If you have would like a copy of this version please contact info@davarpartners.org

The Gaddi New Testament

This work is licensed under Creative Commons Attribution-ShareAlike 4.0 License.

कई चुंगी लैणैबाळै अतै पापी मणु यीशु बल्लै ईच्ची करी तसेरी गल्ला हुणदै थियै। पर फरीसी अतै शास्त्री कुड़कुड़ाई करी बलणा लगै, “ऐह ता पापी मणु सोगी मिलदा जुलदा अतै तियां सोगी खाणा खान्दा।”
ऐह हुणी करी यीशुऐ तियां जो ऐह उदाहरण हुणाऊ “तूसु मन्ज कुण ऐसा मणु हा जैस बलै सौ भैड़ा भून, अतै तियां मन्ज अक्क गोआची गच्छा ता कै तैस तियां नड़ीनबैं भैड़ा जो छड़ी करी तैसा गोआचुरी भैड़ा जो तोपणा गाहणा। तैस सो तैहणै तक तोपणी हा जैहणै तिकर सो मुळी ना पैन्दी हा। अतै जैहणै जे तैसा भैड़ा जो तोपी लैन्दा ता सो तैसा जो कन्‍हा पुर रखी करी लेई इन्दा। सो घरै ईदंआ अतै अपणै मित्रा जो अतै पड़ेही जो कठेरी करी तियां सितै बल्‍दा, ‘मिन्जो सितै खुशी मना, कजो कि मेरी गोआचुरी भैड़ मुळी पैई हा।’ अऊँ तूसु सोगी सच बलदा कि, इन्‍नी साहबै अक्क मना फेरनै बाळै पापी रै बारै मन्ज भी स्वर्गा मन्ज तूणी ही खुशी भुन्दी हा, जतूणी कि नडिनूऐ ऐसै धर्मी मणु रै बारै मन्ज ना भुन्दी हा। जैड़ै अपणै आपा जो धर्मी समझदै हिन तियां जो मना फेरनै री जरूरत ही नियां।”

यीशुऐ अक्क होर उदाहरण हुणाऊ कि “कोई ऐसी जनानी भोआ जैसा बल्लै किमती दस सिक्कै भून, अतै ईयां थऊँ अक्क गोआची गच्छा। ता सो तैतिओ तोपणै तांई दीयै जाळी करी अतै झाडू लेई करी घरा जो खरा करी झाड़दी हा। अतै जैहणै तिकर सो सिक्का मुळी ना गान्दा तैहणै तिकर तोपदी रैहन्‍दी हा अतै जैहणै मुळी गान्दा ता अपणी सहेली अतै पड़ेहणी जो हैदी करी बलदी हा, ‘मिन्जो सोगी खुशी मना, कजो कि मिन्जो मेरा गोआचुरा किमती सिक्का मुळी पैऊ हा।’ अऊँ तूसु सितै बलदा कि, ईनी साहबै अक्क पापी मणु रै मना फेरनै सितै प्रमात्मैं रै स्वर्गदूता सामणै खुशी भुन्दी हा।”

