If you have would like a copy of this version please contact info@davarpartners.org

Kulvi Outer Seraji New Testament, CC-BY-SA-4.0, The Love Fellowship (Text). Kulvi Outer Seraji New Testament Audio Bible, CC-BY-SA-4.0, Davar Partners International, 2022 (Audio).

औटर सेराजी  स्टैण्डर्ड वर्शन

This work is licensed under Creative Commons Attribution-ShareAlike 4.0 License.

ज़ेभै अपूलोस कुरिन्थ नगरी त, ता पल़सी पुजअ उझै फ्रूगिआ गलाती लाक्कै सारै सराज़ै हांढी एशिया बाती इफिसुस नगरी। तिधी भेटे तेऊ कई च़ेल्लै इहै तिन्नैं बोलअ, “हाम्हैं बी आसा विश्वासी।” पल़सी पुछ़अ तिन्नां का, “ज़ेभै तम्हैं परमेशरे खुशीए समादा दी विश्वास किअ तेभै तम्हां पबित्र आत्मां आअ?” तिन्नैं की इहअ बोली करै नांह,
“हाम्हैं निं पबित्र आत्में बारै शूणअ द बी आथी।” पल़सी बोलअ तिन्नां लै, “तै ज़ेभै तम्हैं पाणीं दी डुबकी लई तेते बारै तम्हैं किज़ै समझ़ा?”
तिन्नैं दैनअ ज़बाब, “हाम्हैं करा तिन्नां गल्ला दी विश्वास ज़ुंण युहन्ना डुबकी दैणैं आल़ै आसा खोज़अ द।” तेखअ समझ़ाऊऐ तिंयां पल़सी, “युहन्ना दैनी इहअ बोली करै मना बदल़णें डुबकी कि ज़ुंण मुंह बाद एछणैं आल़अ आसा, मतलब मसीहा प्रभू ईशू दी करै विश्वास।”
इहअ शूणीं करै लई तिन्नैं प्रभू ईशूए नांओंऐं पाणीं दी डुबकी। ज़ांऊं पल़सी तिन्नां दी हाथ डाहै ता तिन्नां लै आअ पबित्र आत्मां और तिंयां लागै कई बोली बोलदै और आजू हणैं आल़ी गल्ला प्रगट करदै। ईंयां सोभै तै कोई बारा मणछ।

