Quechua, Northern Conchucos Ancash - 2006 Edition (NT) Drama

Quechua, Northern Conchucos Ancash - 2006 Edition (NT)

Tsay witsaymi Levadürannaq Tantata Mikuna fiestapaq ichikllana faltaykarqan. Tsay fiestatam Pascua fiesta niyaq. Tsay junaqkunam mandakuq sacerdötikuna y ley yachatsikuqkuna imaykanöpis Jesústa wañutsiyänanpaq willanakuyarqan. Peru paypa favornin runakuna shäriyänanta mantsakurmi prësu achkuyarqantsu.
Tsaypitanam Judas Iscariotipa shonqunman Satanás yaykurqan. Judasqa Jesúspa chunka ishkay discïpulunkunapitam karqan. Paymi mandakuq sacerdötikunaman y templu täpaq wardiakunapa capitanninkunaman aywaykur parlarqan Jesústa imanö entregananpaq. Tsaynö niptinmi sacerdötikuna kushikur pägayänanpaq äniyarqan. Judasnam shuyararqan runakuna mana kayanqan höra Jesústa traicionananpaq.


Levadürannaq Tantata Mikuna fiesta qallanan junaqmi Pascuachö mikuyänanpaq cordëruta pishtayaq. Tsaymi Pedruta y Juanta kachar Jesús nirqan: <<Pascua mikuyta mikunapaq alistaq aywayay>>.
Paykunanam tapuyarqan: <<Taytay, ¿maychötan alistayämushaq?>>
Jesúsnam nirqan: <<Jerusalénman chaykurmi juk runa puyñuwan yakuta apaykaqta tariyanki. Tsay runapa qepanta aywayanki may wajimanpis chanqanyaq. Tsay wajiyuqta niyanki: <¿Mayqan kaq cuartuykichötaqshi discïpulunkunawan Pascua mikuyta Jesús mikunqa?> Wajiyuqnam altuschö jatun cuartu alistashqata rikätsiyäshunki. Tsaychö mikunapaq alistayanki>>.
Tsaymi paykuna aywar Jesús ninqannölla tariyarqan. Tsaychömi Pascua mikuyta alistayarqan.


Mikuyänanpaq höranam apostolninkunawan mësaman Jesús jamaykurqan. Tsaynam Jesús nirqan: <<Imanömi munarqä manaraq wañukur kay Pascua mikuyta qamkunawan mikuyta. Noqam niyaq: Mananam Pascua mikuyta mikushaqnatsu Dios Yayapa mandakuyninchö yapay mikunqäyaq>>.
Tsaypitanam vïnuyuq cöpata achkurkur Dios Yayata agradëcikuskir apostolninkunata nirqan: <<Kayta llapayki upyayay. Noqam niyaq: Kananpitaqa vïnuta manam yapay upyashaqnatsu hasta Dios Yayapa mandakuynin chämunqanyaq>>.
Tsaynöllam tantata aptarkur Dios Yayata agradëcikurqan. Tantata pakiskirnam apostolninkunata makyar nirqan: <<Kayqa cuerpümi. Kay tantata mikur qamkuna rayku wañunqäta yarpäyanki>>.
Tsaynöllam mikuyta ushaskir vïnuyuq väsuta aptarkur nirqan: <<Kay vïnuqa yawarnïmi. Qamkuna rayku wañur yawarnïta jichaptïmi Dios Yaya mushuq pactuta ruranqa. Peru chikiqnïkunaman entregamaq runapis paqtantsikmi kay mësachö kaykan. Rasunpam Runapa Tsurin Dios Yaya munanqannölla ñakar wañunqa. Peru payta traicionaq runam sïqa alläpa llakipaypaq kanqa>>.
Apostolninkunanam kikinkunapura tapunakuyarqan: <<¿Mayqantsikraq tsay traicionëru kantsik?>>