फिरी यीशुऐ अक्क होर उदाहरण बल्लू, “कसी मणु रै दोई पुत्र थियै। ता हैल्‍कै जिन्‍नै पुत्रै अपणै पितै सितै बल्लू, ‘पिता जी, तुन्दी जायदात रा जैडा हेस्सा मिन्जो मुळना तैतिओ मिन्जो दी देआ।’ ता पितै तियां दूनी मन्ज जायदात बंड़ी दिती।”
“कुछ दिन बाद, हैल्‍कै जिन्‍नै पुत्रै अपणा सारा समान बन्‍नू अतै दूर कस्‍की देशा जो चली गो। तैठी तिनी सारा पैसा लोफर लफंगी अतै बदमाशी मन्ज ऊड़ारी दिता। जैहणै तसेरा सारा पैसा मुक्‍की गो ता, ता तैस ही टैमैं तैस देशा मन्ज भारी अकाल पैई गो, अतै सो भूखा भाणा मरना लगा। फिरी सो तैस देशा रै अक्की मणु बलै गिचीकरी सूंरा चारनै रा कम करना लगा। सो तियां हुकुरी फळी जो भी खाणा चाहन्दा थू जैतिओ सूर खान्दै थियै, पर तैस जो कोई कुछ भी खाणै जो ना दिन्दा थू।”
“फिरी तैस जो होश आई अतै अपणै मना मन्ज सोचणा लगू, ‘मेरै पितै रै घरै मजूरा जो जरूरता थऊँ ज्यादा खाणै जो मुळदा! अतै अऊँ ऐठी भूखा भाणा मरू करदा। मुँ अबै अपणै पितै बल्लै गाणा अतै बलणा, “पिता जी मैंई प्रमात्मैं अतै तून्दै विरोधा मन्ज पाप करूरा हा।” अतै अबै ऐस लाईक नियां कि कोई मिन्जो तून्दा पुत्र बल्ली सका, मिन्जो तुसै अक्क मजदूर समझी करी अप्पू बलै रखी लेय्आ।’ ”
ऐह सोची करी सो ऊठु अतै अपणै पितै बलै चली पैऊ,
“सो हल्ली तिकर दूर ही थू कि तसेरा पिता दया सितै भरी गो। तिनी दौड़ लाई करी सो हिक्का सितै लाई लैऊ अतै तैस जो बड़ा प्रेम करू।”
पुत्र बलणा लगा, “पिता जी मैंई ता तून्दै अतै प्रमात्मैं रै विरोधा मन्ज बड़ा पाप करूरा हा, अतै अबै ऐस लाईक नियां कि कोई मिन्जो तून्दा पुत्र बल्ला।”
पर पितै अपणै नौकरा चाकरा जो बल्लू, “झट-फट नोए जिन्‍नै कपड़ै लैईआ अतै ऐस जो लोआ। सेरै हथा मन्ज अंगुठी अतै पैरा मन्ज मोचड़ी पोआ। अतै खाणै पीणै रा बन्‍दोबस्त करा कि अहै खाई पी करी खुशी मनान। कजो कि मेरा पुत्र जैडा मरी गच्छुरा थू सो जिन्दा भूच्ची गो हा, गोआची गच्छुरा थू अतै अज मुळी पैऊ हा।” इन्‍नी साहबै तियां खुशी मनाई।
“तसेरा बड्‍डा जिन्‍ना पुत्र खेता मन्ज थू। जैहणै सो खेता थऊँ आ अतै घरा रै नेड़ै पुजू तैस जो गाणा-बजाणा हुणु। ता तिनी अक्क नौकर हैदी करी पूछु, ऐह कै पूछु करदा?” तिनी तैस जो जवाव दिता, तून्दा हल्का भाई चली आ। तून्दै पितै तसेरै ईणै री खुशी मन्ज खास खाणै पीणै रा प्रबन्ध करूरा हा, कजो कि तियैं ऐह भला चंगा हेरू हा। ऐह हुणी करी सो गुस्सै भूच्ची गो, अतै अन्दरा जो ना गाणा चाऊ। ता तसेरा पिता बाहर आ अतै तैस जो मनाणा लगा। तिनी पितै जो उतर दिता, “हेरा, अऊँ तूणै साला थऊँ तुन्दी सेवा करू करदा हा। मैंई कदी भी तुन्दी गप्‍प ना टाळी। फिरी भी तुसै मिन्जो अक्क बकरी रा बच्चा तिकर ना दिता, कि अऊँ अपणै यारा दोस्‍ता सितै मस्‍ती मारी सकू। पर जैहणै तून्दा ऐह पुत्र, अपणी सारी धन दौलता जो वेश्या मन्ज ऊड़ारी करी घरा जो फिरी आ ता तुसै ऐस पुत्रा तांई बड़डी धाम लाई दितुरी हा?”
ता पितै तैसिओ समझऊ, “पुत्रा तू ता मिंया हमेशा मिन्जो सोगी थू। जैडा कुछ भी मेरा हा सो सब कुछ तेरा ही ता हा। पर असु जो ता खुशी ऐसा गल्ला री मनाणा चहिन्दी कि तेरा ऐह भाई जैडा मरी गछूरा थू सो जिन्दा भूच्ची गो हा, गोआची गछूरा थू सो मुळी पैऊआ।”

Listen to लूका 15