पल़सी रहअ आराधना कोठी दी डेऊई करै चिई भिन्नैं तैणीं नडरै हई करै बोलदअ लागी और परमेशरे राज़े बारै खोज़दअ और समझ़ाऊंदअ लागी। पर ज़ांऊं कई लोगै काठै हई करै तेऊए नांईं शूणीं और लोगै सम्हनै लागै इहअ बी बोलदै कि एऊए बात आसा बूरी, ता पल़सी किऐ तिन्नां छ़ाडी करै च़ेल्लै ज़ुदै और हर धैल़ै करा त तरन्नुसे सभा दी ईशूए बारै सुआल-ज़बाब। दूई साला तैणीं रहअ इहअ ई हंदअ लागी, इधी तैणीं कि एशिया लाक्कै रहणैं आल़ै कै यहूदी, कै यूनानी, सोभी शूणअ प्रभूओ समाद।
परमेशर रहैऊआ त पल़सी करै शगतीए बडै-बडै काम। इधी तैणीं कि शाटै और गाची निंयां तै लोग तेऊए देही का छुंआऊंई करै और तिन्नां पाआ तै बमारा प्रैंदै और तिन्नें बमारी हआ ती ठीक, और भूत ठुर्हा तै दूर।
पर कई यहूदी ज़ुंण ज़ादू करदै फिरा तै तिंयां बी लागै तै इहअ करदै कि ज़हा दी भूत होए तिन्नां लै प्रभू ईशूओ नांओं लई करै इहअ बोली करै मारा तै फूंक, “ज़हा ईशूए बारै पल़सी खोज़ा, तेऊए नांओंऐं दैआ हुंह ताल्है हुकम कि दूर हअ।” सकीबा नांओंए एकी यहूदी बडै परोहिते तै सात शोहरू, और तिंयां बी करा तै इहअ ई। पर भूतै दैनअ तिन्नां लै ज़बाब, “ईशू बी ज़ाणा हुंह और पल़सी बी बछ़ैणा हुंह; पर तम्हैं कुंण आसा?”
तेऊ मणछा ज़हा दी भूत तै शाचै दै, तेऊ दैनी तिन्नां प्रैंदै एही छ़ाहल़ा कि तिंयां किऐ आपणैं बशै और इहअ उपद्रभ किअ तिन्नां लै कि तिंयां ठुर्है नांगै और मूंड माथै फाल़ी तेऊ घरा का पोर्ही।
एसा गल्लो थोघ लागअ इफिसुस नगरी दी रहणैं आल़ै यूनानी और यहूदी सोभी का। तिंयां डरै और प्रभू ईशूओ नांअ लागअ बढदअ।
तिन्नां मांझ़ै किअ कई विश्वास बी, और तिन्नां मांझ़ै आऐ कई और तिन्नैं बोलअ सोभी सम्हनै इहअ कि हाम्हैं तै आप्पू बी एऊ ई कामां दी लागै दै। ज़ादू करनै आल़ै कई मणछै की आपणीं पोथी कठा और तिंयां पाई सोभी सम्हनै ज़ाल़ी। ज़ांऊं तिन्नें किम्मता ज़ोल़ी ता तेते किम्मत ती कोई पज़ाह हज़ार च़ंदीए सिक्कै बराबर। इहअ करै शूणअ बडै भारी लोगै प्रभू ईशूओ बैण और बडै भारी लोगै किअ विश्वास।
ज़ांऊं पल़सी इफिसुस नगरी आपणअ काम पूरअ करी मुक्कअ, ता पल़सी किअ आपणैं मनैं बच़ार कि मकिदुनिया और अखाया लाक्कै डेऊई लणअ पैहलै तिधे विश्वासी भाई सेटा पुजी। तेऊ बोलअ इहअ, “येरुशलेम डेऊई करै आसा मुंह रोम बी डेऊणअ ज़रूरी।” आपणैं दूई साथी तिमुतुस और इरास्तुस छ़ाडै पल़सी मकिदुनिया और आप्पू रहअ थोल़ै धैल़ै एशिया लाक्कै।

