If you have would like a copy of this version please contact info@davaraudiobibles.org

Alur (DRC) Bible

The Holy Bible In Alur (Lur), Revised Orthography © United Bible Societies, 1970.

Kum dhanu dupa giketho cing’gi nigoro lembe pi gin maeno m’utimbre kakare i kindwa, cil calu gimiogi iwa, ma kwong’a wa jumulembe ma ku wang’ man jutim mi lembe de, e ebedo ber ira bende, kum abedo ku ng’eyong’ec mi gin ceke cu ugambre ku kwong’a, nia agor iri kubang’e kubang’e, Theofilo ma jabero; kara ing’ei lemandha mi gin ma juponji kudo.

I nindo pa Herode, ubimo mi Yahudi, nwang’u jalam ma nyinge Zakaria nuti, i maka pa Abia: man ebedo ku dhaku ma kind nyir pa Harun, nyinge de Elisabeth Gin ario de gibedo pwe i wang’ Mungu, ma gibewotho i cik ku lembapoka ceke pa Rwoth umbe gin ma rac. Man nyathin umbe kugi, kum Elisabeti mugumba, gin ario de rundi migi kadhu.
Nie etimbre, kinde m’etimo tic pa jalam maka pare kubang’e kubang’e i wang’ Mungu, calu kura mi tic pa jalam, tic pare en e mondo i hekalu niwang’u udok ma ng’wice ng’ar. Udul ceke mi dhanu berwo woko i saa mir udok ma ng’wice ng’ar. Malaika pa Rwoth uwok i bang’e ecungo yor acwic ba pemblam mir udok ma ng’wice ng’ar. Zakaria de cwinye ng’abre kan enene, lworo de make. Ento malaika wacu ire kumae, Lworo kud unegi, Zakaria: kum kwac peri winjre, cegi Elisabeti binyolo iri nyathin ma nico, man ibilwong’o nyinge Yohana. Man mutoro kud anyong’a binegi; dhanu dupa de anyong’a binegogi i munyuru pare. Kum ebibedo dwong’ i wang’ Rwoth, man ebimadhu pigulok kadi giramadha ma mero jo de ngo; man Tipo Maleng’ birome, ugambre kud i min. Man dhanu dupa mi nyithindho pa Israel ebiloko ni Rwoth Mungu migi. Man ebicidho i wang’e i tipo ku tego pa Elia, niloko adunde wego ni nyithindho, juco de niwotho i rieko mi weg bedopwe; niyau dhanu m’ubedo ayika ni Rwoth. Zakaria wacu ni malaika kumae, Abing’eyo maeni nenedi? kum an a ng’atu m’uti, dhaku para de rundi pare kadhu. Malaika dwoko lembe ewacu ire kumae, An a Gabriel, ma cungo i wang’ Mungu; man juora niyero iri, nikelo iri rwonglembe maeni de. Nen, ibibedo ajuba ibicopo weco de ngo, cil i ceng’ ma gin maeni bitimbre i ie, kum iyio lem para ngo, ma bitimbre kakare i nindone. Dhanu de gibekuro Zakaria, igi wang’ lii de kum egalu i hekalu. Kan ewok woko de, ecopo weco i bang’gi ngo: e ging’eyo nia eneno ginmawokiwang’ i hekalu: man enyutho igi anyutha asu, ebedo ling’ de. Etimbre ka ceng’ mi timotim pare timbre kakare, edok i ot pare.
E yo ng’ei ceng’ maeni Elisabeti ma dhaku pare gamu ie; epale de dwi abic, ewacu kumae, Rwoth utimo kumeno ira i ceng’ m’enena i ie, nikabu lewic para woko i kind dhanu.

Nie i dwi mir abusiende juoro malaika Gabriel uai ba Mungu ucidho i adhura mi Galilaya, ma nyinge Nazareti, ba nyaku ma sumba ma ng’atu ma nyinge Yusuf ubenyome, ma en e mi ot pa Daudi; nyaku ma sumbane nyinge Mariamu. Emondo i bang’e, man ewacu kumae, Moth iri, in ma mugisa kwenyi, Rwoth ni kudi. Ento ie pido dit kum lembe maeni, ie de bepido ya moth maeni manedi. Malaika de wacu ire kumae, Lworo kud unegi, Mariamu: kum inwang’u bero ba Mungu. Man nen, ibigamu ii, ibinyolo nyathin ma nico, man ibilwong’o nyinge Yesu. Ebibedo dwong’, man jubilwong’e Wod Ng’atu ma Malu Ngbir: man Rwoth Mungu bimio ire komker pa kwarumire Daudi. Man ebicamu ker wi ot pa Yakobo mi nja; kajik mi ker pare de bibedo umbe. Mariamu wacu ni malaika kumae, Maeni bitimbre nenedi, ma k’ang’eyo co ngo e? Malaika dwoko lembe ewacu ire kumae, Tipo Maleng’ bibino i wii, man tego pa Ng’atu ma Malu Ngbir tipone biumi: kum kumeno bende gin maleng’ m’ibinyolo jubilwong’o Wod Mungu. Man nen, wat peri, Elisabeti bende gamu ie mi wode kan eti; maeni de dwi mir abusiende pa ng’atu ma julwong’o mugumba. Kum lembe moko mbe ma ai ba Mungu ma bibedo umbe tego. E Mariamu wacu kumae, Nen, an a bong’ pa Rwoth; dong’ ebed ira calu lembe peri. E malaika weke.

