Nugunu - 2017 CABTAL (NT) Drama

Mɔtɔ ummue ufíno yɛ́hɛ́ Lasáalɛ, o obamɔ́ na ogɔ́nɔ́ɔ. A mbá lɛ́ a gɛ́ga naá gɛdɔŋɔ gá Beteníi, olɔŋɔ na bolimóní bɛ́hɛ́ bá bakɔ́dɔ báaba bá lɔ́mɔ́ Malɛ́a na Mááta.
Malɛ́a moánɛ mɔ́ɔnyɔ mɔ́ɔ a mbaá fúé Yésusu alabɛ́nda go bɛgɔ́ndɔ́, a báá bɛ́ fúúnée na cóɛ sɛ́hɛ́. Ondimóní Lasáalɛ, mɔ́ɔ a mbaá lɛ́ a nóma.
Bolimóní bá bakɔ́dɔ go dómɛna Yésusu cɔ́mɔ bá amɔ́: «Daadáa ugúle bahɔ a nóma.»
Aŋa Yésusu a mbɔɔ́ ɔ́bɔ́ cɔ́mɔ yɛ́ɛyɔ, gɛ́hɛ́ go gálɛda a amɔ́: «Ogɔnɔ́ yá Lasáalɛ yɔ́ɔyɔ yó do gaá mo óná. Yó lɔ́mɔ́ go go dúfie bogaaga bá Asaŋa. Gɔnɔ́ bá gúmidie Moɔnɔ́ ba Asaŋa a.»
Yésusu a mba lɛ́ a maamana Mááta na ondimóní Malɛ́a, na Lasáalɛ kɛ́. Kanɛ́ akɛ́ aŋa a mbíi íyime goŋaá Lasáalɛ a nóma, gɛ́hɛ́ go gɔnɔ dúmbie medúgú máandɛ́ tisi naá hoóma háaha a mbaá lɔ́mɔ́ hɔ́ɔ. Naá nnyimé hɔ́ɔlɔ́ kanɛ́, gɔ́ɔ o oyanamɔ́ behúúní bɛ́hɛ́ a amɔ́: «Ŋgáa dɛ no gunde naá Yudée.» Behúúní bɛ́hɛ́ go mo gundie bá amɔ́: «Eléébi, medúgú kanɛ go béfíidie, Beyúdene bá báá fúmbée go go óna na adánɛ́, gɔ́ɔ o lɔ́mɔ́ go a amɔ́ o gɔnɔ gunde hɔ́ɔ o?» Yésusu go bó oyana a amɔ́: «Ábɔ, buisí bó do bɛanánáa bigúlí bɛ́ɔ́dɔ́ na bɛ́andɛ́ o? Aáŋa mɔtɔ ɛ ɛnda sisíi, a dɛ bósó go kúkenene, goakɛ́ ɛ ɛ́nana gise gá cí yɛ́ɛyɛ. Kanɛ́ aáŋa ɛ ɛnda na budúgú, a kúkenene, goakɛ́ a dɛ báá na gise.»
Naá nnyimé ya dogálɔ dɔ́ɔdɔ, Yésusu go gidene a amɔ́: «Ugúle bɛcɔ́ Lasáalɛ a lɛ́ go dɔnɔ́ɔ, kanɛ́ ŋgɛ́danamɔ́ go go ɛ́da mo foyona.» Behúúní go mo oyana kanɛ́ bá amɔ́: «Daadáa, aáŋa a lɛ́ go dɔnɔ́ɔ, a geé éŋúgé.» Yésusu a mbaá lɔ́mɔ́ o oyanɛna behúúní bɛ́hɛ́ nigúe ná Lasáalɛ, kanɛ́ bɔ́ɔ, bá béeniŋenye goŋaá bó lɔ́mɔ́ dɔnɔ́ɔ mammana. Gɔ́ɔ Yésusu a bó ádɛnamɔ́ pasɛ́pasɛ́ a amɔ́: «Lasáalɛ a lɛ́ ugúe. Ŋgɔ́bɔnɔ bese makɔ́nɔ́ go busío bɛ́nyɔ́ aŋa gɔ́ɔgɔ bó mbaá bádómbánáa yɔmɔ́ɔ kanɛ hɔ́ɔ, hɔ́ɔlɔ́ gɔ́ɔ no gaá ná ágá odɛ́má yɛ́nyɔ́ naá yɔmɔ́ɔ. Kanɛ́ ŋgáa dɛ no ɛ́da anáa a lɔ́mɔ́.» Tómasɛ, mɔ́ɔnyɔ bá gɔnɔmɔ́ dɔ́ŋɔnɔ bá amɔ́ Moɔnɔ́ ba ɛbáasa, o oyanamɔ́ behúúní báaba bóncodío a amɔ́: «Ŋgáa dɛ no ɛ́da tɔ́nɔ, dɛ gúenye olɔŋɔ na Iloodio.»