तिन्नां धैल़ै हुअ तिधी पंथे बारै बडअ भारी हाल्लअ-गोल्लअ। किल्हैकि तिन्नां धैल़ै दिमेत्रियुस नांओं एक सनार। सह दैआ त अरतिमिस देबीए च़ंदीए देहुरै बणांईं कारीगीरा लै बडअ भारी काम। तेऊ किऐ एऊ कामां करनै आल़ै सोभै कारीगीर कठा और तिन्नां लै बोलअ,
“हे मणछो, तम्हां का आसा थोघ कि एऊ कामां करी करै हआ म्हारी खास्सी कमाई।
“तम्हैं भाल़ा बी और शूणां बी कि सिधअ इफिसुस नगरी ई निं, पर सारै एशिया दी पाऐ एऊ पल़सी बडै भारी लोग इहअ शकाऊई करै कबाता, ‘ज़ुंण च़िज़ा कुंण कारीगीर हाथा करै बणांआ सह निं परमेशर हंदअ।’ ता ऐबै निं हाम्हां सिधी एसा गल्ले डौर आथी कि म्हारअ ढबै खटणैओ धांधअ हणअ खतम। पर डौर आसा एही बी कि म्हारी महान अरतिमिस देबीए देहुरे बी निं लोगा कदर करनी। ज़हा देबी सारै एशिया लाक्कै पृथूई दी रहणैं आल़ै कई लोग पूज़ा। इहअ करै निं एऊ देहुरे बी कोई कदर हणीं।”
तिंयां भर्हुऐ इहअ शूणीं करै रोशै और लैल़ा पाई लागै बोलदै, “इफिसुस नगरी रहणैं आल़ै मणछे देबी अरतिमिस आसा बडी!” सारी नगरी मच़अ बडअ भारी हाल्लअ-गोल्लअ और तिन्नैं लोगै ढाकै गयुस और अरिस्तखोरस मकिदुनिया लाक्कैओ ज़ुंण पल़सीए संघी-साथी आसा तै। तिंयां निंयैं तिन्नैं घिशी करै और सोभ ठुर्है एक मन बणांईं करै रंगशाल़ा दी।
ज़ांऊं पल़सी लोगा सेटा लै भितरा लै डेऊणअ च़ाहअ, ता होरी च़ेल्लै निं तेऊ डेऊणैं दैनी। मुखियै मांझ़ै ज़ुंण पल़सीए कई साथी तै तिन्नैं बी दैनअ तेऊ लै समाद और तिन्नैं की एही अरज़ कि रंगशाल़ा लै डेऊई करै निं खातरै दी पल़ी।
पर तिन्नां खास्सै लोगे जेल्ह-मरेल्ही मांझ़ा का लागै कोई किछ़ बोलदै और कोई किछ़ लैल़ा लांदै। सभा दी आसा तै लोग डरै दै और कई लोगा का निं इहअ थोघ बी आथी त कि हाम्हैं इधी कठा किल्है आसा हुऐ दै। तेखअ सिकंदर ज़ुंण यहूदी खल़अ किअ त, सह किअ लोगा सम्हनै खल़अ। सिकंदर च़ाहा त लोगा लै हाथा करै शारअ दैई ज़बाब दैणअ।
पर ज़ांऊं तिन्नां का थोघ लागअ कि अह आसा यहूदी, ता तिंयां सोभ रहै कोई खास्सी घल़ी कोई एकी पहरै तैणीं एकी बोला दी लैल़ा लांदै लागी, “इफिसुस नगरी रहणैं आल़ै मणछे देबी अरतिमिस आसा महान!”
नगरीए बज़ीरै किऐ तेखअ लोग शांत, संघा बोलअ तिन्नां लै इहअ, “हे इफिसुस नगरी रहणैं आल़ै लोगो, एसा गल्लो आसा सोभी का थोघ कि सारी इफिसुस नगरी आसा म्हारी बडी देबी अरतिमिस देबीए देहुरै और ज्यूस देओए सरगा का पल़ी दी मुर्तिए सेऊआ च़ाकरी करनै आल़ै। ज़ै सोभी का थोघ आसा, तै निं इना गल्ला कोहै झ़ुठअ बोली सकदअ। एता लै आसा इहअ ई ठीक कि तम्हैं रहा च़ुप्पी और हर गल्ला करनी सोठी समझ़ी करै। किल्हैकि तम्हैं ज़ुंण ईंयां मणछ ढाकी आसा आणै दै, ईंयां नां ता देहुरै लुटणैं आल़ै आथी, और नां म्हारी देबीए निंदा करदै।
“ज़ै दिमेत्रियुस और तेऊए साथी कारीगीरा कसा संघै झ़गल़अ आसा होए, ता तेता लै आसा दालता खुल्ही दी, और न्यायी बी आसा, और तिंयां सका एकी दुजैओ दोश खोज़ी। पर ज़ै तम्हैं किज़ू होरी गल्ले बारै च़ाहा पुछ़णअ ता तेतो फैंसलअ हणअ सभा दी। किल्हैकि आझ़कै एऊ हाल्लै-गोल्लै हणें बारै सका हाम्हां लै बी दोश लागी। किल्हैकि एतो निं कोई कारण ई आथी और हाम्हैं निं एऊ झाल़ै कठा हणैंओ बी कोई ज़बाब दैई सकदै।” इहअ बोली करै की तेऊ सभा बिदा।

Listen to शधाणूं 19