Kaba for CAR - ACATBA; 2020  Drama (NT)

Dɔ ndɔɛ̂ tə̂ənn, Jeju aw nday mə ndɔɔ bleje tə̂ ndɔ-kuwa-rɔ tə̂ lə Jiipije. Bbo dda njê-njaje goe tə̂ ngaâ daw tətəje jinga bleje le daw dusaje. Parijinyɛje ooje baann a, n̂-paje darəje Jeju nan: «Oo, njê-njaje goi tə̂ aw ddaje nɛ̂n kə̂ Ndu mbətə karə dəw dda ndɔ-kuwa-rɔ tə̂.» A Jeju ilade tə̂ nan: «Nɛ̂n kə̂ Dabbiti dda dɔ ndɔ tə̂ kə̂ bbo ddɛɛ̂, ne kə dəwje laa le, ə-turaje tarɛ̂ Makəturu tə̂ ang wa? Dabbiti kə dəwje laa le dandəje mə kəy tə̂ lə Lubba ngaâ dusaje mapa kə̂ darə Lubba. Dabbiti le ddəm dəwje laa ddəm Ndu arəde ddəw karə dusaje mapa le ang, mba to nɛ̂n-kusa kə̂ njê-poloje Lubba kə karəde baa â asəje ta kusa. Ə-gərə tar kə̂ n̂-dda Makəturu-Ndu tə̂ kə majɛ̂. Tar le nan: Njê-poloje Lubba kə̂ aw ddaje kula mə kəy-polo Lubba tə̂ ndɔ-kuwa-rɔ tə̂ aalje Ndu kə̂ dunn mba ndɔ-kuwa-rɔ, a n̂-gangə sariya dɔde tə̂ ang. M-pa marəse, marə nɛ̂n kə̂ bo uta kəy-polo Lubba to nəənn. Makəturu lə Lubba pa nan: Koo kəm-to-ndoo lə naan â m-ndiki bbo nɛ̂n-polo ang. Bbo ə-gərəje kandə tar nəənn a, dəwje nəənn kə̂ tar to dɔde tə̂ ang, â gangəje sariya dɔde tə̂ ang. Mba Ngonn lə dəw njaa to Nje-ndɔ-kuwa-rɔ.»

Jeju ɔtu lo tə̂ənn ngaâ aw andə kəy mbɔn-naan tə̂ lə Jiipije. Marə dəw kə̂ jia oy ee tə̂ənn. A Parijinyɛje ndikije ta kunda tar dɔ Jeju tə̂ ngaâ dujeje nan: «Ddəw to ta kaji nje-rɔ-to ndɔ-kuwa-rɔ tə̂ wa?» Jeju ilade tə̂ nan: «Nân â horose tə̂ nəənn, bbo batə laa kâra baa ngaâ batə le oso mə buwa tə̂ ndɔ-kuwa-rɔ tə̂ a, a kɔrɛ̂ kə̂ ddaka ang wa? Dəw uta batə ang wa? Yeenn a, ndu arə ddəw ta dda maji ndɔ-kuwa-rɔ tə̂.» Yeenn ngaâ Jeju pa arə dingaw le nan: «Ə-ndɔju jii.» N̂-ndɔju jia le ngaâ jia le təl ddee maji tokə ye kə̂ kâra.
A Parijinyɛje le teeje ddaka ngaâ mbɔnje naan ta kuwa dɔde mba koo gusu kə̂ ta tɔl nɛ̂n Jeju le.

Jeju oo tar tɔlɛ̂ le a, ɔtu lo tə̂ənn kə ddang. Dəwje tokə banya unnje goe ngaâ naji njê-rɔ-toje tɔyn. A n̂-ndɔru mbide nya karə n̂-paje darə dəwje gərə tar dɔɛ̂ tə̂ ang. Yeenn bba tar kə̂ Ejayi kə̂ to nje-kila mbər tar lə Lubba pa le ddee to tar kə̂ tɔkɔrɔ. Tar le nan: «Lubba pa nan:
Ne nəənn â n̂-to Nje-kula ləm kə̂ m-mbəre.
Ne kə̂ m-ndike nya ngaâ minga rɔ-nəəl mbɛɛ̂.
Mâ karə Ndil ləm isi dɔɛ̂ tə̂,
karə nila mbər nɛ̂n-dda kə̂ gatə gatə narə dəwje kə̂ toje to Jiipije ang.
Nâ kɔl kə dəw kâra ang ddəm
Nâ kuru əkii ang ddəm.
Dəw kâra a koo ndue go ddəw tə̂ ang.
Mu kə̂ dunda nangə̂ mban,
nâ kuwa tətə ang.
Puru kə̂ a ta koy, nâ tɔl ang.
Nâ dda nɛ̂n tokə baann ndərəng karə
nɛ̂n-dda kə̂ gatə gatə uta dɔ lo ngaâ dəwje kə̂ toje to Jiipije ang a kundaje məde dɔɛ̂ tə̂.»