Yésusu ɛ ɛ́da bola, go gíde goŋaá bá mba miée Lasáalɛ, a ná lɛ́ medúgú ménni. Aŋa Beteníi a lɔ́mɔ́ a dɛ ɔmpɔ́nɛ́nɔ́ɔ na Yolósalɛmɛ, boóma bá go húme ba kílo mɛ́da bádadɔ́, gɔ́ɔ gɛca gá Beyúdene gɛ́ mbuú úlénée naá nnyaŋá ya Mááta na Malɛ́a go go nco bó folofolio go nigúe ná ondimóní bábɔ́.
Mááta ɔ ɔ́ ɔ́bɔ́ goŋaá Yésusu a ná lɛ́ go pɛ́, gɛ́hɛ́ go fadɛgɛna go go ɛ́da mo gólio; Malɛ́a, mɔ́ɔ a báá síéné naá nnyaŋá. Mááta go oyana Yésusu a amɔ́: «Daadáa, aáŋa o mba lɛ́ hɔ́ɔ, gásɛ́ ondimóní bamɛ a lɛ́ kanɛ go gúe. Kanɛ́ akɛ́ godɔ́ɔdɔ, ŋgíyimene goŋaá buimée bɔ́ɔbɔ o gaá nú úhúné Asaŋa, a gaá go fáá.» Yésusu a amɔ́ gɛ́hɛ́ aá: «Tɛ́ɔbɛnɔ a gaá fúfúgé.» Mááta go gundie a amɔ́: «Ŋgíyimene caá a ŋga fúfúgé naá kúme gɛbɛ́láa ya begúe, buisí bá mesúgidinye.»
Yésusu go mo oyana a amɔ́: «Ndɛ́ kúme gɛbɛ́láa, yɔmɔ́ɔ gɔnɔ́ gɛɔyɔ. Mɔ́ɔnyɔ a ágamɔ́ odɛ́má yɛ́hɛ́ naá yɔmɔ́ɔ a ŋgɔ ɔyɔ́ɔ, akɛ́ a gúe. Gɔnɔ́, uŋkimée mɔ́ɔnyɔ ɔ ɔyɔmɔ́ a gunde a ŋgolimonyo a dɛ ŋgá bóso go gúe. Go olimonyo nɔ́ɔnɔ o?» Mááta a amɔ́: «Ɛɛ́ɛŋ Daadáa, ŋgolimonyo goŋaá o lɛ́ Mesíi, Moɔnɔ́ ba Asaŋa, mɔ́ɔ mɔ́ɔnyɔ a mbaá lɛ ba go úle naá cí.» Naá nnyimé ya dogálɔ dɔ́ɔdɔ, Mááta go fadɛgɛna go go ɛ́da dɔ́ŋɛnɔ ondimóní Malɛ́a, a báá mo oyáná naá udúu a amɔ́: «Iloodio a lɛ́ héení, a go dɔ́ŋɔnɔ.»
Malɛ́a ɔ ɔ́bɔnɔ cɔ́mɔ yɛ́ɛyɔ, go dómba go fadɛgɛna, go ɛ́da anáa Yésusu a mbaá lɔmɔ́.
