjɛ̀wɛ, sɔɔ̀ wo gììyà wuŋ bi maŋhɛɛ, wo ɓèmè wɔŋ vànèkpaauŋ nɔɔ̀ŋ, yèè woim dè maŋjɛ̀wɛ. Wo nyùnɔ̀ɔŋ gbiŋ manaŋ wo jòèyè wɔŋ nyììŋ wuŋ biɔ̀ wɔ, wɔ̀ŋ douŋ nàŋ gbɛ̀nɛ̀ŋ wèè julɔfɔ. Kɛɛ wo nyùnɔ̀ɔŋ gbiŋ naim haawè yèè wò naŋ nyimèè wèè auŋ jìwà esaɓù kɛ̀ wò yaà wo nyùùŋ màŋjɛ̀wɛ̀im wɔ̀, wò do nàŋ kɛ̀ɛ̀nɛ̀ŋ wɔŋ nyiiŋ gèe gò jùà. Kiìŋ è do nàŋ nàfà wo nyùùŋ sèè wo kɛ̀ɛ̀nɛ̀ŋ e bànè ɗuunyaàŋ gbiŋ, kpeiŋ wo gò wɔŋ nyììŋ jinàuŋ nɔɔ̀ŋ? Muŋ kuwà è nɛ̀ŋ gbiŋ maŋ kiɛ̀ŋ wèè maŋ ɓɛìŋ yɛ̀mɛ̀ wɔ̀ŋ nyiiŋ mɔɔ̀ŋ. Miàim wo Jɔ̀àfèlàà Nyuùŋ kpùnɔɔ̀ŋ do nàŋ hnè e teenga kpuu sùà e jòòwò Dèda miɔ̀ŋ yaà aŋ màikàuŋ nyàŋ sùà wèè ka kìɛ̀ŋ e jìwààjɛ̀wɛ̀ koɓɛ̀ anyùùŋ nyaŋ gbiŋ wèè maŋ keì maŋ àŋ naŋ nyɛ̀nɛ̀ŋ maŋ. Miŋ woòiŋ e tɔɔɓaaà, aŋ nyùùŋ bà kòò àŋ yaà kià, yèè aŋ naàŋ fɔ̀ e jèèsùà aŋ yɛ̀mɛ̀ miàim wo Jɔ̀àfèlàà Nyuùŋ kpùnɔɔ̀ŋ ka hnàŋ e kana mɛ̀ sùà.”

Listen to Maafiù 16