Tsaypitanam apostolkuna mas mandakuq kayta munar kikinkunapura piñanakuyarqan. Peru Jesúsnam nirqan: <<Nacionkunapa mandakuqnin reykunaqa runakunata munayanqantam ruratsiyan. Tsaynö mandakuqkunataqa alli runa kanqantam niyan. Qamkunaqa manam tsaynötsu kayänayki. Masbien mayor karpis wamranö qollmi shonqum kayänayki. Mandakuq karpis servikuqnöllam kayänayki. Shumaq tantiyakuyay. ¿Mësachö jamaqku o mikuynin serviqku mas mandakuq? ¿Manaku mësachö jamaq mas mandakuq? Tsaynö kaykaptinpis noqaqa qamkunachö imayka servikuqnöllam kaykä.
<<Imayka ñakaychö kaptïpis qamkunam paqtä imaypis kayashkanki. Tsaymi mandakuq kanäpaq Taytä churamanqannölla qamkunatapis mandakuq kayänaykipaq churayäshayki. Qamkunam mandakuynïchö noqawan mikuyanki y upyayanki. Tsaymi trönuykikunaman jamayanki chunka ishkay trïbu Israel runakunata mandayänaykipaq>>.


Tsaypitanam Pedruta Jesús nirqan: <<Simón, Simón, Satanásmi Dios Yayata mañakushqa trïguta zarandaqnö qamkunapa creyikuynikikunata ushakätsinanpaq. Peru Dios Yayamanmi mañakushkä noqaman firmi confiakamunaykipaq. Tsaymi noqaman yapay confiakamurnin discïpulu majikikunata yanapanki noqaman firmi creyikuyänanpaq>>.
Pedrunam nirqan: <<Taytay, carcelman apayäshuptikipis manam dëjashaykitsu. Wañutsiyäshuptikipis paqtaykim wañushaq>>.
Jesúsnam nirqan: <<Pedro, noqam niq: Kanan paqas gällu manaraq cantaptinmi kimsa kuti nëgamanki>>.

Tsaypitanam apostolninkunata Jesús tapurqan: <<Qellayninnaqta, alporjannaqta y llanqinnaqta willakuyänaykipaq mandayanqaqchö ¿imaykikunallaqa faltarqanku?>>
Paykunanam niyarqan: <<Manam ni imäkunapis faltarqantsu>>.
Jesúsnam nirqan: <<Kananpitaqa qellayta alporjata apayay. Espädaykikuna mana kaptinqa punchuykikunata rantikuskir rantiyay. Noqam niyaq: Dios Yayapa palabranchömi noqapaq nin: <Jutsayuq runanöllam wañurqan>. Tsay ninqannöllam noqata päsamanqa>>.
Apostolninkunanam niyarqan: <<Taytay, kaychö ishkay espädam kayäpaman>>.
Jesúsnam nirqan: <<¡Tsaynöllana!>>


Tsaypita yarquskirnam costumbrinmannö Olivos lömaman Jesús aywarqan. Discïpulunkunanam qepanta aywayarqan. Tsayman chaykurnam nirqan: <<Dios Yayata mañakuyay Satanás mana tentayäshunaykipaq>>.
Tsaynö niskirnam washaläninkunaman witiskir qonqurikuykur Dios Yayata mañakur nirqan: <<Taytay, cöpachö wiñaraykaq castïguykita ama upyaykatsillämaytsu. Peru noqa munanqänöqa ama katsuntsu, sinöqa qam munanqaykinö kaykullätsun>>.
[Tsaymannam ciëlupita juk ángel yuriskir valoratsirqan. Tsaynö alläpa llakikurmi jumpinpis yawarnöraq patsaman shutunqanyaq Dios Yayaman mas jinchi mañakurqan.]
Tsaypita discïpulunkuna kaqman kutirmi llakikuywan puñukashqata tarirqan. Jesúsnam nirqan: <<¡Imanirtan puñuykäyanki! Rikchar Dios Yayata mañakuyay Satanás mana tentayäshunaykipaq>>.