Yésusu a mba ŋá a gá lɛ́ go pɛ́ kanɛ go íŋene naá gɛdɔŋɔ, kanɛ́ a mbaá ŋá a gá lɛ́ naá hoóma háaha Mááta a mbaá ncó mo gíde hɔ́ɔ. Aŋa Beyúdene báaba bá mbaá lɛ naá nnyaŋá na Malɛ́a go go mo foloofolio, bá mbaá mo ɛ́ná a báá gaŋányɛ́dá go fadɛgɛna go go húme, gáábɔ́ go mo biene. Bá mba lɛ́ bá béeniŋenye bá amɔ́ ɛ ɛ́danamɔ́ naá gɛbɛ́lá go go baŋa. Aŋa Malɛ́a a mbaá ncó bola naá hoóma háaha Yésusu a mbá lɔmɔ́ hɔ́ɔ, u úle a mo ɛ́nana, go dómba go mo obɛna naá bɛgɔ́ndɔ́ a amɔ́ gɛ́hɛ́ aá: «Daadáa, aáŋa o mba lɛ́ hɔ́ɔ, gásɛ́ ondimóní bamɛ a lɛ́ kanɛ go gúe.» Yésusu ɛ ɛ́nana Malɛ́a na Beyúdene báaba bá mbaá lɛ bá mo díligenene bá baŋa, nnyɔ́dɔ yɛhɛ́ go sagɛmɛda, odóɛ yɛ́hɛ́ yó báá bógólɛ́dá. Gɛ́hɛ́ go úhune a amɔ́: «No lɔ́mɔ́ mo miéelú áhanɛ́ɛ o?» Batɔ go mo gundie bá amɔ́: «Daadáa u úle ncó go ɛ́na.» Gɔ́ɔ Yésusu a dúmbugemú na mbií. Beyúdene go ɛ́da go oya bá amɔ́: «Éé! Ɛ́ná nɔnɔ mbɔ́dɔ yɛ́ɛyɛ a á lɔmɔ́ a maamana Lasáalɛ.»
Kanɛ́ bóncodío naá olɔŋɔ yábɔ́ bá amɔ́: «A lɛ́ fuunéelú ugélígeli oŋgíso, a dɛ á gá lɛ́ bá go ŋa goŋaá Lasáalɛ a dɛ gúé o?»
Gɔ́ɔ nnyɔ́dɔ ya Yésusu ɛ gɔnɔmɔ́ sagɛmɛda, gɛ́hɛ́ go ɛ́da naá gɛbɛ́lá. Bó mba lɛ́ gikeŋgúlu gindígénéelú na ɛdánɛ́. Yésusu go oyɛda a amɔ́: «Úlíe nɔnɔ ɛdánɛ́ nɛ́ɛnɛ.» Mááta, ondimóní ba gɛlɔ́ŋɔ́ɔ, go oyana Yésusu a amɔ́: «Daadáa, a ná lɛ́ go numpe, goakɛ́ medúgú ménni mámáa aŋa bá lɔ́mɔ́ mo miéelú.» Kanɛ́ Yésusu go mo gundie a amɔ́: «Mbáa go oyana caá aáŋa go olimonyo, o gɛɛ́ ɛ́ná nigúmi ná Asaŋa.» Batɔ go úlie ɛdánɛ́ gɔ́gɔ́ɔ. Yésusu go fediginye oŋgíso go mmoɛná, go gálɛda a amɔ́: «Baaba, ko béhiigi go gɔ́ɔgɔ o ŋgɔ́bɔmɔ́. Mammana, ŋgíyimene caá o ŋgɔ́bɔnɔ bɛcamɛna biimée, kanɛ́, kálagalamɔ́ nɔ́ɔnɔ go busío bá gitúu gá batɔ gɛ́ɛgɛ naá boayá bámɛ gɛ́ɛgɛ, go goŋaá bó oliminyo bá amɔ́ o mba tómá.» Naá nnyimé ya dogálɔ dɔ́ɔdɔ, gɛ́hɛ́ go áncɛda na ukelú ogɔ́nɔ́ a amɔ́: «Lasáalɛ, húme!» Lasáalɛ go húme, bɛgɔ́ndɔ́ na ɛmbɔ́gɔ méŋínényé méŋínényé na biseli bá nnɔ́mbɔ́, busío boáalú na sanda ya gɛla. Yésusu go oyana batɔ a amɔ́: «Mo fulúnéemú nɔnɔ, no mo dɛ́ɛna ɛ ɛ́da!»