E Mariamu ai i ceng’ maeno ecidho pio pio i ng’om gudi, i adhura mi Yahudi; man emondo i ot pa Zakaria emotho Elisabeti de. Etimbre de, nia kan Elisabeti winjo moth pa Mariamu, mukere por malu i ie; Elisabeti de pong’ ku Tipo Maleng’; man eting’o dwande malu ku ba dwal ma dit, ewacu kumae, Mugisa kwenyi kind mon, man mugisa ni nyodo m’i ii de. Man lembe m’unwang’a maeni ai kani, nia min Rwoth para bino i bang’a? Kum nen, ka dwand moth peri mondo i itha, mukere por malu i ia ni mutoro. Mugisa ni ng’atu m’uyio de; kum lembe m’uai ba Rwoth uyere ire bitimbre kakare.

Mariamu de wacu kumae, Ng’eyong’ec para beyungo Rwoth,
Man anyong’a nego cwinya kum Mungu Jalarna.
Kum eneno wi nok pa bong’ pare:
Kum nen, ugambre kawono dhanum’utuk ceke gibilwong’a jamugisa.
Kum ng’atu ma tek utimo ira gin ma dit;
Nyinge de leng’.
Kisa pare de bedo ni dhanum’utuk ku dhanum’utuk
Wi ju m’ulwore.
Enyutho tego ku bote;
Elalu jukuhaya ku lembe ma igi pido ku i adundegi.
Ejwigo juker kud i komker migi,
Eting’o dhanu ma kitgi mbe malu.
Eyeng’o ju ma kec unegogi ku gin ma ber;
Man eketho julonyo gidok mananu.
Ekonyo jatic pare Israel,
Kara epoi kum kisa
(Calu yang’ eyero ni kwaruwa)
Ni Ibrahim ku nyikwaye rondo ku rondo.
Man Mariamu gibedo gikude ma yenyo romo dwi adek, kan edok i ot pare.

Nie nindo ma Elisabeti binyol i ie utimbre kakare: e enyolo nyathin ma nico. Man judhugola pare ku wat pare giwinjo nia Rwoth uketho kisa pare dit i bang’e; e anyong’a negogi dit gikugi. Etimbre i ceng’ mir aborane, nia gibino nitimo yaa kum nyathin; giyenyo gilwong’e Zakaria, calu nying won. Man min uloko lembe ewacu kumae, Kumeno ngo; ento jubilwong’e Yohana. E giwacu ire kumae, Nying’ maeni mbe i kind wat peri. E gitimo ku giranyutha ni won, maram eyenyo julwong’ ko nyinge. Man elwong’o waraga, egoro de kumae, Nyinge Yohana. E igi kpo wang’ lii. Ndhu ndhu nica dhoge yabre, lebe de gonjre, man eyero, ku mio mugisa ni Mungu de. E lworo maku dhanu ceke m’ubedo i vutgi: man lembe maeni ceke yik tir i ng’om gudi ceke mi Yahudi. Dhanu ceke m’uwinjogi gikanu lembene i adundegi, giwacu kumae, Ka kumeno nyathin mae bibedo ni ang’o? Kum cing Rwoth ni i bang’e.

Zakaria ma won de Tipo Maleng’ urome ndhu, man eewo, ewacu kumae,
Mugisa ni Rwoth, Mungu pa Israel;
Kum eliewo dhanu pare etimo war de igi,
Man eting’o tung mi both iwa I ot pa jatic pare Daudi
(Calu eyero ku dhu jubila pare ma leng’ m’ugambre por con),
Ebodhowa ni judegiwa, kud i cing’ dhanu ceke m’udaguwa de;
Mi nyutho kisa ni kwaruwa,
Man mi poi kum lembariba pare ma leng’;
Kwong’ m’ekwong’o ni kwaruwa Ibrahim,
Nia edwok iwa, wan ma waboth kud i cing’ judegiwa Ya watim ire ma lworo mbe,
I leng’cwiny man bedopwe i wang’e i ceng’ mwa ceke.
Eyo in de, nyathin, jubilwong’i jabila pa Ng’atu ma Malu Ngbir:
Kum ibicidho i nyim wang’ Rwoth niyiko yo pare;
Nimio ng’eyong’ec mi both ni dhanu pare
I wek mi dubo migi,
Kum kisa ma ng’ic pa Mungu mwa,
Ni kum maeni rupiny m’uai malu biliewowa,
Nirieny wi ju m’ubedo i mudho ku tipo mi tho;
Niketho tiendwa woth i yo mi kwiocwiny.
Nyathin udongo, cwinye de doko tek, ebedo i yamba de cil i ceng’ m’enyuthre ie ni Israel.

Listen to Luka 1