Dəwje ddeeje kə marə dəw kə̂ ndilje kə̂ maji ang ddɛɛ̂ arə noo lo ang ddəm n̂-pa tar ang ddəm. Jeju ajɛ̂ arə noo lo kə majɛ̂ ddəm noo tar kə majɛ̂ ddəm. Nɛ̂ɛnn le dum dɔ dəwje kə̂ banya le ngaâ paje nan: «Ngonn lə Dabbiti le â nəənn ang wa?» Parijinyɛje ooje tarɛ̂ a, paje nan: «Dingaw nəənn, Bɛljebul kə̂ to mbay lə ndilje kə̂ maji ang â arɛ̂ singa tubba nɛ̂n ndilje kə̂ maji ang.» Jeju gərə kəjə ləde ngaâ pa arəde nan: «Bbe-kɔn tɔyn njaa kə̂ njê-bbeje le tinje naan ngaâ ddɔje naan, bbe le a tuju. Tɔkə bbe tɔyn njaa wase kəy njaa tɔyn kə̂ njɛɛ̂je ddɔje naan a kasə ta nayn bbay ang. Bbo Satan tubba Satan a, yeenn pa nan n̂-tin kə da-rɔɛ̂ njaa. A Bbe-kɔn laa le a təl nayn bbay tokə baânn wa? Â bbo Bɛljebul â arəm singa maw tubba nɛ̂n ndilje kə̂ maji ang a, nân â arə singa njê kə̂ ləse arə aw tubbaje nɛ̂n ndilje kə̂ maji ang le wa? Yeenn bba dede njaa dâ toje to njê-kujaje kəm tar nəənn karəse. A bbo Ndil lə Lubba â maw tubba nɛ̂n ndilje kə̂ maji ang a, yeenn tɔju to kɔn-mbay lə Lubba ddee ndərəng tee rɔse tə̂ ngaa. Bbo dəw ndiki ta kandə kə̂y le marə nje-singa mba koto nɛ̂n-kingaje laa a, nâ kuwɛ̂ tɔɛ̂ kete bba ang tokə baann wa? Nâ dda baann bba nâ kasə ta koto nɛ̂nje tɔyn kə̂ to mə kəy tə̂ le. Dəw kə̂ to ləm ang, to nje-baan ləm ddəm dəw kə̂ mbɔn səm nɛ̂n ang to nje-sanrɛ nɛ̂n ddəm. Mba yeenn bba, m-pa marəse, Lubba a kɔru tar majangje tɔyn kə tar taji kə̂ dəwje aw tajɛ̂je dɔde tə̂. A nâ kɔru tar dɔ dəw tə̂ kə̂ taji Ndil ang. Bbo dəw pa tar kə̂ mbətə Ngonn lə dəw a, Lubba a kɔru tar dɔɛ̂ tə̂. A dəw kə̂ pa tar kə̂ mbətə Ndil-mə-nda, Lubba a kɔru tarɛ̂ dɔɛ̂ tə̂ bbokənɛn nəənn ang ddəm ndɔ kə̂ bara ang ddəm.»