Gitúu naá olɔŋɔ yá Beyúdene báaba bá mbaá lɛ úléelú naá Malɛ́a, gɛ́ mbɛ ɛ́ná bɔ́ɔbɔ Yésusu a mbaá ŋaáa, gɛ́ báá ágá odɛ́má yábɔ́ naá Yésusu. Kanɛ́ bóncodío go ɛ́da gíde Befelisiéŋe, go bó oyanɛna bɔ́ɔbɔ Yésusu a mbaá ŋaáa. Bagɔ́nɔ́ɔ bá bedúmbí bɛbáágá naá Asaŋa na Befelisiéŋe go lukumenye nɛgála nɛgɔ́nɔ́ go oyɛda hɔ́ɔ bá amɔ́: «Dɛ gaá ná no ŋaáa nɛɛ́nɛ o? Mɔtɔ mɔ́ɔnyɔ a ŋanana gɛcɛcá gá bieninye bá gobékúke!» «Dɛ amɔ́ dɛ mo dɛ́ɛna a dúmbenye náana, batɔ biimée bá gaá ágá odɛ́má yábɔ́ naá mɔ́ɔ, manɛ́ kanɛ́ Balomɛ́ŋɛ ba gaá ná ncó gaŋɛmɛda, bá gada Nnyaŋá ya Asaŋa yɛcɔ́, bá fúugie gɛdɔŋɔ gɛ́cɔ́.» Ummue naá olɔŋɔ yábɔ́, ufíno yɛ́hɛ́ Keyífe, a mba lɛ́ Ufuŋe yá bedúmbí bɛbáágá naá nnyómá moánɛ, go oyɛda a amɔ́: «No do ɔ́bɔ́nɔ́ɔ boóma. No do ɛ́nánáa no amɔ́ bó lɛ́ bese go busío bɛ́nyɔ́ go goŋaá mɔtɔ táŋɛ́ ummue a gúe go boɛ́nɔ, nɔ́ɔnɔ gɛdɔŋɔ giimée gɛ́ dɛ fúé o?» A dɛ mbá gálɛda nɔ́ɔnɔ go mɔ́ɔ moatɛ́, kanɛ́ aŋa a mbaá lɛ Ufuŋe yá bedúmbí bɛbáágá naá nnyómá moánɛ, gɔ́ɔ a mbaá gálɛ́dá dogálɔ dá mbúsí dɔ́ɔdɔ go goŋaá Yésusu a háanana go gúe go gɛdɔŋɔ; caá akɛ́ goana go gɛdɔŋɔ gɛ́hɛ́, kanɛ́ go go bándɛgɛna baaná bá Asaŋa báaba bá lɔ́mɔ́ sálámándáalú naá cí iŋkimée hoóma táŋɛ́ hémmue. Buisí moánɛ bɔ́ɔbɔ bɔ́, bagɔ́nɔ́ɔ bá Beyúdene bá gediemú go óna gá Yésusu. Naá bɛ́hɛ́ boayá, Yésusu go békile go gɔsɔ a bólɛga naá oŋgíso yá Beyúdene. Kɔ́ɔ a bɔ́gɔ́gɛdɔmɔ́ na behúúní bɛ́hɛ́ naá gigísi gá cí mekúígíi na giolóo gá bodɛ́agadɛ́, naá tɛ́sɔnɔ yɛ́ɛyɛ bá dɔ́ŋɔnɔ bá amɔ́ Efelehíme.

Gibíné gá Pásɛ́ka ya Beyúdene gɛ́ mbaá ŋá gɛ́ ná lɛ́ mekúígíi; gitúu gá batɔ bá gɛdɔŋɔ go ɛ́da naá Yolósalɛmɛ otóotoɛ yá gibíné go go básogona. Bá mba lɛ́ bá fúmbe Yésusu; bɔ́ɔ naá Nnyaŋá ya Asaŋa gadɛ́ɛ, bá bágálɛnagalɛna bá amɔ́: «Go goɛ́na gɛ́nyɔ́, a guú úlé naá gibíné lí a dɛ guú úlé o?»
Bagɔ́nɔ́ɔ bá bedúmbí bɛbáágá naá Asaŋa na Befelisiéŋe, bá mba fáá bɛlɔsɛnɔ bá amɔ́ mɔtɔ mɔ́ɔnyɔ a gaá ní íyímé anáa Yésusu a gaá ná bɛ́ɛ́mbá, a háanana go dóogio goŋaá bá mo gumbene.

Listen to Sáŋa 11