Chin, Cho - Common Language Version (Ng’thu K’Thai) - NT drama

Cho Bible Common Language © Bible Society of Myanmar, 2016.

BAWIPA

Pasakha pawi ami bi nak vai hnüüp chuk m’hni ba khätah, BAWIPA Jesuh cu Bethani ah hteit ne, sih nak ungka tho ba ciah Lazaruh ah im ah om tuk ci. BAWIPA Jesuh-am mü-ei m’bei vai ah Mahta naw ei loi ne chang ci. BAWIPA Jesuh awn a täng ah vun ne, Lasaruh phi ei vai tuk ci. Cun yah ung Mari naw ang htei ah a phu küi ciah Naduh tuing’ui awn BAWIPA Jesuh ah akho cu hluk netah, alusam awn htuut ne ghu pek ci. Cun ah tuing’ui cu kyong khui avan ung ng’ui lawk ci. Angdüihpüi tumat BAWIPA yoi khai ah chang naw, “A i ah kyasei shin ah tuing’ui cu ngui phia thum ah yoi ne pyamthaam ci gui-am kä na peit gui ang?” cik ci. Ani cu a ngawi ah ga ah kut ung BAWIPA Jesuh ap khai ah chang ah kyak ci. Ani naw acun ah a pyein cu, pyamthaam ci gui am gein gui su ah kä kyak ci, m’gu man te ci kya netah acun ah a pyein ah kyak ci. Ani cu ngui ng’ip k’bah ci kya ne ngui m’gu ne mang ci ci.
BAWIPA Jesuh naw, “Cun ah hnumi cu kä tüihtook vä, kei ah ka gook htüm law ungka vai ah, shin ah tuing’ui cu gim sä. Pyamthaam ci gui cu nangmi awn angtäi ah nami om ci, kei läi cu nangmi awn angtäi ah kä ka om khai” cine kyak na gui ci.

BAWIPA Jesuh Bethani ah a gawk law cu ng’yak u netah chang akda gawk law ci gui. Ngami cu BAWIPA Jesuh ami hmuh vai bäng ah kä kyak ciah, BAWIPA Jesuh naw sih nak ungka am ghin ba ah, Lasaruh phi hmu hlük ci gui. Taigüpa gui naw Lasaruh ngawn vai ah pawngpüi ci gui. A i ah kyasei ci ung, Lasaruh ah hmawk ah Jew chang gui naw, ngami cu nawng-en gui ne, BAWIPA Jesuh cu ami yum law ah hmawk ah kyak ci.


A ngawi ung Pasakha pawi ung lawk ciah chang khli naw, BAWIPA Jesuh cu Jerusalem ah lawk khai cicu ng’yak ci gui. Ngami cu hliip hnah, m’chum hnah gui kawt ne law u netah, “Khanpughi ah bämang nak cu m’hlüngtai vä! Khanpughi ah ang ming awn kyum lawk ciah BAWIPA ah khan ah hlüngtai nak om sä! Israel Ghangpughang ah khan ah Khanpughi ah m’shumphyuk nak om sä!” cine m’lau ne BAWIPA Jesuh cu ana dou ci gui.
Cacim ah a khüm vai ah BAWIPA Jesuh cu ng’se nong tumat hmu netah ng’cum ne lawk ci. Cacim ung, “Zion mangkho kä na kyih vai, Nami Ghangpughang cu ng’se nong ung cun ne gawk lawk ci nei” ciah om ci.
Ang düihpüi gui naw akhtük ung shin ah cacim cu kä hmat ci gui. BAWIPA Jesuh ah bämang nak ang dang law kawn ah shin ah cacim naw BAWIPA ah mawng a pyein la, BAWIPA ah hmawk ah ngami ah bilawh gui cu shüm hmat lawk ci gui.
BAWIPA Jesuh naw Lasaruh cu ng’cim hmun ungka khü ne sih nak ungka am ghin ba cu hmu tute ciah chang gui naw, Cun ah cäi aih vai ah mawng gui cu ngak ba u sei, ng’yak tuk ciah chang gui cu BAWIPA Jesuh ana dou vai ah gawk lawk ci gui Pharisee gui naw, “Mikmi a i phi mi näng nak kä om ci, teng tu vä, khomdek khan avan naw ani ah hnu ah läk law pyi ci gui nei,” cine ami mät ng’cecäk ci gui.
BAWIPA
Ami khawihnah taigü nak ung pum tuk khai gui ah Jerusalem ah hteit ciah chang gui ung, Karik chang amshah hteit tuk ci gui. Ngami cu Philip (Kalile kho Bethsaida ah kaa) ah hteit u netah, “Saya, Keimi maw, BAWIPA Jesuh kami hmu hlük ci” cine pyein ci gui.
Philip naw Andaru ah hteit ne acun ah a mawng cu m’thein tu khätah, ngani cu BAWIPA Jesuh ah teit ni ne acun ah a mawng cu pyein ci goi. BAWIPA Jesuh naw, “Chang ah Htapa ah bämang nak ang dang nak ah khin gawk lawk ci nei, Kei naw akcang ka pyein cu, geit m’shi cu m’dek ung kä va kya ne, kä thuce ne a om ah a kyak ung, amät ah kawn ah kä da lawpi hlawt khai nei. M’dek ung va kya netah, athu ce ung vah akda ah vuipai m’theih tak ba man ci; Amät ah ghin nak vai bäng m’hni cicu didap ci nei; khomdek khan ah mät ah ghin nak ah kä ng’vang ciah chang cu angtai ghin nak gim ciah kyak ci nei. Kei ah bi bi hlük ci naw ka hnu ah na läk khai, kei ah chang cu a hawi ka om ung phi kei awn a täng ah om tuk khai. Kei ah bi bik ci cu Kapa Khanpughi naw m’tamkhah khai nei” cik ci.
BAWIPA
“Tuhbäi kei cu kamlung thüi ci nei, a i cine ka taigü khai aw? Kapa, tuhbäi kei ah khan ah gawk lawk khai ah akhin ungka na phiawn sak kä! ka cik khai ang? Cun ung phi kei cu shin ah caiya nak ah a khin cu ka aut khai ah ka lawk ci nei. O Kapa, Na ming theing ung na bämang nak dang sak ä” cine kyak ci.
Acun vai-am Khankho ah kaa thang lawk ciah k’aw naw, “Kei naw ka ming theing ah bämang nak cu kang dang sak pyi ci nei, cun kawn ah phi ka dang sak ba khai nei” cine pyein ci.
Cun yah ah ng’düi tuk ciah chang gui cu acun ah k’aw ng’ya tu u netah, chang amshah naw, “Kho ang hmum nei” cik ci, chang anshah naw, “Khankho chang naw ani cu yuk thu püi ci nei” ci sei ami mät ng’thu ci gui.
Cun ung phi BAWIPA Jesuh naw ngami-am, “Shin ah k’aw agawk law cu, kei ah phäh ah kä kyak ci, nangmi ah phäh ah kyak ci nei. Shin ah khomdek cu tuhbäi m’khawichaa nak gah pyi ci nei, khomdek khan uk ci cun phi tuhbäi htin lawk khai nei. Kei cu m’dek ungka chang ne k’phäi nak ka gah kawn ah chang avan cu kei ah gawk lawk khai ah ka thäm khai nei” cik ci. (Shin ah pyein nak ung ani cu a i ah mäih ah asih vai ah mawng a pyein ah kyak ci.)
Chang gui naw, “Keimi ah thukhän ung, Messiah cu angtäi ah ghing khai, ciah om ci; chang A Htapa cu m’dek ungka han k’phäi nak gah khai, na cicu a i ang? chang ah Htapa cu a u ang?” cine ng’shik ci gui.
BAWIPA Jesuh naw, “Akdei cu nangmi ung a shäng hta nei om ba khai. Kho hmüp naw kä a ning küp gui vai ah akdei ah om yah ung hteit hton vä; hmüp khui ung hteit hton ci naw ani ahawi lam a hteh ah kä hmat ci nei. Cun ah kyasei akdei ah om yah ung yum tu vä, cun ung nangmi cu akdei ah hta ah nami kyak khai nei” cine kyak na gui ci.