Jesús tsaynö parlaykaptinmi apostolnin Judas Iscariote atskaq runakunata pushashqa charqan. Jesúsman witiykurmi qaqllanchö mutsaykurqan. Jesúsnam nirqan: <<Judas, ¿mutsaykiwanku Runapa Tsurinta traicionanki?>>
Jesústa prësu apaq shayämunqanta tantiyaskirmi discïpulunkuna niyarqan: <<Taytay, ¿espädäkunawanku wallukachaskayämushaq?>>
Tsaynö nirmi jukaq discïpulun mas mandakuq sacerdötipa serviqninpa derëchu kaq rinrinta jipikat walluskirqan. Jesúsnam nirqan: <<¡Ama tsayta rurayaytsu!>> Tsaypitanam servikuqpa rinrinta yataykurlla kutikaskatsirqan.
Jesústa prësu apayänanpaq shamuqkunam kayarqan mandakuq sacerdötikuna, templu täpaq wardiakunapa capitanninkuna y Israel mayor runakuna. Paykunatam Jesús nirqan: <<¿Imanirtan suwamannö espädaykikunawan y qeruykikunawan shayämushkanki? Waran waran templupa patiunchö qamkunawan paqta kaykaptï ¿imanirtan tsaychö prësu achkuyämarqaykitsu? Peru kananmi sïqa, höra chämushqa Satanáspa munayninta rurayänaykipaq>>.


Tsaypitanam Jesústa prësu achkuskir mas mandakuq sacerdötipa wajinman apayarqan. Pedrunam karu qepallanta aywarqan. Tsay wajipa patiunchömi runakuna ninata tsarirkatsir mashakur kaykäyarqan. Tsaynam Pedrupis paykunaman witiykur mashakuykarqan. Pedro mashakuykaqta rikaykurmi juk servikuq warmi nirqan: <<Kay runapis taqay runawanmi purishqa>>.
Pedrunam nëgar nirqan: <<¡Warmi, imanankitan! Paytaqa manam reqïtsu>>.
Tsaypita unay rätutanam juk runa payta rikaykur nirqan: <<Qampis taqay runawanmi purishkanki>>.
Pedrunam nirqan: <<¡Runa, imanankitan! Noqaqa manam paywan imaypis purishkätsu>>.
Tsaypita juk höratanönam yapay juk runa nirqan: <<Rasunpam kay runaqa paywan purishqa. Paypis Galilea runam>>.
Pedrunam nirqan: <<¡Runa, imanankitan! ¡Manam musyätsu ni imata parlanqaykitapis!>>
Pedro tsaynö parlar manaraq ushaptinmi gällu cantaskirqan. Tsaynam Pedruman Jesús tumaykur rikaskirqan. Pedrunam yarpaskirqan Jesús ninqanta: <<Manaraq gällu cantaptinmi kimsa kuti nëgamanki>>.
Tsaymi waqtaman yarquskir alläpa llakikur waqarqan.


Tsaypitanam Jesústa cuidaq runakuna burlakurnin maqayarqan. Ñawinta tsaparkurmi [laqyar] niyarqan: <<Pï maqashunqaykitapis mä niyämay>>.
Tsaynöllam imaykata asharnin burlakuyarqan.


Patsa waraskiptinnam Israel mayor runakuna, mandakuq sacerdötikuna y ley yachatsikuqkuna qorikäyarqan. Paykunapa despächunman chätsiyaptinmi Jesústa tapuyarqan: <<Mä niyämay: ¿Rasunpaku Dios Yaya kachamunqan Cristo kanki?>>
Jesúsnam nirqan: <<Awmi niyaptiqpis manam creyiyämankitsu. Tapuyaptiqpis manam contestayämankitsu [ni dëjayämankitsu]. Peru kananpitam Runapa Tsurin poderösu Dios Yayapa derëcha kaq lädunchö jamanqa>>.
Tsaynam autoridäkuna tapuyarqan: <<Tsaypunqa ¿Diospa Tsurinku kanki?>>
Jesúsnam nirqan: <<Qamkuna niyanqaykinöllam kä>>.
Paykunanam niyarqan: <<Diospa Tsurin kanqanta kikin nikämashqaqa ¿imapaqnatan testïgutapis wanantsik?>>

Listen to Lucas 22