«Bbo kakə maji a, kandɛ̂ a maji tɔ. Bbo kakə tuju a, kandɛ̂ a tuju tɔ. Mba dəw gərə kakə ddəw kandɛ̂ tə̂. See əmbakaraje. Sese kə̂ ə-majije ang le, â kasəje ta pa tar kə̂ maji tokə baânn wa? Mba tarje kə̂ ddusu mə dəw â aw teeje tɛɛ̂ tə̂. Dəw kə̂ maji aw tee kə nɛ̂nje kə̂ maji kə̂ toje məɛ̂ tə̂ kə̂ maji kə ddaka. A dəw kə̂ maji ang aw tee kə nɛ̂nje kə̂ maji ang kə̂ toje məɛ̂ tə̂ kə̂ maji ang kə ddaka tɔ. M-pa marəse, tarje kə̂ baa baa tɔyn kə̂ dəwje aw paje, dâ kɔruje gəle ndɔ gangə sariya tə̂. Mba Lubba a kunda tar dɔi tə̂ wase nâ kɔru tar dɔi tə̂ ddəw tar pai tə̂.»

Yeenn ngaâ marə njê-gərəje-Ndu kə marə Parijinyɛje paje arəje Jeju nan: «Nje-nɛ̂n-tɔju, ə-dda marə nɛ̂n-mɔri arəje joo.» Nilade tə̂ nan: «Dəwje kə̂ bbasinɛn kə̂ majije ang ddəm dəwje kə̂ pa-nja ləde to kə dannâ ang ddəm dujuje nɛ̂n-mɔri. A bbay nɛ̂n-mɔri kə̂ dâ koo â to nɛ̂n kə̂ inga Jonas kə̂ to nje-kila mbər tar lə Lubba. Tɔkɔrɔ tə̂ njaa, tokə Jonas kə̂ dda ndɔ mota kə til mota mə tɔkə kanji tə̂ le, Ngonn lə dəw a dda ndɔ mota kə til mota mə nangə tə̂ tɔ. Ndɔ gangə sariya a, dəwje kə̂ Ninibə a kinje ta kunda tar dɔ dəwje tə̂ kə̂ bbasinɛn nəənn. Mba dəwje kə̂ Ninibə le, Jonas ila mbər arəde a, n̂-turuje məde nyɔm. A dəw kə̂ uta Jonas ee nəənn. Ndɔ gangə sariya a, mbay-dɛnɛ̂n kə̂ bəər kə̂ oy le, a ndol kə dəwje kə̂ bbasinɛn nəənn, ta nâ kunda tar dɔde tə̂ ndɔ gangə sariya tə̂. Mba nin kɔyn nangə tə̂ n̂-ddee mba koo tar kəm-karɛ lə Salomɔn. A dəw kə̂ uta Salomɔn ee nəənn.»

«Bbo ndil kə̂ maji ang tee mə dəw tə̂ kə ddang a, naw nja jəm jəm loje tə̂ kə̂ maann goto tə̂, mba sangə lo kuwa rɔɛ̂ tə̂, a ninga lo le ang. Yeenn ngaâ n̂-pa məɛ̂ tə̂ nan: ‹Mâ təl kə̂y ləm kə̂ minya le.› N̂-təl kə̂y le ngaâ noo a, to baa, duta darə arɛ ngaâ n̂-dda darə kura. Yeenn ngaâ naw noto marə ndilje kə̂ maji ang nya utɛ̂ siri n̂-ddee kə de ngaâ dandəje mə kəy tə̂ le disije tə̂. Goe tə̂ a, kisi lə dəw le təl maji ang nya uta ye kə̂ kete. Nɛ̂n kə̂ a kinga dəwje kə̂ majije ang kə̂ bbasinɛn nəənn a to tokə baann tɔ.»

Jeju nayn aw pa tar kə dəwje kə̂ banya le bbay a, kɔɛ̂nje kə ngakɔɛ̂nje, n̂-ddeeje darje ddaka ngaâ daw sangəje ddəw ta pa saa tar. Marə dəw pa arɛ̂ nan: «Kɔinje kə ngakɔinje arje ddaka ngaâ daw sangəje ddəw ta pa səi tar.» Jeju ila dəw kə̂ aw pa tar arɛ̂ le tə̂ nan: «Nân bba to kɔnʼmje wase njê kə̂ dda bba toje to ngakɔnʼmje wa?» Goe tə̂ a, nula jia kə rɔ njê-njaje goe tə̂, n̂-pa nan: «Kɔnʼmje kə ngakɔnʼmje â nəənn. Bbo dəw dda nɛ̂n kə̂ mə Bɔmje kə̂ darâ ndiki a, dəw le to ngokɔnʼm, to kɔn-nannəm wase kɔnʼmje.»

Listen to Matiye 12