Cun ah ng’thu a pyein kawn ah BAWIPA Jesuh cu ngami naw kä ami hmuh ba vai ah ng’thup ne om ci. Ami hmuh vai ah cäi aih vai gui m’dang sei phi ngami naw kä yum ci gui. Cun cu prophet Isaiah ah ng’thu a khüm nak ah kyak ci; Cun ah thu ung;
“BAWIPA, Keimi ah ng’thu pyein cu
a u naw ang a yum ve?
BAWIPA naw a hlüngtai nak cu
a u chang ung ang ang dang sak?” ciah kyak ci.
Acun ah mäih ah ngami ung yum nak hning vai kä om ci. Cun cu Isaiah naw;
“Khanpughi naw ami mik m’dauh sak gui ne
ami m’lung khai pe gui ci nei,
Cun ah kyasei, ami mik naw a i kä hmuk ci,
ami m’lung naw a i kä hmat ci nei,
Kei naw ka gai sak gui vai ah
Kei ah om nak ah a u phi kä law ba ci nei,
cine Khanpughi naw pyein ci” ciah guk ci.
Isaiah cu BAWIPA Jesuh ah bämang nak hmuh pyi ciah kya ne, ani ah mawng cu shin ah apyein ah kyak ci.
Cun ung phi huham nak om ciah Jew chang akda naw BAWIPA Jesuh cu yum ci gui. Cun ung phi pharisee gui naw ngami cu pum im ungka amik täm gui vah kyi u netah, a u naw phi ayum nak ah mawng cu ang dang ah kä pyein ci.
Ngami cu Khanpughi ah m’tamkhah nak ah mä, chang ah m’tamkhah nak cu m’hni pi ci gui ah kyak ci.
BAWIPA
BAWIPA Jesuh naw, akdäm ah m’lau ne a pyein cu, “Kei na yum ci cu kei bäng na yum ciah kä kyak ci, kei na tüi lawk ci phi yum ciah kyak ci. Kei na hmuk cicu kei na tüi lawk ci phi hmuk ciah kyak ci nei. Kei cu m’dek khan ung akdei ah kya ne ka lawk ci, kei na yum ci cu kho hmüp khui ung kä om ba khai. Kei ah ng’thu ng’ya lang ne kä läk ciah chang cu kei naw m’khoichaa nak kä ka pek khai; kei cu m’dek khan kam khoichak khai ah kä ka lawk ci, ka hun khai ah ka lawk ci. Kei na hnu ng’tuk püi ne kei ah ng’thu kä ngai ciah chang m’khoichak khai tumat om ci. Akhnu hnüüp ung kei ah ng’thu cu cun ah chang m’khoichak ciah bawi ah kyak khai. A i ah kyasei ci ung, kei naw kamät ah ngaih ah thu ka pyein ciah kä kyak ci, na tüi lawk ciah Kapa ah huham awn ng’thu ka pyein ah kyak ci. Cun ah huham ng’thu naw angtäi ghin nak pek ciah ka hmat ci. Ka pyein gui ah ng’thu phung cu Kapa ah nam cäi gui bäng bäng ah kyak ci” cine pyein ci.

Listen to JOHAN 12